Mataupu 2

Mala po o se Taunuuga?

A oo ina tatou feagai ma mala vaaia o le faanoanoa, puapuaga, ma le oti, e tatau ona tatou tuu atu lo tatou faatuatuaga i le Atua.

Mai le Soifuaga o Spencer W. Kimball

I lona laitiiti, sa mafatia ai Spencer W. Kimball i le tiga ona o le maliliu o e pele ia te ia. I le valu o ona tausaga, na maliu ai lona tuafafine o Mary ae le’i leva ona fanau mai. I se masina mulimuli ane, na lagona ai foi e matua o Spencer e le o toe mamao ae maliu foi ia Fannie, e lima tausaga le matua, ma sa tigaina mo ni nai vaiaso. Na faamatalaina mulimuli ane e Spencer le aso na maliu ai Fannie: “O lo’u aso fanau lona iva na maliu ai Fannie i lima o Tina. Na fafagu uma lava i matou le fanau i le vaveao ina ia faatasi ai. E foliga mai ou te manatuaina le vaaiga i totonu o lo matou potu malolo …, le tagi masusu o lo’u tina pele faapea ma lana tama e lima tausaga o le a oti i ona lima ma i matou uma o loo faataliolio ai.”¹

Na sili atu ona faigata mo le taulealea o Spencer le tala na ia maua i le lua tausaga milimuli ane, ina ua toe faafoi mai i latou ma ona uso ma tuafafine mai le aoga i se tasi taeao. Sa latou taufetuli atu i le fale ma sa faafeiloai i latou e lo latou epikopo, o le na faapotopotoina atu i latou i ona autafa ma ta’u atu ia i latou ua maliu lo latou tina i le aso ua mavae. Na toe manatua e Peresitene Kimball mulimuli ane: “Na pei o le pa o se faititili. Sa ou tamoe ese mai le fale agai i tua o le fanua e nana ai o’u loimata. Sa ou tagi masusu e aunoa ma le lagona pe iloa mai e tagata uma. O taimi uma lava ou te tauina ai le upu ‘Ma’ e faapena ai foi ona pei o se timu o’u loimata seia oo lava ina ua ou le toe tagi. O Ma—ua oti! Ae le mafai! E le mafai ona matou ola pea. … Na foliga mai o le a pa lo’u fatu ua sefulutasi tausaga le matua.”²

I le limasefulu tausaga mulimuli ane, a o avea lena o Elder Spencer W. Kimball ma se sui o le Korama a Aposetolo e Toasefululua, na ia iloaina ai lona mamao ese mai le aiga, a ua toe faasolosolo manuia mai sona taotoga tele sa faia. Sa le mafai ona moe, na ia toe manatuaina le aso na maliu ai lona tina: “Ua ou lagona e pei o le a ou toe tagi masusu foi nei … a o o’u toe manatuaina na taimi faanoanoa.”³

O le feagai ai ma tulaga faanoanoa matuitui o ni aafiaga faapena, e masani ai lava ona maua e Spencer W. Kimball le mafanafana i le tatalo faapea ma mataupu faavae o le talalelei. E oo lava i le taimi o lona laitiiti, sa ia iloa le mea e liliu atu i ai ina ia maua ai le filemu. Na tusia e se uo a le aiga e uiga i tatalo a le taulealea o Spencer—”sa mamafa lava i si ona tama’i fatu le maliu o lona tina, ae peitai sa ia taualo pea ma le lototoa ma le faanoanoa ma saili le faamafanafanaga mai si punavai lava e tasi.”⁴

I lana galuega, sa masani ona tuuina atu ai e Peresitene Kimball upu o faamafanafanaga ia i latou o e faavauvau ona o le maliliu o e pele. Sa ia molimau atu i mataupu faavae o le talalelei, ma faamautinoa atu i le Au Paia o le oti e le o le mutaaga lea o le olaga. I sana saunoaga i se falelauasiga, sa ia ta’ua ai e faapea:

