Mataupu 22
Faaaliga: “O se Fati e Usuina Pea ma se Olega Leotele”
O faaaliga faaauau pea o le toto ola lea o le talalelei a Iesu Keriso.
Mai le Soifuaga o Spencer W. Kimball
Sa saunoa Peresitene Spencer W. Kimball i se tasi taimi i se konafesi a le au tusitala sa faia i le Fale mo Tagata Asiasi atu i le Malumalu i Arisona. Sa fesili atu se fai nusipepa ia te ia: “O lea sa faasilasila mai o oe o le peresitene ma o le perofeta foi o le Ekalesia a Iesu Keriso o le Au Paia o Aso e Gata Ai. O la’u fesili: E fetalai mai le Atua ia te oe? Ma afai o lea, e faapefea? Sa tali atu Peresitene Kimball: “Ioe. E fetalai mai le Atua i ana perofeta i aso nei, e pei lava ona ia fetalai i ana perofeta ananafi ma e pei lava ona o le a ia fetalai mai i ana perofeta a taeao. O le a e manatua na tusia e Amosa, “E le faia lava se mea e le Alii o Ieova, a e faaalia lona finagalo i ana auauna o perofeta.’ (Amosa 3:7) O nisi taimi e fetalai mai ai o ia i se leo manino. O nisi taimi na te auina mai ai ana agelu, e pei ona ia faia ia Iosefa, le tamã taufeagai o Iesu. E masani lava e auala mai i se leo filemu ma le itiiti o le Atua i le agaga i totonu. Ioe. Pe ua ou taliina ea lau fesili, alii.”1
Sa faatuatua Peresitene Kimball i le mataupu faavae o faaaliga faaauauina pea, ma ua folafola mai “o le toto ola lea o le talalelei a le Alii ma le Faaola soifua, o Iesu Keriso.”2 O lenei faatuatua, sa saunoa mai ai Elder Neal A. Maxwell o le Korama a le Au Aposetolo e Toasefululua, “na manino lava o se vaega o le natura o lenei alii sili ona faapitoa.”3 Sa matuai manatu mamafa ia Peresitene Kimball i lona tiutetauave o le avea ma Peresitene o le Ekalesia, i le silafiaina ua na o ia lava le tagata i le lalolagi ua faatagaina e mauaina faaaliga mo le Ekalesia. Na ia molimau mai: “Ou te iloa na valaauina au e le Alii i lenei tulaga. Ou te iloa atonu o loo i ai perofeta e sili atu nai lo au, ae peitai, ou te naunau e faia uma mea ou te mafaia e faaalualu ai i luma le galuega a le Alii e pei ona Ia finagalo e faia ai. O po uma ma taeao uma ou te tootuli ma tatalo ma le faatauanau loloto ina ia musuia au e le Alii ma ia faaali mai ia te au le ala e tatau ona ou ui ai ma le mea e tatau ona ou tauina atu i tagata o lenei ekalesia.”4
I lana auaunaga atoa o se Peresitene o le Ekalesia, sa ia mauaina ia faaaliga e taitaiina ai le Au Paia. O le faaaliga aupito sili ona lauiloa o nei faaaliga uma na oo mai ia Iuni 1978, ina ua faaali mai e le Alii ia te ia faapea foi i lana usoga i le Au Peresitene Sili ma le Korama a Aposetolo e Toasefululua e faapea, o faamanuiaga o le perisitua, ia sa taofia mai nisi, ua mafai nei ona avanoa mo tagata agavaa uma o le Ekalesia (tagai Mataupu Faavae ma Feagaiga, O Le Tautinoga Tonu 2). O lenei faaaliga na oo mai ina ua mavae ni tausaga sa mafaufau loloto ma tatalo ai foi isi Peresitene o le Ekalesia e uiga i lenei mataupu.
