Mataupu 10

Faamalolosia o i Tatou Lava e Tetee Atu i Aafiaga Amioleaga

O le talalelei a Iesu Keriso e tuuina mai ai ia i tatou le mana ma le puipuiga e tetee atu ai i amiogaleaga o o tatou aso.

Mai le Soifuaga o Spencer W. Kimball

Na aoao mai Peresitene Spencer W. Kimball e faapea o le taua e faasagatau atu ai ia Satani ma ana au “e le o se tamai taua ma se fili e le o naunau tele i ai, ae o se taua tele ma se fili e matuai malosi lava, ua matuai mauaa, ma faatulagaina lelei lea e ono solipalaina ai i tatou pe afai tatou te le malolosi, aoaoina lelei, ma mataala.”¹

A o auauna atu o se faifeautalai talavou i le Misiona a Setete Tutotonu, sa ia tusia ai i lana tusi talaaga se aafiaga na faaalia ai lona mausali e tetee atu i faaosoosoga. Sa malaga o ia i se nofoaafi agai i Chicago, Illinoi, ae tei ua alu atu se tagata ia te ia. “Sa taumafai o [ia] e faaoso a’u e faitau se tusi leaga o loo i ai ni ata mataga. Sa ou fai atu ia te ia e le manaia ia te au. Sa amata ona ia faaosoosoina au ina ia ma o ma ia i Chicago ma sa ou iloa o le a ia tosoina au i seoli. Sa ou teenaina o ia, ina ua aluese o ia sa mafai ona ou lagonaina le pei e mu ou foliga i le maasiasi mo se itula. Sa ou manatu—’Oka! e maeu le faigata o Satani, e ala i ana temoni, o loo taumafai e taitai sese tagata talavou.’ Sa ou faafetai i le Alii aua sa ou maua le malosi e faatoilalo ai.”²

Aoaoga a Spencer W. Kimball

E moni lava e i ai Satani ma o le a ia faaaogaina soo se auala e taumafai ai e faaleaga i tatou.

I nei aso o le taufaasese ma le taufaavalea, ua le gata ina faia e tagata o faamatalaga e uiga i le Atua ae ua faapea foi ona latou faia o faamatalaga e uiga i le tiapolo. E tusa ai la ma lenei talitonuga o Satani e le o se mea moni, sa avea ma mea aoga tele mo le faatumauina o tagata i le amiotonu i aso o le pogisa, ae talu ai ona o aso nei o le malamalama ma le poto ua le o toe tausisi ai i lea talitonuga. O Satani o ia lava o se tagata, o se agaga moni lava e toatasi o ia, ae leai sona tino faaletino. E leai lava se mea e eseese ai le malosi o le manao mai o Satani ia faatosina atu i tatou e fai ma ana au i le faia o le leaga, ma le naunau mai o lo tatou Tama e tusa ai ma le ala o le amiotonu ina ia faatosina atu i tatou i lona lava malo faavavau.³

E mafai ona maua le puipuiga i le iloa lea o le tulaga matautia, atoa ma le mafai ona iloa o ia faaosoosoga i soo se tulaga lava e oo mai ai. E le mafai ona moe le tiapolo. E saunia o ia i taimi uma e faasese ma fai mona i latou uma o e faavaivai, faatamala, ma fouvale.⁴

E tusa lava po o ai o loo taulai faapitoa atu i ai le tiapolo i soo se taimi, na te saili lava ina ia “malaia tagata uma e pei o ia lava” (2 Ni. 2:27). E moni lava, e saili e ia “le malaia o tagata uma” (2 Ni. 2:18). O loo mausali lava o ia i ona faamoemoega ma e atamai ma e maua’i pea i lana sailiga o i latou.⁵

Na lapatai mai Peteru: “Ia outou faautauta, ia mataala; ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ‘aina e ia” (1 Pet. 5:8).

