Sakaio i le Laau o le Sukamolo, saunia e James Tissot

Me 20–26.

Mataio 21–23; Mareko 11; Luka 19–20; Ioane 12

“Faauta, E Afio Mai Lou Tupu”

A o e faitauina le Mataio 21–23; Mareko 11; Luka 19–20; ma le Ioane 12, mata’itu ia uunaiga e te maua mai le Agaga Paia. Faasino i le “Taulimaina o Manaoga o Tamaiti Laiti Ifo” i le amataga o lenei tusi lesona mo mea e mafaufau i ai a o e aoao atu nei mataupu faavae.

Tusifaamaumau Ou Lagona Uunai

Valaaulia le Fefaasoaai

Faaali atu le ata mai le otootoga o lenei vaiaso i le Sau Mulimuli Mai ia te Au—Mo Tagata Taitoatasi ma Aiga, ma valaaulia tamaiti e faasoa mai mea ua latou iloa i le mea o loo tupu i le ata.

Aoao atu Aoaoga Faavae

Tamaiti Laiti Ifo

Luka 19:1–10

E silafia e le Tama Faalelagi ma Iesu a’u i lo’u igoa.

A o e faitau e uiga i le fegalegaleaiga a le Faaola ma Sakaio, o le a se savali ua e maua ai e ono faamanuia ai tamaiti o loo e faiaoga ai?

Gaoioiga e Mafai Ona Fai

• Faaali le ata o Sakaio i luga o le sukamoro (LDS.org). Fesoasoani i tamaiti e faailoa mai Sakaio ma ta’u lona igoa. Fatufatu ni taga mo tamaiti e fai a o e faamatalaina le tala ia Sakaio ma Iesu—mo se faataitaiga, tutu tetee e autilo i luga atu o se aofia pe faafoliga o la e fe’a’ei i se laau. Faamalamalama na vaaia e le Faaola ia Sakaio ma sa ia valaau atu ia te ia i lona igoa. Molimau atu e iloa foi e le Faaola tamaiti taitasi ma o latou igoa.

• Aumai se faavaa o se ata i le vasega, pe fai foi se faavaa pepa. Valaaulia tamaiti taitasi e feauauai i le uuina o le faavaa i ona mata a o fai atu le vaega o totoe o le vasega, “E silafia e le Tama Faalelagi ma Iesu [ta’u le igoa o le tamaitiiti].

• Valaaulia tamaiti e feauauai e faafoliga o loo fe’a’ei i se laau, e pei ona sa faia e Sakaio. Ia fai atu le isi vaega o le vasega, “E silafia e le Tama Faalelagi ma Iesu [ta’u le igoa o le tamaitiiti].”

• Usu faatasi le “O Au Se Atalii O Le Atua,” Tusipese a Tamaiti, 2, ma fesoasoani i tamaiti e faalogologo mo mea e fesoasoani ia latou iloa ai e alofa le Tama Faalelagi ia i latou.

Mataio 21:12–14

O le malumalu o se nofoaga paia.

O lau molimau o le malumalu e mafai ona fesoasoani i tamaiti e te faiaoga ai ia malamalama o le malumalu o se nofoaga paia.

Gaoioiga e Mafai Ona Fai

• Faaali le ata o O Iesu o Loo Faamama le Malumalu (Tusi Ata o le Talalelei, nu. 51), ma faamatala le tala e pei ona tusia i le Mataio 21:12–14. Fesoasoani i tamaiti e sue ata o tupe ma manu i le ata. Ona talanoaina lea pe aisea na manao ai le Faaola i le au faatau tupe ma tagata na faatau a latou manu e o ese ma le malumalu.

• Faaali ata o malumalu (mo se faataitaiga, tagai Tusi Ata o le Talalelei, 117–21), ma fai i tamaiti e faasoa mai pe o a o latou lagona pe a vaai i se malumalu. Ta’u i tamaiti o na lagona o le Agaga Paia lena o loo ta’u mai ia i tatou o le malumalu o se nofoaga faapitoa. Fai i tamaiti e faatino mai faapea o loo latou i ai i totonu o le malumalu. Mo se faataitaiga, e mafai ona latou musumusu ma nonofo ma le migao. Usu faatasi le “Ou te Fia Vaai i le Malumalu,” Tusipese a Tamaiti, 99, ma valaaulia tamaiti e faatu se sini ina ia o atu i le malumalu i se aso.

O le malumalu o le maota o le Alii.

Mataio 21:28–32

E mafai ona ou usiusitai.

E finagalo le Tama Faalelagi ina ia tatou usiusitai. O le faataoto i atalii e toalua o se avanoa lea e aoao atu ai e uiga i le taua o le usitai.

Gaoioiga e Mafai Ona Fai

• Tusi se ata o atalii e toalua i le laupapa, ma faaaoga ata tusi a o e toe faamatalaina le faataoto i le Mataio 21:28–32. O le fea atalii na faia le mea sa’o i le faaiuga? Fai i tamaiti e ta’u mai ni mea e mafai ona latou faia e usitai ai i le fale. Tuu atu latou te tusia ni ata o i latou lava o faia se mea se tasi o na mea.

