Ma Ua Oo ina Po, saunia Benjamin McPherson

10--16 Iuni

Mataio 26; Mareko 14; Luka 22; Ioane 18

“Ae Aua Le Faia Lo’u Loto, ae o Lou Finagalo”

A o e faitau i mea na tutupu o loo faamatala mai i le Mataio 26; Mareko 14; Luka 22; ma le Ioane 18, mataitu soo se lagona uunai e te maua aemaise o uunaiga e faia suiga i lou olaga.

Tusifaamaumau Ou Lagona Uunai

Sa na o le toatolu molimau na vaaitino i mafatiaga o Iesu Keriso i le Faatoaga o Ketesemane---ma sa tele lava ina latou momoe. I lena faatoaga ma mulimuli ane i luga o le satauro, sa tauaveina ai e Iesu Lava ia ia agasala, o tiga, ma puapuaga o tagata uma o e sa ola, e uiga e leai se tasi na ola i lena taimi na iloaina le mea sa tupu. Ae o le taimi lena, o mea aupito taua o le faavavau sa tele ina taunuu e aunoa ma se ano i ai faalelalolagi. Peitai, sa silafia lelei e le Atua le Tama. Sa Ia faafofoga mai i le augani atu a Lona Alo faamaoni: “Lo’u Tama e, a e finagalo i ai, ia e aveese lenei ipu ia te au: a e aua le faia lo’u loto, a o lou finagalo. “Ona faaali mai ai lea ia te ia o le agelu mai le lagi, ua faamalosi ia te ia”(Luka 22:42–43). E ui ina sa tatou lei i ai i le tino e molimauina lenei faatinoga le manatu faapito ma le gauai atu, i se isi itu, e mafai ona avea uma i tatou o molimau o le Togiola a Iesu Keriso. O taimi uma tatou te salamo ai ma maua le faamagaloga o a tatou agasala ma o taimi uma foi tatou te lagonaina ai le mana faamalosiau o le Faaola, e mafai ona tatou molimau atu ai i le mea sa tupu i le Faatoaga o Ketesemane.

Manatu mo Suesuega Faaletagata Lava ia o Tusitusiga Paia

Mataio 26:17–30; Mareko 14:12–26; Luka 22:7–39

O le faamanatuga o se avanoa lea e manatua ai le Faaola.

O le a se mea e te faia e manatua ai tagata o e e taua i lou olaga? Tou te faia lenei mea ma faamanatuga ia te au” (Luka 22:19; tagai foi 3 Nifae 18:7). E fesoasoani faapefea le falaoa, le vai ma isi elemene o lenei sauniga paia e te manatua ai o Ia ma Ona puapuaga? Manatunatu loloto i le fesili lea a o e faitau e uiga i le uluai faamanatuga. E le gata i lea, matau iloiloga o loo maua i le Faaliluga a Iosefa Samita (tagai i vaefaamataaga ma le Bible appendix).

Faaalu sina taimi e manatunatu loloto ai i aafiaga sa oo i ai i le taimi o le faamanatuga i vaiaso taitasi. O le a se mea e mafai ona e faia ia atili anoa ai? Atonu e mafai ona e tusia ni nai mea e musuia oe e manatua e uiga i le Faaola---Ana aoaoga, Ana faatinoga o le alofa, taimi e te lagona ai ua e matua latalata atu lava ia te Ia, pe o agasala ma tiga sa Ia tauaveina i Ona luga mo oe.

Tagai foi 3 Nifae 18:1–13; Mataupu Faavae ma Feagaiga 20:76–79; “Sacrament,” Gospel Topics, topics.lds.org; “Always Remember Him” (video, LDS.org).

Mataio 26:36–46; Mareko 14:32–42; Luka 22:40–46

Na puapuagatia le Faaola i Ketesemane mo au.

Na valaaulia e Peresitene Russell M. Nelson i tatou e “faaalu aoga le taimi e aoao ai e uiga i le Faaola ma Lana taulaga togiola” (“Mauaina o le Mana o Iesu Keriso i o Tatou Olaga,” Ensign po o le Liahona, May 2017, 40).

Mafaufau po o le a lau mea e fai e talia ai le valaaulia a Peresitene Nelson. E mafai ona e amata i le manatunatu loloto ma le agaga tatalo i puapuaga o le Faaola i Ketesemane e pei ona faamatala mai i nei fuaiupu, ma tusi i lalo lagona uunai ma fesili e oo atu i le mafaufau.

Mo se suesuega e sili atu ona loloto i le Faaola ma Lana Togiola, taumafai e saili isi mau mo tali i fesili e pei o nei:

• Aisea na tatau ai ona i ai le Togiola a le Faaola? (Tagai 2 Nifaei 2:5–10, 17–26; 9:5–26; Alema 34:8–16; 42:9–26.)

