O Le Afio Mai Faalua, saunia e Harry Anderson.

Me 27–Iuni 2

Iosefa Samita—Mataio 1; Mataio 25; Mareko 12–13; Luka 21

“O Le Atalii o le Tagata Ua Sau”

Manatunatu loloto pe o a mea e manaomia ona aoao e tamaiti o loo e faiaoga ai e uiga i le Iosefa Samita—Mataio 1; Mataio 25; Mareko 12–13; ma le Luka 21. Fetuunai manatu o tamaiti matutua atu pe a e manao ai, i le otootoga lenei mo tamaiti laiti ifo ma isi foi.

Tusifaamaumau Ou Lagona Uunai

Valaaulia le Feafaasoaai

Faaali atu se ata e fesootai ma se tasi o tala i le faitauga o le vaiaso lenei (pei o le ata o taupou e toasefulu mai le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). Tuu atu i tamaiti e faasoa mai mea latou te iloa e uiga i le tala.

Aoao atu Aoaoga Faavae

Tamaiti Laiti Ifo

Iosefa Samita—Mataio 1:31

A o lei toe afio mai Iesu, o le a folafola atu le talalelei i le lalolagi uma.

Fai mai Iesu a o lei toe afio mai o Ia, o le a folafola atu le talalelei i le lalolagi uma. E mafai ona fesoasoani tamaiti e faataunuu lenei valoaga e ala i le faasoa atu o le talalelei.

Gaoioiga e Mafai Ona Fai

• Faaali se faafanua, kelope, poo se ata o le lalolagi (tagai Tusi Ata o le Talalelei, nu. 3) ma fesoasoani i tamaiti e fai mai, “O lenei Talalelei … o le a folafola atu i le lalolagi uma” (Iosefa Samita—Mataio 1:31). Aisea ua finagalo ai le Atua i Ana fanau uma e faalogo i Lana talalelei?

• Valaaulia tamaiti e savavali faafitafita i le mea o tutu ai ao usuina faatasi le “Ou Te fia Avea ma Faifeautalai i le Taimi Nei” ma le “Tofia E Auauna,” Tusipese a Tamaiti, . Valaaulia faifeautalai faamisiona po o faifeautalai faatoa maea mai e faasoa mai o latou aafiaga i le faasoaina atu o le talalelei ma fesoasoani ai i tamiti e mafaufau i auala e mafai ai ona latou faasoa atu le talalelei.

Atapue mai le faaaloaloga a NSA Johnson Space Center

Mataio 25:14–30

E mafai ona ou faaaogaina meaalofa na aumai e le Atua ia te au

Ua iloa e tamaiti a latou meaalofa ma tomai. Fesoasoani ia latou malamalama o nei meaalofa ma tomai e mai le Tama Faalelagi.

Gaoioiga e Mafai Ona Fai

• Aumai ni tupe siliva e faaaoga a o e faamatalaina le faataoto i taleni, o loo maua i le Mataio 25:14–30. E mafai ona e fai i ni tamaiti se toatolu e fai ma auauna e toatolu. Faamalamalama i ona po o Iesu, o taleni sa faatusa i tupe, a o aso nei o taleni e mafai ona faauiga i a tatou meaalofa ma tomai.

• Fai i tamaiti e ta’u mai ni auala sa fesoasoani atu ai o latou matua, tei, faiaoga, po o uo ia te i latou. O a tomai o nei tagata ua fesoasoani ai ia te i latou e auauna atu ai i isi?

• Tusi sina faaupuga i se pepa e ta’u atu ai i tamaiti taitoatasi meaalofa ma tomai ua e matauina ia i latou. Afifi ia pepa ua tusia faaupuga e pei o se meaalofa ma valaaulia tamaiti e tatala a latou “meaalofa.” Fautuaina i latou e faaleleia a latou meaalofa ma faaaoga e auauna atu ai i isi.

Mataio 25:31–46

E manao Iesu ou te auauna atu i isi.

Tatou te auauna atu i le Tama Faalelagi ma Iesu Keriso e ala i le auauna atu i tagata o loo siomia ai i tatou. E oo lava i tamaiti laiti e mafai foi ona auauna atu i isi.

Gaoioiga e Mafai Ona Fai

• Aotele le faataoto i le Mataio 25:34–46. Fesoasoani i tamaiti ia malamalama a tatou auauna atu i isi, ua tatou auauna atu lea ia Iesu.

• Tuu i luga se ata o se tamaitiiti i lau vasega faatasi ma se ata o Iesu o loo nana ai i tua. O le a se mea e mafai ona tatou faia e auauna atu ai i lea tamaitiitii? Aveese le ata o le tamaitiiti ma faamalamalama atu a tatou auauna atu o le tasi ma le isi, ua tatou auauna atu lea ia Iesu.

• Valaaulia tamaiti e tusi o latou lava ata o loo auauna atu i isi i auala o loo faamatala mai e le Faaola i le Mataio 25:35–36. Tuu atu i isi tamaiti e mate mai le mea o loo latou tusia.

• Valaaulia tamaiti e faasoa mai o latou aafiaga ina ua faaali atu e se tasi se auaunaga faaKeriso ia i latou po o o latou aiga.

