Mataupu 18

Faaipoipoga Viia, Fiafia, ma Manuia

E olioli ulugalii faaipoipo i se sootaga sologa lelei ma le faavavau, pe a tumau lo la’ua faamaoni i le Alii faapea foi le tasi i le isi.

Mai le Soifuaga o Spencer W. Kimball

A o lei tofia o ia i le Korama a Aposetolo e Toasefululua, sa umia e Spencer W. Kimball se vaega o se kamupani inisiua ma fanua i Safford, i Arisona. Sa toe ta’ua e se tasi o tagata sa faigaluega ia te ia, o Carmen Richardson Smith, le faatuatua o Spencer ma Camilla Kimball ina ua aafia lo la’ua atalii o Edward i le ma’i pipili i popofou o le 1930:

“O le mafutaga a Uso Kimball ma lona faletua, o se mea ou te matua’i faamama’i tele i ai. A o i ai Eddie i Kalefonia, i le faiga o ona mau togafitiga, sa nofo ai Sister Kimball ae asiasi atu i ai Peresitene Kimball i taimi e matua moomia ai. I le vaitaimi sa faatalitali ai mo le toe malosi mai o Eddie ina ua mae’a le taotoga, sa toe taliu atu Uso Kimball i le fale e vaai le isi vaega o le aiga, ae nofo lona faletua e vaai Eddie.

“Ou te talitonu sa tusitusi atu o ia i lona faletua i aso uma. Sa le na o se tusi puupuu e na o le 50 ni upu. O nisi taimi, afai e tau leai sona taimi, ona ia faalau mai lea o se tusi ia te a’u, ma ou te manatua lava o’u lagona: sa toetoe lava o se avanoa paia ma le mamalu.

“O i la’ua o se ulugalii fiafia, ma sa foliga e amana’ia tele e le tasi le isi. Sa foliga mai o o la’ua soifuaga e tele lava ina popole le tasi i le isi i taimi uma.”¹

O le alofa o Spencer ma Camilla Kimball mo le tasi i le isi, lea sa matuai iloagofie a o talavou, sa faatupula’ia le malosi ma le loloto a o aga’i atu ina matutua o la’ua soifua. E masani ona ta’ua e Peresitene Kimball le agaga faafetai mo la la’ua mafutaga ma lona faletua: “O aafiaga uma e i ai lava Camilla i o’u autafa. Sa ma falelauasia o ma’ua matua ma isi e pele ia i ma’ua, ma ua mamulu atu foi la ma’ua fanau iti sa fananau le au. Sa ma oo i le loloto o le faanoanoa ma le maoa’e o le fiafia. … Sa ma fetagisi faatasi, sa ma talie faatasi foi. … Sa tumu o ma olaga i mea fiafia, e ui lava i faanoanoaga uma ma mea matuia sa i ai. Sa ma sisiva; sa ma pepese; sa ma faafiafia [i a ma’ua malo]; sa ma alolofa atu ma sa alofaina foi i ma’ua. O le i ai o se ava e faapei o Camilla Eyring, e atoa ai le olaga, fiafia, ma tamaoaiga”²

I lona soifua ai i se faaipoipoga umi ma le fiafia, na ia saunoa ai faapea: “Tatou te manaomia se soa atoatoa na te le amanaiaina o tatou maanuminumi, pe manatuaina mea valea tatou te faia, poo o tatou vaivaiga; … tatou te manaomia se soa agaalofa tatou te mafatia faatasi, fetagisi ma tatalo ma tapua’i faatasi; se tagata tatou te faavauvau ma faanoanoa faatasi, o se tagata e alofa i ituaiga o tagata e i ai i tatou, pe o mea foi tatou te faamoemoe i ai nai lo o tatou foliga vaaia.”³

Aoaoga a Spencer W. Kimball

O le faaipoipoga faavavau e faauuina e le Atua, ma e taua le aiga i le fuafuaga a le Tama Faalelagi mo i tatou.