E lei umi se saunoaga faalauaitele a Peresitene Kimball e uiga i lenei faaaliga. Ae sa ia tuuina mai ni nai faamatalaga pupuu e uiga i ana sauniuniga patino mo le mauaina, ma e tele ni taimi sa ia faasoaina mai ai ona lagona e uiga i ai:
“Sa ou iloa e i ai se mea o loo i o matou luma ua matua taua tele i le tele o fanau a le Atua. Sa ou iloa tatou te maua faaaliga mai le Alii pe afai tatou te agavaa ma saunia mo i latou ma saunia e talia ma faataunuuina. Mai lea aso i lea aso sa ou alu ai toatasi i le faamaoni, ma le naunautai tele i le potu i luga o le malumalu, o iina sa ou tuuina atu ai lo’u agaga ma tuuina atu au taumafaiga e faaalualu ai i luma le polokalama. Sa ou manao e fai le mea sa ia finagalo ai. Sa ou talanoa ia te ia i lenei mea ma faapea atu, ‘Le Alii e, na o le mea sa’o lava ou te manao ai. Matou te le o faia lava ni fuafuaga ina ia maoae ni faatinoga. Na pau le mea matou te mananao i ai o le mea e te finagalo ai, ma matou te mananao i ai i le taimi e te finagalo ai ae le o le seia afea.’ “5
“O i matou i aso nei o e o loo talia ma lagolagoina e outou e avea ma perofeta, tagata vaai, ma talifaaaliga, ua oo ia i matou le lagona i le tautotogo o le 1978 e faapei foi ona oo i le toatele o le au taitai i le amataga, ina ua faataunuuina le faaaliga ‘ia avea nuu ese ma suli faatasi … ma ia tofusia faatasi i lana sa folafola mai ona o Keriso, i le talalelei’ (Efeso 3:6). O le mea lenei sa fai mai ai Paulo, ‘sa le faailoa atu i nisi tupulaga o le fanauga a tagata, faapei ona faaali mai nei e le Agaga, i ana aposetolo paia, ma ana perofeta paia’ (Efeso 3:5).
“Sa matou maua se aafiaga mamalu o le faailoa manino mai lea e le Alii e faapea, ua oo mai le taimi e mafai ai ona avea ai alii ma tamaitai faamaoni uma i soo se mea, ma suli faatasi ma tofusia i faamanuiaga uma o le talalelei. Ou te manao ia outou silafia, i le avea ai ma se molimau faapitoa o le Faaola, lou lagonaina o le latalata atu ia te Ia ma lo tatou Tama Faalelagi, a o ou faia ni asiasiga se tele i le afeafe aupitoaluga o le malumalu, a o ou alu atu na o au i nisi o aso. Sa matua faamanino mai e le Alii ia te au le mea sa tatau ona fai. Matou te le faamoemoe e malamalama tagata o le lalolagi i mea faapena, aua o le a vave ona faaalia lo latou fia fai manatu po o le le amanaiaina foi o le faagasologa paia o faaaliga.”6
E le gata i le tautino atu e faapea, o faaaliga e taiala ai filifiliga a taitai o le Ekalesia, na aoao mai foi ia Peresitene Kimball e mafai e i tatou uma ona maua faaaliga e taitai ai o tatou olaga ma faamalolosia ai i tatou i o tatou tiutetauave. Sa ia saunoa mai, “O le faamanuiaga o faaaliga o le mea lea e tatau ona sailia e tagata uma.”7
Aoaoga a Spencer W. Kimball
O loo naunau le Atua le Tama ma Iesu Keriso e fesootai ma tagata.
Sa faapea mai se tasi, ua tatou ola i se vaitaimi ua filifili ai le Atua, pe afai e i ai se Atua, e le fetalai, ae ua folafola atu e le Ekalesia a Iesu Keriso o le Au Paia o Aso e Gata Ai i le lalolagi e faapea, o loo fetalai mai pea lava le Tama po o le Alo. O loo fetalai mai i laua ma fesootai mai e pei ona talafeagai ma manaomia ai, ma o loo faaalia mai i taimi uma se naunau, ioe, o se naunautaiga, e faatumauina ia fesootaiga ma tagata.8
Sa faaalia mai e se tasi o failotu e matua le mafai lava e tagata ona maua le Atua pe iloa le Atua. E pei lava o le fai mai: Ou te lei a’e lava i le Mauga o Ararata—e leai se isi e mafai ona a’e ia Ararata; po o le, Ou te lei taele lava i le vai manino mafanafana o le Adriatic [Atiatika]—e leai se Vasa Atiatika; po o le, ou te lei vaai lava i manu feai i le Kruger Park—e leai se Kruger Park; po o le, ou te maloloina lava au i aso uma—o le mea lea, o le tiga o loo fai mai ai tagata, ai o ni lagona faatupu mai o latou lava mafaufau. Ou te lei asiasia lava le vanimonimo; o le mea lea, e leai lava se isi e mafai ona faatele’a’i i le vanimonimo.”