Aoao atu Aoaoga Faavae

Tamaiti Matutua Atu

Iosefa Samita—Mataio 1:31

A o lei toe afio mai Iesu, o le a folafola atu le talalelei i le lalolagi uma.

E mafai e tamaiti o loo e faiaoga ai ona folafola atu le talalelei i le lalolagi uma a o lei Afio Mai Faalua le Faaola.

Gaoioiga e Mafai Ona Fai

• Valaaulia tamaiti e faasoa mai faamanuiaga ua latou maua pe o le a maua ona o i latou o tagata o le Ekalesia a Keriso. Faitau faatasi le Iosefa Samita—Mataio 1:31, ma fesili i tamaiti pe faapefea ona faamanuiaina e le talalelei fanau a le Atua i le lalolagi atoa.

• Faaali i tamaiti se faafanua o le lalolagi po o le tou atunuu, ma fesoasoani ia latou faailoa maia ni nofoaga sa talai ai se tagata o le aiga po o se uo le talalelei i se misiona.

• Valaaulia ni nai tamaiti e o mai sauniuni e faasoa mai pe na faapefea ona faailoa atu i lo latou aiga po o o latou tuaa le talalelei. Afai e mafai, fesili i se tasi o le uarota sa faamisiona e faasoa mai se aafiaga i le faasoaina atu o le talalelei.

• Fai i tamaiti taitasi e tusi le igoa o se tasi e mafai ona ia talanoa i ai e uiga i le talalelei pe valaaulia foi i le lotu. Fai atu foi i tamaiti e lisi mai mea e mafai ona latou fai e avea ai o ni faifeautalai i le taimi nei.

Mataio 25:1–13

Ua ia te au le tiutetauave mo lo’u lava liua i le talalelei.

O le faataoto i taupou e toasefulu ua aoao mai ai e le mafai ona tatou nonoina mai lo tatou liua i le talalelei mai isi. E mafai faapefea ona tatou fesoasoani i tamaiti e tauave le tiutetauave mo lo latou lava liua?

Gaoioiga e Mafai Ona Fai

• Fai i se tamaitiiti ma se tasi o ona matua e o mai sauniuni e faasoa mai pe na faapefea ona latou aoaoina le faataoto i taupou e toasefulu i le fale i le vaiaso nei.

• Tusi le ata o se lamepa suauu i le laupapa, ma faaigoa o le molimau. Tuu atu i tamaiti taitasi se fasipepa e foliga i se mataua o le suauu, ma fai i tamaiti taitasi e tusi ai i luga se mea o le a ia faia ia liua atili ai i le talalelei. Faapipii i ai ni mataua i le laupapa faataaliolio i le lamepa.

• Valaaulia tamaiti e fesoasoani atu ia te oe e fai se lisi o mea e fai e sauniuni ai mo se malo faapitoa. E tutusa faapefea nei mea pe ese ai foi mai auala e mafai ona tatou saunia ai faaleagaga mo le Afio Mai Faalua o le Faaola?

• I luga o ni fasipepa se lima, tusi ai mea e le mafai ona nono mai. I luga o isi fasipepa, tusi ai mea e mafai ona nono mai. Faafelilogaa’i fasipepa, ma fai i tamaiti e tuu faavasega i vaega nei e lua. Faitau le Mataio 25:1–13 Aisea e taua ai le aua nei faalagolago i isi mo lo tatou liua i le talalelei?

Mataio 25:14–46

I le Faamasinoga Mulimuli, o le a tatou tuu atu ai i le Alii se tala o o tatou olaga.

A mavae le Toetutu, o le a faamasinoina i tatou e le Atua e faavae i lo tatou usiusitai i Ana poloaiga ma le taliaina o le taulaga togiola a le Faaola. O le faataoto i taleni ma le faataoto i le mamoe ma ‘oti ua aoao ai i tatou e uiga i le Faamasinoga Mulimuli.

Gaoioiga e Mafai Ona Fai

• Tofi le afa o le vasega e faitau le Mataio 25:14–30 ae o le isi afa e faitau le Mataio 25:31–46. Fai i vaega e faatino mai ia faataoto mo le vasega.

• Valaaulia tamaiti e faitau i paga le Mataio 25:35–36 ma fai se lisi o mea e mafai ona latou fai e faaali atu ai lo latou alolofa mo Iesu.

Fautuaina le Aoaoina i le Aiga

Fai i tamaiti e faasoa atu i o latou aiga auala e mafai ona avea ai i latou ma ni faifeautalai sili atu ma talanoa i o latou aiga e uiga i tagata e mafai ona latou faasoa atu i ai le talalelei.

Faaleleia o Lo Tatou Aaoao Atu

Faalogologo pe faatino foi se tala. Talu ai e fiafia tamaiti i tala, vaavaai ni auala e faaaofia ai i latou i tala faatusi paia e te faasoa atu. E mafai ona latou uu i luga ni ata po o ni meafaitino, tusi ata o le tala, faatino ia tala, pe fesoasoani foi e faamatala le tala. Toe faamatala ia tala e fesoasoani ai ia latou iloa faamatalaga taua ma aoaoga o le talalelei.