O le faaipoipoga, se faaipoipoga viia, e faauuina lea e le Atua. Sa ia folafola mai o le iunite faavae lava o se nuu, e tatau lava o le aiga ma le auaiga, ma e tatau ona tatou nofouta i tu leaga i nei ona po ua fulitua mai i lenei fuafuaga sa faauuina e le Atua. …

E foliga mai ua i ai se tulaga faatupula’ia e faasagatau i faaipoipoga i eria soloitua o le lalolagi ma o loo malosi tele i le faaipoipo e aunoa ma ni fanau. Ma o le tulaga masani lava o le fesili o le a sosoo ai, “Aisea la e faaipoipo ai fua?” Ma o le taimi lea e oo mai ai le “tetee i le faaipoipo.” Ua i ai finauga ua tuuina mai e faapea, o fanau o se avega, o se saisaitiaga, o se matafaioi. O le toatele ua faatalitonuina i latou lava e faapea, o le a’oga, saolotoga mai le saisaitia ma matafaioi—o le olaga lelei lena. Ma o le mea e faanoanoa ai, o lenei manatu pogisa ma le faatafuna ua amata ona taliaina foi e nisi o o tatou lava tagata.⁴

Ina ia faasagatonu ma tineia ia aoaoga amioleaga i auala o faasalalauga ma tifaga ma televise, ma fale faafiafia ma luga o alatetele, e tatau ona tatou aoao atu le faaipoipoga, le faaipoipoga sa’o, le faaipoipoga e faavavau.⁵

O le pogai autu lava mo le faaipoipoga e faavavau ona e faavavau le ola; ma o le faaipoipoga, ina ia ogatasi ma faamoemoega e faavavau, e tatau ona talafeagai ma le faagasologa o le olaga. O faaipoipoga e faia e sui o le malo, po o sui o le Ekalesia i fafo o malumalu, e mo na o le olaga nei, “seia tuueseeseina oulua e le oti” po o le “i le umi lava e te lua ola ai.” E faamutaina i le oti…. O le faaipoipoga faavavau e faia e le perofeta a le Alii po o se tasi o le vaega toaitiiti o e ua ia faasafuaina atu i ai le pule. E faia lea i malumalu paia ua faatuina ma faapaiaina mo lena faamoemoega. Ua na o ia ituaiga o faaipoipoga e faaauau i talaatu o le oti ma faaatoatoaina le fesootaiga o le tane ma le ava, ma matua ma fanau e oo atu i le faavavau.⁶

O se faaipoipoga viia, fiafia, ma le manuia, e mautinoa lava o se sini maualuga lea a tagata uma lava. Ua fuafuaina e le Alii le faaipoipoga ia fausia ai ni aiga ma ni fanau malolosi ma le fiafia. Soo se tasi lava e fuafua ma le loto i ai e aloese mai le olaga faaipoipo, e le gata e le o ia o se tagata e pei o isi, ae faapea foi ona faaletonu ai lana lava polokalama.

Ou te tausisi pea i le upu [tagata] e pei o isi aua o le Alii lava ia na faatulagaina le tulaga e pei o isi e ala i le aumaia faatasi o Atamu ma Eva, o lana alii muamua ma le tamaitai muamua i lenei lalolagi, ma faataunuuina ai se sauniga paia o le faaipoipoga e avea ai i laua o le tane ma le ava. Sa fai sina eseese o i laua i o laua natura, ma ni matafaioi eseese e faatinoina. O le taimi lava na maea ai le faataunuuina o le sauniga, ona ia fetalai atu lea ia i laua: “Ia fanafanau ia, ma ia uluola, ma ia tumu ai le lalolagi, ia faatoilalo i ai: ma ia pule ai” (Kenese 1:28).

O se tulaga masani le faaipoipo ma o se mea masani foi ma le tatau le fanauina o fanau. O tagata uma e tatau ona mananao ma fuafua ina ia faaipoipoina aua o le mea lena na fuafuaina e le Atua i le lagi mo i tatou. O le auala lena sa ia faataunuuina ai.⁷

O le polokalama atoa lava a le [Alii], sa faatulagaina ma le poto ina ia aumaia fanau i le lalolagi, i le alofa ma le felagolagomai. Pe a na fai e manumalo ia manatu papa’u o le toatele o tagata i aso nei, semanu ua leva ona leai ma muta le lalolagi, o tagata ola uma, ma mea tatau uma. …

… Ua fetalai mai le Alii e faapea, ina ia maua e le tagata le mamalu aupito maualuga o lagi po o mamalu e tolu i le malo selesitila, “e ao foi i se tagata ina ulu i lenei faatulagaga o le perisitua [o lona uiga o le feagaiga fou ma le faavavau o le faaipoipoga];

“Afai foi na te le fai faapea, na te le mafai ona maua.” (MFF 131:2–3)

O le auala tatau lenei.