O le a la se eseesega o le faapea ou te lei faalogo lava pe vaai i le Atua—o le mea lea, e leai se tagata ua vaai pe faalogo i le Atua pe ua savavali foi ma Ia. Oka se faafiapoto ma le faasausili o soo se tagata e faapea mai o le Atua e le mafai ona talanoa i ai, e le mafai ona iloa, e le mafai ona vaaia, e le mafai ona faalogoina aua o lena tagata e lei saunia ia lava mo le aafiaga.9
E tatau ona manatua e le mafai ona iloa le Atua i le na o le faia o suesuega, pe malamalama ma talisapaia lana talalelei i le na o le suesue, aua e leai se tasi e mafai ona iloa le Tama po o le Alo ae o “se ua loto le Atalii e faaali atu i ai.” (Luka 10:22.) O le tagata masalosalo o le a i ai le aso a le o le taimi nei po o le faavavau, e iloa ai lona faanoanoa ona ua faoa e lona faamaualuga le tele o lona olioli ma lona tuputupu ae.10
Tatou te fiafia i lo tatou iloa o le Atua o lenei lalolagi o se Atua o faaaliga. E faaali mai e lo tatou Alii lona mafaufau ma lona finagalo i lana fanau i le lalolagi. Afai tatou te saili i ai, o le a Ia faaalia mai pea lava pea o Ia lava i le atoatoaga e sili ma sili atu foi, ma o le a tatou malamalama ia te Ia e pei foi ona mafai e le tagata faaletino ona malamalama i le Atua. E le mafai ona tatou tapuai i se tagata sa fausia lava e i tatou po o i ni ata fausia i o tatou mafaufau. Tatou te tapuai i se tagata o loo soifua, o le na faia, o le o loo fesootai ma i tatou lona tagata ma ona uiga ma le maoae o lona lava tagata.11
E le [mafai] e le Tama o Elohima po o le Alo o Ieova ona vavaeeseina ia lava mai le fanauga a tagata. Ae o tagata lava latou, e vavaeeseina i latou lava pe afai e i ai se vavaeeseina. E matuai fiafia lava le Tama ma le Alo e fesootai ma fegalegaleai ma tagata. …
… E ui i le tele o atua e faia e tagata mo i latou lava ma le fenumiai e tupu mai ai, o loo i ai lava le Atua Soifua ma Moni o loo i le lagi ma o loo avanoa mo ana fanau.12
E ui o nisi faaaliga e maofa ai, ae o le tele lava e oo mai o ni lagona loloto i le mafaufau ma le loto.
O o tatou vaitaimi e pei foi o vaitaimi ua tuanai, ua faamoemoe le toatele o tagata e faapea afai e i ai ni faaaliga, o le a oo mai o ni musumusuga matautia ma e luluina ai le lalolagi. Aua o le toatele e faigata ona talia o ni faaaliga ia le anoanoai o faaaliga e tele na oo mai i le vaitaimi o Mose, i le vaitaimi o Iosefa, ma faapena foi i lo tatou lava vaitaimi—o na faaaliga ia e oo mai i perofeta o ni manatu loloto, e le fesiligia, e oo ifo i le mafaufau ma le loto o le perofeta e pei o le sau mai le lagi pe pei foi o le suia o le pogisa o le po e le tafaoata.
O le faamoemoe mo ni [faaaliga] ofoofogia, atonu o le a atoatoa ai le mataalia o se tagata i le tafe mai i taimi uma o fesootaiga faaalia. Ou te faapea atu ma le lotomaualalo tele, faapea foi ma le mana ma le malosi o se molimau o loo mumu pea i lou agaga, e faapea, mai lava i le perofeta o le Toefuataiga e oo mai i le perofeta o o tatou nei vaitaimi, e lei motusia lava lea laina o fesootaiga, o loo i ai pea le pule, ma se malamalama matagofie ma le mata’ina, o loo faaauau pea ona susulu mai. O le leo o le siufofoga o le Alii o se fati e usuina pea ma o se talosaga faatauanau leotele.13
O faaaliga e le faapea o taimi uma e faauigaina ai o le “savavali ma le Atua,” po o le “faafesagai,” po o le “musumusu i le taliga.” E tele ituaiga faaaliga o loo i ai—o nisi e sili atu ae o nisi e itiiti le mata’ina.14
O nisi faaaliga e oo mai e ala i miti. O le tele lava o a tatou miti e papa’u ma e leai ni uiga, peitai, e faaaoga e le Alii ia miti mo le faamalamalamaina o ona tagata. … Sa fai le miti a Nepukanesa. (Tagai Tanielu 2.) O se miti mamana lea sa galo ia te ia, ae sa oo ane Tanielu ma faamanatu i le tupu lana miti ma tuuina atu lona faaliliuga. Sa faailoa atu e le Alii ia Tanielu mo se mafuaaga faapitoa.
