O Le Malumalu Paia
I totonu o malumalu, e mafai ai e tagata o le Ekalesia ua faaagavaaina i latou lava ona auai i sauniga aupito sili ona faaeaina o sauniga faaola ia ua uma ona faaalia mai i tagata.
O totonu o malumalu e mafai ai ona tatou auai ai i sauniga aupito sili ona faaeaina o sauniga faaola
E tele mafuaaga e fia sau ai se tasi i le malumalu. E oo lava i ona foliga i fafo e pei lava o ta’u mai ai ona faamoemoega loloto faaleagaga. E sili atu ona manino na faamoemoega faaleagaga i totonu o puipui o le malumalu. I luga ae o le faitotoa o le malumalu o loo tusia ai upu ia “E Paia i le Alii.” Pe a e ulu atu i soo se malumalu lava ua faapaiaina, ua e i ai i totonu o le maota o le Alii.
I totonu o malumalu, e mafai ai e tagata o le Ekalesia ua latou faaagavaaina i latou lava, ona auai i sauniga aupito sili ona faaeaina o sauniga faaola, ia ua uma ona faaalia mai i tagata. O iina, i se sauniga paia, e mafai ai e le tagata ona mulumuluina ma faauu ma aoaoina ma faia faaeega paia ma faamauina. Pe a tatou mauaina foi nei faamanuiaga mo i tatou lava, ona mafai lea ona avea i tatou ma sui o i latou o e ua maliliu ae lei mauaina lenei lava avanoa. Tatou te faia nei sauniga paia i totonu o malumalu mo e o loo soifua faapea ma e ua maliliu.
O sauniga ma feagaiga o le malumalu e faigofie, matagofie, ma paia
O le faitauina ma le faaeteete o tusitusiga paia e faaalia mai ai le le’i ta’uina mai e le Alii mea uma i tagata uma. Na i ai ni tulaga manaomia e agavaa ai muamua ona faatoa mauaina lea o ni faamatalaga paia. O le faavasegaga lena e aofia ai sauniga o le malumalu.
Tatou te le talanoaina sauniga o le malumalu i fafo atu o malumalu. E le i faamoemoeina lava le malamalama e uiga i sauniga o nei malumalu e faapea ua mo na o nisi e toaitiiti ua filifilia, ma ia mautinoa ia le iloa lava e isi se mea e uiga i ia malumalu. O le mea moni, o se tuu faafeagai lea o lena tulaga. Faatasi ai ma se taumafaiga tele, matou te uunaia ai tagata uma ina ia agavaa ma sauniuni mo aafiaga i le malumalu. O i latou ua uma ona ulu i le malumalu ua aoaoina i se manatu lelei sili e faapea: E i ai se aso o le a maua ai e tagata ola uma ma tagata uma sa soifua mai le avanoa latou te faalogo ai i le talalelei ma talia pe teena foi sauniga o loo ofoina atu e le malumalu. Afai e teena lenei avanoa, o lea tulaga e faia e le tagata lava ia.
O sauniga ma feagaiga o le malumalu e faigofie. E matagofie. E paia. E le faalauaiteleina ina ne’i tuuina atu ia i latou o e lei saunia. O le fia iloa, e le o se sauniuniga lena. O le na ona naunau loloto foi i i ai e le o se sauniuniga lena. O tapenaga mo sauniga e aofia ai muai laasaga nei: faatuatua, salamo, papatisoga, faamauga, agavaa, o se agavaa faatagata matua ma mamalu o se tasi ua valaaulia o se malo faaaloalogia e ulufale atu i le maota o le Alii.
O i latou o e agavaa e mafai ona ulu atu i le malumalu
O i latou uma o e agavaa ma tauaogaina i soo se itu e mafai ona ulu atu i le malumalu, o iina e faailoa atu ai feagaiga ma sauniga paia.
A e maua loa se lagona o le taua o faamanuiaga o le malumalu ma mo le paia o sauniga e faia i le malumalu, o le a e le fesiligia tulaga maualuga faatonuina ua faatuina e le Alii mo le ulufale atu i le malumalu paia.
