Ecce Homo, saunia e Antonio Ciseri

Iuni 17–23.

Mataio 27; Mareko 15; Luka 23; Ioane 19

“Ua Mae’a”

Amata lau tapenaga i le faitauina o le Mataio 27; Mareko 15; Luka 23; ma le Ioane 19. Saili ma le lototatalo ia malamalama i manaoga o tamati.

Tusifaamaumau Ou Lagona Uunai

Valaaulia le Fefaasoaai

Tuu atu i tamaiti taitasi e uu se ata mai le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. A o uuina le ata, e mafai e tamaiti taitoatasi ona faasoa mai se mea na te iloa pe na faapefea ona maliu Iesu.

Aoao atu Aoaoga Faavae

Tamaiti Laiti Ifo

Mataio 27:11–66; Luka 23; Ioane 19

Talu ai na maliu Iesu mo au, ua mafai ona ou toetu.

E ono le fiafia tamaiti laiti i le tala o le Faasatauroga o Iesu. “Mataupu 52: O Faamasinoga o Iesu” ma le “Mataupu 53: Ua Faasatauroina Iesu,” Tala o le Feagaiga Fou, 133–38, po o vitio e o faatasi ai (LDS.org) ua aumaia ai se faataitaiga lelei o le ala e mafai ona e faasoa lelei atu ai lenei tala ia i latou.

Gaoioiga e Mafai Ona Fai

• Faaali atu le ata o i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga a o e faamatala atu e uiga i le faamasinoga o Iesu, Faasatauroga, ma le tanuga (tagai foi Tusi Ata o le Talalelei, nu. 57 ma le 58). Valaaulia tamaiti e faasoa mai mea ua latou iloa e uiga i nei mea na tutupu. Faamamafa atu o le aso lona tolu, sa toetu ai Iesu, o lona uiga ua toe ola mai o Ia.

• Fai i tamaiti e ta’u mai ni mea e fai e o latou matua mo i latou ona e le mafai ona latou faia mo i latou lava. Faaali atu se ata o le Faaola. Faamalamalama atu ona o Iesu, ua mafai ai ona tatou toetutu—o se mea e le mafai ona faia e i tatou lava.

• Faaali se ata o se tagata e te iloa ua oti. Faasoa atu lau molimau ona o Iesu o le a toe ola ai lena tagata.

O Le Tanuga, saunia e Carl Heinrich Bloch.

Mataio 27:26–37; Luka 23:34

E mafai ona ou faamagalo atu i isi e pei ona sa faia e Iesu.

E faapefea ona e fesoasoani i tamaiti ia malamalama pe faapefea ona faamagalo atu ia i latou o e agaleaga mai, e pei ona sa faia ai e Iesu?

Gaoioiga e Mafai Ona Fai

• Faamatala pe na faapefea ona agaleaga fitafita ia Iesu (tagai Mataio 27:26–37), ona faitau lea o le Luka 23:34. Faamalamalama a tatou faamagalo atu i isi, ua tatou aveesea o tatou lagona leaga ia i latou ae faaali atu i ai le alofa.

• Faasoa ni vaaiga o fai atu ai pe faia se mea leaga e se tasi i se isi. Valaaulia tamaiti e faailoa mai pe faapefea ona latou faamagalo atu lena tagata.

• Tusi ni upu po o fasifuaitau mai le “Fesoasoani Mai Ia Te Au Tama Pele,” Tusipese a Tamaiti, 52, i le laupapa. Valaaulia tamaiti e usu faatele le pese, tape ni nai upu i taimi taitasi seia oo ina latou maua le pese atoa. E tusa ai ma le pese, o ai e tatau ona tatou faamagalo atu? O ai e mafai ona fesoasoani ia i tatou pe a faigata ona faamagalo atu?

• Sailiili i se lomiga talu ai nei o le Friend po o le Liahona e sue ai se tala e uiga i se tamaitiiti na faamagalo atu i se tasi. Faasoa atu lenei tala i tamaiti.

Luka 23:32–33, 39–43

Ona sa puapuagatia Iesu ma maliu mo au, ua mafai ona ou salamo ma faamagaloina au.

E ui o tamaiti i lalo ifo o le valu tausaga e lei oo ina latou tali atu mo i latou lava, ae e taua mo i latou ona amata aoao i le taimi nei e salamo i filifiliga sese latou te fai.

Gaoioiga e Mafai Ona Fai

• Aotele le Luka 23:32–33, 39–43, ma ta’u mai tagata gaoi e toalua i le ata 57 i le Tusi Ata o le Talalelei. Faamalamalama ina ua taufaifai le pagota muamua ia Iesu, sa ta’u sa’o atu e le pagota lona lua le mea sese na ia faia—ua amata ona salamo.

• Faitau le Mataupu Faavae ma Feagaiga 19:16 i tamaiti. Aisea na puapuagatia ai Iesu mo i tatou?

• Faaali le vitio “The Shiny Bicycle” (LDS.org). Faamalamalama atu e mafai e le Tama Faalelagi ma Iesu Keriso ona fesoasoani ia i tatou e foia a tatou agasala ma mea sese ma maua le faamagaloga.

• Tuu i tamaiti e fai ni maka i sioka i le laupapa e faatusa i filifiliga sese. Ona fai lea i ai e tape le laupapa e faatusa i le salamo. Faaali se ata o le Faaola, ma molimau atu e mafai ona tatou salamo ona o Ia.

