Talosia Ia Tatou Ola Ai Faapea, saunia e Sam Lawlor

8–14 Iulai

Galuega 6–9

“Se A Le Mea E Te Finagalo I Ai Ou Te Faia?”

Amata i le faitauina o le Galuega 6–9. Otootoga o lenei vaiaso mai le Sau, Mulimuli Mai ia te A’u—Mo Tagata Taitoatasi ma Aiga e mafai ona fesoasoani e te malamalama ai i nei mataupu. O gaoioiga mo tamaiti laiti i lenei aotelega e mafai ona fetuunai mo tamaiti matutua, ma faapena ai lava.

Tusifaamaumau Ou Lagona Uunai

Valaaulia le Fefaasoaai

Tusi ni igoa o tagata mai le Galuega 6–9 i le laupapa–pei o Saulo po o Setefano. Valaaulia tamaiti e faasoa mai mea ua latou iloa e uiga i se tasi o nei tagata.

Aoao atu Aoaoga Faavae

Tamaiti Laiti Ifo

Galuega 6–7

E mafai ona ou mulimuli ia Iesu Keriso e ala i le tu atu mo le mea tonu.

O a ni mea e mafai e tamaiti ona aoao mai ia Setefano e uiga i le avea ai ma se e mulimuli ia Iesu Keriso?

Gaoioiga e Mafai Ona Fai

• Fesoasoani i tamaiti e fatuai ni taga e o faatasi ma se pese e uiga i le filifili o le mea tonu, e pei o le “Tu mo le Mea Tonu” (Tusipese a Tamaiti, 81). Faaaoga le Galuega 7:51–60 e faamatala atu ai i tamaiti pe na faapefea e Setefano ona aoao atu e uiga ia Iesu Keriso, e ui o le faia o lea mea na matua feitai ai taitai Iutaia (tagai foi “Chapter 57: Wicked Men Kill Stephen,” New Testament Stories, 150–51, po o le vitio e talitutusa i le LDS.org). Na faapefea ona tu atu Setefano mo le mea tonu?

• Tuu atu i tamaiti ni tulaga o ni tamaiti na tatau ona faia se filifiliga i le va o le sao ma le sese. Fesili i tamaiti pe o le a se mea latou te faia e tutu atu ai mo le mea sao.

Galuega 8:26–39

Ua musuia au e le Agaga Paia e faasoa atu le talalelei i isi.

Na mulimuli ia Filipo i uunaiga a le Agaga ma sa fesoasoani i se alii Itiopia lea sa tauivi ia malamalama i tusitusiga paia. O a lesona o i ai i lenei tala mo tamaiti o loo e faiaoga ai?

O Filipo o Loo Faiaoga i le Tagata Itiopia, saunia e Robert T. Barrett.

Gaoioiga e Mafai Ona Fai

• Toso faatasi ni nofoa se lua e fai ai se kariota. Valaaulia ni tamaiti se toalua e nonofo i totonu o le kariota, o le tasi o Filipo ma le isi o le alii Itiopia. Ona faamatala lea o le tala i le ala na aoao atu ai e Filipo le talalelei i le alii mai Itiopia.

• Pe ua e lagonaina ea le Agaga o ta’u atu ia te oe e faasoa atu le talalelei i se tasi, pei o le aafiaga sa i ai Filipo i le Galuega 8:29? Faasoa atu lou aafiaga i tamaiti.

Galuega 9:1–20

A ou faia se mea sese, e valaaulia au e le Tama Faalelagi ia salamo ma sui.

Ina ua ta’u atu e Iesu ia Saulo e tuu le sauaina o le Ekalesia a le Alii, sa salamo loa lava ia Saulo ma sa suia. E mafai faapefea ona fesoasoani lenei tala i tamaiti o loo e faiaoga ai ia mananao ia vave ona sui pe a latou faia se mea sese?

Gaoioiga e Mafai Ona Fai

• Aotele le tala i le liuaina o Saulo, o loo maua i le Galuega 9:1–20 (tagai foi “Mataupu 59: Ua Aoao Saulo e uiga ia Iesu,” Tala o le Feagaiga Fou, 154–55, po o le vitio e o faatasi ai i luga o le LDS.org).

• Lisi mai pe aumai ni ata o mea e liu, e pei o se apevai [tadpole] lea e liu e avea ma lane, po o laau i le taimi o vaitau eseese. Na faapefea ona liua Saulo ina ua asiasi atu Iesu Keriso ia te ia?

• Tusi se auala magalua i le laupapa. Valaaulia tamaiti e faaigoa mai ni nofoaga latou te fia asiasi i ai, ma tusi i le pito i luga o se tasi o auala. O le a se mea e tupu pe a tatou liliu i le auala sese? E faapefea ona faapei le salamo o le toe foi i le auala sao?

• Fai i tamaiti e toe fai mai le mea na fai atu ai Saulo i le Alii: “Se a le mea e te finagalo i ai ou te faia?” O le a se mea e finagalo le Alii tatou te faia?

Aoao atu le Aoaoga Faavae

Tamaiti Matutua Atu

Galuega 6–7

O le a avea au o se molimau a Iesu Keriso.

E mafai faapefea ona e fesoasoani i tamaiti o loo e faiaoga ai ia aoao mai le faataitaiga a Setefano e tu atu o se molimau a Iesu Keriso?