Ma na fetalai le Faaola e faapea o e ua filifilia o le a faaseseina e Lusifelo pe afai e mafai [tagai Iosefa Samita—Mataio 1:22]. O le a faaaoga e [Lusifelo] lona malamalama e faafenumiai ma ana faatatauga e faaumatia ai. O le a ia faaufiufia ia uiga, tatalaina faitotoa e tai inisi i taimi uma, ma taitai atu ai mai le pa’epa’e atoa e oo atu i le faaefuefu seia oo atu i le uliuli patoi atoa.⁶

Ua uma ona suesueina e le matai o taufaasese ia auala uma e mafai ona ausia ai ona faamoemoega, e faaaoga ai meafaigaluega uma, o masini uma e mafai ai. Na te tauaveina, fesuia’ia, ma suia ma faafoliga ese mea uma na foafoaina mo le lelei o le tagata, … ina ia mafai ona ia pulea o latou mafaufau ma suia o latou tino ma avea ai ma ia.

E le tulemoe o ia—e maelega ma tumau. Na te iloiloina ma le faaeteete ona faafitauli ona agai lea i luma ma le maelega, ma le atamai ina ia ausia lena faamoemoega. Na te faaaogaina uma senesori e lima ma le natura masani o le fiaai ma le fia inu o le tagata e taitaiese ai o ia. E faatalitali o ia mo le faatautee atu ona ia faamalosia ai lea o ia e tetee atu i ai. Na te faaaogaina le taimi ma le avanoa ma taimi fiafia. E tausisi o ia ma faatauanau ma e tomai tele. Na te faaaogaina mea aoga e pei o leitio, televise, itulau lolomi, o le vaalele, ma le taavale e faasese ma faaleaga ai. Na te faaaogaina le lauiloa o le tagata, o lona tuua na o ia, o manaoga uma o i ai e taitaiese ai o ia. Na te faia lana galuega i le taimi sili ona aoga o nofoaga sili ona faatosina faapea ma tagata sili ona tele so latou aafiaga. E leai se mea e misi i lana vaai lea e faasese ma fesuiai ma faaleaga ai. Na te faaaogaina tupe, pule, ma le malosi. Na te faatosinaina le tagata ma osofai i ona itu e vaivai ai. Na te avea le lelei ae faatupu le leaga. … Na te faaaogaina auala eseese uma e aoao atu ai ina ia faaleaga ai le tagata.⁷

O le tiapolo e faitogafiti. E taufaasese. Na te iloa lelei lava e le mafai ona ia taitaiina ma faatosinaina alii ma tamaitai lelei ina ia latou solia vave ni tulafono ma faia ni mea leaga matautia, o lea e faifaimalie ai o ia, i le musumusuina atu o mea pepelo seia oo lava ina manumalo i le faapagotaina o i latou ma mulimuli atu ia te ia.⁸

Faatasi ai ma le fesoasoani a le Alii, e mafai ona tatou tatalia aafiaga leaga.

A faapea o le a mafai ona tatou sosola ese mai na tui matautia a le tiapolo ma taumafai ia faasaoloto ma puipuia lelei o tatou aiga mai na uunaiga matautia o loo siomia ai i latou, e tatau ona tatou maua le fesoasoani a le … Foafoa lava ia. E na o le tasi lava le auala mautinoa ma e auala mai lea i le talalelei a le Alii o Iesu Keriso ma le usiusitai i ona aoaoga loloto ma le musuia.⁹

O loo i ai se tulaga feteenai i le va o le lelei ma le leaga, i olaga o tagata uma, i le va o Satani ma le Alii. O tagata uma lava o e ua oo atu i le matua e faamasinoina ai o le valu tausaga lea, ma ua faapea foi ona papatisoina i le ala tatau faatasi ma le i ai atoatoa o le salamo, o le a maua moni lava le Agaga Paia. Afai o le a usiusitai, o le a taitaiina, musuia, ma lapataia, ma faatamaia e lenei sui o le Aigaatua ia uunaiga a le tiapolo.¹⁰