“E gata la tatou vaai. E na o ni nai maila e mafai ona tatou iloa atu i o tatou mata. E na o ni nai tausaga e lagona atu i o tatou taliga. Ua papuipuia i tatou, ua siosiomia, e pei lava o loo i totonu o se potu, ae a oo ina motusia lo tatou malamalama o lenei olaga, ona tatou iloa atu ai lea o mea e le mafai ona iloa i la le tino. …

“E soloia i lalo pa vaeloto, e muta le taimi ma e mou ma mavae atu le taimi a o tatou agai atu i le faavavau … ma e vave lava ona tatou totofu atu i se lalolagi sili lea e leai ni tapulaa faalelalolagi.” ⁵

Aoaoga a Spencer W. Kimball

I Lona lava atamai, e le taofia i taimi uma e le Atua ni mala.

Na laualuga i le nusipepa i aso taitasi le ulutala: “Pa le Vaalele Maliliu le 43. E leai Se Tasi na Faasaoina i le Mala i le Mauga,” ma le fia afe o leo sa aufaatasi i le fesili: “Aisea na faataga ai e le Alii lenei mea matautia e tupu?”

E lua taavaleafi na feto’ai ina ua alu loa le isi i le moli lanumumu, ma e toaono tagata na maliliu ai. Aisea na le taofia ai e le Atua lenei mea?

Aisea e maliu ai se tina talavou i le kanesa ae tuua lana fanau e toavalu e aunoa ma se tina? Aisea na le faamaloloina ai o ia e le Alii?

Na malemo se tamaitiiti; o le isi na solia i le taavale. Aisea?

Na maliu faafuasei se alii ona o le poloka o alatoto a o ia a’ea’e atu i luga i ni faasitepu. Na maua lona tino ua matuai galemu lava i luga o le fola. Sa tagi ma le faavauvau lona toalua, “Aisea? Aisea ua fai ai e le Alii lenei mea ia te au? Pe le mafai ea ona ia manatu i la’u fanau laiti e toatolu o loo manaomia se tama?”

Na maliu se alii talavou i le misiona ma ua tuufesili ma le faitio tagata: “Aisea na le puipuia ai e le Alii lenei talavou a o ia faia le galuega talai?”

Ou te moomoo maimau pe ana ia te au le pule e mafai ona ou tali atu ai i nei fesili, ae ou te le mafaia. Ou te mautinoa e i ai se taimi o le a tatou malamalama ai ma saunia ai e talia. Ae mo le taimi nei e tatau ona tatou saili ina ia malamalama i le mea sili tatou te mafaia i mataupu faavae o le talalelei.

Pe o le Alii ea na faatonutonuina le vaalele agai i atumauga ina ia faamutaina ai ola o e sa i ai, pe mafua mai i ni faaletonu i le vaalele lava ia po o tagata?

Pe na mafua ea i lo tatou Tama i le lagi ona feto’ai taavale lea na aveina atu ai tagata e toaono i le faavavau, pe ona o le sese o le avetaavale na le amanaiaina tulafono o le saogalemu?

Pe na aveesea e le Atua le ola o le tina talavou pe na uunaia le tamaitiiti e savalivali i le alavai, pe sa ia taitaiina atu le tamaitiiti i le auala o le taavale o loo agai mai?

Pe na faamatua’ia ea e le Alii le tamaloa ina ia pe lona fatu? Pe ua vave tele ea le oti o le faifeautalai? Tali i ai, pe afai e te mafai. Ou te le mafaia, aua ua ou iloa e ui o loo i ai se matafaioi tele a le Atua i o tatou olaga, ae ou te le iloa pe o le a se tele na te faatupuina ai se mea ae o le a foi se tele na te faatagaina ai. Po o le a lava le tali i lenei fesili, ae e i ai se isi tali lea ou te mautinoa i ai.

Pe na mafai e le Alii ona taofia nei faalavelave? O le tali o le, Ioe. O le Alii e Silisiliese, o loo i ai le mana uma e pulea ai o tatou olaga, e faasaoina ai i tatou mai tiga, e taofia ai faalavelave uma, e aveina vaalele ma taavale uma, e fafagaina i tatou, puipuia i tatou, faasaoina i tatou mai le tiga, ma’i, e oo lava i le oti, pe afai e finagalo i ai. Ae o le a ia le faia lava.

