Aso o le Penetekoso, saunia e Sidney King

1–7 Iulai

Galuega 1–5

“E Fai Foi Outou ma Molimau ia te Au”

Amata lau tapenapenaga i le faitauina o le Galuega 1–5. Saili ma le lototatalo ia malamalama i manaoga o tamaiti e te faiaoga ai. Sau, Mulimuli Mai ia te Au–Mo Tagata Taitoatasi ma Aiga ma lenei otootoga e mafai ona fesoasoani ia te oe.

Tusifaamaumau Ou Lagona Uunai

Valaaulia le Fefaasoaai

Tusi le O ai Au? i le laupapa. Saunia ni faaupuga e uiga ia Peteru ma fesili i tamaiti pe o ai e faatatau i ai ia faaupuga. O a nisi mea latou te iloa e uiga ia Peteru?

Aoao atu Aoaoga Faavae

Tamaiti Laiti Ifo

Galuega 1:1–11

O loo taitaia e Iesu Keriso Lana Ekalesia e ala i perofeta ma aposetolo.

O le aoao e uiga i le ala sa taitaia ai e le Faaola Lana Ekalesia anamua e ala i aposetolo e mafai ona fesoasoani i tamaiti e maua ai molimau e uiga i perofeta ma aposetolo i o tatou taimi.

Gaoioiga e Mafai Ona Fai

• Faaali atu le ata o i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Fesili i tamaiti pe aisea latou te manatu ai o loo tilotilo atu tagata i le lagi. Aotele le tala mai le Galuega 1:1–11. Tagai foi “Mataupu 55: Ua Taitai e Aposetolo le Ekalesia,” Tala o le Feagaiga Fou, 145–47, po o le vitio e o faatasi ai (LDS.org).

• A o tilotilo le vasega i le ata mai le otootoga o lenei vaiaso o i le Sau, Mulimuli Mai ia te Au–Mo Tagata Taitoatasi ma Aiga, valaaulia se tamaitiiti e uu i luga se ata o Aposetolo o i ai i le taimi nei. O ai e taitaia le Ekalesia pe a le o i ai Keriso i le lalolagi? Pe faapefea ona latou taitaia le Ekalesia?

• Fai se taaloga faafetaui i seti e lua o ata o le Au Peresitene Sili ma Aposetolo e Toasefululua. A uma ona faafetaui, ta’u le igoa o le Aposetolo po o le Peresitene ma se mea e uiga ia te ia.

• I tua o se ata o Iesu, faapipii i ai ni ata laiti o mea atonu o loo aoao atu ai se perofeta, e pei o le papatisoga po o se malumalu. Ia tofu le tamaitiiti ma le avanoa e tilotilo ai i se tasi o ata ma ta’u atu i le isi vaega o le vasega, “Ua aoao mai e le perofeta ia i tatou e uiga i le [autu o i le ata].”

Galuega 3:1–10

E mafai e le Tama Faalelagi ona faamanuiaina isi e ala ia te au.

O le a se mea e mafai ona e faia e fesoasoani ai i tamaiti ia iloa ala e mafai ona latou faamanuiaina ai i latou o siomia ai i latou? Fesoasoani ia latou aoao mai le faataitaiga a Peteru ma Ioane o loo faamaloloina le tamaloa pipili.

Gaoioiga e Mafai Ona Fai

• Valaaulia tamaiti e faia ia taga e o faatasi ma le tala o i le Galuega 3:1–10, mea e pei o le faalala o o latou lima mo se tupe ma osooso i le olioli. Na faapefea ona faamanuiaina e le Tama Faalelagi le tamaloa sa le mafai ona savali?

• Aumai se taga o i ai ni ata e faatusa i ala e mafai ona tatou faamanuiaina ai ma auauna atu i isi. Ia feauauai tamaiti e filifili ni ata mai le taga ma faasoa mai pe mafai faapefea ona latou faamanuiaina isi i lena ala.

• Fai i tamaiti e faasoa mai se taimi na latou fesoasoani ai i se tasi.

Galuega 5:1–11

E mafai ona ou faamaoni.

Sa ola ia uluai Kerisiano i se faiga o le tulafono o le faapaiaga e fesoasoani ai e tausia e matitiva. O i latou na i ai fanua sa latou faatauina atu ae avatu tupe i Aposetolo e tufatufa i le Au Paia e tusa ai ma o latou manaoga. Sa lei faamaoni ia Anania ma Safaira i la la’ua saofaga, sa manatu e mafai ona la faaseseina ia auauna a le Alii.

Gaoioiga e Mafai Ona Fai

• Fesoasoani i tamaiti e faatino le tala ia Anania ma Safaira. Faamalamalama atu e ui ina tatou le feoti pe a tatou talapepelo, ae o loo faaalia i lenei tala le taua o le faamaoni i le Tama Faalelagi.

• Usu faatasi se pese e uiga i le faamaoni, e pei o le “I Believe in Being Honest” (Children’s Songbook, 149). Fesoasoani i tamaiti ia malamalama o se vaega o le faamaoni o lona uiga ia tautala sa’o ma aua nei aveina mea a se isi tagata.