O Ia o le e sili lona malosi nai lo Lusifelo, o ia o lo tatou maluapapa ma lo tatou malosi, e mafai ona lagolagoina i tatou i taimi o faaosoosoga. E ui lava o le Alii na te le faamalosia le aveeseina o se isi mai lea magaala po o lima o le e taufaaosooso, na te uunaiina lona agaga e musuia le ua agasala ina ia faia ma se fesoasoani faalelagi. Ma o le tagata e gauai atu i aafiaga malie ma aioiga a le Agaga ma faia mea uma i lona mana e tumau ai i se agaga salamo, ua faamautinoa atu i ai le puipuiga, mana, saolotoga ma le olioli.¹¹

Sa tauva … Satani mo le faaosoosoina o Mose. …

“Mose e, le atalii o le tagata, ina ifo mai ia ia te au,” sa faaosooso atu ai le tiapolo, faatasi ma folafolaga o lalolagi ma tamaoaiga ma le mana. …

… Na poloai atu le perofeta: “Ia e alu ese ia Satani. … ” (Mose 1:16.) O le [tiapolo] pepelo, o le [tiapolo] taufaaosooso, sa le naunau e tuuese atu lenei tagata, o lea, i le inaina ma le ita tele na “alaga leotele ai, ma tatu i luga o le eleele ma faapea mai: O au o le Atalii e Toatasi na Fanaua, ifo mai ia ia te au.” (Mose 1:19.)

Sa iloa e Mose le taufaasese ma iloa atu le mana o le pouliuli ma le “malaia o seoli.” O se malosiaga lenei sa le faigofie ona taulimaina pe tuliesea. O lona fefe, sa ia valaau atu ai i le Atua, ona tuuina mai ai lea o se mana fou:

“E le tuua ona ou valaau atu i le Atua … aua sa i ou luga lona mamalu, o le mea lea ua mafai ai ona ou iloa le eseesega o ia ma oe. … I le suafa o le Alo e Toatasi na Fanaua, ina alu ese atu ia oe Satani.” (Mose 1:18, 21.)

E oo lava ia Lusifelo, … le fili tupito o tagata, e le mafai ona tatalia le mana o le perisitua o le Atua. Sa gatete, sa luluina, sa tagi ma le aue, ma le lilivau o nifo, ma sa ia alu ese atu mai luma o Mose lea na manumalo.¹²

E tatau ona tatou saunia e tutu atu ma le lototoa i luma o Satani … ma tetee atu i malo ma mana ma pulega a le pouliuli. Tatou te manaomia le ofutau atoatoa mai le Atua ina ia mafai ai ona tatou tutu atu ma le malosi. [Tagai Efeso 6:12–13.]¹³

“Ia oofu outou i ofutau atoatoa o le Atua,” e pei ona apoapoai mai ai Paulo [Efeso 6:11]. Faatasi ai ma lenei aafiaga ma le puipuiga faalelagi, e mafai ona tatou iloatinoina ai ia taufaasese a le tiapolo i soo se upu faatosina ma fetuunaiga ma e mafai ona tatou “tetee atu pe a oo i le aso vale, pe a uma ona outou faia o mea uma tou te tutumau ai lava.” [Tagai Efeso 6:13.]¹⁴

E le tatau ona tatou gauai atu e oo lava i nai faaosoosoga laiti.

E ulufale mai agasala mamafa i o tatou olaga, a o tatou gauai muamua atu i nai faaosoosoga laiti. E seasea lava ona oo atu se tasi i ni soligatulafono e sili atu ona mamafa e aunoa ma le gauai atu muamua i nai soligatulafono laiti. O se faataitaiga o le agasala, sa faapea mai se tasi, “O se tagata faamaoni e le faafuaseia ona lē faamaoni e faapei foi o se fanua mama e le faafuaseia lava ona vaoa.”

E matuai faigata lava i le tiapolo ona ulu atu i se faitotoa e tapunia. E foliga mai e le o ia te ia ki mo faitotoa e loka ai. Ae afai o le a i ai sina avanoa itiiti i le faitotoa, e muamua ona faamaulu i totonu lona tamatamaivae, ma e le umi lava ae sosoo atu ai ma lona vae atoa, ona sosoo atu ai lava lea ma lona tino ma lona ulu, ma oo ai lava ina oo atoa i totonu.