E tatau ona i ai sou pepa faataga o le malumalu o aoga i le taimi nei e faatagaina ai oe i le malumalu. O lenei pepa faataga e tatau ona sainia e taitai talafeagai o le Ekalesia. Na o i latou lava ua agavaa e tatau ona o i le malumalu. E i lau epikopo po o le peresitene o le paranesi le tiutetauave o le fesiligia o lou agavaa patino ae te lei mauaina ni ou sauniga o le malumalu. O lenei faatalanoaga e taua naua, aua o se mea lea e iloiloina ai faatasi ma se auauna faauuina a le Alii, le tulaga o loo e ola ai. Afai e i ai se mea e faaletonu i lou olaga, o le a mafai e le epikopo ona fesoasoani ia te oe e faaleleia. E ala atu i lenei faiga, e mafai ona e tautino atu pe mafai foi ona fesoasoani e faatulaga lou agavaa e ulu atu i le malumalu i se faamaoniga mai le Alii.
O le faatalanoaga mo se pepa faataga o le malumalu e faia patino lava na o le epikopo ma le tagata o le Ekalesia ua talosaga mai. O iina e fesiligia ai le tagata i ni fesili suesue e uiga i lana amio, agavaa, ma lona faamaoni i le Ekalesia ma ona taitai. E tatau ona faamaonia e le tagata lona mama a’ia’i ma le tausiaina o le Upu o le Poto, totogi atoa le sefuluai, ola e tusa ai ma aoaoaga a le Ekalesia, ma ia le auai lava i se faalapotopotoga a vaega o tagata faatuiese. Ua faatonuina le epikopo o le le faalauaiteleina o mataupu nei na talanoaina ma tagata taitoatasi na faatalanoaina, e matuai taua naua.
O tali e taliaina i fesili a le epikopo o le a mafai ai ona agavaa le tagata e maua se pepa faataga o le malumalu. Afai e le o tausia e le tagata talosaga ia poloaiga, pe o i ai foi se mea o faaletonu e uiga i lona olaga lea e manaomia ona faasagatonu, e tatau ia te ia ona faaalia le salamo moni a o le i tuuina atu ia te ia se pepa faataga.
A uma loa ona faia e le epikopo lena faatalanoaga, ona faatalanoaina foi lea o oe e le peresitene o le siteki ae e te le i mauaina ou sauniga o le malumalu.
O aoaoga i totonu o le malumalu o ni faatusa
Ae e te le i alu atu i le malumalu mo le taimi muamua, po o le tele foi o taimi pe a uma ona e ulu atu i ai, o le a mafai ona fesoasoani ia te oe lou iloa o aoaoga e faia i malumalu ua faia i ni auala faa-faatusa. O le auala foi lea na tuuina mai ai e le Alii, le Aoao Sili, le tele o Ana aoaoga.
O le malumalu o se a’oga sili. O se fale o le aoaoga. E tausia ai i totonu o le malumalu le siosiomaga lea e talafeagai ai mo aoaoga i mataupu e loloto le faaleagaga. O Elder John A. Widtsoe, o le ua maliu o le Korama a Aposetolo e Toasefululua, sa avea ma se peresitene tautaua o se iunivesite ma o se tagata atamai ua lauiloa i le lalolagi. E ava tele o ia i galuega faalemalumalu ma na saunoa mai i se tasi taimi e faapea:
“O sauniga o le malumalu ua aofia ai le fuafuaga atoa o le faaolataga, e pei ona aoao mai i lea taimi ma lea taimi e taitai o le Ekalesia, ma ua faamalamalamaina ai mataupu e faigata ona malamalama i ai. E le lolo’uina pe femilosa’ia aoaoga o le malumalu ina ia talafeagai ma le fuafuaga sili o le faaolataga. O le tulaga lelei atoatoa o le faaeega paia, o se tasi lea o feupuaiga maoae o le moni o sauniga o le malumalu. E le gata i lea, o lenei atoatoa o le suesuega ma le faamalamalamaga o le fuafuaga o le Talalelei, e avea ai tapuaiga i le malumalu ma se tasi o metotia sili ona aoga e toe faafouina ai le mafaufau e uiga i le ata atoa o le Talalelei” (“Temple Worship,” Utah Genealogical and Historical Magazine, Ape. 1921, 58).
Afai o le a e alu i le malumalu ma manatua o aoaoga o ni faatusa, e te le mafai ona e alu atu ma le agaga sao e aunoa ma lou foi mai ma se vaaiga ua faalauteleina, ma e lagona le faaeaina teisi o oe, faatasi ma lou malamalama ua faateleina e uiga i mea faaleagaga. O le fuafuaga o aoaoga e maoae naua. O se mea ua musuia. Sa aoaoina e le Alii lava Ia, le Aoao Sili, Lona au soo e le aunoa i faataoto— o ni aoaoga tuugutu ia sa avea o ni faatusa o ni mea atonu sa faigata ona malamalama i ai.