E i ai nisi alii ua le mafai ona faaipoipo ona o a latou lava filifiliga. Ua latou vavaeeseina i latou lava. Atonu e toatele foi ni tamaitai ua latou vavaeeseina i latou lava mai faamanuiaga. Ua i ai nisi e lei faaipoipoina lava ona e lei maua e i latou le avanoa. Ioe, ua tatou iloa, o le a faapea ona saunia e le Alii ni avanoa se tele, ma o le a leai se tasi e tausalaina mo se mea e le mafai ona ia faia. …

Peitai, i le tulaga o le faaipoipoga ma matafaioi a le tane ma le fafine, ia aua lava nei i ai se tasi e tetee i le Atua. …

Ou te faamoemoe ma le faamaoni o le a faapea ona matuai feinu ia o tatou teineiti ma tamaitai, o tane ma alii o le Au Paia o Aso e Gata Ai i le vai o le ola ma faafetaui o latou olaga i le matagofie ma le atoatoa o matafaioi ua tofia ai i latou e le Alii.

Ou te faamoemoe o le a tatou le taumafai e toe faaatoatoa se fuafuaga ua uma ona atoatoa, ae ia tatou saili atu ma o tatou loto, manatu ma le malosi atoa e faaatoatoa i tatou lava i le polokalama atoatoa ua tuuina mai ia i tatou. Talu ai ona ua toilalo nisi o i tatou, o le mea moni, o le a le talafeagai le tuuaia o le polokalama. Ia tatou pulea a tatou amioga, a tatou gaoioiga, o o tatou olaga atoa, ina ia mafai ona avea i tatou ma suli i faamanuiaga silisili ma le tele ua folafolaina mai ia i tatou.⁸

O faaipoipoga e faavavau e manaomia ai ona saunia mae’ae’a.

O le faaipoipoga, atonu o le filifiliga aupito sili lea ona taua i filifiliga uma, ma e aupito o’oo’o foi ona aafiaga, aua e le gata ina maua ai le fiafia i le taimi nei, ae faapea foi ona maua ai le olioli i le faavavau. E le gata ina aafia ai tagata e toalua o loo faatasi ai, ae faapea foi o la’ua aiga aemaise lava a la fanau ma fanau a a la’ua fanau ma faasolo mai ai i le tele o augatupulaga.

I le filifiliga la o se soa mo le olaga nei ma le faavavau, e mautinoa lava e tatau ona faia ia fuafuaga, mafaufauga, tatalo ma anapogi aupito sili ona mae’ae’a, ina ia mautinoa ai mai filifiliga uma lava, o le filifiliga lenei e le tatau lava ona sese. O se faaipoipoga moni, e tatau ona i ai le tasi i manatu faapea foi i loto. E le tatau ona faia atoa ia faaiuga i luga o lagona, ae o le mafaufau ma le loto, e faamalosia i le anapogi ma le tatalo ma le manatunatu loloto i ai, o le a tuuina atu ai i se tagata se avanoa sili o le fiafia i le [olaga] faaipoipoina. Na te aumaia faatasi ai ma le ositaulaga, fetufaai, ma le manaomia tele o le le manatu faapito. …

… “O ni tagata se toalua [alii ma le tamaitai] e fetaui lelei le tasi ma le isi,” e le moni ma e taufaasese; ma a o sailia e alii talavou ma tamaitai talavou uma i le maelega atoatoa ma le agaga tatalo se uo e mafai ona matagofie ma sologa lelei ai le olaga, e mautinoa lava e toetoe lava o soo se alii lelei ma soo se tamaitai lelei e mafai ona maua se faaipoipoga fiafia ma le faamanuiaina pe afai e naunau uma e totogi le tau [mo se faaipoipoga manuia]…