O lenei la tulaga e manatua ai le tala fatu e uiga i le kamela ma lona matai o e sa malaga atu i le toafa ae oo mai loa ma se matagi malosi. Sa faavave ona faatu e le tagata malaga lona faleie ma maulu loa lava i totonu, ma tapunipuni ia laufaleie e puipui ai o ia mai le maini o le oneone o loo feula mai e le matagi malosi. Sa tuu i fafo le kamela, ma a o fesasaa’i foi i lona tino, o ona mata, ma puisu le oneone lea e lelea mai le matagi, sa oo ina le mafai ona tatali e ia ma sa oo ai lava ina faatoga atu i lona matai, pe mafai ona ulu atu i le faleie.

“Ua na o au lava e ofi i le faleie,” o le tala lea a le tagata malaga.

“Ae a pe a tuu atu tau lava o si o’u isu i totonu ina ia ou le manavaina ai se ea e tumu i le oneone?” sa talosaga atu ai le kamela.

“Oi, atonu e mafai ona e faia lena mea,” sa tali atu ai le tagata malaga, ma sa ia tatalaina faavaitiiti se laufaleie ma sa tuu mai i ai i totonu le isu umi o le kamela. Sa manaia lava le faalogo a le kamela i lea taimi! Ae lei umi ae vaivai le kamela ona o le maini o oneone i ona mata ma taliga … :

“Ua matua maini lava le tau o oneone i lo’u ulu. E mafai ona tuu atu na o lo’u ulu i totonu?”

Sa toe faapea atu foi le tagata malaga, e leai se mea e afaina ai pe afai e te malie i lea tulaga, aua e mafai ona tuu le ulu o le kamela i le avanoa o loo i le tumutumu o le faleie lea na te le o faaaogaina. O lea na tuu ai loa le ulu o le kamela i totonu, ma sa faapea ona faamalieina ai le meaola—ae mo sina taimi puupuu.

“Na o o’u lima lava i luma,” sa ia toe talosaga atu ai, ma sa malie foi i ai le tagata malaga ma e lei pine ae tuu atu i totonu tauau ma lima o le kamela i le faleie. Mulimuli ane, i le faiga lava lea o le aioi atu ma talia, sa iu ai ina oo atu i totonu o le faleie le tino atoa o le kamela. Ae ua le ofi ai le toalua i totonu, ma o lea na a’a ai loa i fafo e le kamela le tagata malaga i le afa ma le matagi malosi.

E oo lava foi ina avea Lusifelo ma matai e pei o le kamela, pe afai o le a gauai atu se tasi i nai ana faiga faamalie loto i le amataga. O le a le pine ae matua taofia le malamalama, ma ua pule atoa le malosi o le tiapolo, ma o le a tapunia le faitotoa e tau atu i le faaolataga seia vagana ua salamo faamaoni ona toe tatalaina ai lea.

O loo faamamafa mai i le faataitaiga a le Faaola le taua o le le gauai atu i le faaosoosoga i sina tulaga itiiti. Pe lei silafia ea e ia le tulaga matautia a o i ai o ia i luga o le mauga faatasi ma lona uso na pau o Lusifelo, a o faaosoosoina e le matai o taufaaosooso? Semanu e mafai lava ona ia tatalaina le faitotoa ma tausua atu i le tulaga matautia i le faapea atu, “Ua lelei alii Satani, o le a ou faalogo atu i lau fautuaga. Ou te le usitai i ai, ou te le gauai i ai, ma ou te le taliaina foi—ae o le a ou faalogo i ai.”

Sa lei manatu faapena Keriso. Sa matua taofia e ia le talanoaga ma poloai atu: “Ina alu ese ia oe Satani,” o lona uiga, “Alu ese ia—alu ese ia ma ou luma—ou te le faalogo atu—ou te le manao ia te oe.” Ona tatou faitau lea, “ona tuua ai lea o ia e le tiapolo.” [Mataio 4:10–11.]

