“1-7 Iulai. Galuega 1–5: “E Fai Foi Outou Ma Molimau ia te Au’” Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 (2019)
“1-7 Iulai. Galuega 1–5,” Sau, Mulimuli Mai ia te Au---Mo Tagata Taitoatasi ma Aiga: 2019
O le Aso o le Penetekoso saunia e Sidney King
1–7 Iulai
Galuega 1-5
“E Fai Foi Outou Ma Molimau ia te Au”
A o e suesue i le Galuega 1–5, e mafai ona musuia oe e le Agaga Paia ia maua upumoni e talafeagai mo lou olaga. Ia maitau fuaiupu e faagaeetia ai oe, ma vaavaai mo avanoa e faasoa atu ai mea ua e aoaoina.
Tusifaamaumau Lagona e Uunaia ai Oe
Pe na e mafaufau faapea po o a ni manatu ma ni lagona o Peteru ina ua ia, faatasi ai ma isi Aposetolo, “tulimatai ae i le lagi” ao afio ae Iesu i Lona Tama? (Galuega 1:10). O le Ekalesia sa faavaeina e le Alo o le Atua lea ua taitaiina nei e Iesu e ala atu ia Peteru, le perofeta a le Atua. O le galuega o le taitaia o le taumafaiga e “[aoao] nuu uma” ua taoto nei i luga o Peteru (Mataio 28:19). Ae afai sa ia lagona le le atoatoa po o le fefe, tatou te le maua se faamaoniga o lena mea i le tusi o Galuega. O mea tatou te maua i ai o faataitaiga o le molimau le fefe ma le liuaina, faamalologa faavavega, faaaliga faaleagaga, ma le tuputupu ae tele mo le Ekalesia. O lenei la, faatasi ai ma le meaalofa o le Agaga Paia, sa le toe avea ai Peteru ma faifaiva e lei aoaoina lea na maua e Iesu i luga o matafaga o le Sami o Kalilaia. Po o ia foi o le tagata mafatia o le sa nao ni vaiaso na muamua atu lea sa ia tagitui ai ma le tiga ona sa ia faafitia lona iloa o Iesu le Nasareta.
I le tusi o Galuega, o le a e faitau ai i tautinoga mamana e uiga ia Iesu Keriso ma Lana talalelei. O le a e iloa ai le ala na suia ai e lena talalelei ia tagata—e aofia ai ma oe—e avea ma soo totoa ua silafia e le Atua e mafai ona avea ai i latou.
Manatu mo Suesuega Faaletagata Lava Ia o Tusitusiga Paia
Galuega 1:1–8, 15–26; 2:1–42; 4:1–13, 31–33
E taitai e Iesu Keriso Lana Ekalesia e ala i le Agaga Paia.
O le tusi o Galuega ua tusifaamaumau ai taumafaiga a Aposetolo e faatuina le Ekalesia a Iesu Keriso ina ua mavae le Afio Ae o le Faaola. E ui ina sa le toe i ai Iesu Keriso i le lalolagi, sa ia taitaia le Ekalesia e ala i faaaliga e ala mai i le Agaga Paia. Mafaufau pe faapefea ona taiala e le Agaga Paia ia taitai fou o le Ekalesia a Keriso ao e toe faamanatuina fuaitau nei: Galuega 1:1–8, 15–26; 2:1–42; 4:1–13, 31–33.
O a nisi o tofiga, valaauga po o tiutetauave ua tuuina atu e le Alii ia te oe? O a ni mea ua e aoao mai aafiaga a nei uluai Aposetolo e uiga i le auala e mafai ona e faalagolago ai i le Agaga Paia e taiala oe?
Tagai foi i le Bible Dictionary, “Holy Ghost.”
O le a le faamoemoega o le meaalofa o le tautala i gagana?
O le meaalofa o le tautala i gagana o nisi taimi e faamatalaina o le tautala i se gagana e le malamalama i ai se tasi. Ae peitai, sa faatatau ai le Perofeta o Iosefa Samita i mea na tutupu i le Galuega 2 e faamanino mai ai e faapea, o lenei meaalofa a le Agaga “na tuuina mai mo le faamoemoega o le talai atu i e o a latou gagana e le malamalama gofie; e pei ona i ai i le aso o Penetekoso. … O le fuafuaga autu o le [meaalofa o le] tautala i gagana eseese o le tautala lea i tagata mai nuu ese” (Aoaoga a Peresitene o le Ekalesia: Iosefa Samita [2008], 409-10). O le Tausamiga o le Penetekoso, o se aso fiafia tele a Iutaia, na aumaia ai tagata Iutaia mai le tele o atunuu i Ierusalema. O le meaalofa o le tautala i gagana na mafai ai e nei tagata asiasi ona malamalama i upu a Aposetolo i a latou lava gagana moni.
