15–21 Iulai

Galuega 10–15

“Ua Tupu le Afioga a le Atua ma ua Faateleina”

Amata lau tapenapenaga e aoao atu i le faitauina le Galuega 10–15. Sau, Mulimuli Mai—Mo Tagata Taitoatasi ma Aiga e mafai ona fesoasoani i nei mataupu, ma e mafai ona avatu e lenei otootoga ia te oe ni manatu faafaiaoga.

Tusifaamaumau Ou Lagona Uunai

Valaaulia le Fefaasoaai

Ina ia fesoasoani i tamaiti e faasoa mai mea latou te aoaoina ma oo i ai, e mafai ona e fai i ai e faasoa mai mea o loo latou faia e faaalia ai latou te talitonu ia Iesu Keriso.

Aoao atu Aoaoga Faavae

Tamaiti Laiti Ifo

Galuega 10:34–35

E alofa le Tama Faalelagi i Ana fanau uma.

O se aoaoga faavae taua e oo lava i tamaiti laiti e mafai ona malamalama ai o le, o tagata uma o se atalii/afafine ole Atua ma e alofa o Ia i Ana fanau uma lava.

Gaoioiga e Mafai Ona Fai

• Faaali le ata O Keriso ma Tamaiti mai le salafa o le Lalolagi (Tusi Ata o le Talalelei, nu. 116) a o e faitauina le Galuega 10:34–35. Faamalamalama atu o ona po o Peteru, sa i ai ni tagata na talitonu faapea sa alofa le Atua na o ni vaega o tagata, peitai sa aoaoina e Peteru e alofa le Atua i Ana fanau uma, ma e finagalo o Ia ia latou aoaoina le talalelei.

• Valaaulia tamaiti e tusi se ata o i latou lava. Faasoa atu lau molimau faapea e alofa le Tama Faalelagi ia i latou taitoatasi ma Ana fanau uma lava, tusa lava pe o a o latou foliga pe o fea foi latou te o mai ai.

• Usu faatasi ma tamaiti se pese e uiga i le alolofa atu i isi–mo se faataitaiga, “Ou te Savali ma Oe” (Tusipese a Tamaiti, 78). Valaaulia i latou e faasoa mai ni auala e mafai ona latou faaali atu ai le alofa i tagata uma–e oo lava ia i latou e ese mai lo i latou–e faapei foi ona sa faia ai e Iesu.

• Vave talosagaina matua o tamaiti taitasi e faasoa mai ni nai uiga tausaafia o a latou fanau. Faasoa atu i le vasega a latou tali, ma molimau atu e alofa le Tama Faalelagi i tamaiti taitasi uma lava.

• Tusi lou lima i tamaiti taitasi ma fai atu, “E alofa le Tama Faalelagi ia [igoa].” Tuu i tamaiti e feauauai ona tusitusi atu le tasi i le isi ma fai le fasifuaitau lea.

Galuega 11:26

O au o se Kerisiano aua ou te talitonu ma mulimuli ia Iesu Keriso.

Atonu e iloa e tamaiti o loo e faiaoga ai e tele taimi e faaigoa ai tagata o le Ekalesia o Mamona aua tatou te talitonu i le Tusi a Mamona, ae pe o latou iloaina o i tatou foi o Kerisiano aua tatou te talitonu ia Iesu Keriso?

Gaoioiga e Mafai Ona Fai

• Faitau le Galuega 11:26 i tamaiti. Faamalamalama atu faapea o se tagata e talitonu ma mulimuli ia Iesu Keriso ua ta’ua o se Kerisiano, o le mea lea o i tatou o Kerisiano.

• Usu faatasi ma tamaiti le “O Le Ekalesia a Iesu Keriso” (Tusipese a Tamaiti, 48). O a ni a tatou taga i le lotu, i le aoga, ma le fale ona tatou te mulimuli ia Iesu Keriso ma auai i Lana Ekalesia?

• Tuu i tamaiti e valivali le pine o le itulau o gaoioiga o le vaiaso lenei ma fai lea pe a o i le fale.

Galuega 12:1–17

E faafofoga ma tali mai le Tama Faalelagi i tatalo.

O le tala i le agelu na faasaolotoina Peteru mai le falepuipui e mamana le aoao mai ai faapea e tali mai le Tama Faalelagi i tatalo.

Gaoioiga e Mafai Ona Fai

• Valaaulia tamaiti e faatino mai taga o le tala ia Peteru na faasaolotoina mai le falepuipui i le Galuega 12:1–17 a o e aoteleina le tala. Na faapefea ona tali e le Tama Faalelagi ia tatalo a i latou o e sa tatalo mo Peteru?

• Usu se pese e uiga i le tatalo---mo se faataitaiga, “Matou Te Ifo Atu” (Tusipese a Tamaiti, 18)—ma fatuai ni taga e fesoasoani ai i tamaiti e aoao pe faapefea ona tatalo. Valaaulia tamaiti e faasoa mai ni faataitaiga o mea e mafai ona latou faafetai ai i le Tama Faalelagi ma ole atu ai ia te Ia i tatalo.

• Faaali atu ata o tagata o loo tatalo (tagai, mo se faataitaiga, Tusi Ata o le Talalelei, nus. 111 ma le 112) a o e faasoa atu se aafiaga ina ua tali au tatalo e le Tama Faalelagi.

  

  E alofa le Tama Faalelagi ia i tatou ma o le a tali mai ia tatou tatalo.

Aoao atu Aoaoga Faavae

Tamaiti Matutua Atu

Galuega 10:34–35; 15:6–11

“E le faailoga tagata le Atua.”