O le mea tonu lea e tatau ona tatou faia, pe afai ua sili ia i tatou le puipuia o le agasala nai lo le feagai ma le galuega sili ona faigata o le tau togafitia o le agasala. A o ou suesue i le tala e uiga i le Togiola, ma ona faaosoosoga, ou te mautinoa sa faaaoga e ia ona malosi uma e faamalosia ai ia lava, ina ia tetee atu i le faaosoosoga nai lo le tau ma le faaosoosoga ina ia faatoilaloina.¹⁵

O faaiuga sa’o i le taimi nei e fesoasoani ai ia i tatou e teena ia faaosoosoga i se taimi mulimuli ane.

O se tasi o galuega autu mo tagata taitoatasi o le faia lea o filifiliga. O le tele o taimi tatou te oo atu ai i se magaala i aso taitasi ma e ao ona tatou filifili po o fea le ala o le a tatou ui ai. O nisi ala e uumi ma faigata, ae taitai atu ai i tatou i le mea sa’o e agai atu ai i lo tatou sini faamoemoeina; o isi ala e pupuu ma lautetele, ma maua ai le fiafia, ae peitai e tau atu i le auala sese. O se mea matua taua lava le iloa tonu o o tatou faamoemoega i o tatou mafaufau ina ia le mafai e i tatou ona faaletonu pe a tau atu i le auala e tele ni magaala e ala i fesili e le talafeagai: O le fea auala e faigofie po o le sili ona fiafia i ai? po o le, O le fea auala o loo ui atu ai isi tagata?

O filifiliga sao e faigofie lava ona faia pe afai e lelei ona tatou faia ao lei taitai ona oo mai lena taimi, ma ia i ai ni faamoemoega patino i o tatou mafaufau; ma o lenei mea o le a mafai ona laveaiina ai i tatou mai le faanoanoa e oo mai pe a tau atu i se magaala lavelave, pe oo foi ina vaivai i tatou ma faaosoosoina.

A o o’u laitiiti, sa tonu i lo’u mafaufau o le a le mafai lava ona ou tofo i le lauti, kofe, tapaa, po o le ava malosi. Sa ou iloa lava le taua tele o lenei filifiliga na ou faia ma sa faapea ona laveaiina ai au i le tele o taimi i le tele o mea eseese na oo mai ia te au. E tele lava ni faatasiga na ou i ai sa oo mai ai ia te au ni faaosoosoga malolosi ina ia ou tago atu i ia mea, peitai ona o le tonu maumaututu na faia i lo’u loto sa mafai ai ona tumau ma maua le malosiaga e tetee atu ai i le leaga.

… O le taimi lava lenei e filifili ai e mafuta e faavavau ma lo tatou Tama e sili atu nai lo se isi mea, ina ia faia filifiliga uma ma le faamoemoe maualuga ia aua nei i ai se mea e faalavelave i lo tatou mauaina o lena sini silisili.¹⁶

Ia atiina ae le pulea o oe lava ia, ina ia saga faateleina, ia e le tau faia ai se faaiuga ma toe tau filifili foi po o le a le mea e te faia pe a oulua feagai ma lea lava tofotofoga e tasi i lea taimi ma lea taimi. E ao lava ona tasi lau faaiuga e fai mo nisi mea!

O se faamanuiaga tele le saoloto mai i le saga tiga pea i se faaosoosoga. O le faia o lea mea e alu ai le taimi, ma e matua lamatia ai foi.¹⁷

E i ai nisi o mea e mafai ona tasi lava ona tatou tuleieseina, ma uma ai lava! E mafai ona tatou faia se filifiliga se tasi e uiga i ni mea patino o le a tatou tuuina i totonu o o tatou olaga ma tatou tumau ai—e aunoa ma le popole umi ma tau filifili faaselau pe o se a se mea tatou te fai, a o le a foi se mea tatou te le faia.