Sa fai le miti a Peteru lea na ia vaaia ai se ie lautele ua tuutuu ifo i lalo mai le lagi e tumu i manu uma lava ma manu feai, ma sa i ai sona uiga faapitoa. (Tagai i le Galuega 10: 9–35.) …
O Paulo i ona aafiaga maoae sa oo foi ia te ia lea lava ituaiga o faaaliga e ala i se miti. “Ua oo foi ia Paulo le faaaliga i le po.” Ma sa ia maua ai faatonuga sa alagatatau mo ia faapea ma le malo. (Galuega 16:9.) …
O loo i ai isi faaaliga mata’ina ua ta’ua. Sa i ai le oo mai o Moronae, o se tagata toetu, e toe aumaia le faamaumauga maoae o tagata Amerika anamua ma le toefuataiina o le talalelei. …
Ona oo mai ai lea o Ioane le Papatiso o le sa vavaeeseina lona ulu e le tupu i si taimi o le vaivai … [sosoo ai ma] Peteru, Iakopo ma Ioane. … O lea la na oo mai ai, o lea laasaga ma lea laasaga, se toefuataiga o mea uma, ma sa oo uma mai lava e ala i faaaliga, e ala i mea faali’ali’a, pe auala mai foi i miti, po o lagona loloto.
O lenei la, e le o faaaliga uma i tusitusiga paia na oo mai i ni faaaliga mata’ina. A o e faitau i le Feagaiga Tuai, o le a e iloa ai e fetalai mai le Alii. Sa fetalai mai o ia ia Isaia, ia Ieremia, ma isi, ae o na faaaliga e le faapea o taimi uma o ni faaaliga vaaia. Sa pei lava o le aafiaga o Enosa, aua a e faitau i le tusi a Enosa i le Tusi a Mamona, sa anapogi ma tatalo o ia ma sa ia aapa atu ma fesili atu mo ni faamatalaga aemaise lava mo se faamagaloga o ana agasala: “Ina o faapea ona ou finau i le Agaga, faauta, ua toe tulei mai le siufofoga o le Atua ia te au, ua faapea mai:. …” (Enosa 1:10.) O le auala lena, o loo oo mai ai le tele ma le tele o faaaliga.
O lea la, sa oo mai faaaliga: o nisi taimi e faaali tino mai ai tagata faalelagi. … Ae o le tele lava o faaaliga a le Perofeta o Iosefa Samita i totonu o lenei faamaumauga paia, o le Mataupu Faavae ma Feagaiga, e lei oo mai i lena auala. Sa oo mai o ni lagona loloto.15
O le tele lava o faaaliga tusitusia i le Mataupu Faavae ma Feagaiga ma le Tusi Paia o lagona loloto ma ni lagona faagaeetia o le taitaiga mai luga. O le ituaiga faaaliga lea e masani ona maua e tagata taitoatasi mo o latou lava manaoga.16
O nisi taimi tatou te le iloaina ai [faaaliga] pe a oo mai. Tatou te tatalo ma tatalo ma saga tatalo mo le poto ma le faamasinoga tonu ona tatou lagonaina lea e pei e tatau ona o i le itu tonu lea. Sa i ai se faaaliga iina. Ua tali e le Alii nei fesili sa faapea ona e talosagaina.17
O le a le gagana e faaaoga e le Alii? E ala mai i le Perofeta o Iosefa Samita, sa fautuaina ai e le Alii ia Oliva Kaotui, o le sa manatunatu e uiga i se tali i ana tatalo:
“E moni, e moni, ou te fai atu ia te oe, afai e te manao i se isi molimau, ia e toe manatu i le po na e tagi mai ai i lou loto ia te au ina ia e malamalama e uiga i le faamaoni o nei mea.
