Ma ua Oo Mai le Po, saunia e Benjamin McPherson

Iuni 10–16.

Mataio 26; Mareko 14; Luka 22; Ioane 18

“Ae Aua Le Faia Lo’u Loto, ae o Lou Finagalo”

A o e faitauina le Mataio 26; Mareko 14; Luka 22; ma le Ioane 18, vaavaai mo mataupu faavae e te manatu e manaomia ona malamalama ai tamaiti.

Tusifaamaumau Ou Lagona Uunai

Valaaulia le Fefaasoaai

Faaali ata o mea o loo tutupu i nei mataupu, e pei o le Tusi Ata o le Talalelei, nu. 54, 55, ma le 56, ma valaaulia tamaiti e ta’u mai mea o tutupu i ata.

Aoao atu Aoaoga Faavae

Tamaiti Laiti Ifo

Mareko 14:22–25; Luka 22:19–20

E fesoasoani le faamanatuga ou te mafaufau ai ia Iesu.

Fesoasoani i tamaiti ia malamalama o le aai ma feinu i le faamanatuga o se avanoa lea e mafaufau ai ia Iesu.

Gaoioiga e Mafai Ona Fai

• Aotele le tala ia Iesu o amatalia le faamanatuga. E mafai ona e faaaogaina le “Mataupu 49: O Le Uluai Faamanatuga,” Tala o le Feagaiga Fou, 124–26, po o le vitio e o faatasi ai (LDS.org). Tagai foi i le vitio “Sacrament” (LDS.org). Fesoasoani ia malamalama tamaiti tatou te manatua Iesu i le taimi o le faamanatuga.

• Fesili i tamaiti pe latou te iloa le mea o faatusa i ai le falaoa ma le vai o le faamanatuga. Faamalamalama o nei faatusa ua fesoasoani tatou te manatua ai na maliu Iesu mo i tatou ma sa toetu mai le oti. Faaali se fasi falaoa ma se ipu vai ao e fesoasoani i tamaiti e tauloto le fasifuaitau “E fai ma faamanatuga ia te [Ia]” (Luka 22:19).

• Fai i tamaiti e moeiini ma mafaufau i se tasi e alolofa i ai, ona valaaulia lea o i latou e ta’u atu se mea e uiga i lena tagata. Fai i ai e toe moeiini, mafaufau i le Faaola, ona faasoa mai lea o ni mea latou te iloa e uiga ia te Ia. Fautuaina i latou e mafaufau ia Iesu i le taimi o le faamanatuga i vaiaso taitasi.

• Valaaulia tamaiti e faataitai mai mea e mafai ona latou fai e manatua ai Iesu ma migao i le taimi o le faamanatuga.

• Fesoasoani i tamaiti e fai le tamaitusi o loo faamatala atu i le itulau o gaoioiga o lenei vaiaso. Fautua atu ia latou faaaogaina e fesoasoani ai ia i latou e mafaufau e uiga ia Iesu i le taimi o le faamanatuga.

• Fesoasoani i tamaiti e saili i mekasini a le Ekalesia ni ata o Iesu ma fai se fatufatuga o nei ata e tilotilo i ai i le taimi o le sauniga faamanatuga.

Mataio 26:36–46

Na puapuagatia Iesu mo au aua e alofa o Ia ia te au.

Mafaufau pe mafai faapefea ona e fesoasoani i tamaiti ia lagonaina le alofa o Iesu mo i latou a o outou talanoaina le tala i Ona mafatiaga i Ketesemane.

Gaoioiga e Mafai Ona Fai

• Valaaulia tamaiti e mafaufau i se taimi na latou lagonaina ai le faanoanoa po o le tiga. A talafeagai ai, valaaulia ni nai tamaiti e faasoa mai. Faaali le ata o i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Faamalamalama o Iesu, i nisi taimi tatou te le malamalama atoatoa i ai, sa Ia lagonaina le tiga uma ma le faanoanoa e lei oo i ai se tasi. O lona uiga e mafai ona fesoasoani o Ia ia tatou lagona le toafilemu pe a tatou faanoanoa, tiga, pe le fiafia.

• Usu faatasi ma tamaiti le “Le Alofa O Lou Faaola,” Tusipese a Tamaiti, 42. Valaaulia i latou e faasoa mai ni auala na latou lagonaina ai le alofa o Iesu.

O Keriso o loo Tatalo i le Faatoaga o Ketesemane, saunia e Hermann Clementz

Aoao atu Aoaoga Faavae

Tamaiti Matutua Atu

Mareko 14:22–24

E fesoasoani le faamanatuga ia te au ou te manatua ai Iesu Keriso ma Lana taulaga mo au.

E mafai faapefea ona ou fesoasoani atu i isi ina ia maua se aafiaga anoa mai le faamanatuga?

Gaoioiga e Mafai Ona Fai

• Valaaulia tamaiti e feauauai e faitau ia fuaiupu i le Mareko 14:22–24 (tagai foi Iosefa Samita Faaliliuga, Mareko 14:20–24 [i le faaopoopoga i le Tusi Paia) ma le Mataupu Faavae ma Feagaiga 20:75–79. O a upu ma manatu e tutusa ma fuaitau e lua?

• Fesili i tamaiti po o a mea latou te fai e fesoasoani ai ia latou mafaufau ia Iesu i le taimi o le faamanatuga. Fesoasoani ia i latou e sue mau po o upu mai viiga o le faamanatuga e mafai ona latou faitauina i le taimi o le faamanatuga, ona lisi lea i luga o se kata e mafai e tamaiti ona faasino i ai i le isi taimi latou te aai ai ma feinu i le faamanatuga. Usu faatasi ma tamaiti nisi o nei pese (tagai Viiga, nu. 169–97).

