O Lou Auala i le Malumalu
Mo Tamaiti
Pe e te iloa le malumalu e sili ona lata ia te oe? Tusi se ata o lena malumalu, ma faatautau i le mea e te vaai i ai i aso uma.
O le malumalu o le maota o le Alii. O se nofoaga tatou te aoao ai e uiga i le Tama Faalelagi, osia ai feagaiga (po o folafolaga) ma Ia, ma maua ai faamanuiaga maoae. I le malumalu, tatou te faia ai galuega taua mo i tatou lava ma mo tagata o aiga o e ua maliliu. O galuega e faia i le malumalu e aofia ai papatisoga mo e ua maliliu, faaeega paia, ma faamauga. E ta’ua o sauniga o le malumalu.
O a Mea e Faia i totonu o le Malumalu
Papatisoga mo e Maliliu
Pe a valu ou tausaga, e mafai ona e papatiso ma faamauina o se tagata o Le Ekalesia a Iesu Keriso o le Au Paia o Aso e Gata Ai. O le toatele o tagata o ou aiga na maliliu e lei papatisoina ma faamauina. E ui ua oti o latou tino, ae o loo ola pea o latou agaga i le lalolagi o agaga, lea e mafai ona aoao ai le talalelei a Iesu Keriso.
Pe a 12 ou tausaga, e mafai ona e alu i le malumalu ma fesoasoani i nei tagata e ala i le papatisoina ma faamauina i o latou igoa. Ona mafai lea ona latou filifili pe mananao e talia le papatisoga ma le faamauga pe leai. O le a e ofuina ofu papae atoa pe a e papatiso mo e ua maliliu, e pei ona e faia pe a e papatiso mo oe lava ia.
Fesili i ou matua e fesoasoani ia te oe e fai se lisi o tagata o lou aiga o e ua maliliu e lei papatisoina i Le Ekalesia a Iesu Keriso o le Au Paia o Aso e Gata Ai. Saili pe na i ai se tasi na alu i le malumalu e papatiso mo i latou.
O Le Faaeega Paia
O se tasi o faamanuiaga maoae o le malumalu o le faaeega paia. Faaeega Paia o lona uiga o le “meaalofa.” Pe a e mauaina lou faaeega paia, o le a e aoao atili ai e uiga i le ata o le faaolataga ma osia feagaiga. O feagaiga o folafolaga ia tatou te osia ma le Tama Faalelagi. A e tausia na feagaiga, o le a e saunia e mau faatasi ma le Tama Faalelagi ma Iesu Keriso i se aso.
I totonu o le malumalu e i ai se potu matagofie, toafilemu e ta’ua o le potu selesitila. I totonu o le potu selesitila tatou te lagona ai le latalata atu i le Tama Faalelagi ma Iesu Keriso, ma o le a tatou lagona ai sina aafiaga laitiiti o le tulaga tatou te oo i ai pe a tatou nonofo ai ma i La’ua i le malo selesitila.
Faamauga mo le Olaga Nei ma le Faavavau
Pe a faaipoipo se alii ma se tamaitai i le malumalu, la te tootutuli i le fata faitaulaga ma faamauina mo le olaga nei ma le faavavau atoa. O lona uiga o i la’ua ma a la fanau e mafai ona faatasia o se aiga e faavavau. Fuafua e faaipoipo i le malumalu i se aso. O le faamanuiaga sili lea o le malumalu.
O Le Pepa Faataga o le Malumalu
O le malumalu o se nofoaga paia. E faamautinoa e epikopo ma peresitene o paranesi o i latou o e ulu atu i le malumalu ua saunia ma ua agavaa. A e te lei alu i le malumalu, o le a faia sou faatalanoaga faapitoa ma lau epikopo po o le peresitene o le paranesi. O le a ia fesili atu pe i ai sau molimau i le Ekalesia, tausi poloaiga, lagolago i taitai o le Ekalesia, usitai i le Upu o le Poto, totogi le sefuluai, ma faamaoni i mea uma e te faia ma tautala ai. O le a ia fesoasoani ia te oe ia iloa le mea e te faia ma ia agavaa e ulu ai i le malumalu.
Saunia Nei e Ulu Atu i le Malumalu
E tuuina mai e le Tama Faalelagi le tele o faamanuiaga ia i latou o e ola amiotonu ma auai i le malumalu. E taua le saunia e ulu atu i le Malumalu a’o e laitiiti.
E alofa le Tama Faalelagi ia te oe ma finagalo ina ia e mauaina faamanuiaga o le malumalu. O le a Ia faamanuiaina oe mo le faatinoina o sauniga o le malumalu mo oe lava ia ma isi. Atonu o le a le mafai ona e ulu i le malumalu i le taimi nei, pe afai e i ai se malumalu e lata ane, e mafai ona e asiasi i lotoa o le malumalu ma lagona ai le agaga o loo i ai iina. E mafai foi ona e tausia se ata o le malumalu i totonu o lou fale e faamanatu ai ia te oe le taua o le malumalu. Ola amiotonu ina ia e mafai ona agavaa e ulu atu i le maota o le Alii.
Vaai i le faata i lenei ata. O nisi o potu faamau e i ai faata e pei o le ata lea. Ona o faamauga i le malumalu, o o tatou aiga, e pei lava o le ata lafoia mai lenei faata, e mafai ona faaauau e faavavau.
Vaai i le potu selesitila i lenei ata ma le ata i le itulau e 64. O le a sou lagona pe a vaai i se potu selesitila?
Malumalu o Boston Massachusetts. Faapaiaina i le aso 1 Oke., 2000.
Potu o faamauga. Malumalu o Aba Nigeria.
Potu selesitila. Malumalu o Nukua’lofa Toga.