Faaeega Paia

Vaaiga Aoao

O le faaeega paia o se sauniga faale-ekalesia e faataunuuina i totonu o malumalu O Le Ekalesia a Iesu Keriso o le Au Paia o Aso e Gata Ai. E avanoa i tagata matutua o le Ekalseia o e ua saunia mo lenei aafiaga paia.

O le faamauga e tuuina mai ai aoaoga, feagaiga, ma faamanuiaga folafolaina ia e ofoina mai ai le mana, faamoemoega, ma le puipuiga i le olaga i aso taitasi. E aoao mai ai e uiga i le Foafoaga o le lalolagi, le Pau o Atamu ma Eva, ma le fuafuaga o le faaolataga e ala mai ia Iesu Keriso, ma la tatou malaga toe foi atu i le afioaga o le Atua. O le faaeega paia e fesoasoani ia i latou o e mauaina ia mulimuli i le Faaola a o latou taumafai mo “ina ia fai ma tagata matua ina ia oo i le fua o le ua matua e tatau ma le tumu o Keriso” (Efeso 4:13), “faalagolago atoa i galuega a ia o lē ua malosi aoao e laveai” (2 Nifae 31:19). O le faamamaluina o feagaiga o le faaeega paia e agavaa ai tagata o le Ekalesia e ulufale atu i le feagaiga o le faaipoipoga e faavavau, e taitai atu ai i le meaalofa taua o le ola e faavavau.

O le upu faaee e lua ona uiga e faatatau i ai: “ia faaee atu se meaalofa” ma le “ia faaofu ai.” I le 1831 na poloaiina ai e le Alii le Au Paia e faapotopoto i Ohaio, faatasi ai ma se folafolaga e faapea, “o iina o le a Ou tuu atu ai ia te outou laʼu tulafono; ma o iina o le a faaeeina ai outou i le mana mai luga” (Mataupu Faavae ma Feagaiga 38:32). O ni vaega o le faaeega paia, sa faatautaia i totonu o le Malumalu o Katelani. Na amata i le 1842, ona faatautaia faaeega paia atoa i tagata o le Ekalesia i Navu, Ilinoi. I aso nei, ua valaaulia ai tagata uma o le Ekalesia ia saunia e maua le faaeega paia.

E ala i le faaeega paia, ua faalolotoina ai e tagata o le Ekalesia a latou sootaga faafeagaiga ma le Atua a o latou folafola atu e mulimuli i Ana tulaga faatonuina o le amio mama, amio sa’o, ma auaunaga i isi. I lenei sauniga paia, e osi feagaiga ai tagata o le Ekalesia “ia tausia le tulafono o le usiusitai, le tulafono o le taulaga, le tulafono o le talalelei, le tulafono o le ola mama, ma le tulafono o le faapaiaga” (David A. Bednar, “Saunia e Maua Mea Manaomia Uma,” Ensign po o le Liahona, Me 2019, 103). O le faamamaluina faamaoni o nei folafolaga e fesoasoani ai i tagata o le Ekalesia ia avea o ni Au Paia e ala i le Togiola a Keriso (tagai Mosaea 3:19). O le faaeega paia o se tasi lea o auala e tuu mai ai e le Atua Lona mana i luga o Ona tagata o le feagaiga.

Na saunoa mai Peresitene Iosefa Filitia Samita e uiga i le taua o le faaeega paia i o tatou olaga i aso taitasi:

“Afai tatou te malaga atu i le malumalu e sii o tatou lima ma osi feagaiga o le a tatou auauna i le Alii ma tausia ana poloaiga ma tausia i tatou ma le mama mai lenei lalolagi. Afai tatou te malamalama i le mea ua tatou faia, ona avea lea o le faaeega paia o se puipuiga ia i tatou i o tatou olaga atoa—o se puipuiga e le maua ese alii [po o se tamaitai] e le alu i le mamalu.

“Na ou faalogo i lo’u tamā o fai mai faapea, i le itula o tofotofoga, i le itula o faaosoosoga, na te mafaufau ai i folafolaga, o feagaiga sa ia faia i le Maota o le Alii, ma sa o se puipuiga mo ia. … O lenei puipuiga o le aoga lena o nei sauniga, i se vaega. Ua latou faasaoina i tatou i le taimi nei ma e faaeaina ai i tatou i se taimi o mulimuli mai, pe afai tatou te faamamaluina. Ou te iloa ua tuuina mai lenei puipuiga aua ua ou iloaina foi, e faapei foi o le afe o isi ua manatua a latou matafaioi” (Aoaoga a Peresitene o le Ekalesia: Iosefa Filitia Samita [2013], 235–36).

E faaopoopo atu i nei faamanuiaga o le puipuiga i aso taitasi, na faamatalaina e Polika Iaga le faaeega paia e faatatau i lona taua pe a uma ona tatou faamaeaina la tatou malaga i le olaga faitino:

“O lou faaeega paia o le, mauaina lea o na sauniga uma i totonu o le maota o le Alii, lea e tatau ai mo outou, pe a mavae atu ma lenei olaga, e mafai ai ona outou savavali atu i le afioaga o le Tama, pasia agelu o tutu o ni leoleo, ma mafai ona tuu atu ia i latou ia upu tatala, o igoa ma faailoga, e faatatau i le perisitua paia, ma maua ai lou faaeaga e faavavau” (Discourses of Brigham Young, sel. John A. Widtsoe [1954], 416).

I lana uluai malelega faalauaitele i le avea ai ma Peresitene o le Ekalesia, na aoao mai ai Peresitene Russell M. Nelson e uiga i le mana o le faaeega paia e faatatau i la tatou malaga i le olaga nei ma i sauniuniga mo le ola e faavavau:

“I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga” (“A’o Tatou Agai Faatasi Atu i Luma,” Liahona, Ape. 2018, 7).

O aoaoga faaopoopo mai perofeta ma aposetolo o onaponei ua ta’ua ai le faaeega paia e mafai ona tagai i ai i le ChurchofJesusChrist.org/temples/prophetic-teachings-on-temples.

Tusifaamaumau Ou Lagona Uunai