Fafaga i A’u Mamoe, na saunia e Kamille Corry

24--30 Iuni

Mataio 28; Mareko 16; Luka 24; Ioane 20–21

“Ua Toetu o Ia”

Faitau ma le lototatalo le Mataio 28; Mareko 16; Luka 24; ma le Ioane 20–21, ma tomanatu i le olioli ua e maua ona o le Toetu o Keriso. Manatunatu loloto pe mafai faapefea ona e faasoa atu lau molimau i isi i lenei mea na tupu.

Tusifaamaumau Ou Lagona Uunai

I le toatele o le au matau, o le maliu o Iesu le Nasareta atonu na foliga mai o se faaiuga faauigalua i se soifuaga ofoofogia. Pe le o le tagata ea lenei sa faatuina mai Lasalo mai le oti? Pe na te lei talitalia ea faamata’u e fasiotia mai le au Faresaio i lea taimi ma lea taimi? Sa Ia faaalia le mana e faamalolo ai tauaso, o lepela, ma le ma’i supa. Sa usitai matagi ma le sami ia te Ia. Ae o lea, ua tautau mai o Ia i se satauro, ma tautino atu, “Ua mae’a”(Ioane 19:30). atonu sa i ai sina faateia moni i upu faaamuamu “Na ia faaolaina isi tagata; e le mafaia e ia ona faaola ia te ia” (Mataio 27:42). Ae ua tatou iloa o le maliu o Iesu e le o le iuga lea ole tala. Ua tatou iloa o le gugu o le tuugamau sa na o sina taimi ma o le galuega faaola a Keriso ua faatoa amata. Ua le o maua o Ia “ie o oti” ae o e o ola (Luka 24:5). O Ana aoaoga o le a le gugu, aua o le a folafola atu e Ona soo lotonuu le talalelei i “nuu uma,” ma le faatuatua i Lana folafolaga o le a Ia “faatasi ma [i latou] e le aunoa, e oo lava i le iuga o le lalolagi” (Mataio 28:19–20).

Manatu mo Suesuega Faaletagata Lava Ia o Tusitusiga paia

Mataio 28; Mareko 16; Luka 24; Ioane 20

Ona ua toetu Iesu, o le a ou toetu ai foi.

I nei fuaitau, o le a e faitau ai i se tasi o mea aupito taua na tutupu i le talafaasolopito o le tagata soifua: o le Toetu lea o Iesu Keriso. A o e faitauina, tuu oe lava e sui ai tagata o e sa molimauina mea na tutupu i le siomaga o le Toetu. Mata o a ni lagona o nei molimau? O a ni ou lagona a o e faitau e uiga i le Toetu o le Faaola? Mafaufau pe faapefea ona aafia ai oe---ou foliga vaaia i le olaga, o au sootaga ma isi, lou faatuatua ia Keriso, ma lou faatuatua i isi upumoni o le talalelei.

Tagai foi Bible Dictionary, “Resurrection”; “Resurrection,” Gospel Topics, topics.lds.org

Luka 24:13–35

E mafai ona tatou valaaulia le Faaola e “mau faatasi ma i tatou.”

O le aafiaga o soo na savavali lea na fetaiai ma le Faaola toetu, e mafai ona ogatusa ma lou ala i le avea ai ma soo. O a sootaga o e vaai i ai i le va o lenei tala ma ou aafiaga o se o mulimuli ia Keriso? E mafai faapefea ona oulua savavali ma Ia i le taimi nei ma valaaulia o Ia e “nofo” mai mo sina taimi? (Luka 24:29) E faapefea ona e iloa Lona mafuta mai i lou olaga? Na faapefea ona molimau mai le Agaga Paia ia te oe i le paia o Iesu Keriso?

Luka 24:36–43; Ioane 20

Pe i ai se tino o Iesu Keriso?

E ala mai i tala o le Alii toetu na faaali atu ia Maria le Makatala ma Ana fegalegaleaiga mulimuli ane ma Ona soo, ua tatou aoao ai o le Toetu o Iesu sa moni lava ma sa faaletino. Faatasi ai ma Lona tino toetu, mamalu, sa Ia savali, talanoa, ma aai faatasi ma Ona soo. O loo molimau mai foi isi mau o Iesu Keriso e i ai se tino o aano ma ivi: Filipi 3:20–21; 3 Nifae 11:13–15; Mataupu Faavae ma Feagaiga 110:2–3; 130:1, 22.

Ioane 20:19–29

“Amuia i latou e lei vaai, ae talitonu mai pea.”