Gaoioiga e Mafai Ona Fai

• Faitau faatasi le Galuega 6:5--15 ma le 7:51--60 ma tamaiti. Na faapefea ona avea Setefano o se molimau a Iesu Keriso? Valaaulia se tasi pe sili atu foi tamaiti e faafoliga faapea o Setefano ma faasoa mai mea latou te talitonu i ai ma pe aisea foi.

• Valaaulia tamaiti e feauauai e faitau le Galuega 6:3–10, ma saili mo uiga auaumama o Setefano na fesoasoani ia te ia e auauna atu ai.

• Fai i tamaiti e fesoasoani atu e te mafaufau i tulaga e mafai ona latou tutu atu ai o ni molimau a Iesu Keriso ma Lana talalelei. Fesoasoani ia i latou e faatino i taga nisi o nei tulaga. Fai i tamaiti e faitau le Mosaea 18:9. Ta’u i ai o le avea ai o se molimau a Iesu Keriso e aofia i folafolaga tatou te faia i le papatisoga.

• Tusi igoa o Setefano ma Filipo i luga o le laupapa. I lalo o le igoa o Setefano, tusi ai auala e mafai ai ona avea i tatou ma faataitaiga i isi. I lalo o le igoa o Filipo, tusi ai auala e mafai ona tatou faasoa atu ai le talalelei i isi. E fesoasoani faapefea le avea ma faataitaiga o se soo o Iesu Keriso e faasoa atu ai le talalelei?

Galuega 8:5–24

O le perisitua o se meaalofa e le mafaatauina mai le Atua.

E faalauiloa e Satani le savali faapea o mea o le lalolagi e aumaia ai ia i tatou le fiafia. E mafai faapefea ona e faaaogaina le tala ia Simona e fesoasoani ai i tamaiti e faataua mea faaleagaga e pei o le perisitua ma ona faamanuiaga?

Gaoioiga e Mafai Ona Fai

• Aotele le tala ia Simona, o loo maua i le Galuega 8:5–24 (tagai foi “Mataupu 58: O Simona ma le Perisitua,” Tala o le Feagaiga Fou, 152–53, po o le vitio e o faatasi ai i luga o le LDS.org). Aisea e le mafai ai ona tatou maua le perisitua e ala i le faatauina mai? E faapefea e se tagata ona maua moni lava le perisitua? (tagai Mataupu Faavae o le Faatuatua 1:5).

• Tuu atu i tamaiti ni tupe faafoliga, ma faaali ata o mea e mafai ona faatau i tupe. Fesili i tamaiti pe fia ni tupe faafoliga o le a latou tuu atu mo nei mea. Ona faaali lea o ata o le faamanatuga, se malumalu (e faatusa i faamanuiaga o le malumalu), se papatisoga, ma isi faamanuiaga tatou te maua e ala mai i le perisitua. Faamalamalama atu o nei meaalofa mai le Atua e le mafaatauina ma e le mafai ona faatauina i tupe.

Galuega 9:1–20

A ou faia se mea sese, e valaaulia au e le Tama Faalelagi ia salamo ma sui.

Ina ua ta’u atu e Iesu ia Saulo e tuu le sauaina o le Ekalesia a le Alii, sa salamo loa lava ia Saulo ma sa suia. E mafai faapefea ona fesoasoani lenei tala i tamaiti o loo e faiaoga ai ia mananao ia vave ona sui pe a latou faia se mea sese?

Gaoioiga e Mafai Ona Fai

• Valaaulia ia tamaiti e gaulua se fasipepa. Fai i ai e tusi le Muamua i le tasi afa ma le Mulimuli Ane i le isi afa. Faitau faatasi ma tamaiti le Galuega 8:1--3; 9:1--2; ma le 9:17--22, ma vaavaai mo upu po o fasifuaitau o loo faamatala mai ai Saulo i le taimi muamua ma le taimi ua uma ona ia vaai ai i le Alii.

• Valaaulia se tagata o le uarota e faasoa atu lana tala o lona liua ma pe na faapefea e le avea ai o se tagata o le Ekalesia ona suia lona olaga, e pei ona suia le olaga o Saulo.

• Tusi se “ala i Tamaseko” i le laupapa. Valaaulia tamaiti e faitau le Galuega 9:6, 11, 18, 20–22, e saili ai mo mea na faia e Saulo ia salamo ai ma liliu atu ia Keriso, ma tusi taga nei i luga o le ala. O a mea ua tatou aoao mai ia Saulo e uiga i le ala e mafai ai ona tatou avea e faapei o Keriso?

• Valaaulia tamaiti e tusi ata o a latou vaega e sili ona fiafia i ai i le tala o le liua o Saulo ma faasoa mai a latou atatusi i le vasega.

Fautuaina le Aoaoina i le Aiga

Fautuaina tamaiti e faamatala i o latou aiga la latou gaoioiga e sili ona fiafia i ai mai le vasega i le aso ma mea sa latou aoao mai ai.

Faaleleia o Lo Tatou Aoao Atu

Fesoasoani i tamaiti e aoao mai tusitusiga paia. Atonu e le mafai e tamaiti laiti ona faitau lelei, ae e mafai lava ona e faagalulue i latou e aoao mai tusitusiga paia. Mo se faataitaiga, e mafai ona e faitau atu se fuaitau ma valaaulia i latou e tutu i luga pe sii o latou lima pe a faalogo mai i se upu patino po o se fasifuaitau e te manao e taulai i ai (tagai Aoao Atu i le Ala a le Faaola, 20).