O tagata e toalua e oo atu i le fata faitaulaga o le faaipoipoga e tatau ona iloaina, ina ia maua se faaipoipoga fiafia lea la te faamoemoe i ai, e tatau ona la iloaina o le faaipoipoga faaletulafono e le o se tali lea i faafitauli uma o le olaga, ae o lona uiga o le ositaulaga, fetufaai, ma e oo foi ina tuuitiitia ai nisi o saolotoga o le tagata lava ia. O lona uiga o le ola i se olaga umi ma le faigata o le taufaasoasoa. O lona uiga o ni fanau o le a o mai faatasi ma ni avega tau tupe, avega o le auauna atu, avega o le tausiga ma le popole [mo i latou]; ae o lona uiga foi, o ni lagona aupito loloto ma aupito manaia o lagona uma.⁹

O le faatuai ona faaipoipo … e le taliaina atoatoa. O tagata uma e tatau ona fuafua o latou olaga ina ia aofia ai se faaipoipoga e fai faalelei i le malumalu i o latou olaga talavou, ma ia uluola ma faia o latou aiga ina ua matutua o latou mafaufau.¹⁰

O tagata talavou ua fuafuaina o latou ala ina ia faaipoipoina i le malumalu, ua uma ona latou faavaeina ni mafaufauga mautu i le ala o le a mafai ai e i latou ona faataunuuina lea fuafuaga ma se tasi ua ia filifilia na te faaipoipo atu i ai. A o lei oo ina faapaiaina la laua faaipoipoga i le nofoaga paia, e ao lava ona fuafuaina faatasi e laua le olaga o le a ola ai i laua, ma e tatau ona faaauau pea lea lava ala i le avea ma tane ma le ava pe a fuafuaina e laua le ala la te ui atu ai i le fiafia, manuia, ma le olaga faaleagaga, i le faaeaina i le malo o le Atua.¹¹

Soo se tasi o outou o le a taamilo i le lalolagi ina ia maua le sauniga o le faamauga pe a e iloaina lona taua, pe a e malamalama foi i lona maoae. E le mafai e le mamao, e le mafai e le le lava o tupe, po o se isi lava tulaga ona taofia oe mai lou faaipoipoina i le malumalu paia o le Alii.¹²

O le a i ai se agaga fou i Siona pe a fai atu tamaitai talavou i a latou uo tama, “afai e te le maua se pepa faataga o le malumalu, ia o le a le mafai foi ona noatia lo’u ola ia te oe, e oo lava i le olaga nei.” Ma o le a fai atu alii ua foi mai a latou misiona i a latou uo teine, “E faamalie atu, ae po o le a lava lo’u alofa ia te oe, ou te le faaipoipo lava i fafo o le malumalu paia.” …

… Ona tatou manatunatu lea pe aisea, i nei mau faamanuiaga ma folafolaga, e le faaipoipo sa’o ai tagata, ma maumau ai o latou ola i se vaomatua lafulafua e ono le mafai ona fuga mai. Aisea o le a mafaufau ai se tagata talavou i se faaipoipoga i fafo atu o le malumalu ma maumau ai na mamalu o loo i ai?¹³

O ulugalii ua faaipoipoina e mafai ona mulimuli i se fua e le faavaivaia e maua ai le fiafia faatasi.

E toetoe lava o faaipoipoga uma e mafai ona matagofie, filemu, fiafia, ma faavavau, pe afai o tagata autu e toalua o loo aafia, e naunau o le mea lena e ao ona i ai, e tatau lava ona i ai, ma o le a i ai.¹⁴

O le na ona faataunuuina o se sauniga e le aumaia ai le fiafia ma se faaipoipoga faamanuiaina. O le fiafia e le oo mai i le na o le oomiina o se faamau, e pei o le moli eletise; o le fiafia o se tulaga lea o le mafaufau ma e sau mai i totonu [o se tagata]. E tatau ona galueaiina. E le mafai ona faatauina i tupe; e le mafai foi ona avefuaina.