O le le mautonu ma le lotovaivai o siosiomaga ia e nofo ai le Tiapolo ma galue ai, e mafai ona ia faatupuina le tele o e manunua mai tagata i siosiomaga na. … Afai e te lei faia nei, ia filifili nei loa e fai!¹⁸

E maeu le matagofie o le a i ai pe afai e mafai ona tatou fai atu i tama ma teine uma o le Au Paia o Aso e Gata Ai ina ia fai nei loa lana faaiuga po o le taimi foi a o laitiiti ina ia faapea atu, “O le a ou le gauai atu lava ia Satani po o soo se tasi e manao e faaleagaina lo’u tagata.”¹⁹

O le taimi e tatau ona motusia ai le ui i ala leaga, o le taimi lea a o lei amata ona ui ai. O le mea lilo e maua ai le olaga lelei o le puipuia lea. O i latou o e gauai atu i le leaga, o i latou ia ua latou tuuina atu i latou lava i se tulaga matautia.²⁰

Tatou te teteeina le tiapolo pe a tatou faailoa atu o tatou vaivaiga ma tauivi ina ia faatoilaloina.

O lo’u ola a’e i le faatoaga, ua ou iloa ai afai e sosola i fafo puaa, e muamua lava ona ou vaavaai i pu na ui ai muamua i latou i fafo. Afai e alu i fafo le povi e saili se vaomua i se isi mea, ou te iloa le mea e saili muamua i ai le vaega na sola ese mai ai. E maua lava i le mea na oso ai muamua i fafo mai le pa, po o le mea na leaga o le pa. Ua faapea foi ona iloa e le tiapolo le mea e faaosooso mai ai, le mea e ui mai ai ana uunaiga malolosi. Ua maua e ia le mea e osofaia gofie. O le a faigofie ona faaosoosoina le tagata e ala i le mea na vaivai ai o ia muamua.²¹

E foliga mai o loo siomia pea i tatou i le tiapolo. … O le mea lea ua tatau ai ona tatou mataala i taimi uma. Fai se lisi o o tatou vaivaiga, ona tatou taumafai lea ia faatoilaloina.²²

O le toatele o i tatou e i ai ni vaega vaivai e mafai ona manumalo ai ni faigata ia i tatou, sei vagana ua fai lelei ni o tatou tui puipui. …

O loo i ai foi i le talafaasolopito le tele o … faataitaiga o le malosi ma le mimita, i le tulaga i tagata taitoatasi, faapea foi i malo na faatoilaloina, ina ua osofaia i vaega e vaivai ai. Talu ai ona o nei vaega vaivai e masani lava ona vaaia i le tulaga faaletino, ua iloa lelei ai lava e Lusifelo ma i latou o e mulimuli ia te ia amioga, vaivaiga, ma vaega e vaivai e mafai ona faaumatia ai tagata uma ma faaaoga na vaega e taitaiina ai i tatou i le faafanoga faaleagaga. Atonu o se tasi tagata o le naunau i le ava; atonu foi o le isi e naunau i le ‘ai; o le isi ua faatagaina ona tuinanau i teine po o tama foi e manumalo ia te ia lava; o le isi e tuinanau i tupe, faapea ma mea matagofie ma mea faamalieloto, e mafai ona faatauina ai; o le isi ua tuinanau i le fia maua o le malosi; ma isi lava tulaga.²³

Ia tuu atu ia te ia o le o loo i ai ni faamoemoega faatiapolo ina ia faamaoni ma faailoa atu ona vaivaiga. Ou te tauina atu ia te outou e lei tuuina e le Alii se agasala i totonu o o tatou olaga. Na te lei faia lava se tagata ia amioleaga. … Sa faatagaina le agasala i le lalolagi, ma sa faatagaina Satani e faaosooso i tatou, ae ua i ai lo tatou filifiliga saoloto. E mafai ona tatou agasala pe ola amiotonu foi, ae le mafai ona tatou sosola ese mai le tiutetauave. O le tuuaia o a tatou agasala i le Alii, i le faapea atu o se mea na tuufaasolo ma e le mafai ona puleaina, e matuai taugofie lava ma palaai. O le tuuaia o a tatou agasala i luga o o tatou matua ma le tausiga o i tatou o se auala lea a se tagata sola. E mafai ona toilalo matua o se tasi; o o tatou lava tulaga atonu sa le mautonu, ae o le avea ai ma atalii ma afafine o se Atua soifua ua maua ai i totonu o i tatou le mana e tutulai ae ai i luga o o tatou tulaga, ina ia suia ai o tatou olaga.²⁴