E tatau ona mafai ona tatou malamalama i lenei mea, aua e mafai ai ona tatou iloaina le le atamai o le a i ai mo i tatou ina ia tau punipuni a tatou fanau mai taumafaiga uma, mai faanoanoaga uma, mai faaosoosoga uma, mai lototiga, ma puapuaga.

O le tulafono faavae o le talalelei o le filifiliga saoloto ma le atinaeina faaleagaga. O le faia faamalosi o i tatou ia faaeteete pe amiotonu foi, o le a faaleaogaina ai lena tulafono faavae ma o le a le mafai ai ona alualu i luma.⁶

O le i ai o se vaaiga faavavau, tatou te malamalama ai e taua ia faigata mo lo tatou alualu i luma e faavavau.

Afai tatou te vaavaai atu i le olaga faaletino o se atoaga o le olaga, o lona uiga la, o le tiga, faanoanoa, toilalo, ma le puupuu o le olaga o le a avea ma mala. Ae afai tatou te vaavaai atu i le olaga o se mea e faavavau lea e oo atu i tua i le muai olaga ma oo atu ai i le faavavau i le lumanai pe a mavae le oti, ona mafai lea ona sagatonu la tatou vaai i mea e tutupu.

Pe le o i ai ea se atamai i lona tuuina mai ia i tatou o tofotofoga ina ia mafai ona tatou manumalo ai, o tiutetauave ina ia mafai ona tatou faataunuuina, o galuega ina ia malolosi ai o tatou musele, o faanoanoaga ina ia tofotofoina ai o tatou agaga? Pe le o lo tatou oo ea i faaosoosoga e suesue ai lo tatou malosi, o ma’i ina ia tatou aoaoina ai le onosai, o le oti foi ina ia tatou maua ai le tino ola pea ma le faamamaluina?

Afai e faamaloloina ma’i uma o e tatou te talosia, afai e puipuia tagata amiotonu uma ma faaumatia tagata leaga, o le a leai se aoga o le polokalama atoa a le Tama ma o le a faamuta ai foi ma le mataupu faavae o le talalelei, o le filifiliga saoloto. Semanu o le a leai se tagata e ola i le faatuatua.

A na fai e vave ona tuuina atu le olioli ma le filemu ma taui i e faia mea lelei, semanu e leai se tasi e faia ni mea leaga—semanu e faia e tagata uma le lelei ae peitai o le a le faia ona o le sa’o o le faia o le mea lelei. Semanu e leai se suega o le malosi, leai se atiina a’e o le tagata, leai se tuputupu a’e o mana, leai se filifiliga saoloto, ae na o pulega faasatani.

Pe a na fai e tatau ona taliina uma tatalo i le taimi lava lea e tusa ai ma o tatou manaoga faaloloto ma lo tatou malamalama pumoomoo, semanu e tau leai po o le leai foi lava o ni puapuaga, faanoanoaga, lototiga, e oo lava i le oti, ma pe a na fai e leai nei mea, semanu e leai foi se fiafia, manumalo, toetu, e leai foi se ola faavavau ma le tulaga faale-atua.

“Aua e ao lava ina i ai le faafeagai o mea uma … amiotonu … amioleaga … mea paia … malaia … lelei … leaga. … ” (2 Nifae 2:11.)

O le uiga faaletagata, tatou te mananao e aveese mai o tatou olaga le tiga faaletino ma le faalemafaufau ma ia tatou mautinoa o tumau pea le faigofie ma le saogalemu, peitai, afai tatou te tapunia faitotoa i le faanoanoa ma le puapuaga, e le taumate o le a tatou tapunia ai a tatou uo ma fesoasoani pito sili. O le mafatia e mafai ona avea ai tagata ma tagata amiotonu a o latou aoaoina le onosai, faapalepale, ma le pulea e le tagata o ia lava. …

Ou te fiafia i le fuaiupu o le [viiga] “Le Faavae Malosi”—

A valaau oe e feagai ma faigata,
E le manumalo ia oe mea faatiga
Aua ou te ia oe, ma faamanuia oe,
E avea o ou tiga ma ou manuia.

