Aisea Ua i ai Nei Malumalu?
O malumalu o Le Ekalesia a Iesu Keriso o le Au Paia o Aso e Gata Ai o ni fausaga paia lea o loo taliina ai fesili o le faavavau.
O malumalu o nofoaga ia e maua ai tali o a tatou fesili o le faavavau e uiga i le olaga.
Pe sa i ai ea se alii po o se tamaitai, na i ai se taimi paganoa sa sailiili ai, e lei mafaufau loloto i mea lilo o le olaga?
Pe le i fesili ea o ia, “O fea na ou sau ai? Aisea ua ou i ai iinei? O fea ou te alu i ai? O le a lo’u sootaga i Le na Faia au? Pe o le a faoa ea e le oti a’u fegalegaleaiga taua o lenei olaga? Ae faapefea a matou fesootaiga ma lo’u aiga? Pe toe i ai ea se isi olaga pe a mavae atu lenei, ma, afai foi e i ai, pe o le a iloa ea e le tasi le isi iina?
O tali i nei fesili e le maua i le poto o le lalolagi. Na o totonu lava o afioga faaalia a le Atua e maua ai. O malumalu o Le Ekalesia a Iesu Keriso o le Au Paia o Aso e Gata Ai o ni fausaga paia ia e taliina ai nei fesili faapea ma isi fesili o le faavavau. E faapaiaina taitasi o se maota o le Alii, o se nofoaga o le paia ma le filemu lea ua vaetofia mai le lalolagi. O iina e aoaoina ai upumoni ma faataunuuina ai sauniga lea e aumaia ai le malamalama i mea e faavavau ma faaosofia ai e auai ina ia ola ai ma se malamalamaaga o lo tatou tofi paia o ni fanau a le Atua ma se iloa i lo tatou mana o ni tagata e faavavau.
E tulaga ese lava malumalu i le faamoemoega ma le faatinoga mai isi falelotu uma.
O nei fale, e ese mai le fia afe o fale tapuai masani o le Ekalesia o loo faasalalauina i le lalolagi, e tulaga ese i le faamoemoega ma le aoga mai isi falelotu uma lava. E le o le lapopoa o nei fale po o le matagofie o le fausaga ua mafua ai. Ae o galuega o loo faatinoina ai i totonu o o latou puipui.
O le fuafuaina o ni ituaiga fale faapea mo sauniga faapitoa, e pei ona faailogaina ese ai mai nofoaga o tapuaiga, e le fou. O le faiga lenei sa i ai Isaraelu anamua, lea sa masani ona tapuai soo ai tagata i totonu o sunako. O lo latou nofoaga e sili atu ona paia, muamua, o le falefetafai lea i le vao faatasi ai ma le Nofoaga Sili ona Paia, ona sosoo mai ai lea o le faasologa o malumalu, lea na faataunuuina ai ia sauniga faapitoa ma e na o i latou ua ausia le tulaga manaomia na mafai ona auai i nei sauniga.
E faapea foi i aso nei. A o le i faapaiaina se malumalu, e valaaulia e Le Ekalesia a Iesu Keriso o le Au Paia o Aso e Gata Ai tagata lautele e o atu i totonu o le fale ma asiasia ona vaega eseese. Ae pe a faapaiaina loa ona avea loa lea ma maota o le Alii, e tuuina atu i ai na o se tagata e sili ona paia ma e na o tagata o le Ekalesia o loo tulaga lelei e faataga ona ulufale atu i ai. E le faapea ona o ni mea faalilolilo. Ae o se mataupu o le paia a’ia’i.
O galuega o le malumalu e faatatau ia i tatou taitoatasi o ni tagata o le aiga e faavavau o le Atua.
O le galuega o loo faatinoina i totonu o nei fale o loo tuuina mai ai faamoemoega e faavavau o le Atua e faatatau i le tagata, o le atalii/afafine o le Atua ma le foafoaga. Mo le vaega pito i sili, o le galuega faalemalumalu e faatatau lea i le aiga, ma le avea ai o i tatou taitoatasi o ni tagata o le aiga o le Atua e faavavau faapea foi ma aiga faalelalolagi. E popole i le paia ma le faavavau o le natura o le feagaiga o le faaipoipoga ma sootaga faaleaiga.
E faamautu mai ai o tane ma fafine taitoatasi ua fananau mai i le lalolagi o se atalii po o se afafine o le Atua, ua faaee atu i ai se vaega o Lona natura paia. O le fai faafia o nei aoaoga faavae autu e i ai se aafiaga aoga ia i latou o e mauaina, aua a’o fofogaina mai ma le manino le aoaoga faavae i le gagana matagofie ma faagaeetia, ona iloa ai lea e le tagata o loo auai, e faapea, talu ai ona o tane ma fafine uma o se atalii po o se afafine o le Tama Faalelagi, o lona uiga o tagata uma lava la taitoatasi o se tasi o se aiga faalelagi; o lea la, o tagata uma lava o sona uso po o sona tuafafine.
Ina ua fesiligia e le au tusiupu, “Po o le fea poloaiga e sili i poloaiga uma?” na tali atu le Faaola, “Ia e alofa atu i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa: o le poloaiga sili lea.