O uluai mataupu faavae ma sauniga o le talalelei e fesoasoani ou te sau ai ia Keriso.
Pe na i ai se taimi na e lagonaina ai le “tuia o [lou] loto,” e pei o tagata Iutaia i le aso o Penetekoso? (Galuega 2:37). Atonu sa e faia se mea sa e salamo ai, pe atonu foi sa e manao lava e sui lou olaga. O le a le mea e tatau ona e faia pe a i ai ia lagona ia te oe? O le fautuaga a Peteru i tagata Iutaia o loo maua i le Galuega 2:38. Ia maitau pe na faapefea ona aafia nei tagata liliu mai i uluai mataupu faavae ma sauniga o le talalelei (e aofia ai le faatuatua, salamo, papatisoga, ma le meaalofa o le Agaga Paia—po o le mea lea e taua i nisi o taimi o le aoaoga faavae a Keriso) e pei ona tusia i le Galuega 2:37–47.
Atonu ua uma ona papatisoina oe ma maua le meaalofa o le Agaga Paia, e faapefea la ona faaauau ona e faaaogaina le aoaoga faavae a Keriso? Mafaufau i upu nei mai ia Elder Dale G. Renlund: “E mafai ona faaatoatoaina i tatou e ala i le faateleina o le faalagolago atoa e le aunoa … faatinoina o le faatuatua ia Keriso, salamo, taumamafa ma feinu i le faamanatuga e faafou ai feagaiga ma faamanuiaga o le papatisoga, ma le mauaina o le Agaga Paia e fai ma soa tumau i se tulaga maualuga atu. A tatou faia lea mea, e avea atili i tatou e faapei o Keriso ma ua mafai ona tumau e oo i le iuga, ma mea uma e aofia ai” (“Le Au Paia o Aso e Gata Ai, Taumafai Pea,” Ensign po o le Liahona, Me 2015, 56).
Tagai foi 2 Nifae 31; 3 Nifae 11:31–41; 27; Brian K. Ashton, “O Le Mataupu Faavae a Keriso,” Ensign po o le Liahona, Nov. 2016, 106–9.
O a “tausaga e filemu ai” ma “tausaga e toe fuatai ai mea uma lava”?
“O taimi e filemu ai” e faasino i le Meleniuma, i le taimi o le a toe afio mai ai Iesu Keriso i le lalolagi. “O le taimi o le toefuatai mai o mea” e faasino i le Toefuataiga o le talalelei.
Ua tuuina atu i soo o Iesu Keriso le mana e fai ai vavega i Lona suafa.
Sa faamoemoe le tagata pipili e maua ni tupe mai ia i latou o e sa o mai i le malumalu. Ae sa ofo atu ia te ia e auauna a le Atua se mea e sili mamao atu. A o e faitau i le Galuega 3; 4:1–31; ma le 5:12–42, mafaufau pe o a aafiaga o le vavega sa sosoo mai ai:
I le tagata pipili
Ia Peteru ma Ioane
I molimau i le malumalu
I faitaulaga sili ma pule
Isi Au Paia
Tagai foi i vitio “Peter and John Heal a Man Crippled Since Birth,” “Peter Preaches and Is Arrested” (LDS.org).
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
O anafea na tatou lagonaina ai le “tuia o o [tatou] loto” a o aoao mai e se tasi le talalelei? O le a le uiga o lenei lagona? Aisea e taua ai le fai atu “O le a se mea e tatau ona tatou faia?” pe a tatou maua na lagona?
Sa faapefea ona ese le faamanuiaina o le tagata i le malumalu nai lo le mea sa ia faamoemoeina? O faapefea ona tatou vaaia le oo mai o faamanuiaga a le Tama Faalelagi ia i tatou i auala e lei faamoemoeina?
A o Le Mea ua ia te Au, Ou Te Avatu Lea ia te Oe, saunia e Walter Rane
O le a se mea ua faagaeetia ai oe i le faamaoni o Peteru ma Ioane? E mafai faapefea ona tatou totoa ia tatou molimau ia Iesu Keriso?
Atonu e fiafia lou aiga e faatino le tala ia Anania ma Safaira ma ni toniga faigofie ma ni tupe siliva. O a ni lesona tatou te aoao mai lenei tala? E tusa ai ma manaoga o lou aiga, e mafai ona outou talanoaina le faamaoni, lagolagoina o taitai Perisitua, ma le faapaiaga.
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Filifili se autu. Tuu atu i tagata o le aiga e feauaua’i e filifili se autu mai le Galuega 1–5 e suesue faatasi.
O Le Afio A’e o Iesu, saunia e William Henry Margetson