“Na ou le avatua ea le toafilemu i lou mafaufau e uiga i lea mataupu? O le a ea se tasi molimau e mafai ona e maua e sili atu i lo lea mai le Atua?” (MFF 6:22–23.)18
E faaali mai e le Alii Lona finagalo mo le Ekalesia e ala mai i perofeta soifua.
E ui lava i mea uma, ae e tatau ona sili atu lo tatou agaga faafetai i le aso ona o le tatalaina mai pea o le lagi, ma o le Ekalesia toefuataiina a Iesu Keriso ua faavaeina i luga o le papa o faaaliga. E moni lava o faaaliga faifai pea o le toto ola lea o le talalelei a le Alii ma le Faaola soifua o Iesu Keriso.19
O faamaumauga taua ma le le mafaatauina e uiga ia Amerika anamua, faatasi ai ma aoaoga a Keriso, o se isi molimau lea i lona paia, ua maua ai le Tusi a Mamona, lea tatou te tautino atu o se tusitusiga paia faalelagi, e soosoo tauau ma lagolagoina le Tusi Paia.
Talu mai [le Uluai Faaaliga Vaaia a Iosefa Samita] i le 1820, o loo faaauau pea ona oo mai tusitusiga paia faaopoopo, e aofia ai faaaliga e tele ma le taua e le motu le faasoloina mai le Atua i ana perofeta i le lalolagi. O le tele o nei faaaliga o loo faamaumauina i se isi tusitusiga paia ua taua o le Mataupu Faavae ma Feagaiga. O le isi tusi e atoa i ai tusitusiga paia a le Au Paia o Aso e Gata Ai o le Penina Tau Tele, o se isi faamaumauga o faaaliga ma tusitusiga faaliliuina a perofeta o anamua ma ona po nei.
O loo i ai nisi ua manatu o le lomia ma le tuufaatasia o nei faamaumauga paia, o le “mutaaga lena o perofeta.” Peitai matou te toe molimau atu i le lalolagi o loo faaauau pea faaaliga ma o loo faapea ona i ai i anapapa ma faila a le Ekalesia nei faaaliga lea e maua mai i lea masina ma lea masina ma lea aso ma lea aso. Matou te molimau atu foi o loo i ai, talu mai le 1830 ina ua faavaeina le Ekalesia a Iesu Keriso o le Au Paia o Aso e Gata Ai, ma o le a faapea lava ona i ai, po o le a lava le umi o le a i ai, ia se perofeta, e aloaia e le Atua ma ona tagata, o le a faaauau pea ona ia faamatalaina mai le mafaufau ma le loto o le Alii.20
Afai e …, maea ia tatalo ma le anapogi, ona faia lea o faaiuga taua [e taitai o le Ekalesia], e faavaeina ni misiona ma ni siteki fou, e amataina ni fuafuaga ma aiaiga fou, e manatu faatauvaa tagata i le tala fou ma faapea ane ai ua na o ni fuafuaga faaletagata. Peitai ia i latou o e saofafai i lio laiti ma le vavalalata ma faalogo i tatalo a le perofeta ma le molimau a le tagata o le Atua; ia i latou o e na vaaia le loloto o lana tofa ma le faautaga poto o ana faaiuga ma folafolaga, o ia moni lava o se perofeta. O le faalogo atu o faaiu ana saunoaga e uiga i ni atinae fou i ni sauniga tautino e pei o le “ua fiafia le Alii;” “ua tonu lena faaiuga;” “ua fetalai mai lo tatou Tama Faalelagi,” o le iloaina lea ma le mautinoa.21
E lei taofia ma o le a le taofia lava ia faaaliga. O le malo lenei o le Atua ua faatulagaina mo le taimi atoa o totoe, e le toe talepeina i lalo pe tuuina atu i se isi nuu. O se polokalama e faaauau pea ma o le a tuputupu a’e, nai lo le fai ifo. O ana aoaoga faavae ua lelei ona faatulagaina, ae talu ai ona o le tuputupu a’e ma le faatoateleina, ua faia ai ni auala ua faaleleia atili e aoao atu ai le talalelei i le lalolagi atoa. Ua valaauina ia auauna faaopoopo i le galuega faateleina mo se lalolagi ua toatele atu. O le a le taofia lava faaaliga ma isi vavega vagana ai ua taofia le faatuatua. Afai e lava pea le faatuatua, o le a faaauau pea nei mea.