Aoao atu Aoaoga Faavae

Tamaiti Matutua Atu

Mataio 27:11–66; Luka 23; Ioane 19

Na maliu Iesu mo au aua e alofa o Ia ia te au.

Aisea e te faafetai ai ona sa maliu Iesu mo oe? Mafaufau pe mafai faapefea ona e fesoasoani i tamaiti ia malamalama i le taua o le taulaga a le Faaola mo i latou.

Gaoioiga e Mafai Ona Fai

• Lisi mea autu na tutupu mai le Mataio 27:11–66 (mo se fesoasoani i le faia o le mea lea, tagai “Mataupu 52: O Faamasinoga o Iesu” ma le “Mataupu 53: Ua Faasatauroina Iesu,” Tala o le Feagaiga Fou, 133–38). Valaaulia tamaiti e suesue fuaiupu nei ma faatulaga sa’o mea na tutupu.

• Faaali vitio Jesus Is Condemned before Pilate” ma le “Jesus Is Scourged and Crucified” (LDS.org). (Tagai foi “The Atonement,” LDS.org.) Aisea na naunau ai Iesu e mafatia mo i tatou?

• Fai i se tamaitiiti e faitau le Mataio 27:54, ma valaaulia tamaiti e faasoa mai ni mea e uiga ia Iesu lea e fesoasoani ia i latou e iloa ai o Ia o le Alo o le Atua.

• Fai i tamaiti po o a mea ua latou aoao e uiga i le Faasatauroga mai le “E Ua Maliu le Faaaola,” Viiga, nu. 99, po o se isi viiga.

Mataio 27:26–37; Luka 23:34

E mafai ona ou faamagalo atu i isi e pei ona sa faia e Iesu.

E mafai ona faigata ona faamagalo atu i isi. O le a faamanuiaina tamaiti e te faiaoga ai pe a latou mulimuli i le faataitaiga a le Faaola ma faamagalo atu i tagata uma.

Gaoioiga e Mafai Ona Fai

• Valaaulia tamaiti e feauaua’i e faitau e uiga i fitafita agaleaga ia Iesu i le Mataio 27:26–37 ae na faamagalo atu e Iesu i latou i le Luka 23:34. (Tagai i le malamalamaaga o loo maua mai i le Faaliliuga a Iosefa Samita i le Luka 23:34, vaefaamaalaga c.) O le a se mea ua tatou aoao mai le faataitaiga a Iesu?

• Tusi i le laupapa le O le a se mea e mafai ona e fai e faamagalo atu ai se tasi e agaleaga mai ia te oe? Tuu i tamaiti e feauaua’i e tusi ni manatu i le laupapa, e pei o le Tatalo ia maua ni lagona alofa i se tagata po o le Mafaufau i se mea lelei e uiga i lena tagata.

• Valaaulia tamaiti e tusi ni ata o taimi na agaleaga atu ai se tasi ma pe faapefea ona latou faamagalo atu i lena tagata. Tuu atu e faasoa mai i le vasega a latou ata.

Luka 23:32–33, 39–43

Ona sa puapuagatia Iesu ma maliu mo au, ua mafai ona ou salamo ma faamagaloina au.

O lenei lesona o se taimi lelei lea e molimau atu ai talu ai ona o Iesu Keriso, ua mafai ona tatou salamo i a tatou agasala ma faamagaloina.

Gaoioiga e Mafai Ona Fai

• Valaaulia se tamaitiiti e faitau le Luka 23:32–33, 39–43. Faamalamalama atu o tagata e toalua na faasatauro faatasi ma Iesu o tagata gaoi. Na faapefea ona faaalia e se tasi o tagata gaoi ua amata ona salamo?

• “E mafai ona faamagaloina au pe a ou salamo ona o le Togiola a Iesu Keriso.” Tuu atu i tamaiti ni faaataataga e fesoasoani ia i latou e faatumu ia avanoa.

• Valaaulia se tamaitiiti e uu se taga, ma faatumu i ni tama’i maa ae ta’u atu e isi tamaiti ni filifiliga sese e mafai e se tagata ona fai. Fesoasoani i tamaiti e faatusatusa le taga i avega faaleagaga tatou te tauaveina pe a tatou agasala. E faapefea ona pei le salamo o le aveeseina o maa mai se taga?

• Faaaoga le tala “You Can Repent and Forgive” (Friend, Aug. 2015, 10) e aoao ai tamaiti pe faapefea ona salamo.

Fautuaina le Aoaoina i le Aiga

Fautuaina tamaiti e mafaufau i se tasi e tatau ona latou faamagaloina ma filifili se mea se tasi latou te faia e faaali atu ai i lena tagata ua latou faamagaloina i latou.

Faaleleia o Lo Tatou Aoao Atu

Aoao ia iloa faaaliga. O faaaliga e tele ina oo mai “fuaitau i luga o lea fuaitau” (2 Nifae 28:30), ae le oo mai uma i le taimi e tasi. A o e tatalo ma manatunatu loloto i mau mai lenei otootoga, o le a e iloa ai o manatu ma uunaiga e mafai ona oo mai i soo se taimi ma i soo se mea—a o e malaga i le galuega, fai au feau i le fale, pe fegalegaleai foi ma aiga ma uo.