[Tagai Viiga, nu. 45]

Ma na tusia e Elder James E. Talmage: “E leai se mafatiaga e mafatia ai se alii po o se tamaitai i luga o le fogaeleele o le a leai ni ona aafiaga e tauia ai … pe afai e onosa’ia.”

I le isi itu, o nei mea e mafai ona olopalaina ai i tatou i o latou aafiaga matautia, pe afai tatou te gauai atu i vaivaiga, o le tomumu, ma le faitio.

“E leai se tiga tatou te mafatia ai, e leai se faigata tatou te oo i ai e maumau. E aoga i lo tatou aoaoina, i le atinaeina o ituaiga uiga e pei o le onosai, faatuatua, lototele ma le lotomaualalo. O mea uma tatou te mafatia ai ma mea uma tatou te tutumau ai, aemaise lava pe a tatou tutumau ai i le onosai, e fausia ai o tatou tagata, faamamaina ai o tatou loto, faateteleina ai o tatou agaga, ma faateleina ai lo tatou agamalu ma le agaalofa, faateleina ai le agavaa e ta’ua ai o fanau a le Atua … ma o le faanoanoa ma mafatiaga, galue malosi ma tiga, lea tatou te maua ai le aoaoga e faapea ua tatou o mai iinei ina ia maua ma o le a avea atili ai i tatou e faapei o lo tatou Tama ma le Tina o i le lagi. … ” (Orson F. Whitney)

E oona i nisi tagata pe a latou vaavaai atu i e pele o puapuagatia i tiga ma mafatiaga ma sauaga faaletino. O nisi ua tuua’ia le Alii i le agaleaga, o le le manatu popole, ma le le faamasino tonu. E matuai leai se agavaa o ia te i tatou e faamasino atu ai! …

O le mana o le perisitua e leai sona tapulaa, peitai o le Atua i lona atamai ua tuuina mai ai i tagata taitoatasi ni tapulaa faapitoa. E mafai ona ou atiina ae le mana o le perisitua a o ou taumafai e faaatoatoaina lo’u olaga, peitai ua ia te au le faafetai ona e ui lava ona o loo ia te au le perisitua ae le mafai ona ou faamaloloina ma’i uma lava. Atonu e mafai ona ou faamaloloina ai ni tagata ua tatau ona maliliu. Pe atonu foi o le a ou aveesea ai puapuaga mai tagata e tatau ona oo i ai ia puapuaga. Ou te fefe ina ne’i ou taofia fuafuaga paia a le Atua.

A na fai e leai se tuaoi o lo’u mana, e ui i le papa’u o la’u vaai ma lo’u malamalama, atonu ou te faasaoina Apinati mai le mumusaesae o le afi ina ua susunuina o ia, ma o le faia o lea tulaga atonu ou te le mafaia ona faaleleia lona afaina. Na maliu o ia o se maturo ma ulufale atu ai i le taui o se maturo—o le faaeaga.

Semanu ou te puipuia foi Paulo mai ona mafatiaga pe a na fai e leai se tuaoi o lo’u mana. Semanu e mautinoa lava lo’u faamaloloina o ona “matuitui i le tino.” [2 Korinito 12:7.] Ma o le faia o lea mea atonu ou te faaluafesasiina ai le polokalama a le Alii. E faatolu ona ia tatalo atu, ma talosaga i le Alii ina ia aveeseina “mea matuitui” mai ia te ia, ae le’i taliaina e le Alii ana talosaga [tagai 2 Korinito 12:7–10]. E tele taimi na semanu e se ese ai Paulo pe a na fai e tamaoaiga i le gagana, tulelei, aulelei, ma saoloto mai mea na faamaualaloina ai o ia. …

Ou te fefe aua ana ou i ai i le Falepuipui i Karefasi i le aso 27 o Iuni, 1844, semanu ou te seueseina ia pulufana ia na ati i tino o le Perofeta ma le Peteriaka. Semanu ou te faasaoina i laua mai puapuaga ma le tiga, ae le maua ai e i la’ua le maliliu faamaturo ma le taui. Ua ou fiafia ona ou te le’i faia lena faaiuga.