O le malumalu lava ia ua avea o se faatusa. Afai na e vaai i se tasi o malumalu i le po, ua faamumu uma ona moli, e te silafia lava le mafai ona matagofie o lena vaaiga. O le maota o le Alii, ua faaofuina i le malamalama, e tu matilatila i le pogisa, ua avea ma faatusa o le mana ma musumusuga o le talalelei a Iesu Keriso ua tu o se faailo i se lalolagi o loo goto atu pea i le pogisa faaleagaga.
E te ulufale loa i le malumalu ona e suia lea o ou laei masani o le auala, i laei papae o le malumalu. O lenei suiga o laei e faia i le potu e fai ai laei, lea e tofu le tagata ma se loka ma se avanoa e fai ai ona lava laei na o ia. O totonu o le malumalu e faatumauina ai le faia o laei tatau ma talafeagai. A o e tuuina ou laei i totonu o se loka, ua e tuuina ai iina ou popolega ma atugaluga ma mea o loo faalavelaveina ai oe. E te laa ese atu mai lena potu itiiti ua uma ona e laei papae, o le a e lagona le tulaga o le tasi ma le tutusa, aua o loo laei tutusa uma i latou o loo siomiaina oe.
O le faaipoipoga i le malumalu o le sauniga tupito lea o le malumalu
O outou na o loo tulimatai atu i se faaipoipoga i le Malumalu atonu o outou fia malamalama i le mea o le a tupu. Matou te le sii maia upu o le sauniga o le faamauga (faaipoipoga) i fafo atu o le malumalu, ae e mafai ona matou faamatalaina atu le matagofie o le potu o le faamauga, e filemu ma toafilemu i le agaga, ma ua faapaiaina e ala i le galuega paia o loo faatino ai iina.
Ao le i o atu le ulugalii i le fata faitaulaga mo le sauniga o le faamauga, o se avanoa i le na te faia le sauniga o le faamauga e tuuina atu ai, faapea foi ma le mauaina e le ulugalii talavou, o ni apoapoaiga. O nisi nei o manatu atonu e faalogo i ai le ulugalii talavou i lea taimi.
“O le aso lenei o la oulua faaipoipoga. Ua lofituina oulua i lagona e uiga i la oulua faaipoipoga. Ua fausia malumalu e avea o se nofoaga mo sauniga faapenei. Tatou te le o i ai i le lalolagi. O mea o le lalolagi e le aoga iinei ma e le tatau ona i ai se aafiaga i mea tatou te faia iinei. Ua tatou o ese mai le lalolagi ma ua tatou o mai i le malumalu o le Alii. Ua avea ai ma se aso sili o o oulua olaga.
“Sa oulua fananau mai, ma valaaulia e o mai i le lalolagi, e ni matua o e sa saunia se malumalu faaletino mo o oulua agaga e mau ai. Ua uma ona oulua papatiso. O le papatisoga, o se sauniga paia, o se faatusa o le faamamaina, e faatusa i le maliu ma le toetu, e faatusa i le tulai mai i se ola faafouina. E mafaufau loloto ai i le salamo ma le faamagaloina o agasala. O le faamanatuga o le Talisuaga a le Alii o se faafouina lea o le feagaiga o le papatisoga, ma e tatou te mafaia, pe afai tatou te ola ai, ma maua le faamagaloga o a tatou agasala.
“O oe, le faatoafaiava, ua uma ona faauuina i le perisitua. Na muamua faaee i ou luga le Perisitua Arona ma e le taumate sa e umia tofi uma o lena perisitua e i ai—tiakono, aoao, ma le ositaulaga. Ona oo mai ai lea o le aso ua e agavaa ai e mauaina le Perisitua Mekisateko. O lena perisitua, le perisitua maualuga, ua ta’ua o le perisitua ua faatulagaina i le faatulagaga pito sili ona paia a le Atua, po o le Perisitua Paia ua faatulagaina i le Faatulagaga a le Alo o le Atua (tagai Alema 13:18; Helamana 8:18 Mataupu Faavae ma Feagaiga 107:2–4). Na tuuina atu ia te oe se tofi i le perisitua. Ua avea nei oe ma se toeaina.