E manaomia ona malamalama ia tamaiti o loo e faiaoga ai e alofa le Tama Faalelagi i Ana fanau uma lava, tusa lava pe o a o latou foliga, pe o fea e o mai ai, pe o a foi filifiliga latou te faia.

Gaoioiga e Mafai Ona Fai

• Fesili i tamaiti pe mafai ona latou iloa le ituaiga o tagata i le na o le vaai atu ia i latou pe taumate foi pe o fea latou te o mai ai. E tusa ai ma le Galuega 10:35, e faapefea ona fuafua e le Atua “ua talia e ia” se tagata?

• Faitau faatasi le Galuega 10:34–35; 15:6–11 ma tamaiti. Faamalamalama atu o ona po o Peteru, sa talitonu tagata Iutaia faapea sa lei taliaina e le Atua ia tagata e le o ni Iutaia (sa faaigoa nei tagata o Nuuese). Ae na aoao atu e le Atua ia Peteru e faapea e alofa le Atua i Ana fanau uma lava, o Iutaia ma Nuuese. Usu faatasi le “O Au o se Atalii o le Atua” (Tusipese a Tamaiti, 2–3). Valaaulia tamaiti e sui i igoa o le tasi ma le isi upu e pei o le Ou po o au.

• Valaaulia tamaiti e faasoa mai se mea e tulagaese e uiga i se isi tagata o i le vasega. Faamatala atu o le faaupuga “E le faailoga tagata le Atua” o lona uiga e alofa le Tama Faalelagi i Ana fanau uma lava, ma ona e alofa o Ia ia i latou, ua finagalo ai o Ia ia faalogo Ana fanau uma i le talalelei.

Galuega 11:26

O se Kerisiano o se tagata ua talitonu ma mulimuli ia Iesu Keriso.

E mafai faapefea ona e fesoasoani i tamaiti ia malamalama o a latou upu ma taga fai e faaalia ai o i latou o ni Kerisiano?

Gaoioiga e Mafai Ona Fai

• Valaaulia tamaiti e faitau le Galuega 11:26; 3 Nifae 27:3–8; ma le Mataupu Faavae ma Feagaiga 115:4. Tusi Kerisiano i le laupapa ma vase le vaega o loo fai mai “Keriso.” Fai i tamaiti e faasoa mai po o le a le uiga o le avea ma se Kerisiano ia i latou.

• Fai i tamaiti e ta’u mai ni vaega eseese o latou auai, e pei o o latou aiga po o le vasega Peraimeri. Valaaulia i latou e faasoa mai ni mafuaaga latou te faafetai ai i le avea ai o se Kerisiano ma lo latou auai i Le Ekalesia a Iesu Keriso o le Au Paia o Aso e Gata Ai. E mafai faapefea ona tatou faaali atu i isi o i tatou o Kerisiano?

• Faaali ni meafaitino po o ni ata e faatusa i upumoni e tulagaese ile Ekalesia a Iesu Keriso, e pei o se ata o se faamanuiaga faaleperisitua. Fai i se tamaitiiti e piki se meafaitino se tasi po o ata ma faamatala mai pe o faapefea ona avea lena mea o se faamanuiaga i la tatou Ekalesia. Faamalamalama atu e ui ina auai ia Kerisiano i le lalolagi atoa i le tele o lotu eseese, ae ua tatou auai i le Ekalesia lava e tasi lea na faatuina e Iesu Keriso i le lalolagi.

• Faaali le vitio “True Christianity” (LDS.org). Valaaulia tamaiti e tusi ata o mea e mafai ona latou faia e avea ai o ni Kerisiano moni.

Galuega 12:1–17

Pe a ou tatalo i le faatuatua, o le a tali mai le Tama Faalelagi.

Mafaufau i ni taimi na tali mai ai e le Tama Faalelagi au tatalo. E mafai faapefea ona e faaaogaina nei aafiaga e aoao atu ai tamaiti faapea o le a faafofoga ma tali mai le Tama Faalelagi i a latou tatalo i Lana lava ala ma le taimi?

Gaoioiga e Mafai Ona Fai

• Valaaulia tamaiti e faatino mai taga o le tala i le agelu na faasaolotoina Peteru mai le falepuipui o i le Galuega 12:1–17 a o e faamatalaina le tala i au lava upu.

• Fesili i tamaiti pe o le a so latou manatu ile uiga o le “faia le tatalo faatauanau” (Galuega 12:5). Na faapefea ona tali atu tatalo a tagata? Valaaulia tamaiti e faasoa mai ni aafiaga na tali atu ai e le Tama Faalelagi se tatalo a le tagata lava ia po o le tatalo faaleaiga. E mafai foi ona e faasoa atu se aafiaga na tali mai ai e le Tama Faalelagi au tatalo i se ala na ese mai i le mea sa e faamoemoe pe manao ai. Molimau atu e alofa le Atua ia i tatou, ma o le a Ia tali mai ia tatou tatalo i le ala ma le taimi e silisili mo i tatou.

Fautuaina le Aoaoina i le Aiga

Avatu i tamaiti se ata po o se meafaitino e faaali i totonu o o latou fale e fai ma faamanatu mo tagata o le aiga ia tatalo faatasi.

Faaleleia o Lo Tatou Aoao Atu

Molimau atu i faamanuiaga ua folafola mai. Pe a e valaaulia tamaiti o le Peraimeri e ola i se mataupu faavae patino, faasoa atu ia folafolaga ua faia e le Atua ia i latou o e ola ai i lena mataupu faavae. Mo se faataitaiga, e mafai ona tuu atu lau molimau e uiga i faamanuiaga folafolaina ua e mauaina a o e sailia tali e ala i le tatalo.