Faatasi ai ma lea mana e le mataofia, semanu ou te mautinoa lava lo’u lagona e puipuia Keriso mai lona mafatiaga i Ketesemane, o taufaifaiga, o le paletuitui, o le faalumaina i le faamasinoga, o manua faaletino. Semanu ou te faauuina ona manua ma faamalolo, ma tuuina atu ia te ia se vai malu nai lo le vineta. Semanu ou te faasaoina o ia mai puapuaga ma le oti, ae le maua ai e le lalolagi lana taulaga togiola.

Semanu ou te le popole fua e tauave le tiutetauave o le toe faaolaina mai o e pele ia te au. O Keriso lava ia na faailoa maia le eseesega i lona finagalo ma le finagalo o le Tama ina ua ia tatalo e aveeseina le ipu o puapuaga mai ia te ia; ae na ia toe faaopoopo atu lava, “Ae aua le faia lo’u loto, a o lou finagalo.” [Luka 22:42.]⁷

O le oti e mafai ona tatalaina le faitotoa i avanoa mamalu.

O le tagata e oti, e faaauau pea le olaga ma e faaauau foi lana filifiliga saoloto, ma o le oti, lea e foliga mai ia i tatou o se mala, e mafai ona avea ma se faamanuiaga natia. …

Afai tatou te faapea ane o le vave ona oti o se mala, puapuaga, po o se faalavelave, pe le o lo tatou faapea atu foi lena, e sili atu ona lelei le olaga faaletino nai lo le vave ulufale atu i le lalolagi o agaga ma vave maua ai le faaolataga ma le faaeaina? Afai o le olaga faaletino o le olaga sili lea ona lelei, o lona uiga la o le oti o se mea lea e mumusu tagata e oo i ai, peitai ua aoao mai le talalelei ia i tatou, o le oti e le o se mala, sei vagana ai le oti i le agasala. “… amuia e ua oti o e oti i le Alii. … ” (Tagai MFF 63:49.)

E matuai laitiiti tele se mea ua tatou iloa. E matuai papa’u tele la tatou faamasinoga. Tatou te faamasinoina ala o le Alii mai la tatou lava vaaiga pumoomoo.

Sa ou lauga i se falelauasiga o se tamaitiiti aoga talavou o le Iunivesite o Polika Iaga, sa maliu i le taimi o le Taua Lona II a le Lalolagi. E fia afe alii talavou ua vave faananati atu i le faavavau ona o aafiaga o lena taua, sa ou faia ai se faamatalaga e faapea ou te talitonu o lenei talavou amiotonu ua valaauina i le lalolagi o agaga e talai atu le talalelei i agaga e lei mauaina. Atonu e le moni lenei mea ia i latou uma o e maliliu, ae sa ou lagona e moni ia te ia.

I lana faaaliga vaaia o le “Togiolaina o e Maliliu” na vaaia ai e Peresitene Iosefa F. Samita le mea lava lenei. … Na ia tusia:

“… sa ou iloa e lei afio atu le Alii lava ia i e amioleaga ma e le usiusitai na teena le upumoni … faauta, sa faatulagaina e ia ana au ma tofia ana avefeau mai e amiotonu … ma tofia i latou e o atu ma avatu le malamalama o le talalelei. …

“… na faaaluina e lo tatou Togiola Lona taimi … i le lalolagi o agaga, i le aoaoina ma le saunia o agaga faatuatua … o e na molimau ia te ia a o i ai i la le tino, ina ia latou aveina atu le savali o le faaolataga i e uma ua oti, o e sa le mafai ona oo atu i ai o Ia lava, ona o lo latou tetee ma le solitulafono. …

“Sa ou vaai atu, o toeaina faamaoni o lenei augatupulaga, pe a mavae atu ma lenei olaga faaletino, e faaauau a latou galuega i le talaiina o le talalelei o le salamo ma le togiolaina.” [Tagai MFF 138:29–30, 36–37, 57.]