E mafai ona faigata ona talitonu e moni se mea e aunoa ma le vaai i se faamaoniga faaletino. Atonu e i ai taimi e lagona ai faapei o Toma, o le na fai mai, “Afai ou te le vaai atu … ou te le talia lava” (Ioane 20:25). I le tali atu, sa fetalai atu le Faaola ia Toma, “Amuia o e le vaai mai, ae talitonu mai pea” (Ioane 20:29). Ua faamanuiaina faapefea oe i le talitonu i mea faaleagaga e le mafai ona e vaaia? O le a le mea ua fesoasoani e te faatuatua ai i le Faaola tusa lava pe le o mafai ona e vaai ia te Ia? O a isi upumoni e te talitonu i ai tusa lava pe leai se faamaoniga faaletino? E mafai faapefea ona e faaauau e faamalosia lou faatuatua i “mea e le o vaaia, ae moni”? (Alema 32:21; tagai foi Eteru 12:6). Fuafua e tusifaamaumau i se tusi talaaga aafiaga na fesoasoani e te talitonu ai ia Iesu Keriso, pe faasoa atu foi ia i latou po o se tasi e te iloa.

Ioane 21:1–17

Ua valaaulia au e le Faaola e fafaga i Ana mamoe.

Atonu foi e manaia pe a faatusatusa ia fegalegaleaiga a le Faaola ma Ana Aposetolo i le Ioane 21 ma le uluai taimi na Ia poloaiina ai i latou e tuu ifo i lalo a latou upega, o loo tusia i le Luke 5:1–11. O a ni mea e tutusa ai ma ni eseesega ua e maua? O a ni malamalamaaga ua e maua e uiga i le avea ma soo?

Mafaufau pe faapefea ona faatatau ia te oe ia upu a le Faaola ia Peteru o i le Ioane 21:15–17 Pe o i ai se mea o taofiofia oe mai le auauna atu i mamoe a le Alii? Mata o le a lau tali pe afai e fesili atu le Alii, “Pe ete alofa mai ea ia te au?” Manatunatu loloto pe mafai faapefea ona e faaalia lou alofa mo le Alii.

Tagai foi Jeffrey R. Holland, “O Le Poloaiga Muamua ma le Sili,” Ensign po o le Liahona, Nov. 2012, 83–85.

Manatu mo Suesuega Faaleaiga o Tusitusiga Paia ma Afiafi Faaleaiga

A uma ona outou faitau faatasi ma lou aiga ia Evagelia, e mafai ona fesoasoani le Agaga e te iloa ai po o a mataupu faavae e faamamafa ma talanoaina ina ia taulima ai manaoga o lou aiga. O ni nai fautuaga nei:

Mataio 28:6

Aisea ua avea ai upu “E le o iinei o Ia: aua ua toetu oia” ma nisi o upu e aupito sili ona taua ua tautalagia?

Mataio 28; Mareko 16; Luka 24; Ioane 20–21

A o faitauina e lou aiga nei mataupu, mataitu tagata o e na fegalegaleai ma Iesu i tala taitasi. Mo se faataitaiga i se tasi itu atonu e te taulai atu i tagata o e sa asiasi atu i le tuugamau o le Faaola. I se isi itu, atonu e te suesue ma le faaeteete ia taga a le au Aposetolo po o soo i le auala i Emau.

Auala i Emau, saunia e Jon McNaughton

Mataio 28:16–20; Mareko 16:14–20; Luka 24:44–53

I le avea ai o se aiga, talanoaina le galuega sa poloaiina e Keriso Ana Aposetolo e fai E mafai faapefea ona tatou faataunuuina lenei galuega? Pe mafai ona e faasoa mai se taimi na e lagonaina ai “o loo galue le Alii faatasi ma [oe]” e fesoasoani ia e faataunuuina Ona faamoemoega? (Mareko 16:20).

Ioane 21:15–17

Fuafua e faitau fuaiupu nei a o aai faatasi. E mafai i lea mea ona faaopoopo se uiga i upu a le Faaola “fafaga a’u mamoe.” Faavae i mea na aoao mai e Iesu e uiga i mamoe ile Feagaiga Fou (tagai, mo se faataitaiga, Mataio 9:35–36; 10:5–6; 25:31–46; Luka 15:4–7; Ioane 10:1–16), aisea ua avea ai le fafagaina o mamoe ma upuvaliata lelei mo le faafaileleina ma le tausiga o fanau a le Atua? O le a se mea o aoao mai e lenei upuvaliata e uiga i lagona o le Tama Faalelagi ma Iesu mo i tatou?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia Suesuega Faaletagata Lava Ia

Faaaoga musika e valaaulia ai le Agaga ma aoao aoaoga faavae O le faalogologo i pe usuusu viiga e pei o le “He Is Risen!” po o le “Christ the Lord Is Risen Today,” Viiga, nu. 199, 200, e mafai ona valaaulia ai le Agaga ma fesoasoani e aoao ai e uiga i le Toetu o le Faaola.

Funa e, Se a Le Mea E Te Tagi Ai? saunia e Simon Dewey