• O le a se aafiaga o le Faaola ina o Ia mafatia? (Tagai Isaia 53:3–5; Mosaea 3:7; Alema 7:11–13; MFF 19:16–19.)

• O faapefea ona aafia lo’u olaga i puapuaga o Keriso? (Tagai Ioane 10:10–11; Eperu 4:14–16; 1 Ioane 1:7; Alema 34:31; Moronae 10:32–33; Dallin H. Oaks, “Strengthened by the Atonement of Jesus Christ,” Ensign po o le Liahona, Nov. 2015, 61–64.)

• O isi a’u fesili:

A o e aoao i le mea na tupu i Ketesemane, e ono malie le iloa o Ketesemane o se togalaau o olive ma sa aofia ai ma se soligavine, sa faaaogaina e soli ai olive ma tatau le suauu sa faaaoga mo moli ma meaai faapea foi faamalologa (tagai Luka 10:34). O le gasologa o le faaaogaina o mea mamafa e tatau ai le suauu olive e mafai ona faatusa i le mamafa o agasala ma tiga sa tauaveina e le Faaola mo i tatou (tagai D. Todd Christofferson, “Abide in My Love,” Ensign po o le Liahona, Nov. 2016, 50–51).

Mareko 14:27–31, 66–72; Luka 22:31–32

O le liua o se faiga e faifai pea.

Mafaufau i aafiaga o Peteru sa i ai ma le Faaola---o vavega sa ia molimauina ma aoaoga faavae sa ia aoaoina. Aisea la na fetalai atu ai le Faaola ia Peteru, “Pe a liua mai oe, ia e faamalosi ou uso”? (Luka 22:32; ua faaopoopo le faatusilima). O le a le mea na aoao mai e Elder David A. Bednar o le eseesega o le i ai o se molimau ma le liua moni? (tagai “Faaliliuina i le Alii,” Ensign po o le Liahona, Nov. 2012, 106–9). A o e faitau i aafiaga o Peteru i le Mareko 14:27–31, 66–72, mafaufau i lou lava liua. O a ni lesona e mafai ona e aoao mai ia Peteru? A o faaauaua ona e faitauina le Feagaiga Fou, o le a le faamaoniga e te maua i le liua o Peteru ma ana taumafaiga e faamalolosia isi? O le a le aafiaga o le meaalofa o le Agaga Paia na i ai i lona liuaina? (tagai Ioane 15:26–27; Galuega 1:8; 2:1–4).

Manatu mo Suesuega Faaleaiga o Tusitusiga Paia ma Afiafi Faaleaiga

A o faaauau pea ona e faitau faatasi ma lou aiga e uiga i le toe vaiaso o le soifuaga o le Faaola, e mafai ona fesoasoani le Agaga e te iloa ai po o a mataupu faavae e faamamafa ina ia taulima ai manaoga o lou aiga. O ni nai fautuaga nei:

Mataio 26:17–30; Mareko 14:12–26; Luka 22:7–39

E faape’i le aafiaga o lou aiga i le taimi o faamanatuga i vaiaso taitasi? O le faitau e uiga i le uluai faamanatuga e mafai ona musuia ai se talanoaga e uiga i le taua o le faamanatuga ma auala e mafai ai e tagata o le aiga ona faa’anoa atili a latou tapuaiga. Fuafua e faaali le ata o le Tufatufaina o le Faamanatuga (Tusi Ata o le Talalelei, nu. 108) ma fefaasoaai manatu o le tasi ma leisi e uiga i mea e mafai ona e fai a o lei faia le faamanatuga, i le taimi o le faamanatuga, ma pe a uma le faamanatuga.

Luka 22:40--46

Pe a faitau e lou aiga ia fuaiupu nei, e mafai ona latou fefaasoaai i mea sa latou aoaoina a o latou suesueina ia mau fautuaina i le suesuega faaletagata lava ia o le vaega “Na puapuagatia le Faaola mo au i Ketesemane.”

Luka 22:50–51

O le a se mea ua tatou aoao e uiga ia Iesu mai lenei aafiaga?

Suffer Ye Thus Far, by Walter Rane

Mataio 26:36–46; Mareko 14:32–42; Luka 22:40–46

O le a se mea ua tatou aoaoina mai upu a le Faaola i nei fuaiupu?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava ia

Saili i upu a perofeta ma aposetolo o aso e gata ai. Faitau ma po o a mea na aoao mai e perofeta ma aposetolo o aso e gata ai e uiga i upumoni e te maua i mau. Mo se faataitaiga, i le lomiga o le konafesi aoao aupito lata mai Ensign po o le Liahona, e mafai ona e sailia le faasino autu mo le “Togiola” (tagai Aoao Atu i le Ala a le Faaola, 21).

Aua Le Faia Lo’u Loto, a o Lou, saunia e Walter Rane