O Le Afio Mai Faalua, saunia e Harry Anderson.

27 Me--2 Iuni 2

Iosefa Samita—Mataio 1; Mataio 25; Mareko 12–13; Luka 21

“E Sau le Atalii o le Tagata”

A o e faitauina le Iosefa Samita—Mataio 1; Mataio 25; Mareko 12–13; ma le Luka 21, atonu e te fesili, ”O a savali o i ai i nei mataupu mo au? mo lo’u aiga? mo lo’u valaauga?”

Tusifaamaumau Ou Lagona Uunai

Atonu na faateia soo o Iesu i Lana valoaga: o le malumalu maoae o Ierusalema, le totonugalemu faaleaganuu o tagata Iutaia, o le a matua faaumatia ma “o [le a] leai se … maa i luga o le isi.” Na mananao le au soo e iloa atili. “O afea e tutupu ai nei mea?” sa latou fesili ai. “A o le a foi le faailoga o lou afio mai?” (Iosefa Samita—Mataio 1:2--4). O tali a le Alii na faaalia ai le faatafunaga tele ua oo mai i —o se valoaga na faataunuuina i le TA 70—o se mea laitiiti lava pe a faatusatusa i faailoga o Lona afio mai i aso e gata ai. O mea na foliga e sili ona mausali nai le malumalu i Ierusalema o le a faamaonia ua na o sina taimi---o le la, o le masina, o fetu, o atunuu, ma le vasa. E oo lava i “mana o le lagi o le a luluina” (Iosefa Samita—Mataio 1:33). Afai tatou te matauina faaleagaga, e mafai e lenei vavao ona aoao ai i tatou e tuu lo tatou faatuatuaga i se mea e tumau moni. E pei ona folafola mai Iesu, “E mavae atu le lalolagi; ae le mavae atu lava la’u upu . … Ma o se na te tausia au upu, e le faaseseina lava” (Iosefa Samita—Mataio 1:35, 22, 37).

Manatu mo Suesuega Faaletagata Lava Ia o Tusitusiga Paia

Joseph Smith—Mataio

O le a le Iosefa Samita—Mataio?

Iosefa Samita—Mataio, o loo maua i le Penina Tau Tele, o se fuaitau mai le Faaliliuga a Iosefa Samita o le Tusi Paia. O loo i ai isi iloiloga o le fuaiupu mulimuli o le Mataio 23 ma le vaega uma o le Mataio 24 (tagaiBible Dictionary, “Faaliliuga Iosefa Samita”). O le toefaafouga musuia a Iosefa Samita ua toefuatai mai ai upumoni taua na leiloloa Fuaiupu 12–21 o le Iosefa Samita—Mataio e faasino i le faatafunaga o Ierusalema anamua; fuaiupu 21–55 o loo i ai valoaga e uiga i aso amuli.

Iosefa Samita—Mataio 1:21–37; Mareko 13:21–37; Luka 21:25–38

E mafai ona fesoasoani valoaga e uiga i le Afio Mai Faalua o le Faaola ia te au e faafetaiaia le lumanai i le faatuatua.

E mafai ona le maumanatu le faitau e uiga i mea na tutupu e tau atu i le Afio Mai Faalua o Iesu Keriso. Ae ina ua valoia e Iesu nei mea e tutupu, sa Ia ta’u atu i Ona soo “e aua le atuatuvale”Iosefa Samita—Mataio 1:23). E mafai faapefea ona e “le atuatuvale” a o e faalogo e uiga i mafui’e, taua, taufaasese, ma oge? Mafaufau i le fesili lea a o e faitauina nei fuaiupu. Maka pe matau soo se fautuaga faamautinoa e te maua.

Tagai foi Mataupu Faavae ma Feagaiga 29:14–21; 38:30; 45:16–52; 88:86–94; “Afio Mai Faalua o Iesu Keriso,” Gospel Topics, topics.lds.org.

Iosefa Samita—Mataio 1:26–27, 38–55; Mataio 25:1–13; Luka 21:29–36

E tatau ona ou saunia pea mo le Afio Mai Faalua o le Faaola.

E lei faaalia mai e le Atua “le aso po o le itu aso e sau ai le Atalii o le Tagata” (Mataio 25:13). Ae e le finagalo o Ia i lena aso e “faafuasei” mai ia te i tatou (Luka 21:34), o lea ua Ia tuuina mai ai fautuaga ia te i tatou e uiga i le ala e saunia ai.

A o e faitauina nei fuaiupu, faailoa mai faataoto ma isi faatusatusaga sa faaaoga e le Faaola e aoao ai i tatou ia saunia e le aunoa mo Lona Afio Mai Faalua. O a ni mea ua tatou aoao mai ai? O le a se mea ua musuia oe e fai?

Mataio 25:14–30

Ua faamoemoe le Tama Faalelagi ia ou faaaogaina ma le poto Ana meaalofa.