• Faaaoga ia tagapepa papeti e faatino ai ni tulaga faigofie lea e faamaoni ai pe le faamaoni foi se tagata. Fai i tamaiti e tutu i luga pe afai sa faamaoni le tagata pe nonofo i lalo pe afai sa le’i faamaoni le tagata.

Aoao atu Aoaoga Faavae

Tamaiti Matutua Atu

Galuega 1:8, 22–26

O loo taitai e Iesu Keriso Lana Ekalesia e ala i perofeta ma aposetolo.

E mafai ona malamalama ia tamaiti o loo e faiaoga ai o loo taitaia le Ekalesia a le Faaola i ona po nei e perofeta ma aposetolo, e faapei lava ona sa i ai i ona po anamua.

Gaoioiga e Mafai Ona Fai

• Tusi i le laupapa le E faapefea ona taitai e Iesu Keriso le Ekalesia pe a le o i ai o Ia i le lalolagi? Valaaulia tamaiti e vaavaai mo tali i le fesili a o e faitauina upu a le Faaola i Aposetolo i le Galuega 1:8.

• Faitau faatasi le Galuega 1:22--26. Faailoa mai o se vasega, pe na faapefea e Aposetolo ona tofia se Aposetolo fou.

• A o lei oo i le aso, fai i se tamaitiiti ma ona matua e faitau e uiga i se Aposetolo na tofia talu ai nei (atonu i luga o le LDS.org). Valaaulia se tamaitiiti e faasoa mai mea sa ia aoaoina i le vasega, ma afai e mafai, ta’u mai se tala a le Aposetolo e uiga i lona valaauga ma lana uluai savali i le konafesi aoao.

Na taitai e Aposetolo le Ekalesia ina ua mavae le afio a’e o Keriso i le lagi.

Galuega 3:1–10

E faamanuiaina e le Tama Faalelagi isi e ala ia te au, tusa lava pe ou te le mauoa.

E mafai faapefea ona e aoao atu i tamaiti faapea e mafai ona latou faamanuiaina isi, tusa lava pe leai ni a latou “ario ma ni auro”? (Galuega 3:6). Pe mafai faapefea ona e fesoasoani ia latou iloa avanoa e auauna atu ai i le Atua e ala i le auauna atu i isi?

Gaoioiga e Mafai Ona Fai

• Fai i se tamaitiiti e faitau le Galuega 3:1–10 a o fai e isi tamaiti ia taga o le tala. (Mo se fesoasoani, tagai foi “Mataupu 56: Ua Faamalolo e Peteru se Tamaloa,” Tala o le Feagaiga Fou, 105–6, po o le vitio e o faatasi ai i luga o le LDS.org.) E mafai foi ona e faaalia le vitio “Peter and John Heal a Man Crippled Since Birth” (LDS.org). O a ni auala ua sili atu ai faamanuiaga na maua e lea tagata nai lo tupe sa ia muai ole atu ai?

• Pasi faasolosolo se taga o ni tupe siliva. A o uu e tamaiti le taga, fesili i ai pe o le a se mea e mafai ona latou faatauina i le tupe. Ona toe aveese mai lea o le taga tupe ae fesili i tamaiti po o a faamanuiaga e le mafai ona latou faatauina. Valaaulia i latou e faasoa mai pe mafai faapefea ona latou auauna atu e aunoa ma le faaaogaina o tupe (Galuega 3:6).

Galuega 2:36–47

E molimau mai le Agaga Paia i lo’u loto e uiga i upumoni o le talalelei.

A oo ina iloa e tamaiti le ala e fetalai atu ai le Agaga Paia ia i latou, o le a musuia i latou e faalogologo ma faatino i luga o musumusuga latou te mauaina.

Gaoioiga e Mafai Ona Fai

• Faitau faatasi le Galuega 2:36–37. E faape’i pe a ta’u mai e le Agaga Paia ia i tatou se mea i o tatou loto?

• Fai faatasi o se vasega, se pepa e tusi ai upu O le a se mea e tatau ona tatou fai? i le pito i luga. Faaali le pepa lea i vaiaso taitasi, ma faaopoopo i ai auala e mafai e tamaiti ona faatino ai mea latou te aoaoina i lesona o vaiaso taitasi.

• Valaaulia tamaiti e sue mea lelei na faia e tagata ina ua uma ona papatisoina i latou i le Galuega 2:41–47. O a ni mea lelei e mafai ona tatou faia e faaalia ai lo tatou faafetai mo le meaalofa a le Agaga Paia sa tatou mauaina ina ua tatou papatiso?

Fautuaina le Aoaoina i le Aiga

Fautuaina tamaiti e fuafua se ala se tasi e mafai ona latou auauna atu ai i le Tama Faalelagi e ala i le fesoasoani i se tagata o o latou aiga i lenei vaiaso.

Faaleleia o Lo Tatou Aoao Atu

Tauloto se mau. Filifili se mau e te manatu e mafai ona fesoasoani i tamaiti i lau vasega, e pei o le Galuega 2:38 po o le Galuega 3:19, ma fesoasoani ia latou taulotoina se fasifuaitau mai le mau. Fesoasoani faitino, taga e fai i lima, po o foliga, e mafai ona fesoasoani i tamaiti e manatua ai ia mau.