Ua manatu nisi o le fiafia o se olaga manaia e fifilemu, o mea taugata ma le faamalieina i taimi uma; ae peitai, o le faaipoipoga moni e faavae i se fiafiaga e sili atu nai lo lena, lea e maua mai i le foai atu, auauna atu, fetufaai atu, ositaulaga, ma le le manatu faapito.

O tagata e toalua e eseese tulaga o olaga e o mai ai, e vave lava ona la iloa mulimuli ane ina ua maea ona faataunuu le sauniga, e tatau ona faafetaiaia le mea moni aiai. E le toe i ai se olaga o moomooga pe faafoliga; e tatau ona tatou o ese mai [moomooga faivavale] ae ia tutu lelei o tatou vae i le lalolagi. E tatau ona tauaveina ia tiutetauave ma talia ia ni matafaioi fou. E tatau ona lafoaia nisi o saolotoga faaletagata, ma e tele foi ni fetuunaiga, o ni fetuunaiga e le manatu faapito, e tatau ona faia.

E lei umi ona faaipoipoina ae iloa e se tasi e i ai ni vaivaiga o lona toalua sa lei faaalia pe na iloaina muamua. O uiga tausaafia sa masani ona faaalia i le taimi a o faauo, ua faasolo nei ina mou atu, ae o vaivaiga ia sa foliga mai o sina mea itiiti ma le faatauvaa i le taimi o le faauoga, ua tupu tele nei ma avea ma toatuga. Ua oo mai le taimi mo ni loto malamalama, mo le iloiloga a le tagata lava ia, ma le faaaogaina lelei o le mafaufau, fetuutuunai, ma le faia o fuafuaga. …

O loo i ai se fua faatatau e le mafai ona faatoilaloina lea o le a faamautinoa atu ai i ulugalii uma se faaipoipoga fiafia ma le faavavau; ae e pei lava o isi fua faatatau uma, e le tatau ona galo, pe faaitiitia, pe faatapulaaina foi ia vaega autu. O le filifiliga a o lei faauo ma le faaauau pea o le faauoga pe a mavae le faaipoipoga e tutusa lava le taua, ae le sili atu le taua nai lo le faaipoipoga lava ia, o le faamanuiaina o se faaipoipoga e faalagolago lea i tagata e toalua—ae le o se toatasi, ae o le toalua.

O se faaipoipoga e amata ma faavaeina i tulaga faatauaina lelei …, e leai se tuufaatasiga o ni malosiaga e mafai ona faaleagaina se’i vagana ai o le malosiaga o loo i totonu o se tasi po o le ulugalii uma; ma e tatau ona la tauaveina faatasi le tiutetauave. O isi tagata ma vaega e mafai ona i ai so latou aafiaga lelei po o le leaga. Atonu foi e i ai se aafiaga o mea tau tupe, fegalegaleaiga, faiga faaupufai, ma isi tulaga; ae o le faaipoipoga e faalagolago muamua lava, ma i taimi uma foi, i tagata e toalua o le ulugalii o e e mafai ona avea le la faaipoipoga ia faamanuiaina ma fiafia pe afai la te naunau i ai, e le manatu faapito, ma e amiotonu foi.

E faigofie lava le fua faatatau; e le tele foi ni mea e manaomia ai, e ui ina tele ni faaopoopoga po o ni faalauaitelega o vaega taitasi.

Muamua, e ao ona i ai le uluai amioga e tatau ai e faatatau i le faaipoipoga, lea e aofia ai le manatunatu i le filifilia o se toalua, e taulalata atu lava i le atoatoa i vaega uma lea e taua i tagata taitoatasi. Ona tatau loa lea i ia tagata e toalua ona o atu i le fata faitaulaga i le malumalu ma le iloa lelei, e tatau ona la galulue malosi e agai atu i lenei olaga tuufaatasi manuia.

Lua, e le tatau ona i ai se manatu faapito, ia faagalo le tagata lava ia, ae faaautu uma le olaga faaleaiga ma mea uma e faatatau i le olaga faaleaiga mo le lelei o le aiga, i le faagaloina o ia lava.