Sa lapatai mai le perofeta o Mamona: “Ioe, oi talofa i le na te faafitia faaaliga a le Atua, ma faapea ane, ua le toe faia e le Atua lana galuega i faaaliga, ma valoaga, ma mea alofa, ma gagana eseese, ma le faamaloloina o ma’i, ma le mana o le Agaga Paia!” (3 Nifae 29:6.)22
Ou te molimau atu e agai pea i luma le Ekalesia e ala i faaaliga a le Atua i ona taitai faalelagi na tofia. O loo i ai le Silisili Ese faatasi ma lenei nuu.23
Afai tatou te tausia poloaiga, faaaoga le faatuatua, ma tatalo faatauanau, ua tatou faaagavaaina i tatou lava e maua ia faaaliga faaletagata lava ia.
O le faamanuiaga o le [mauaina] o faaaliga o le faamanuiaga lea e tatau i tagata uma ona sailia. Ua iloa e alii ma tamaitai amiotonu, ua ia i latou le agaga o faaaliga e taitaiina ai o latou aiga ma fesoasoani ia i latou i isi o latou tiutetauave. Peitai … e tatau ona tatou saili ia agavaa mo na faaaliga e ala i le faatulagaina lelei o o tatou olaga ma ia masani lelei ma le Alii e ala i talanoaga fai soo ma ia.24
O le a le uunaia faamalosi mai e le Alii Ia lava i tagata; ma afai latou te le talitonu, o le a latou le maua se asiasiga. Afai ua latou malilie e faalagolago i a latou lava faauigaga ma faaliliuga, o lona uiga la, o le a tuua i latou e le Alii ia latou filifiliga pagatia. …
… O ia lava foi faaaliga, faaaliga vaaia, faamalologa, ma le faamatalaga o gagana, o loo maua uma foi i aso nei, e pei lava o isi aso uma, pe afai lena o loo i ai le faatuatua e moomia.25
O loo faatasi le Silisili Ese ma lona nuu. O le a tatou maua faaaliga uma tatou te manaomia, pe afai tatou te faia o tatou tiute ma usitai i poloaiga a le Atua. …
Ia manatua:
Afai e i ai mata e vaai ai, o le a i ai foi faaaliga vaaia e musuia ai.
Afai e i ai taliga e faalogo ai, o le a i ai foi faaaliga e aafia ai.
Afai e i ai ni loto e mafai ona malamalama, ia iloa le mea lenei: o upumoni faaeaina o le talalelei a Keriso o le a le toe natiaina ma faaliloliloina, ma o le a iloa e tagata uma o e saili ma le faamaoni i le Atua ma ana fuafuaga.26
Ona ua tuuina ia i latou lo latou filifiliga saoloto, ua faatauanau ma taitaiina ai e lo latou Tama Faalelagi lana fanau, ae o loo faatalitali mo lo latou aapa atu, o a latou talosaga, ma a latou olega faamaoni ia te ia. …
Ua naunau lava le Alii e fia vaai i le fagua o o latou uluai faanaunauga ma a latou taumafaiga amata e vavaeina ai le pogisa. Talu ai ona ua tuuina atu i ai [i le tagata] le saolotoga e filifili ai, e tatau lava ona ia faatagaina le tagata e autago lona ala seia oo ina taunuu i le malamalama. Ae a amata loa ona fiaai le tagata, a amata loa ona aapa atu ona lima, a amata loa ona gagau ifo ona tulivae ma faalogoina lona leo, o le taimi lena ae le o le seiloga e oo i le taimi lena, e tulei ai i tua e le Alii ia tafailagi, toso i tua le veli, ma faaavanoaina mo tagata e ulufafo mai le tausulusulu le mautonu i le pogisa ae agai atu i le mautinoa, i le malamalama faalelagi.27
Afai e tulai mai se tasi mai ona tulivae i le faia tau lava o ni upu, e tatau ona toe tootuli ifo o ia ma tumau ai iina seia mafai ona ia faatulagaina se fesootaiga ma le Alii, o le o loo naunau lava e faamanuia mai, ma talu ai ona ua tuuina atu i le tagata lana filifiliga saoloto, o le a le faamalosia ai o Ia lava i lena tagata.28