O le oti la, e mafai ona avea ma ala e tatala ai faitotoa i avanoa, lea e aofia ai le aoaoina i le talalelei a Keriso.⁸

I taimi o faigata, e tatau ona tatou faatuatua i le Atua.

E ui lava i le mea moni faapea o le oti e tatalaina ai faitotoa fou, ae tatou te le sailia. Ua apoapoaiina i tatou ina ia tatalo mo i latou o e mamai ma faaaoga lo tatou mana o le perisitua e faamalolo ai i latou.

“Ia aami foi toeaina o le ekalesia, se toalua pe sili atu, ma o le a latou tatalo ma faaee o latou lima i o latou luga i lo’u igoa; afai foi latou te oti, latou te oti ia te au, ae afai latou te ola, latou te ola ia te au.

“Ia outou nonofo faatasi i le fealofani, ina ia outou fetagisi ai mo e ua oti, aemaise lava mo i latou e leai so latou avanoa i le toe tutu mamalu.

“O le a faapea foi, o e ua oti ia te au, o le a le tofo i le oti, aua e suamalie ia i latou;

“A o i latou o e le oti ia te au, oi talofa ia te i latou, aua e oona lo latou oti.

“O lenei foi, o le a oo mai o lē faatuatua ia te au ina ia faamaloloina, ma e lei filifilia ia oti, o le a faamaloloina.” (MFF 42:44–48.)

Ua faamautinoa mai e le Alii ia i tatou e faapea o le a faamaloloina i latou e mamai pe a faatinoina le sauniga, pe afai e lava le faatuatua, ma pe afai o le o loo ma’i “e le’i tofia e oti.” Ae tolu ni vaega e manatu i ai, lea e tatau ona faamalieina uma. E toatele e le ola e tusa ai ma sauniga, ma e toatele e le naunau pe le mafaia foi ona faaalia se faatuatua ua lava. Ae o le isi foi vaega taua: Pe afai e le’i tofia i latou ia oti.

E tatau ona oti tagata uma. O le oti o se vaega taua o le olaga. O le mea moni lava, e le o lava ona tatou tapenapena mo le suiga. O le le iloaina po o le a le taimi e tatau ona oo mai ai, atonu tatou te tauivi ai e taofiofi lo tatou ola. Ae peitai, e le tatau ona tatou fefefe i le oti. Tatou te tatalo mo e mamai, tatou te faauu i e mafatia, tatou te aioi atu i le Alii ina ia faamaloloina ma tuuitiitia le tiga ma faasaoina le ola ma tolopo le oti, ma e faapena lava, ae le faapea o se mea tau faamata’u le faavavau. …

E pei lava ona fai mai le Failauga (3:2), ou te mautinoa e i ai se taimi e oti ai, ae ou te talitonu foi e toatele tagata o e oti a o lei oo i “lo latou taimi” ona o le le faaeteete, soona faataugā o o latou tino, o le faia o ni avanoa e le talafeagai ai, po o le tuuina atu o o latou tagata i ni mea matautia, faalavelave, ma ma’i. …

E pulea e le Atua o tatou ola, taitaiina ma faamanuia i tatou, ae tuuina mai ia i tatou lo tatou faitalia. E mafai ona tatou ola i o tatou olaga e tusa ai ma lana fuafuaga mo i tatou po o lo tatou faapuupuuina foi pe faamutaina faavalevalea.

E sa’o lo’u mafaufau faapea ua uma ona fuafuaina e le Alii lo tatou taunuuga. E i ai se taimi o le a tatou malamalama atoatoa i ai, ma pe afai tatou te toe tepa i tua mai se vaaiga lelei o le lumanai, e ao ona faamalieina i tatou i le tele o mea e tutupu i lenei olaga lea e matuai faigata lava mo i tatou ona malamalama i ai.