• Valaaulia tamaiti e faasoa mai ni o latou aafiaga ona o le usitai i o latou matua po o se isi o vaaia i latou po o se taitai. Na faapefea ona faamanuiaina i latou ona o le faamaoni? E mafai faapefea ona latou usiusitai atili i le lumanai?

Aoao atu Aoaoga Faavae

Tamaiti Matutua Atu

Luka 19:1–10

Pe a ou sailia le Faaola, o le a ou maua o Ia.

E mafai ona e faaaogaina le tala ia Sakaio e fesoasoani ai i tamaiti e mafaufau i mea e mafai ona latou faia e latalata atili ai i le Faaola.

Gaoioiga e Mafai Ona Fai

• Faitau le Luka 19:1–10, taofi pe a uma ni nai fuaiupu ma talanoaina mea ua tatou aoaoina e uiga ia Sakaio. O le a le mea sa faia e Sakaio ina ia mafai ai ona ia iloa atu Iesu? Na faapefea ona ia tali atu ina ua fai atu Iesu ia te ia e sau i lalo mai le laau? Fai i tamaiti taitasi e faasoa mai se mafuaaga se tasi o le a latou mananao ai e vaai ia Iesu. Afai e sau le Faaola i lo outou aai, o le a sau mea e fai e te saunia ai?

• Valaaulia tamaiti e mafaufau i tagata latou te iloa, e pei o Sakaio, atonu o loo sailia le Faaola. Fesili i tamaiti pe o le a se mea latou te fai e fesoasoani ai i se isi tagata e aoao e uiga i le Faaola.

• Valaaulia tamaiti e faasoa atu o latou aafiaga ina ua latou lagonaina e silafia e le Tama Faalelagi ma Iesu Keriso i latou ma e alolofa ia i latou.

Mataio 21:12–14

O le malumalu o se nofoaga paia e tatau ona ou faaaloalo i ai.

E mafai faapefea e le tala i le faamamaina e le Faaola o le malumalu ona fesoasoani ia te oe e aoao atu ai tamaiti e uiga i le paia o le malumalu?

Gaoioiga e Mafai Ona Fai

• Valaaulia tamaiti e faitau le Mataio 21:12–14. O Iesu o Loo Faamama le Malumalu (Tusi Ata o le Talalelei, nu. 51), ma fesili iai pe o le fea fuaiupu lea o loo faailoa mai i le ata. Fai i tamaiti e tusi ni ata pe o a foliga o le malumalu muamua a o lei faamamaina ma ina ua uma ona faamama.

• Valaaulia tamaiti e faasoa mai pe o a o latou lagona ina ua latou o i totonu o se malumalu, asiasi i lotoa o le malumalu, pe matamata foi i ata o malumalu. O le a se mea na fesoasoani ia i latou e iloa ai e paia le malumalu?

• Valaaulia se tasi pe sili atu ni talavou e o mai i le vasega ma talanoa mai pe na faapefea ona latou sauniuni e ulu atu i le malumalu. Afai na latou o i le malumalu, fai i ai e talanoa mai pe o a o latou lagona ina ua latou i ai iina.

• “Oti’oti se ata o le malumalu i ni fasi paso, ma tufa ia tofu le tamaitiiti ma le fasi paso. Fai i tamaiti e tusi i tua o a latou fasi paso se mea se tasi e mafai ona latou faia e saunia ai e ulu atu i le malumalu. A o faasoa mai manatu o tamaiti taitasi, faaopoopo lana fasi paso i le paso.

Mataio 23:25–28

E manaomia ona ou amiotonu i a’u taga fai ma o’u manaoga.

Na aoao atu e Iesu le au tusiupu ma le au Faresaio e uiga i le taua o le ola moni i le talalelei—e le na o le faafoliga e amiotonu. O le a se mea e ono fesoasoani i tamaiti ia malamalama i lenei upumoni?

Gaoioiga e Mafai Ona Fai

• A o e faitauina faatasi ma tamaiti le Mataio 23:25–28 mafaufau e faasoa atu lenei fauigaga o le hypocrite mai le Bible Dictionary: “O se tagata e faafoliga e lotu ae leai.” Aisea e leaga ai le avea o se tagata pepelo?

• Faaali i tamaiti se ipu e mama fafo ae palapala totonu e fesoasoani ai e faapupula mai le upu valiata o i le Mataio 23:25. E mafai faapefea ona faamautinoa ua tatou mama a’ia’i i totonu?

Fautuaina le Aoaoina i le Aiga

Fesoasoani i tamaiti e piki se mataupu faavae po o se gaoioiga mai le vasega e faasoa i o latou aiga i le fale.

Faaleleia o Lo Tatou Aoao Atu

Lagolago atu i matua o tamaiti. “O matua o faiaoga aupito taua ia mo a latou fanau—e i ai ia i latou le tiutetauave autu ma le mana silisili e tosina ai a latou fanau (tagai Teuteronome 6:6–7), A o e aoao atu tamaiti i le lotu, saili ma le agaga tatalo e lagolago atu i o latou matua i la latou matafaioi taua” (Aoao Atu i le Ala a le Faaola, 25).