O Fesili e Masani ona Fesiligia

O a mea e fai e tagata i le malumalu?

Ua aoaoina i tatou i totonu o le malumalu, tatou te osia feagaiga, ma ua folafola mai ia i tatou ni faamanuiaga. Tatou te mauaina sauniga lea e faataga ai i tatou e nonofo i le afioaga o le Atua.

O se tasi o sauniga tatou te mauaina i le malumalu o le faaeega paia. O le uiga o upu faaeega paia o le “meaalofa” po o le “faaee atu.” I le avea ai o se vaega o lenei sauniga, ua aoaoina i tatou e uiga i le faamoemoega o le olaga, le misiona ma le Togiola a Iesu Keriso, ma le fuafuaga a le Tama Faalelagi mo Lana fanau. Tatou te maua se vaaiga o le tulaga tatou te oo i ai pe a tatou nonofo faatasi i Lona afioaga a o tatou lagonaina le siosiomaga toafilemu i le malumalu.

O le isi sauniga o le malumalu o le faamauga, lea e faamau ai tane ma ava i le isi ma fanau i o latou matua i aiga e faavavau. O lona uiga pe a tatou faamaoni i a tatou feagaiga, o le a faaauau pea a tatou sootaga faaleaiga e oo i le faavavau.

E faaopoopo atu i le mauaina o nei sauniga mo i tatou lava, e mafai ona tatou mauaina mo o tatou tuaa ua maliliu. O lenei auala, o tagata ua maliliu ae lei mauaina nei sauniga taua e pei o le papatisoga ma le faamauga, o le faaeega paia, ma le faamauga e mafai ona maua le avanoa e talia ai nei sauniga.

E faape’ī totonu o le malumalu?

O le malumalu e toafilemu, o se nofoaga paia, ma ua vavaeeseina mai popolega ma faafitauli o le lalolagi. O eria uma o le malumalu ua tausiaina ma le matagofie ma le faaeteete ina ia i ai le agaga o le migao. Ona o le maota o le Alii, ma ona o galuega paia o loo faatino ai iina, tatou te lagonaina i le malumalu le malosi o le Agaga ma lagona le latalata i le Alii. O iina tatou te maua ai faaaliga faaletagata lava ia ma le malosi faaleagaga e fesoasoani ia i tatou e foia ai faafitauli. O se vaega lea o le mafuaaga ua faamalosiauina ai le auai soo i le malumalu.

O a ofu e tatau ona ou ofuina pe a ou alu i le malumalu?

Fai ofu talafeagai mo le Aso Sa pe a e auai i le malumalu. Aloese mai le soona teteu, ae ia pei lava ona e faia i le sauniga faamanatuga. E te faaalia le migao ma le faaaloalo mo le Alii ma Lona maota ma valaaulia le Agaga i lou mama ma lou tausaafia.

E i ai potu faapitoa mo laei i totonu o le malumalu lea tou te sui ai mai o outou laei o le Aso Sa ae fai laei papae. O lenei suiga o laei e avea o se faamanatu o loo e tuua mo sina taimi le lalolagi ae ulufale atu i se nofoaga paia. O laei papae e faatusa lea i le mama, ma o le tutusa uma o laei i le malumalu e aumaia ai se lagona o le lotogatasi ma le tutusa.

O afea e tatau ona maua ai o’u faaeega paia?

E tele lava ina e mauaina ou faaeega paia i se taimi puupuu lava a o lei alu lau misiona pe e te lei faaipoipo i le malumalu. O le autalavou nofofua o e lei maua se valaauga e ave se misiona pe e le o faamau e faaipoipo i le malumalu e masani lava ona le fautuaina e maua ni o latou lava faaeega paia.

O tagata fou o le ekalesia e faatali seia atoa le tausaga talu ona papatisoina ona maua lea o o latou faaeega paia.

O le mauaina o ou lava faaeega paia o se vaega taua. Talanoa ma lou epikopo. Tatalo ma mafaufau pe ua e saunia.

O le a se mea e mafai ona ou ta’u atu i isi e uiga i o’u aafiaga i le malumalu?