• Tusi fasifuaitau autu mai tatalo o le faamanatuga i le laupapa, ma fesoasoani i tamaiti e taulotoina. O a uiga o nei fasifuaitau? Aisea tatou te faafetai ai ona ua mafai ona faafou a tatou feagaiga o le papatisoga i vaiaso taitasi?

• Valaaulia se tasi o i ai le Perisitua Arona e faamatala i tamaiti lona poto masani i le tapenaina, faamanuia, po o le tufa o le faamanatuga. O le a se mea o fesoasoani ia te ia e faia lenei mea? O a ni ona lagona pe a ia faia lea mea? O faapefea ona faamanatu atu ia te ia e le falaoa ma le vai e uiga i le Faaola?

• Fai i tamaiti ua uma ona papatiso e faasoa mai mea latou te manatua e uiga i o latou papatisoga. O a ni o latou lagona? O a feagaiga na latou faia? (tagai Mosaea 18:8–10) Ta’u i ai o vaiaso uma lava tatou te aai ma feinu ai i le faamanatuga, e mafai ona pei ua toe papatiso—e mafai ona faamagaloina a tatou agasala, ma tatou toe faafou a tatou feagaiga.

Mataio 26:36-42

I Ketesemane, na tauave ai e Iesu Keriso i Ona lava luga a’u agasala ma o’u tiga.

O le iloa ai o le mea na faia e Iesu mo i tatou i Ketesemane, e mafai ona fesoasoani i tamaiti e salamo ai i a latou agasala ma liliu atu ai i le Faaola pe a latou feagai ma tofotofoga faigata.

Gaoioiga e Mafai Ona Fai

• Valaaula tamaiti e faitau le Mataio 26:36–42, ma vaavaai mo upu po o fasifuaitau o loo faamatala mai ai lagona o Iesu i Ketesemane. O le a le mea na oo i ai Iesu na afua ai ona Ia lagona faapena? Tuu atu i tamaiti le avanoa e faasoa mai ai o latou lagona e uiga ia Iesu ma Lana taulaga mo i tatou.

• Valaaulia tamaiti e faasoa mai se taimi na latou faanoanoa pe tiga ai. Fesili i ai pe latou te iloa se tasi sa faapena foi ona lagona. Faamatala i Ketesemane, sa lagonaina ai e Iesu tiga uma ma le faanoanoa ua lagona e tagata uma. Na Ia faia lenei mea ina ia mafai ai ona Ia faamafanafanaina i tatou pe a tatou manaomia (tagai Alema 7:11–12).

• Tuu atu i se tamaitiiti se fasilaau e umi atu nai lo le lautele o le faitotoa o le potuaoga, ma fai iai e uu faalava ma taumafai e savali atu i le faitotoa. Faamalamalama o le fasilaau e faatusa i a tatou agasala, ia e taofia ai i tatou mai le ulu atu i le malo o le Atua. Aveese le laau e faatusa i le tauaveina e Iesu i Ona lava luga a tatou agasala ina ia mafai ai ona tatou magalo pe a tatou salamo.

Luka 22:39-44

E mafai ona ou mulimuli i le faataitaiga a Iesu e ala i le usiusitai i le Tama Faalelagi.

Na faaali mai e Iesu le usiusitai i le Tama ina ua Ia fai mai, “Aua le faia lo’u loto, a o lou finagalo”(Luka 22:42). E mafai faapefea ona e fesoasoani i tamaiti e aoao mai le faataitaiga a Iesu?

Gaoioiga e Mafai Ona Fai

• Tauloto faatasi ma tamaiti le fasifuaitau “Aua le faia lo’u loto a o lou finagalo” (Luka 22:42) ma talanoaina lona uiga. O le a se mea e mafai ona tatou fai e usitai ai i le finagalo o le Tama Faalelagi?

• Fesoasoani i tamaiti e faailoa mai ni nai poloaiga ua latou usita’ia. Fesili: O a faamanuiaga na e maua i le usitai i le Tama Faalelagi, tusa lava pe na faigata? Ona valaaulia lea o i latou e faasoa mai o latou aafiaga ma molimau.

Luka 22:41–43

E mafai ona ou maua le fesoasoani pe a ou tatalo.

Ina ua tatalo. Pe malamalama tamaiti e te faiaoga ai e mafai foi e i latou ona tatalo i le Tama Faalelagi mo le malosi?

Gaoioiga e Mafai Ona Fai

• Faamatala i tamaiti le tala o i le Luka 22:41–43 (i le faaaogaina o le “Mataupu 51: O Iesu Ua Puapuagatia i le Faatoaga o Ketesemane,” Tala o le Feagaiga Fou, 129–32, po o le vitio e o faatasi ai i luga o le LDS.org). Faamalamalama atu ina ua tatalo atu Iesu, sa auina mai e le Tama Faalelagi se agelu e faamalosiau ia te Ia. O ai e auina mai e le Tama Faalelagi e faamalosiau ia i tatou?

• Faaali atu le ata o le agelu o loo faamafanafana atu ia Keriso i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga, ma faasoa mai se aafiaga na e lagonaina ai le faamalosiau a le Tama Faalelagi.

Fautuaina le Aoaoina i le Aiga

Valaaulia tamaiti e faasoa atu i o latou aiga mea o le a latou faia i le taimi o le faamanatuga e manatua ai Iesu.

Faaleleia o Lo Tatou Aoao Atu

Tuu atu lau molimau i le vasega. E mafai ona faigofie se molimau e pei o le “Ou te iloa e alofa le Tama Faalelagi ia te outou taitoatasi” po o le “Ua ou lagona lava le fiafia o lo’u loto ina ua ou aoao e uiga ia Iesu Keriso.”