O Ni Tagata Gauai I Le Malumalu
Ia tuu se ata o se malumalu i totonu o lou fale ina ia mafai ona vaai i ai lau fanau. Aoao i latou e uiga i faamoemoega o le maota o le Alii.
O le malumalu o le faailoga sili lea o lo tatou auai i le Ekalesia
E maeu le ofoofogia o lenei mea mo i tatou, le mauaina o le avanoa e o atu ai i le malumalu mo o tatou lava faamanuiaga. Ma afai e maea ona ulu atu i le malumalu mo o tatou lava faamanuiaga, e maeu foi le ofoofogia o le faia o galugea mo i latou o e ua muamua atu ia i tatou. O lenei vaega o le galuega faalemalumalu o se galuega le manatu faapito. Ae peitai, soo se taimi lava tatou te faia ai se galuega faalemalumalu mo isi tagata, e i ai se faamanuiaga e toe foi ia i tatou. O lea la, e le o se mea tatou te ofo ai le finagalo mai o le Alii ina ia avea Ona tagata ma ni tagata e gauai i le malumalu.
O le Alii lava Ia, i Ana faaaliga ia i tatou, ua avea ai le malumalu o se faatusa sili mo tagata o le Ekalesia. Mafaufau i uiga ma amioga amiotonu ia na faailoa mai e le Alii e ao ona tatou atiina ae i le apoapoaiga na Ia tuuina atu i le Au Paia i Katelani e ala atu i le Perofeta o Iosefa Samita a o latou saunia e fausia se malumalu. O lenei fautuaga o loo aoga pea:
“Ia outou faatulagaina; ia saunia mea tatau uma; ma faatuina se fale, o se fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale o le tulaga maopoopo atoatoa, o se fale o le Atua” (MFF 88:119). Pe o atagia moni mai ea i nei uiga ma amioga ia le mea o loo tatou naunau ma saili uma taitoatasi ina ia oo i ai?
O a tatou taumafaiga uma lava i le Ekalesia e tau atu i malumalu paia.
O a tatou taumafaiga uma lava i le talaiga o le talalelei, faaatoatoaina o le Au Paia, ma le faaolaina o e ua maliliu e tau uma atu lava i le malumalu paia. E mafua lenei mea ona o sauniga o le malumalu e matuai taua lava; e le mafai ona tatou foi atu i le afioaga o le Atua e aunoa ma na sauniga.
E moni lava, e finagalo le Alii i Lona nuu ina ia avea ma tagata e gauai i le malumalu. E avea o se faanaunauga sili o lou loto ina ia agavaa tagata uma o le Ekalesia mo le malumalu. Ou te faamoemoe ina ia agavaa tagata matutua uma—ma tauaveina—se pepa faataga o aoga o le malumalu, e tusa lava po o le mamao ese mai se malumalu o le a le faatagaina le faaaogaina i le taimi nei po o le alu soo.
O le malumalu e paia i le Alii; e tatau ona paia ia i tatou
Ia avea i tatou ma tagata e auai ma fiafia i le malumalu. Ia tatou o soo i le malumalu ma pe a talafeagai ma le taimi ma mea tatou te maua. Ia tatou o atu e le gata mo o tatou lava tuaa ua maliliu, ae ia tatou o atu foi mo faamanuiaga patino o le tapuai i le malumalu, mo le faapaiaina ma le saogalemu lea o loo tuuina mai e na puipui paia ma mamalu. O le malumalu o se nofoaga o le matagofie, o se nofoaga o faaaliga, o se nofoaga o le filemu. O le maota lenei o le Alii. E paia i le Alii. E tatau ona paia ia i tatou.
Ia tatou faasoa atu i a tatou fanau ia lagona faaleagaga tatou te maua i totonu o le malumalu. Ma ia tatou aoao ma le faamaoni ma le mautinoa atili mea e mafai ona tatou tautatala atu ai ma le talafeagai e uiga i faamoemoega o le maota o le Alii. Ia tuu se ata o se malumalu i totonu o lou fale ina ia mafai ona vaai i ai lau fanau. Aoao i latou e uiga i faamoemoega o le maota o le Alii. Tuu atu ia i latou e fuafua mai o latou tausaga a o laiti ina ia o atu iina ma ia tumau ai lo latou agavaa mo lena faamanuiaga.
O se mea fiafia i le Alii pe a tatou o atu ma le agavaa i le malumalu
O se mea fiafia i le Alii o tatou talavou ia o atu ma le agavaa i totonu o le malumalu ma faia sauniga sui papatisoga mo i latou e le i maua le avanoa e papatiso ai i lenei olaga. O se mea fiafia i le Alii pe a tatou o atu ma le agavaa i le malumalu e faia a tatou lava osiga feagaiga ma Ia ma ia faamauina o ni ulugalii ma ni aiga. Ma o se mea fiafia foi i le Alii lo tatou o atu ma le agavaa i le malumalu e faataunuuina nei lava sauniga faaola mo e ua maliliu, o le toatele o i latou o loo faatalitali ma le naunautai mo le faamaeaina o nei sauniga mo i latou.
Ina ia avea moni lava le malumalu ma se faailoga ia i tatou, e tatau ona tatou naunau i ai faapea. E tatau ona tatou ola agavaa e ulu atu i le malumalu. E tatau ona tatou tausia poloaiga a lo tatou Alii. Afai e mafai ona tatou faatulagaina o tatou olaga e tusa ai ma le soifuaga o le Matai, ma avea Ana aoaoga ma faataitaiga o se faatulagaga silisili mo i tatou lava, o le a le faigata ia i tatou ona agavaa mo le malumalu, ina ia tumau ma faamaoni i soo se vaega o le olaga, aua o le a tatou tautino atu i se amioga ma se talitonuga paia e tasi ua faatulagaina. Pe tatou te i ai i le fale po o le maketi, po o le a’oga po ua leva ona maea a tatou aoga, pe o tatou faia na o i tatou pe o tatou fegalegaleai ma ni tagata se toatele, o le a matuai manino lava lo tatou ala ma o le a iloagofie o tatou faatulagaga.
O le gafatia e tu atu ai mo se mataupu faavae a se tasi, o le ola ai i le amiosao ma le faatuatua e tusa ai ma se talitonuga a se tasi—o le mea lena e taua. O lena tuuto i mataupu faavae moni—i o tatou olaga taitoatasi, i o tatou aiga ma auaiga, ma i nofoaga uma tatou te feiloai ma faaafia ai isi tagata—o lena tuuto o le tulaga sili lena o loo talosagaina e le Atua mai ia i tatou. E moomia ai le tautinoga—ma le agaga atoa, e matuai naunau i ai, e tautino atu ma le fiafia e faavavau i mataupu faavae tatou te iloa e moni i poloaiga ua tuuina mai e le Atua. Afai o le a tatou faamaoni ma faatuatua i mataupu faavae a le Alii, o le a tatou agavaa pea mo le malumalu, ma o le a avea le Alii ma Ona malumalu paia ma faatusa maoae o le avea ai o i tatou ma Ona soo.
Malumalu i Katelani. Faapaiaina i le aso 27 Mati, 1836.
Malumalu i Logan Iuta. Faapaiaina i le aso 17 Me, 1884. Toe faapaiaina i le aso 13 Mati, 1979.