Tolu, e tatau ona faaauau pea le faauooga ma le faailoa atu o lagona alofa, agalelei, ma le magafagafa ina ia faaolaola ma faatupulaia ai pea le alofa.

Fa, e tatau ona i ai se ola atoatoa i poloaiga a le Alii e pei ona faamaninoina mai i le talalelei a Iesu Keriso.

O le tuufaatasia lelei o nei vaega ma faaauau pea ona faaaogaina, e fai ai lava si faigata ona oo mai le le fiafia, e le mafai ai ona faaauauina le le femalamalamaa’i, pe o le malepelepe o faaipoipoga. Atonu o le a moomia ona toe sailia ni galuega a loia e tatalaina faaipoipoga, ma o le a tapunia foi ia ofisa o faamasinoga.¹⁵

O le le manatu faapito ma le tausia o poloaiga e taitaiina atu ai i se faaipoipoga faamanuiaina.

E tatau i manamea uma ona iloa a o lei osia ia feagaiga e tatau i tagata taitoatasi ona taliaina ma le malamalama ma le atoatoa e faapea, o le lelei o se aiga fou laitiiti e tatau ona silisili i tagata taitasi o le ulugalii. E tatau i tagata taitoatasi ona aveese le “o a’u” ma le “o la’u” ae suia … “o ma’ua” ma le “o i ma’ua.” Soo se faaiuga lava, e tatau ona manatu e toalua pe sili atu foi o le a aafia ai. A o taulalata atu o ia i ni faaiuga tetele i le taimi nei, o le a popole le ava i le aafiaga o le a i ai i matua, o le fanau, o le fale, ma o latou ola faaleagaga. O le filifiliga o le galuega a le tane, o lona olaga masani, o ana uo, o mea uma e fiafia i ai e tatau nei ona manatua o ia o se vaega o le aiga, ma o le atoa o le aiga e tatau ona mafaufau i ai.¹⁶

Ina ia galulue faatasi tagata e toalua mo le lelei o le la faaipoipoga, e manaomia ona la fuafuaina ma le faaeteete se paketi, e faia faatasi e le tane ma le ava, ona tausisi lea ma le faaeteete i lena paketi. E tele faaipoipoga e toilalo i le maketi pe a faia ni faatauga e lei fuafuaina. Ia manatua o le faaipoipoga o se faiga faapaaga, a leai e le mafai ona faamanuiaina.¹⁷

O se faaipoipoga atonu o le a le aunoa ma ni tulaga le tonu e ono tutupu mai ai, peitai, e mafai ona avea ma faaipoipoga e maua ai le nofo filemu. Atonu e mafai ona oo i se ulugalii le tulaga o le mativa, ma’i, mea e le fiafia i ai, mea e toilalo ai, ma e oo lava i le maliu ma le oti i le aiga, peitai e ui lava ina o le a i ai nei mea uma, ae o le a le aveesea mai ai lava lo la tulaga o le filemu. O le a tumau ona avea se faaipoipoga ma se faaipoipoga faamanuiaina pe afai o le a le faaulufaleina i ai le manatu faapito. O faafitauli ma mea le tonu e ono tutupu mai, o le a mafai ona tuufaatasia ai le ulugalii po o matua i se faatasiga e le mafai ona toe motusia, pe afai e i ai le tulaga atoatoa o le le manatu faapito. …

O le alofa e pei o se fugalaau, ma, e pei o le tino, e moomia ona fafagaina pea e le aunoa. O le tino faaletino o le a le pine ae paee ma oti pe afai e le fafagaina pea lava pea. O le fugalaau manaia o le a magumagu ma mate pe a aunoa ma le vai ma meaai. E faapea foi la i le alofa, e le mafai ona faamoemoe e tumau e faavavau se’i vagana ua fafagaina pea lava i vaega o le alofa, o le faaalia o le lagona lelei ma le faamemelo, o faailoga o le loto faafetai, ma le manatu e le faapito.