“Ua taitasi ma oulua mauaina o oulua faaeega paia. I lena faaeega paia sa oulua maua ai se faamanuiaga o le mafai ona ausia o le tulaga e faavavau. Peitai o nei mea uma, i se tasi itu, o ni laasaga muamua ia ma o ni sauniuniga ua faia e te lua saunia ai e o mai i le fata faitaulaga e faamauina o se tane ma se ava mo le taimi nei ma mo le faavavau atoa. Ua avea nei oulua o se aiga, e saoloto e faaaoga le mana e foafoaina ai le ola, ma maua le avanoa e ala i le tuuto ma le ositaulaga lua te aumaia ai fanau i le lalolagi e tausia ma taitai i latou i le saogalemu i o latou olaga faaletino; ina ia vaai atu foi ua o mai i latou i se aso e pei foi o oulua, ma auai i nei sauniga paia o le malumalu.
“Ua oulua o mai ma le naunautai ma ua uma ona faamasinoina ma ua oulua agavaa. Ina ia taliaina e le tasi o le isi i le feagaiga o le faaipoipoga o se tiutetauave maoae lava, o se tiute lena e o mai faatasi ma ona faamanuiaga e le mafuatiaina.”
O le mana o le faamauga e fusifusia ai i le lalolagi ma le lagi
Afai o le a tatou malamalama i le talafaasolopito ma le mataupu faavae o galuega o le malumalu, e tatau ona tatou malamalama po o le a le uiga o le mana o faamauga. E tatau ona tatou malamalama, i sina vaega, pe aisea e taua ai ki o le pule e faaaoga ai le mana o faamauga.
“Ina ua maliu atu Iesu i le laueleele o Kaisareia Filipo, ona fesili atu ai lea o ia i ona soo, ua faapea atu, Pe se a le upu a tagata ia te au le Atalii o le tagata, po o ai? …
“Ona tali mai ai lea o Simona Peteru, ma faapea mai, O oe o le Keriso, o le Alo o le Atua soifua.
“Ona tali atu ai lea o Iesu, ua faapea atu ia te ia, Amuia oe Simona Paiona; aua e le se tagata na ia faaali atu ia te oe, a o lo’u Tama o i le lagi.
“Ou te fai atu nei au ia te oe, O Peteru oe, ou te ati ae foi la’u ekalesia i luga o lenei papa; e le mafai foi e faitotoa o seoli ona manumalo i ai.
“Ou te avatu foi ia te oe ki o le malo o le lagi: o se mea foi e te fusifusia i le lalolagi, e fusifusia foi lea i le lagi: o se mea foi e te tālā i le lalolagi, e tatalaina foi lea i le lagi” (Mataio 16:13, 16–19).
Na alagatatau ona umia ki e Peteru. Na ao ona umia e Peteru le mana o faamauga, le pule lena e tauaveina le mana e fusifusia ai pe faamauina ai i le lalolagi pe tatalaina ai i le lalolagi ma faapea foi ona faia i le lagi. O na ki e umia e le Peresitene o le Ekalesia—o le perofeta, tagatavaai, ma le tali faaaliga. O lena mana paia o le faamauga ua i ai i le Ekalesia i le taimi nei. E leai se isi mea ua sili atu le paia e pei o nei ki, ia i latou o e silafia le taua o lenei pule. E leai se isi mea ua sili atu ona umia latalata. E toaitiiti lava alii ua tuuina atu i ai lenei mana o faamauga i le lalolagi i soo se vaitaimi—i totonu o malumalu taitasi ua tuuina atu ai i ni uso lenei mana o faamauga. E leai se tasi e mafai ona ia maua sei vagana ua tuuina mai e le perofeta, tagatavaai, ma le tali faaaliga ma le Peresitene o le Ekalesia a Iesu Keriso o le Au Paia o Aso e Gata Ai.