Matou te talosaga atu i o tatou tagata i soo se mea, “O le mea lea ia outou gauai ai i le Atua. Ia outou tetee atu i le tiapolo, ona sola ese ai lea o ia ia te outou.” (Iakopo 4:7.) …

Atonu o loo i ai nisi o loo i ai ni o latou lagona faaletonu faalauaitele ona o taualumaga ma tulaga o le lalolagi atoa ma tulaga faatuputeleina a le tiapolo, ae ua fetalai mai le Alii, “… afai ua saunia outou o le a outou le matatau ai lava” (MFF 38:30), ma toe fetalai mai foi, “Ou te tuuina atu ia te outou le manuia. … Aua le atuatuvale o outou loto, aua foi tou te matatau.” (Ioane 14:27.)²⁵

E tatau lava ia i tatou o le Au Paia o Aso e Gata Ai ona mataala. O le auala e puipuia ai tagata taitoatasi ma aiga taitasi mai ma’ata ma ufanafana a le Tiapolo ma saunia ai mo le aso tele o le Alii o le pipiimau lea i le aiuamea, ma faaaoga le faatuatua malosi, ia salamo i a tatou agasala ma vaivaiga, ma ia galulue punouai i le galuega a Lona malo i le lalolagi, O Le Ekalesia a Iesu Keriso o le Au Paia o Aso e Gata Ai. E na o le pau lea o le auala e maua ai le fiafia moni mo fanau uma a lo tatou Tama.²⁶

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

O fea aoaoga a Peresitene Kimball e uiga ia Satani ma ana metotia e te iloaina e aoga tele ae aisea foi? (Tagai itulau 117–120.)
Toe iloilo le vaega o loo amata i le itulau 120. O a ni auala e mafai ai e le Alii ona fesoasoani ia i tatou e tatalia le tiapolo? (Mo se faataitaiga, tagai i le tala o loo i le itulau 103.) O anafea na e mauaina ai lea ituaiga o fesoasoani?
Faitau le tala o loo i le itulau 122. O le a sou manatu aisea na faataga ai e le tagata malaga le kamela i totonu o lona faleie? Ia manatunatu i le auala na teena ai e le Faaola ia faaosoosoga (tagai itulau 122–123). O a nisi o auala e mafai e matua ona fesoasoani ai ia latou fanau ia iloa ma tetee atu e oo lava i nai faaosoosoga laiti?
Toe iloilo le parakalafa atoa lona lua o loo i le itulau 108. Faatusatusa le faagasologa o le teenaina o le agasala ma le faagasologa o le foiaina.
Na saunoa Peresitene Kimball, “O filifiliga sao e faigofie lava ona faia pe afai e lelei ona tatou faia ao lei taitai ona oo mai lena taimi” (itulau 124). E mafai faapefea ona aafia o tatou olaga i le vave faia o faaiuga ina ia tausia ia poloaiga e pei o le Upu o le Poto? (Mo se faataitaiga, tagai itulau 124.) O a nisi o faaiuga e faatatau i le ola ai i le talalelei lea e te lei faia lava i ai se fesuiaiga?
Manatunatu i mea na matauina e Peresitene Kimball i ana puaa ma lana povi (itulau 125–126). O le a se mea tatou te maua e ala i le faailoaina atu o o tatou vaivaiga ma taliaina le tiutetauave mo ia vaivaiga?

Mau e Faatatau I Ai: 1 Korinito 10:13; 1 Nifae 15:23–25; Helamana 5:12; Eteru 12:27; MFF 10:5

woman thinking — Na aoao mai Peresitene Kimball afai o le a tatou gauai atu i “aafiaga lelei ma aioiga a le Agaga,” o le a faamanuiaina i tatou i le “puipuiga, mana, saolotoga ma le olioli.”

family studying scriptures — Na saunoa Peresitene Kimball e faapea, ina ia mafai ona puipuia i tatou mai le tiapolo, e moomia ona tatou “pipiimau i le aiu’amea.”