O le le manatu faapito atoatoa e mautinoa le ausia ai o se isi vaega o se faaipoipoga faamanuiaina. Afai e sailia mea e fiafia ai, faamafanafanaga, ma le fiafia o le isi, o le alofa sa mauaina i le taimi o le faauooga ma faamalosia i le faaipoipoga o le a tupu talaulau i ni vaega tetele. E tele ni ulugalii ua faatagaina a latou faaipoipoga ina ia legalega ma lo latou alofa ina ia maluluina e pei o se falaoa tuai po o ni tala tausua ua le toe aoga po o se kaleve ua maalilivaoa. E mautinoa lava o meaai e sili ona taua mo le alofa e aofia ai le manatunatu, agalelei, mafaufau, popole, faaaliga o le alofa, o feofoofoaiga o le talisapaia, faamemelo, mitamita, mafuta, mautinoa, faatuatua, o se paaga, tutusa lelei, ma le felagolagoma’i.

Ina ia matuai fiafia moni lava i le faaipoipoga, e tatau i se tasi ona i ai le faamaoni faifai pea i le tausia o poloaiga a le Alii. E leai se tasi, nofotoatasi pe ua faaipoipo, e matuai fiafia sei vagana ua amiotonu. E i ai tulaga e le tumau e faamalieina ai ma taufaasese mo sina taimi, ae o le fiafia atoatoa ma tumau e na o le ola mama ma le agavaa e mafai ona maua mai ai. …

… Afai e alolofa tagata e toalua i le Alii e sili atu nai o la’ua lava ola ona alofa lea o le tasi i le isi e sili atu nai lo la’ua lava ola, ma galulue faatasi atoatoa ia ogatasi ma le polokalama a le talalelei e avea ma o la faavae, e mautinoa lava o le a la mauaina lenei fiafiaga sili. Afai e o atu soo faatasi le tane ma le ava i le malumalu paia, tootutuli faatasi i le tatalo i lo la’ua fale ma lo la aiga, ma o faatasi ia la fonotaga faalelotu, tausia atoatoa o la olaga ia mama—i le mafaufau ma le faaletino—ina ia taulai uma atu o la manatu ma manaoga ma alofa i le tagata e toatasi, o lana soa lea, ma galulue faatasi e atiina ae le malo o le Atua, ona mafai lea ona maua o le fiafia silisili.¹⁸

O le faaipoipoga e manaomia ai le faamaoni atoatoa ma le faatuatuaina atoatoa.

O loo i ai tagata ua faaipoipo ae e faatagaina o latou mata e fetilotilofa’i solo ma o latou loto e avaga solo, o e manatu e leai se afaina o sina faatafai laitiiti, po o le faasoa atu o o latou loto ma i ai le manao mo se isi e ese mai lana ava po o lana tane. Ua fetalai mai le Alii ma le manino: “Ia e alofa atu i lau ava ma lou loto atoa, ma pipi’i atu ia te ia a e le o se isi.”(MFF 42:22.)

Ma, a fetalai mai le Alii o lou loto atoa, e leai lava ma se faatagaga po o se avanoa e faasoa ai pe vaelua, pe faaogea foi. Ma, i le tamaitai ua faaupuina faapea: “Ia e alofa atu i lau tane ma lou loto atoa, ma pipi’i atu ia te ia ae le o se isi.”

O upu ae le o se isi ua tuu ese ai tagata uma ma mea uma. O le toalua la o le faatumutumuga lea o le olaga o le tane po o le ava, ma e le mafai e le olaga tafao po o le olaga faigaluega po o le olaga faaupufai po o se isi mea lava ona suitulaga i luma atu o lau soa, o lou toalua. O nisi taimi tatou te maua ai ni tamaitai o e ua faaaluina le tele o o latou taimi i tamaiti po o le fanau, ae le lava se taimi mo a latou tane, o nisi taimi e oo lava ina taumamao ai mai ia te ia.