Na saunoa mai le Perofeta o Iosefa Samita e masani lava ona fesiligia soo o ia i le fesili lea, “‘Pe le mafai ea ona faaolaina i tatou e aunoa ma le faia o nei mau sauniga, ma mea uma e faatatau i ai?’ Sa ou tali atu i ai, E leai, e le o le tulaga atoatoa o le faaolataga. Na fetalai mai Iesu, ‘E tele mea e nonofo ai i le maota o lo’u Tama; ana leai, po ua ou fai atu ia te outou; ou te alu e sauni se mea e nonofo ai outou.’[Tagai Ioane 14:2.] O le maota, lea e taua i i, na tatau ona faaliliuina o le malo; ma e soo se tagata ua faaeaina i le maota aupito i maualuga, e tatau ona ola o ia i le tulafono faaselesitila ma le tulafono atoa foi” (Talafaasolopito o le Ekalesia, 6:184).
O galuega o le malumalu o se puna lea o le mana faaleagaga
O malumalu o totonugalemu lea o le malosi faaleagaga o le Ekalesia. E tatau ona tatou iloa o le a taumafai le fili e faalavelave ia i tatou o se Ekalesia ma i tatou foi taitoatasi, a o tatou saili e auai i lenei galuega paia ma musuia. O le galuega o le malumalu e tele naua uiga tetee e aumaia ai ona o le puna lea o le malosi tele faaleagaga o le Au Paia o Aso e Gata Ai faapea ma le Ekalesia atoa.
I le faapaiaga o le maa tulimanu o le Malumalu o Logan i Iuta, na tuuina mai ai e Peresitene George Q. Cannon, le saunoaga lenei:
“O maa faavae taitasi uma ua faataatia mo se Malumalu, ma o malumalu uma taitasi ua maea e tusa ai ma le faatulagaga ua faaalia mai e le Alii i lona Perisitua paia, e faaitiitia ai foi le mana o Satani i le lalolagi, a e faateleina ai le mana o le Atua ma le Faaleatua, ma faagaoioia ai le lagi i le mana maoae mo i tatou, ma tuuina mai ma aumaia ai i lalo i o tatou luga faamanuiaga a le Atua e Faavavau, ma i latou o e mau i lo la’ua afioaga” (i totonu o le “Malumalu o Logan,” Millennial Star, Nov. 12, 1877, 743).
Pe a faalavelavea tagata o le Ekalesia pe i ai foi ni filifiliga taua ua mamafatu i o latou mafaufau, o se mea masani ia i latou le o i le malumalu. O se nofoaga lelei e ave i ai o tatou atugaluga. O totonu o le malumalu e mafai ona tatou maua ai se vaaiga mamao faaleagaga. O iina, i le taimi o le sauniga o le malumalu, ua tatou “o ese ai mai le lalolagi.”
O nisi taimi ua siomia ai o tatou mafaufau i faafitauli, ma e tele naua mea ua alalaga mai ia uai atu i ai ma ua le mafai ai ona manino o tatou mafaufau ma la tatou vaai. O le malumalu e foliga e faaitiitia ai le pefu o faalavelave, ma aveesea ai le puao ma le faanenefu, ma mafai ai ona tatou “iloa” mea sa le mafai ona tatou iloa muamua ma maua ai le ala e foia ai o tatou faafitauli ia sa tatou le mailoa i le taimi ua fano.
O le a faamanuiaina i tatou e le Alii pe a tatou auai i galuega o sauniga paia o le malumalu. O faamanuiaga iina o le a le faatapulaaina mo na o galuega tatou te faia i le malumalu. O le a faamanuiaina i tatou i a tatou galuega uma.
O a tatou galuega i le malumalu e ufitia ai i tatou i se ufifatafata ma se puipuiga
E leai se isi galuega e sili atu ona avea ma puipuiga i lenei Ekalesia nai lo galuega o le malumalu, ma le sailiga o talafaasolopito o aiga lea e lagolagoina. E leai se isi galuega e sili atu ona faaleleia ai faaleagaga. E leai se isi galuega o loo tatou faia tatou te maua atili ai le malosi. E leai se isi galuega e manaomia ai se tulaga faatonuina maualuga atu o le amiotonu.
O a tatou galuega i le malumalu e ufitia ai i tatou i se ufifatafata ma se puipuiga, i le avea ai ma ni tagata taitoatasi faapea ma se nuu.
O lea la, ia o mai i le malumalu— o mai e avatu o outou faamanuiaga. O se galuega e paia.
Malumalu o Panama Aai o Panama. Faapaiaina i le aso 10 Aok., 2008.
Malumalu o Tokyo Iapani. Faapaiaina i le aso 27 Oke., 1980.
Malumalu o Curitiba Pasila. Faapaiaina i le aso 1 Iuni, 2008.