Fafaga A’u Mamoe, na saunia e Kamille Corry

Iuni 24–30.

Mataio 28; Mareko 16; Luka 24; Ioane 20–21

“Ua Toetu o Ia”

Amata lau tapenapenaga i le faitauina o le Mataio 28; Mareko 16; Luka 24; ma le Ioane 20–21. Sau, Mulimuli Mai ia te Au—Mo Tagata Taitoatasi ma Aiga ma o lenei otootoga e mafai ona fesoasoani ia te oe e filifili ai mataupu faavae i nei mataupu o le a aoga i tamaiti o lau vasega.

Tusifaamaumau Ou Lagona Uunai

Valaaulia le Fefaasoaai

O le vaai i se ata e mafai ona fesoasoani i tamaiti e manatua ai mea sa latou aoaoina i le fale po o isi nofoaga. Atonu e mafai ona e faaalia se ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma fai i tamaiti e faasoa mai mea ua latou iloa e uiga i le tala o loo faaalia i le ata.

Aoao atu Aoaoga Faavae

Tamaiti Laiti Ifo

Mataio 28; Mareko 16; Luka 24; Ioane 20:1–23

O le a ou toe ola pe a ou oti, e faapei foi o Iesu.

O le Togiola a Iesu Keriso, e aofia ai Lona Toetu, o le mea aupito taua lea na tupu i le talafaasolopito, ma o le faavae lea o le faatuatuaga o le au Kerisiano. A o e faitau i le Toetu, manatunatu pe o le a faapefea ona e fesoasoani i tamaiti e fausia lo latou faatuatua ia Iesu Keriso.

Gaoioiga e Mafai Ona Fai

• Faamatala i au lava upu le tala i le Toetu o Iesu. Fai i tamaiti e feauaua’i e toe faamatala atu le tala ia te oe. E mafai ona e faasino i le “Mataupu 54: Ua Toetu Iesu,” Tala o le Feagaiga Fou, 139–44, po o le vitio e o faatasi ai (LDS.org). Faamalamalama ina ua maliu Iesu, na tuua e Lona agaga Lona tino. Ina ua toetu o Ia, sa toe faatasia Lona agaga ma Lona tino.

• Valaaulia ni tagata o le uarota e avea o ni fitafita, agelu, Maria le Makatala, Peteru, Ioane, ma soo, ma Toma ma faamatala mai mea sa latou molimauina ina ua mavae le Toetu o Iesu.

• Faaali le vitio “What Happens after We Die?” (LDS.org), ma faamatala e uiga i se tasi e te iloa ua oti. Faasoa atu lau molimau o le a toetutu tagata uma. Valaaulia tamaiti e faasoa mai a latou molimau.

• Mafaufau e usu faatasi le “Pe Na Toe Soifua Moni Ea Iesu?” ma le “Pe A Ia Toe Afio Mai,” Tusipese a Tamaiti, 45, 46. Fai i tamaiti e manatunatu pe o a ni lagona i le vaai atu i le Iesu toetu. Tuu atu ia i latou e faasoa mai o latou manatu i le vasega.

Ioane 20:24–29

E mafai ona ou faatuatua ia Iesu Keriso tusa lava pe le mafai ona ou vaai ia te ia.

Mafaufau pe mafai faapefea ona malamalama tamaiti i le faatuatua ma pe mafai faapefea ona latou faaaogaina le faatuatua i le Faaola.

Gaoioiga e Mafai Ona Fai

• Faaali le ata o Ua Faaali Atu Keriso ia Toma (LDS.org) a o e faamatalaina le aafiaga o Toma i le Ioane 20:24–29. Toe faamatala le tala i se taimi mulimuli ane i le lesona, ae o le taimi lenei fai i tamaiti e aumai ni nai faamatalaga.

• Faaali atu se pusa o i ai se mea i totonu e le o iloa atu e tamaiti, ma faamatala le mea o i totonu i tamaiti. Fesili i ai pe ua latou talitonu o i ai moni se meafaitino i totonu o le pusa ma pe aisea foi. Ona faaali lea i ai o le meafaitino, ma faamalamalama i ai o le faatuatua o le talitonu lea i mea e le o mafai ona tatou vaai i ai. O le faatuatua aupito sili ona taua e mafai ona tatou maua o le faatuatua lea ia Iesu Keriso.

Vaai Ia i O’u Lima, saunia e Jeff Ward.

Ioane 21:15–17

E mafai ona ou faaali atu lo’u alofa mo Iesu i le auauna atu i isi.

E mafai faapefea ona e musuia tamaiti ia alolofa ma fesoasoani ia i latou o siomia ai i latou.

Gaoioiga e Mafai Ona Fai

• Faitau le Ioane 21:15–17, pe faaali le vitio “Feed My Sheep” (LDS.org). E lei manao Iesu ia Peteru e faaalu lona taimi uma e fagota ai. Nai lo lena, sa manao o Ia ia Peteru e faasoa atu le talalelei ma valaaulia tagata uma e o mai ia te Ia. Avatu i tamaiti taitasi se mamoe pepa, ma fai i ai e tusi ai i luga se mea e mafai ona latou faia e fesoasoani ai e fafaga mamoe a Iesu.