I ona po o le Faaola, o se “taleni” sa faasino i tupe. Ae o le faataoto a le Alii i taleni e mafai ona aoao ai i tatou e uiga i le ala ua Ia finagalo tatou te faaaoga ai soo se faamanuiaga ua Ia tuuina mai ia te i tatou. Ua faamoemoe mai le Alii ia te i tatou ia faaleleia mea ua Ia tuuina mai ia te i tatou. A o e faitauina lenei faataoto, fai se lisi o ni faamanuiaga ma avanoa ua tuuina mai e le Tama Faalelagi ia te oe. O le a se mea ua Ia faamoemoe e te faia i nei faamanuiaga? E mafai faapefea ona e faaaogaina atili ma le poto nei meaalofa? O faapefea ona faalauteleina au taleni a o e auauna atu i le Alii

Mataio 25:31–46

Pe a ou auauna atu i isi, ua ou auauna atu i le Atua.

Pe afai na e tomanatu i se taimi pe o le a faapefea ona faamasinoina e le Alii lou olaga, faitau le faataoto ile mamoe ma ‘oti. O le a le mea o le a sili ona taua pe a e tu i luma o Keriso?

Tagai foi Mosaea 2:17.

Mareko 12:18–27

Mata e faaauau faaipoipoga pe a mavae le Toetutu?

Ua tatou aoao mai faaaliga i ona po nei o le fetalaiga a Iesu “Pe a toetutu i la’ua mai le oti, e le faaipoipo i la’ua pe tuuina atu i le faaipoipoga” e faasino ia i latou o e e lei ulu atu i le feagaiga o le faaipoipoga faaselesitila (tagai MF 132:15–16). O se faaipoipoga faaselesitila, lea e “[faaipoipo] ai se tane i se ava … i le feagaiga fou.” o le a tumau “e oo i le faavavau” pe afai e faamaoni le tane ma le ava i a la’ua feagaiga (MF 132:19).

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia mau, e mafai ona fesoasoani le Agaga e te iloa ai po o a mataupu faavae e faamamafa ma talaoaina ina ia taulima ai manaoga o lou aiga. O ni nai fautuaga nei:

Iosefa Samita—Mataio

Ina ia fesoasoani i lou aiga i le vailiiliina o lenei mataupu, valaaulia i latou e vaavaai mo aoaoga a le Faaola e uiga i le ala e mafai ai ona tatou saunia mo Lona Afio Mai Faalua (tagai, mo se faataitaiga, fuaiupu 22–23, 29–30, 37, 46–48). O le a se mea e mafai ona fai e lou aiga e mulimuli ai i lenei fautuaga?

Iosefa Samita—Mataio 1:22, 37

O le a le uiga o le “teulotoina o afioga a le Atua”? E faapefea ona tatou faia lenei mea o se aiga? E faapefea i le faia o lea mea ona fesoasoani ia i tatou ia taumamao ai mai le faaseseina?

Mataio 25:1–13

E mafai ona e faaaogaina le ata o taupou e toasefulu o loo avatu faatasi ma lenei otootoga e talanoaina Mataio 25:1–13. O a faamatalaga o vaai i ai tagata o le aiga i le ata o loo faamatalaina i nei fuaiupu?

Mata e fiafia tagata o le aiga e sue faataamilo i le fale ia mataua pepa o le suauu sa e nanaina? E mafai ona e faapipii i mataua taitasi ni mea faitino e faatusa i mea e mafai e tagata o le aiga ona fai e faamalolosia ai a latou molimau ma saunia ai mo le Afio Mai Faalua, e pei o tusitusiga paia, ofu lotu, po o se ata o le malumalu.

Mareko 12:38–44; Luka 21:1–4

O le a se mea e mafai e tagata o le aiga ona aoao mai le faataitaiga a le fafine ua oti lana tane? O le a le mea na aoao atu e le Faaola i Ona soo e uiga i taulaga? Faaali atu se pepa o sefuluai, ma talanoaina taulaga a lou aiga i le Alii ma pe faapefea ona fesoasoani nei taulaga e fausia ai le malo o le Atua. Pe o i ai ni taulaga o loo faia e lou aiga e mafai ona tusifaamaumauina i se pepa o sefuluai?

Tupe Iti a le Fafine Ua Oti Lana Tane, saunia e Sandra Rast

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia Suesuega Faaletagata Lava Ia

Tapenapena lou siosiomaga. “E mafai ona matua aafia o tatou siosiomaga i lo tatou tomai e aoao ai ma lagonaina le upumoni” (Teaching in the Savior’s Way, 15). Taumafai e sue se nofoaga e suesue ai tusitusiga paia lea e valaaulia ai le mana o le Agaga Paia. O musika faagaeetia ma ata e mafai foi ona valaaulia le Agaga.

Toalima o i Latou e Popoto, saunia e Walter Rane