Avea o le Malumalu ma se Vaega o Lou Olaga
Mo Le Autalavou
E ui o loo e sauniuni ina ia maua au sauniga o le malumalu i le lumanai, e mafai ona i ai se uunaiga loloto o le malumalu i lou olaga i le taimi lava lenei.
O le malumalu o se nofoaga sili ona paia i le lalolagi—o se nofoaga lea e feiloai ai le lalolagi ma le lagi ma o se nofoaga tatou te lagona ai le latalata i lo tatou Tama Faalelagi ma Iesu Keriso. E ui o loo e sauniuni ina ia maua au sauniga o le malumalu i le lumanai, e mafai ona i ai se uunaiga loloto o le malumalu i lou olaga i le taimi lava lenei. O nisi nei o mea e mafai ona e faia i le malumalu e avea ai ma se vaega o lou olaga a o e laitiiti.
Auai i Papatisoga mo e ua Maliliu
O alii ma tamaitai talavou agavaa e i le vaitausaga o le 12 ma sili atu e mafai ona asiasi i le malumalu e papatisoina mo tagata o o latou aiga ua maliliu e lei papatisoina. Na saunoa mai Peresitene Thomas S. Monson i le olioli e aumaia e lenei auaunaga:
“I se tasi taeao a o ou savali atu i le malumalu, sa ou vaaia se vaega o tamaitai talavou o e, i lena taeao po, na auai i ni papatisoga mo i latou ua mavae atu. Na susu o latou lauulu. Na susulu a latou ataata. Na faatumulia o latou loto i le olioli. O se tasi o tamaitai na faliu i tua i le malumalu ma faaalia ona lagona. ‘O se aso sili lea ona ou fiafia ai i lo’u olaga,’ o lana tala lea.”1
Sa papatisoina ia Jessica Hahn e sefulutolu ona tausaga o Daphne, Alabama, mo nisi o ona tuaa i le Malumalu o Atlanta Georgia. E ui e lima itula na o ai i le malumalu, ae na ia fai mai o se aafiaga matagofie. “O le mafai ona ofuina ofu paepae ma papatisoina mo o’u tuaa na ou maua ai se lagona maoae,” o lana tala lea. “Sa ou lagona e pei lava ou te iloaina i latou i le taimi nei.”
Alu soo i le malumalu pe a mafai. O iina e mafai ona e maua ai le olioli i le fesoasoani atu i isi ina ia maua faamanuiaga o le papatisoga.
Lagolago i le Galuega o le Malumalu
E tele auala e lagolagosua ai i le galuega a le malumalu, e tusa lava pe e le mafai e oe lava ia ona e alu soo i le malumalu. E mafai ona e aoao e uiga i ou tuaa ma vaai ua faataunuu sauniga o le malumalu mo i latou. E mafai ona e ofo atu e tausia fanau laiti ina ia auai o latou matua i le malumalu. Ona e tele ina taulai atu auaunaga a le malumalu i aiga, e mafai ona e galue e faamalosia lou lava aiga. Ma e mafai ona e faasoa atu lau molimau i isi e uiga i le malumalu o le maota moni lava o le Alii.
Ia Agavaa e Ulu atu i le Malumalu
Ona o le malumalu o se nofoaga paia, ua faatuina e le Alii ni tulaga faatonuina maualuluga ina ia tatou ola ai ae tatou te lei mafai ona ulu atu i totonu. Na faamatalaina e Peresitene Dieter F. Uchtdorf faapea “o tulaga faatonuina na faatulaga e le Alii i fesili o le pepa faataga o le malumalu e talitutusa lava ma tulaga faatonuina o loo maua i le Mo Le Malosi o le Autalavou. I taimi o le toafilemu faapea foi i taimi o tofotofoga sili, o nei tulaga faatonuina ma taitaiga a le Agaga Paia o le a fesoasoani ia te oe ina ia faia ni filifiliga sao. … O auala e te faaaogaina ai nei tulaga o le a tele se sao i le tagata o le a e sailia e avea ai oe.”2
Ola i tulaga faatonuina a le Alii ma o le a e agavaa e ulu atu i le malumalu. O le i ai o le manao e ulu atu i le malumalu i le lumanai e mafai lea ona fesoasoani ia te oe e liliu ese mai tofotofoga o nei aso. “E tuuina atu ia te oe se mafuaaga e tumau ai i le agavaa,” o le tala lea a Marlona Ruiz, e 16 tausaga, o Sunrise, Florida. “A i ai ia te oe lena sini, o le a e mafaufau pea i le mea e te faia aua e le mafai ona e alu i le malumalu pe a e le agavaa.”
Fuafua mo se Faaipoipoga i le Malumalu
“Ou te vaai i le malumalu ma mafaufau e faaipoipo ai iina i se aso,” o le tala lea a Annika Reithmeier, e 16 tausaga, o Oslo, Nouei. “Ou te iloa o folafolaga e faia i le malumalu o folafolaga ia ma le Alii. O mea e te aoao ai iina e le suia pe mou ese atu.”
Tuu se ata o le malumalu i se mea e te vaai soo i ai, ma taulai atu i le aso o le a mafai ai ona e mauaina ai ou lava sauniga o le malumalu.
Ina ua 14 tausaga o Jody Hazelbaker o American Fork, Iuta, sa asiasi atu o ia i le Malumalu o Mount Timpanogos Iuta i le taimi o le fale tatala. “Ina ua ou savali atu i le potu o tamaitai faaipoipo, sa ou tu mo se minute ma sioa atu i le faata,” sa ia toe manatua. “A o ou tilotilo atu, sa ou iloa atu a’u lava i le lumanai, o ofuina se ofu faaipoipo matagofie ma se ataata lapoa lava. Sa ou iloa o le nofoaga lea o le a ou faaipoipo ai, i le malumalu, e latalata i lo’u Tama o i le Lagi.”