Ia Fai ma Faamanatuga ia te Au, saunia e Walter Rane

Iuni 3–9.

Ioane 13–17

“Ia Tumau Pea Outou i Lo’u Alofa”

Tatalo ia iloa manaoga o tamaiti o loo e faiaoga ai a o e faitauina le Ioane 13–17 Sau, Mulimuli Mai ia te Au—Mo Tagata Taitoatasi ma Aiga ma o lenei otootoga e mafai ona fesoasoani e te malamalama ai i le aoaoga faavae ma e maua ai manatu e aoao ai tamaiti i lau vasega.

Tusifaamaumau Ou Lagona Uunai

Valaaulia le Fefaasoaai

Ina ia fesoasoani i tamaiti e faasoa mai mea latou te aoaoina i le fale, pasi faasolosolo se fatu pepa ma valaaulia tamaiti taitasi e faasoa mai se mea o loo ia faia e faaali atu ai lona alofa mo isi pe a oo i lona taimi e uu ai le fatu.

Aoao atu Aoaoga Faavae

Tamaiti Laiti Ifo

Ioane 13:1–17

E manao Iesu ou te auauna atu i isi.

O le tala ia Iesu sa mulumuluina vae o Ana Aposetolo o se faataitaiga o le auaunaga ma le lotomaualalo. E mafai faapefea ona e musuia tamaiti e mulimli i le faataitaiga a Iesu?

Gaoioiga e Mafai Ona Fai

• Faaaoga le ata i le otootoga o lenei vaiaso i le Sau Mulimuli Mai ia te Au—Mo Tagata Taitoatasi ma Aiga e fesoasoani e faamatala le tala o i le Ioane 13:1–17. Valaaulia tamaiti e ta’u mai faamatalaga mai le tala o loo i ai i ata.

• Faaali ata o Iesu o loo auauna atu i isi (tagai i le Tusi Ata o le Talalelei po o mekasini a le Ekalesia mo ni manatu). Tuu i tamaiti e feauaua’i e uu ia ata a o e faamatalaina mea o faaali mai i tala (tuu atu latou te fesoasoani i le faamatalaina o le tala pe a latou mafaia).

• Fesili i tamaiti pe o a o latou lagona pe a fesoasoani atu se tasi ia i latou. Tuu i tamaiti e tusi ia ata pe faapefea ona latou mulimuli i le faataitaiga a Iesu e ala i le auauna atu i se tasi.

Ioane 13:34–35; 14:15

E faaali atu lo’u alofa ia Iesu Keriso e ala i le tausiga o Ana poloaiga.

E mafai faapefea ona e fesoasoani i tamaiti ia malamalama o lo latou usitai o se faailoga lea o lo latou alolofa ia Iesu Keriso?

Gaoioiga e Mafai Ona Fai

• Tuu atu i tamaiti taitoatasi se fatu pepa e teuteu. Valaaulia i latou e tuu i luga a latou fatu i taimi uma e usu ai le upu “alofa” i le “Fetalai Mai Iesu E Alofa I Tagata Uma” ma le “Ia Fealofani,” Tusipese a Tamaiti, 39, 74.

• Fesoasoani i tamaiti e tauloto le Ioane 14:15 e ala i le tuu i luga o a latou fatu pepa a o latou fai mai, “pe afai tou te alolofa mai ia te au,” ma se ata o maatusi pe a ta’u le “Tausi a’u poloaiga.”

• Valaaulia tamaiti e feauauai e faatino mai se taga e mafai ona latou faia i se tasi e faaali atu ai lo latou alolofa mo Iesu. Tuu atu i isi tamaiti e mate mai le mea o loo latou faia.

• Faamaea faatasi ma tamaiti le itulau o gaoioiga mo lenei vaiaso

Ioane 14:26–27; 15:26; 16:13–14

E fesoasoani le Agaga Paia ia te au ia ou latalata atili ia Iesu.

E ui e le’i maua e tamaiti o loo e faiaoga ai le meaalofa o le Agaga Paia, ae e mafai ona latou aoao nei le ala e galue ai le mana o le Agaga Paia i o latou olaga.

Gaoioiga e Mafai Ona Fai

• Faaali le ata o le O Le Talisuaga Mulimuli (Tusi Ata o le Talalelei, nu. 54). Faamalamalama i tamaiti o le Talisuaga Mulimuli, na aoao atu ai e Iesu Ona soo e uiga i le Agaga Paia.

• Valaaulia tamaiti e tuu o latou lima i luga o o latou fatu ma luga o o latou ulu. Suesue tusitusiga paia i le Mataupu Faavae ma Feagaiga 8:2, ma faamalamalama atu e mafai e le Agaga Paia ona talanoa mai ia i tatou “i [o tatou] mafaufau ma i o [tatou] loto,” pe ala mai foi i o tatou mafaufauga ma faalogona.

• Tape moli ae uu i luga se ata. Ona ki lea o se moliuila i luga o le ata. Fesili i tamaiti pe faapefea ona pei le moliula o le Agaga Paia.

• Usu faatasi ma tamaiti le “O Le Agaga Paia,” Tusipese a Tamaiti, 56, Valaaulia i latou e faalogologo mo mea e fai e le Agaga Paia.