E i ai nisi taimi tatou te mafaufau ai e fia iloa po o a mea o loo i luma atu, ae o mafaufauga manino e mafua ai ona tatou taliaina le olaga i aso taitasi ma taimi taitasi ma faalauteleina ma faamamalu i aso taitasi. …

Na tatou iloaina ae tatou te le’i fananau mai faapea ua tatou o mai i le lalolagi ia maua ni tino ma le malamalama ma ia tatou maua le olioli ma faanoanoaga, o le tiga ma le mafanafana, faigofie ma le faigata, malolosi ma le ma’i, manumalo ma le toilalo, ma na tatou iloa foi o le a tatou oti. Na tatou taliaina nei mea uma ma le loto fiafia, ma naunau e taliaina mea e manaomia ma mea e le manaomia. Sa tatou naunau e taliaina le avanoa e o mai ai i le lalolagi e ui lava atonu o le a na o se aso po o se tausaga. Atonu tatou te le’i popole tele pe tatau ona tatou oti i ma’i, o faalavelave, pe ona ua afu le soifua lava ia. Sa tatou naunau e taliaina le ola ina ua oo mai ma a o mafai ona tatou faatulagaina ma puleaina, e aunoa ma le tomumu, faitio, po o ni tuua’iga e leai ni mafuaaga.

I le feagai ai ma faalavelave ua manino mai e tatau lava ona tatou tuu atu lo tatou faatuatuaga i le Atua, i le iloaina lea e ui lava i le gata mai o la tatou vaai ae o le a le gata ai ona faamoemoega. E ui i faafitauli uma, ae ua tuuina mai e le olaga ia i tatou se avanoa maoae e tuputupu ae ai i le atamai, faatuatua ma galuega, ma le saunia e toe foi atu ma maua le mamalu o le Atua.⁹

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Aisea e le puipuia ai i tatou e le Alii mai faanoanoaga ma puapuaga uma? (Tagai itulau 13–15.)
Suesue ia itulau 15–17, vaai po o le a le mea semanu tatou te misia pe afai e le faatagaina i tatou e le Alii ina ia tatou oo i tofotofoga. E tatau faapefea ona tatou tali atu i o tatou faigata ma puapuaga? Na faapefea ona faamalosia oe e le Alii i ou tofotofoga?
Faitau le parakalafa lea e amata “E oona i nisi tagata … ” i le itulau 19. Aisea e matuai faigata ai lava ona vaai atu i e pele o mafatia? O le a se mea e mafai ona tatou faia ina ia aloese ai mai le lototiga po o le lotovaivai i taimi faapea?
Toe iloilo ia itulau 16–20, e vaai ai mo aoaoga e uiga i faamanuiaga a le perisitua. O anafea na e molimauina ai le mana faamalolo po o le faamafanafana o le perisitua? O a ni auala e mafai ona tatou tali atu ai pe a tatou iloa e le o le finagalo o le Alii le faamaloloina po o le tolopoina o le maliu o se tasi e pele ia i tatou?
E faapefea ona e faamalamalamaina ia aoaoga a Peresitene Kimball e uiga i le oti o se tamaitiiti?
Na aoao atu Peresitene Kimball, “I le feagai ai ma faalavelave ua manino mai e tatau lava ona tatou tuu atu lo tatou faatuatuaga i le Atua” (itulau 22). Afai e faatuatua se tagata i le Atua, o le a le mea e mafai ona ia faia i se taimi o tofotofoga?

Mau e Faatatau I Ai: Salamo 116:15; 2 Nifae 2:11–16; 9:6; Alema 7:10–12; MFF 121:1–9; 122:1–9

Kimball siblings — O Spencer W. Kimball ma nai ona tei, pe tusa o le lua tausaga a o le’i maliu lona tuafafine o Fannie. Tutu, mai le tauagavale i le taumatau: Clare, Ruth, Gordon, ma Delbert. Nonofo, mai le tauagavale i le taumatau: Helen, Alice, Fannie, ma Spencer.

Abinadi — “A na fai e leai se tuaoi o lo’u mana, e ui i le gata o la’u vaai ma lo’u malamalama, atonu lava ou te faasaoina Apinati.”