E mafai ona e talanoa e uiga i foliga o totonu o le malumalu, ma e mafai ona e faasoa saoloto atu ou lagona na e maua i totonu o le malumalu. Ae peitai, o feagaiga ma sauniga o le malumalu, e aofia ai upu na faaaogaina, ua matua paia lava e le mafai ona talanoaina auiliili i fafo atu o le malumalu. E ala i le aloese mai le talatalanoa i nei mea paia i fafo atu o le malumalu, tatou te puipuia ai mai le ulagia, faamaina, po o le le faaaloalogia. Aua e te talatalanoa faasamasamanoa pe a e talanoa atu e uiga i ou aafiaga i le malumalu.

Aisea e faaaoga ai faatusa i totonu o le malumalu?

I le taimi o Lana galuega faaletino, e tele lava ina aoao atu le Faaola i tala faafaataoto e fai ma sui o ni upumoni faavavau. Na Ia aoao mai ia tatou aoao atu foi i se auala lava e tasi i totonu o le malumalu. E i ai faatusa i sauniga ma feagaiga o le malumalu, o latou faatinoga, faatulagaga faaletino, ma laei o loo laeiina. Pe a e mafaufau i uiga o nei faatusa faatasi ai ma le taitaiga a le Agaga Paia, o le a mafai ona fesoasoani lea ia te oe e te iloa ai le moni, ma aoao e uiga i le Tama Faalelagi ma Iesu Keriso, ma tuputupu ae ai faaleagaga.

E i ai tagata o lou aiga e le mafai ona ulu atu i le malumalu. O le a se mea e mafai ona ou faia e fesoasoani ai ia i latou ina ia lagona le faaaofiaina i lau faaipoipoga faalemalumalu?

O se autu maaleale lenei. Talu ai ona o le malumalu o le maota o le Alii, ua faapaiaina mo Ia, o i latou o e ulu atu e tatau ona i ai se pepa faataga o le malumalu, lea e faamaonia ai ua latou ola ai i tulaga faatonuina na Ia faatulagaina. Ae peitai, o i latou e le mafai ona maua se pepa faataga i le malumalu e talia i lotoa o le malumalu, ma o le tele o malumalu e i ai se potu e mafai ona latou faatali ai a o faamauina tagata o le aiga. O se ulugalii e i ai ni tagata o le aiga e le mafai ona ulu atu i le Malumalu e mafai ona valaaulia la latou epikopo po o se isi tagata o le Ekalesia e faatali ma i latou i totonu o le potu faatalitali.

E mafai foi e se ulugalii ona fuafua ma la latou epikopo e fai se sauniga faapitoa pe a maea mo aiga ma uo e le i ai ni pepa faataga. E aumaia ai e lenei sauniga se avanoa mo i latou e lagona ai le faaaofia ma aoao ai e uiga i le faaipoipoga e faavavau. E ui e leai se sauniga e faatinoina ma e le i ai ni feagaiga e osia, ae e mafai ona fesuiai ni mama i se sauniga faapenei.

O le a se mea e tatau ona ou faia e saunia ai ina ia maua sauniga o le malumalu?

E mafai ona e saunia i le alu soo i le malumalu ma auai i papatisoga mo e ua maliliu, e ala i le auai i aoaoga e sauniuni i le malumalu o loo faatulagaina e lau epikopo, ma e ala i le suesue i tusitusiga paia ma tusiga o i lenei tamaitusi.

E mafai foi ona e saunia e ala i le ola ai i tulaga faatonuina a le Alii o le agavaa i le malumalu. Fafaga lau molimau i le Atua le Tama ma Iesu Keriso ma Lana talalelei toefuataiina. Usiusitai i le Upu o le Poto ma le tulafono o le ola mama. Lagolago ou taitai o le Ekalesia, totogi atoa le sefuluai, ma auai i au sauniga o le Ekalesia. Ia e faamaoni i au fegalegaleaiga ma isi, ma ia mautinoa o loo ogatasi lou olaga faaleaiga ma aoaoga a le Ekalesia. Tausia au feagaiga o le papatisoga ina ia e saunia e maua le feagaiga maualuga o le malumalu.

Potu selesitila, Malumalu o Mount Timpanogos Iuta.

Malumalu o Jordan River Iuta. Faapaiaina i le aso 16 Nov., 1981.

Malumalu o Navu Ilinoi. Faapaiaina i le aso 27, 2002.