• Vave fai i ni tamaiti e faasoa mai mea o latou faia e alolofa ai ma auauna atu i isi, po o ni auala ua auauna atu ai nisi ia i latou.

• Tusi igoa o tamaiti taitasi o lau vasega i ni fasi pepa ua otioti i foliga o se mamoe ma faasalalau solo na mamoe i le potuaoga. (Ia aofia ai igoa o tamaiti e le toaaga mai.) Valaaulia tamaiti e faapotopoto mai mamoe i le sueina o le mea o loo i ai lona igoa. O le a se mea e mafai ona tatou faia e auauna atu ai i se tasi o mamoe ua se ae tatou te iloaina?

Aoao atu Aoaoga Faavae

Tamaiti Matutua Atu

Mataio 28; Mareko 16; Luka 24; Ioane 20:1–23

Ona ua toetu Iesu, o le a toetutu ai foi tagata uma.

O se mea lava e masani ai le taumanatunatu o tamaiti pe o le a le mea e tupu pe a mavae lo tatou oti. Mafaufau pe mafai faapefea ona e aoao atua le Toetu i se ala o le a fausia ai lo latou faatuatua.

Gaoioiga e Mafai Ona Fai

• Valaaulia tamaiti e moeiini ma mafaufau faapea o la e nofonofo i tala ane o le tuugamau o Iesu a o e faitauina le Ioane 20:1–17 po o le tauaofai foi le tala o Lona Toetu (tagai foi “Mataupu 54: Ua Toetu Iesu,” Tala o le Feagaiga Fou, 139–44, po o le vitio e o faatasi ai i luga o le LDS.org). Mata e faapei le matamata i le Faaola toetu?

• Fai i tamaiti taitasi e suesue le aafiaga o se tasi na vaai i le Faaola toetu ma faasoa mai i le isi vaega o le vasega mea sa latou aoaoina.

• Matamata faatasi ma tamaiti i se tasi o nei vitio: “Ua Faataoto Iesu i se Tuugamau,” “Ua Toetu Iesu,” “O Keriso i le Auala i Emau,” ma le “Ua Faaali atu le Alii Toetu ile Au Aposetolo” (LDS.org).

Ioane 20:24–29

E mafai ona ou faatuatua ia Iesu Keriso tusa lava pe le mafai ona ou vaai ia te ia.

E mafai ona i ai lo’u faatuatua ia Iesu Keriso tusa lava pe le mafai ona ou vaai ia te Ia. E mafai faapefea ona e fesoasoani ia i latou?

Gaoioiga e Mafai Ona Fai

• Valaaulia ni nai tamaiti e feauauai i le faitauina o fuaiupu i le Ioane 20:24–29. (Tagai foi i le vitio ““Amuia O E Le Vaai Mai Ae Talitonu Mai Pea” LDS.org.)

• Tusi upu taitasi o i le fasifuaitau “Amuia o e le vaai mai, ae talitonu mai pea” i ni fasi pepa eseese. Valaaulia tamaiti e faatulaga sao ia upu. Valaaulia i latou e faamatala ni aafiaga na latou lagonaina ai le Faaola tusa lava pe latou te lei vaai ia te Ia.

• Valaaulia tamaiti e tusi ni ata o mea e mafai ona latou faia e faamalolosia ai lo latou faatuatua. A o latou tusia, faasoa atu le mea sa e faia e faamalosia ai lou faatuatua ia Iesu Keriso.

Ioane 21:1–17

E mafai ona ou faaali atu lo’u alofa ia Iesu i le fafagaina o Ana mamoe.

E mafai ona matuai faatosinaina e tamaiti i latou o loo siomia ai i latou. E mafai faapefea ona e fautuaina i latou e faamalolosi atu i isi i le talalelei?

Gaoioiga e Mafai Ona Fai

• A o le i faitauina faatasi le Ioane 21;1–17 fesili i tamaiti pe na latou o muamua e fagogota. Na faape’ī ? Fesili i se tasi pe i ai se tasi na maua ni “i’a se tele” (Ioane 21;6).

• Faitau le Ioane 21:15–17, ae sui le igoa o Simona i igoa o tamaiti. O ai mamoe a Iesu? E mafai faapefea ona tatou fafagaina Ana mamoe?

• Tufatufa atu sina meaai faigofie i tamaiti. A o latou aai, fesili i ai pe faapefea e le faasoa atu o le talalelei i se tasi ona pei o le fafagaina o i latou.

Fautuaina le Aoaoina i le Aiga

Valaaulia tamaiti e faaaoga le itulau o gaoioiga o le vaiaso lenei e aoao atu ai o latou aiga e uiga i le toe vaiaso faaiu o le soifuaga o le Faaola.

Faaleleia o Lo Tatou Aoao Atu

Tulitatao ia valaaulia e faatino. A e valaaulia ia tamaiti faatino se mea ua latou aoaoina, ia tulitatao lau valaaulia i le taimi o le isi vasega e sosoo ai. O lena mea e faaali atu ai i tamaiti e te manatu atu ia i latou i le faamanuiaina o o latou olaga i le talalelei. A o latou faasoa mai o latou aafiaga, o le a faamalolosia i latou ma o le a fesoasoani ai le tasi i le isi e ola i le talalelei.