E te manao i se taitaiga? Sa e tatalo i le Alii mo se musumusuga? E te manao e faia le mea sa’o pe e te manao e fai le mea e te manao ai e tusa lava pe sa’o pe leai? E te manao e fai le mea e sili mo oe i le iuga, pe o le mea e foliga mai e sili atu ona manaomia i le taimi lava lena? Sa e tatalo? O le a le tele o au tatalo? Sa faapefea ona e tatalo? Sa e tatalo e pei ona faia e le Faaola o le lalolagi i Ketesemane, pe sa e tatalo mo mea e te manao ai e tusa lava pe talafeagai pe leai? E te faapea atu i au tatalo: “Ia faia lou finagalo”? Pe na e fai atu, “Le Tama Faalelagi e, afai o le a e musuia ma uunaia au i le mea tonu, o le a ou faia lena mea tonu”? Pe, na e tatalo, “Foai mai ia te au le mea o loo ou manao ai, a le o lea, o le a ou aveina lava”? Na e faapea atu: “Le Tama e, oi le Lagi, ou te alofa ia te oe, ou te talitonu ia te oe, ou te iloa e te silafia mea uma. Ou te faamaoni. Ou te naunau ma le faamaoni e faia le mea sa’o. Ou te iloa e mafai ona e silafia le iuga mai le amataga. E mafai ona e silafia le lumanai. E mafai ona e silafia i lalo o le tulaga o loo ou i ai, o le a ou maua le toafilemu po o le pagatia, fiafia po o le faanoanoa, faamanuiaina po o le toilalo. Ta’u mai ia te au, faamolemole, le Tama Faalelagi pele, ma ou te folafola atu o le a ou faia mea e te ta’u mai ou te faia.” Pe sa e tatalo faapena? E te le manatu ea atonu e sili atu lena? E lava ea lou lototele e te faia ai lena tatalo?29
O le a tuuina atu e le Alii ia tali i au fesili ma au tatalo pe afai e te faalogo. E le faapea o le a tauala uma mai i le perofeta. … Ae o tagata uma lava, afai e lava lo latou agavaa ma lo latou latalata atu i le Alii, e mafai ona latou maua faaaliga.30
Fautuaga mo Suesuega ma Aoaoga
Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau (v–ix).
-
Toe faitau le faamatalaga a Peresitene Kimball i lona mauaina o le faaaliga i le 1978 e uiga i le perisitua (itulau 264–265). E ui o nisi tulaga maoae i le aafiaga o Peresitene Kimball e uiga i lena faaaliga sa patino lava, o a ni vaega o lona aafiaga e talitutusa lava ma a tatou taumafaiga uma ina ia maua ni faaaliga? E faapefea ona tatou mulimuli i lana faataitaiga?
-
Toe faitau le vaega o loo amata i le itulau 265. O le a sau tala e fai atu i sau uo o le e faapea mai, ua le fetalai mai le Atua? O a ni mau ma ni aafiaga e mafai ona e faasoa atu e fesoasoani ai i lau uo?
-
O a nisi o auala e mafai ai ona oo mai faaaliga? (Mo ni faataitaiga, tagai i itulau 267–269). Ua aoao mai Peresitene Kimball o le tele lava o faaaliga e oo mai o ni lagona loloto nai lo ni faaaliga mata’ina. E faapefea ona tatou iloa e mai le Alii se manatu po o se lagona? (Tagai i itulau 269.)
-
Aisea tatou te manaomia ai perofeta soifua e faaopoopo atu i tusitusiga paia? (Mo ni faataitaiga, tagai i itulau 270–271.) Ua faapefea ona faamanuiaina oe e ala i faaaliga i le Peresitene o le Ekalesia?
-
O le a se fautuaga e te tuuina atu i se tasi o loo sailia le taitaiga mai le Alii? (Tagai i itulau 271–274.)
Mau e Faatatau I Ai: 1 Tupu 19:9–12; Moronae 10:3–5; MFF 1:38; 8:2–3; 43:1–4; 76:5–10
“O po uma ma taeao ou te tootuli ma tatalo ma le faatauanau loloto ina ia musuia au e le Alii ma ia faaali mai ia te au le ala e tatau ona ou ui ai ma le mea e tatau ona ou ta’u atu i tagata o lenei ekalesia.”
E faapei o Enosa, o le a tatou iloaina o faaaliga e masani ona oo mai i se auala filemu, ae le o ni faaaliga mata’ina.
“O le a tuuina atu e le Alii ia tali i au fesili ma au tatalo pe afai e te faalogo.”