Auala e Fesoasoani ai Le Malumalu
E iloa e matua uma o le faafaileleina o fanau e aumai ai luitau ma faamanuiaga. Sa ma iloa ma lo’u toalua lena mea ina ua ma mafaufau i le tulaga faavavau o le matafaioi o le avea ai ma ni matua, sa ma lagona le mamafatu o tiutetauave faatasi ai ma le faamoemoe maoae.
E moni lava, na tuuina mai e le Alii ni taui faaleagaga e faamama ai a tatou avega. Mo o tatou aiga, o le sili o na taui faaleagaga o le o lea i le maota o le Alii ina ia maua Lana fesoasoani aua ua tuputupu ae a tatou fanau ma ua sili atu ona faigata le olaga. Ua tatou iloaina e mafai ona tatou aveina ni faafitauli matua patino lava i le Alii i Lona malumalu.
A o avea a tatou fanau ma ni tupulaga talavou tatou te iloaina e ia i latou le tomai e faia ai ni mea sese tuga. Atonu o le mea sili ona taufaafefe o le iloaina lea ua tatou faia uma lava mea tatou te iloa ona faia, ae o loo faamalumalu mai pea i o tatou luma ni faailoga o le faigata.
Ona tatou iloaina lea o le tapuai i le malumalu e mafai ona avea o se elemene taua i a tatou taumafaiga e fesoasoani ai i a tatou fanau e filifili le mea sao. Ua tatou mauaina le malosi ma le faamanuiaga maoae i le auai atu i le malumalu i le agaga o le anapogi ma le tatalo mo a tatou fanau. Tatou te tatalo mo se lagona o sauniuniga patino, mo mafaufau ma uiga talafeagai ae tatou te lei ulufale atu i le malumalu. Pe a talafeagai ai, o o tatou manatunatuga a o tatou i ai i totonu o le malumalu o le a faatatau lea i a tatou matafaioi o ni matua ma e uiga i manaoga o lena tamaitiiti faapitoa.
O nisi o taimi e vave oo mai lava ma le manino ia tali. O le taimi muamua lava e tupu ai, atonu tatou te mafaufau ai o se laki. Ae e vave lava ona iloa e moni lava sa tatou auai i se faagasologa lea na aumai ai faamanuiaga o le lagi.
O nisi o taimi e oo mai ai tali i ni tulaga o tagata o e faatosinaina olaga o a tatou fanau, e pei o se epikopo alofa o le na fesoasoani i se afafine e i le vaitausaga o le kolisi maualuga i se faafitauli na tupu. O nisi tamaiti na tutusa lava le faamanuiaina. E tofu lava ma lana filifiliga saoloto, ma e atonu latou te le filifili e tali atu i le auala lea tatou te faamoemoe i ai, ae tatou te lagona o a tatou auaunaga i le malumalu ua aumaia ai le fesoasoaniga mai le lagi i olaga o a tatou fanau.
O o tatou faamanuiaga i le tapuai atu i le malumalu ua faalautele atu i tua atu o faamanuiaga o a tatou fanau. I se tasi o mea na tupu, na feagai lo’u toalua ma se faafitauli faigata lava tau le galuega lea na ia filifili ai e ave i le malumalu. I lena aso, na faamanuiaina o ia e le Alii i se uunaiga o se mau faapitoa lava o se tali lea o lana fesili.
Ina ua taunuu i le fale, na ia tatalaina ma le naunautai ia tusitusiga paia ma, i lona fiafia, na ia mauaina le fesoasoaniga mo lana faafitauli. O lenei aafiaga na tatalaina ai se faaaogaina fou atoa o tusitusiga paia. E mafai ona talanoa mai le Alii i Lana fanau e ala i le faamanatu mai ia i tatou o tusitusiga paia o loo i ai ni tali o o tatou luitau. Tatou te faafetai ai mo lenei mataupu faavae tatou te aoaoina i le malumalu.
I se lalolagi ua faatumulia i le amioleaga ma ua tatala mai ai e Satani lona mana e faatamaia ia aiga, e lagona le mafanafana i le iloaina lea e mafai ona tatou o atu i le maota o le Alii ma saili ai se taitaiga. E tusa lava po o a luitau e feagai ma i tatou a o tatou tausia o tatou aiga, tatou mauaina lava le olioli pe a tatou saili atu le puipuiga ma le toafilemu o le malumalu.