Ua fetalai mai le Alii ia te i laua: “Ia e pipi’i atu ia te ia a e le o se isi.” ¹⁹

Ae masani lava, o loo tumau pea tagata i le pipii atu i o latou tina ma tama ma a latou uo. O nisi taimi e le faamutaina ai e tina lo latou tausiga ma le vaaia o a latou fanau, ma ua faapea i tane atoa foi ma ava ona o atu i o latou tina ma tama mo le maua mai ai o fautuaga ma lapataiga atoa ma le faalagolagomaga, ae o le mea e tatau ona pipii atu i le ava ma faalagolago ia te ia i le tele o mea, ma o mea uma lava i lo oulua va e tatau ona faaliloliloina ma e le faalauaiteleina atu i isi.²⁰

O le faaipoipoga e manaomia ai le faamaoni atoatoa ma le faatuatuaina atoatoa. O tagata taitasi e taliaina le soa faatasi ma le malamalamaaga o le a ia tuuina atu atoa i le toalua le loto, malosi, faamaoni, faaaloalo, ma le alofa, ma le atoatoa o lona mamalu. Soo se mea lava e faalavelaveina ai o le agasala lea; soo se ituaiga faasoa atu lava o le loto o le solitulafono. Talu ai e tatau ona tatou “manatu tasi i le mamalu o le Atua,” e tatau foi ona faasaga tasi ai o tatou mata, taliga, ma le loto i le faaipoipoga ma le toalua ma le aiga.²¹

Ou te aioi atu ia i latou uma o e ua noanoatia i tautoga ma feagaiga o le faaipoipoga ina ia faapaiaina lena faaipoipoga, tausia ia fou pea, faaali atu lagona alofa i uiga loloto ma le faamaoni ma ia faifai pea.

Tane, o mai i le aiga—i le tino, agaga, mafaufau, faamaoni, fiafiaga, ma lagona—ma alofa i lau soa i se mafutaga paia ma le le mavavaeeseina.

Ava, o mai i le aiga faatasi ma o outou fiafiaga, faatuatuaina, moomooga, faamaoni, ma le alofa—ia galulue faatasi ia avea lo oulua aiga o se lagi faamanuiaina. O le a faapena ona sili ona lua faafiafiaina lo oulua Alii ma lo oulua Matai ma faamautinoa ai lo oulua fiafia tele.²²

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo fesoasoaniga faaopoopo, tagai itulau v–ix.

O le a sou manatu o a ni faamaoniga e iloa ai o le faaipoipoga e mamalu? fiafia? faamanuiaina? O le fea o nei faamaoniga e te iloa o loo atagia mai i le mafutaga a Peresitene Kimball ma lona faletua, o Camilla? (Tagai itulau 213, 214.)
Toe iloilo le vaega o loo amata i le itulau 214. O a nisi o faatosinaga o loo i le lalolagi i le taimi nei e te manatu e faatuiese i le faaipoipoga? O a ni aafiaga o loo i nei ituaiga o osofaiga? O a ni mea e mafai ona tatou faia e “faasagatonu ma faapaleni” ai, aemaise lava i totonu o o tatou aiga?
O le fea o aoaoga a Peresitene Kimball e uiga i le saunia mo faaipoipoga faavavau e sili ona faatupu lagona ia te oe ma aisea foi? (Tagai itulau 216–219.) O le fea aoaoga e ono fesoasoani ia i latou o e ua maea ona faaipoipoina?
Sa saunoa Peresitene Kimball e uiga i se “fua faatatau e le mafai ona faatoilaloina” (itulau 219–220). Afai e i ai lava se vaega se tasi e misi, faamata e faapefea ona aafia ai se faaipoipoga?
Sa aoao mai Peresitene Kimball e tatau i le toalua ona “pipii atu” le tasi i le isi ae le o se isi lava tagata (itulau 221–225). O le a se mea e mafai ona faia e ulugalii ina ia mautinoa ai o le a le avea matafaioi ma mea faafiafia i fafo atu o le aiga ma faalavelave i le faamaoni o le tasi i le isi?

Mau e Faatatau I Ai: Kenese 2:18, 21–24; 1 Korinito 11:11; Efeso 5:22–25; MFF 132:7–21

President and Sister Kimball at piano — “O aafiaga uma e i ai lava Camilla i o’u autafa.”

couple talking — “E toetoe lava o soo se alii lelei ma soo se tamaitai lelei e mafai ona maua se faaipoipoga fiafia ma le manuia pe afai e naunau uma e totogi le tau [mo se faaipoipoga manuia].”