Aoao atu Aoaoga Faavae

Tamaiti Matutua Atu

Ioane 13:34–35; 14:15; 15:10–14

E faaali atu lo’u alofa ia Iesu Keriso e ala i le tausiga o Ana poloaiga.

A o e faitauina nei fuaitau i lau sueusega patino, mafaufau i tamaiti o loo e faiaoga ai. E faapefea ona faamanuiaina i latou pe a latou malamalama o lo latou usiusitai o se faailoga lea o lo latou alolofa mo le Faaola?

Gaoioiga e Mafai Ona Fai

• Fesoasoani i tamaiti e tauloto le Ioane 13:34–35. O se tasi o ala e fai ai le mea lea o le usu o le “Ia Fealofani,” Tusipese a Tamaiti, 136–37, ma fesoasoani i tamaiti e aoao ni taga e fetaui i ai.

• Valaaulia tamaiti e tusi i le laupapa ni auala ua faailoa mai ai e Iesu e alofa o Ia ia te i tatou. E mafai ona e faaali atu ata mai le soifuaga o Iesu e fesoasoani ai ia i latou (mo ni manatu, tagai i le Tusi Ata o le Talalelei). E mafai faapefea ona tatou faaali atu lo tatou alolofa mo isi e pei ona sa Ia faia? Valaaulia tamaiti taitasi e tu i luga ma ta’u mai se mea se tasi o le a latou “fealofani” ai (Ioane 13:34).

• Fai i se tamaitiiti e faitau le Ioane 14:16. Ia feauaua’i tamaiti e tusi ni ata e faatusa i se tasi o tausia se poloaiga, a o mate mai e le isi vaega o le vasega le ata o loo ia tusia. Mo se faataitaiga o poloaiga, tagai Mo Le Malosi o le Autalavou. E faapefea ona faaali atu i le Faaola tatou te alolofa ia te Ia i lo tatou tausia o nei poloaiga?

Ioane 14:26; 15:26; 16:13

O le Agaga Paia e taiala, faamafanafana, ma molimau atu i upumoni.

Ia ona ua toatele tamaiti ua maua le meaalofa o le Agaga Paia, e mafai faapefea ona e fesoasoani ia i latou ia malamalama atili i matafaioi a le Agaga Paia?

Gaoioiga e Mafai Ona Fai

• Tuu atu i tamaiti fuaiupu nei e faitau i paga: Ioane 14:26; 15:26; ma le 16:13. Fai i ai e sue mai upu o loo aoao ai i latou i mea e fai e le Agaga Paia. Tusi upu nei i le laupapa.

• Faasoa atu se aafiaga ina ua taiala oe e le Agaga Paia, faamafanafana oe, lapataia oe, pe molimau atu foi se upumoni ia te oe. Valaaulia tamaiti e faasoa mai soo so latou aafiaga ma le Agaga Paia. Na faapefea ona latou iloaina le tosinaga a le Agaga Paia?

• Valaaulia tamaiti taitasi e tusi ona foliga i luga o se tagapepa. Ki se moliuila, e faatusa i le Agaga Paia, i totonu o tagapepa. Ona tuu lea o mea i le ato e poloka ai le malamalama, e pei o se sikafu po o solo pepa, e aoao atu ai e mafai e a tatou filifiliga sese ona faaitiitia le tosinaga a le Agaga Paia i o tatou olaga. Tuu i tamaiti e aveese le sikafu po o solopepa mai a latou taga e faatusa i le salamo.

Ioane 15:1–8; 17:3

E finagalo le Tama Faalelagi ma Iesu ia ou iloa i La’ua!

O le a e faamanuiaina olaga o tamaiti e faavavau i lou fesoasoani ia latou iloa le Tama Faalelagi ma Iesu Keriso.

Gaoioiga e Mafai Ona Fai

• Faaali atu se laau toto a o feauaua’i tamaiti e faitau fuaiupu o i le Ioane 15:1–8. E faapefea ona avea Iesu Keriso ma vine? E faapefea ona pei i tatou o lala? O le a se mea e mafai ona tatou fai e latalata ai i le Faaola?

• Faitau leotele le Ioane 17:3. Fesili i tamaiti pe o le a la latou mea o fai ia iloa ai le Tama Faalelagi ma Iesu Keriso? Faasoa atu pe o faapefea ona e iloa i La’ua.

Ua aoao mai Keriso, “Tumau ia te au” (Ioane 15:4).

Fautuaina le Aoaoina i le Aiga

Fautuaina tamaiti e fesili i se tagata o le aiga pe o le a se mea e mafai ona latou fai e auauna atu ai ia te ia. I le taimi o le vasega i le vaiaso a sau, tuu atu i tamaiti se taimi e faasoa mai ai mea sa latou faia.

Faaleleia o Lo Tatou Aoao Atu

Fetuunai gaoioiga. Afai o e faiaoga i tamaiti laiti ifo, e mafai ona e maua manatu faaopoopo e mafai ona e fetuunaia mo lau vasega i le vaega lenei o le otootoga mo tamaiti matutua atu. E faapena foi, e mafai ona fetuunai gaoioiga mo tamaiti laiti ifo e aoao ai tamaiti matutua atu.