“E faapena foi lona lua, o lenei, Ia e alofa atu i le lua te tuaoi, ia pei o oe lava ia te oe” (Mareko 12:28, 30–31).
O aoaoga o loo tuuina mai i totonu o malumalu o ona po nei o loo aumaia ai se faamamafa malosi i lenei mataupu faavae o lo tatou tiute i Le na Faia i tatou faapea ma o tatou tuaoi. O sauniga paia e faalauteleina ai lenei filosofia faagaeetia o le aiga o le Atua. Latou te aoao mai ai e faapea o le agaga o loo i totonu ia i tatou taitoatasi e faavavau, pe a faatusatusa i le tino, lea e faaletino. E le gata ina aumaia ai le malamalama i nei upu moni maoae ae faapea foi ona faaosofia ai le alofa o le tagata auai i le Atua, ma faamalosiauina ai o ia ina ia faatinoina se alofa silisili i isi fanau a lo tatou Tama.
O le taliaina o le manatu faapea o tagata uma o se atalii po o se afafine o le Atua o le a fesoasoani ia i tatou e iloa ai e i ai se faamoemoega paia o le olaga faaletino. O iina foi, ua toe aoaoina ai ia upumoni faaalia i totonu o le maota o le Alii. O le olaga faaletino o se vaega o se malaga e faavavau. Sa tatou ola o ni fanau agaga ae tatou te le i o mai iinei. O loo molimau mai ia tusitusiga paia i lenei mea. Molimau i le afioga a le Alii ia Ieremia: “Na a’u iloa oe a o le i faia oe e au i le manava; na a’u faapaiaina oe a o le i fanau mai oe, na a’u tofia oe e fai ma perofeta i nuu” (Ieremia 1:5).
O sootaga faapelepele o olaga faaleaiga e mafai ona faaauauina i le lalolagi a sau.
Ua tatou o mai i lenei olaga o ni fanau a ni matua faaletino ma o ni tagata o ni aiga. O matua o ni paaga faatasi ma le Atua i le faataunuuina o Ona faamoemoega faavavau e faatatau i Lana fanau. O lea la, o le aiga, o se faatulagaga paia, o le vaega aupito sili lea ona taua i le faaletino ma le faavavau.
O le tele o galuega o loo faatinoina i totonu o malumalu e faatatau lea i aiga. E faavae i se malamalamaaga o lona uiga, o le iloaina lea o le mea moni e faapei ona sa tatou ola muamua o ni fanau a le Atua ae tatou te lei fananau mai i lenei lalolagi, o lea foi o le a faaauau ai pea ona tatou ola pe a mavae le oti, ma o sootaga pele ma le faamalie loto i le olaga faaletino, o le mea sili ona matagofie ma ‘anoa o loo maua i totonu o le aiga, e mafai ona faaauau pea i le lalolagi a sau.
Pe a faaipoipoina se alii ma se tamaitai i le maota o le Alii, ua tuufaatasia e le gata mo le vaitaimi o o laua olaga faaletino ae mo le faavavau atoa. Ua fusia faatasi i laua i lalo o le pule e le gata i le tulafono o le laueleele lea na tuufaatasia ai i laua seia oo i le oti ae faapena foi i le perisitua e faavavau a le Atua, lea e fusifusia i le lagi mea e fusifusia i le lalolagi. O le ulugalii na faaipoipo ua i ai le faamautinoaga o le faaaliga paia faapea o le la sootaga ma le la fanau o le a le muta i le oti ae o le a faaauau pea i le faavavau, pe afai latou te ola agavaa mo lena faamanuiaga.
Pe ua i i ai ea se alii ua alofa moni i se tamaitai, po o se tamaitai o le ua alofa moni i se alii, e le i tatalo ina ia mafai ona faaauauina le la mafutaga i tala atu o le tuugamau? Pe na tanuina ea se tamaitiiti e ni matua o e le i moomoo mo se faamautinoaga o le a toe faatasia i laua ma le la tama pele i se lalolagi a sau? Pe i ai ea se tasi e talitonu i le ola e faavavau e masalosalo faapea o le a tuuina mai e le Atua o i le lagi i Ona atalii ma afafine lena meaalofa silisili o le olaga, le alofa lea e mauaina lona faatinoga sili ona aoga i sootaga faaleaiga? E leai, ona o le alofa o le Atua o lea e faaauauina ai le sootaga faaleaiga pe a mavae le oti. E manao i ai le loto o le tagata, ma ua faaali mai e le Atua o i le lagi se auala e mafai ona faamautuina ai. O sauniga paia o le maota o le Alii o loo tuuina mai ai.
O faamanuiaga o le malumalu ua avanoa mo tagata uma.
Ae o nei mea uma e foliga mai e matuai le talafeauga lava pe afai o faamanuiaga o nei sauniga e avanoa mo na o i latou o loo avea nei ma tagata o Le Ekalesia a Iesu Keriso o le Au Paia o Aso e Gata Ai. O le mea moni lava o le avanoa e sau ai i totonu o le malumalu ma tofo i ona faamanuiaga e tatalaina atu lea ia i latou uma o e o le a taliaina le talalelei ma papatisoina i totonu o le Ekalesia. Ona o lenei la mafuaaga, o loo faapea ona faataunuuina ai e le Ekalesia se polokalama faamisiona tele i le tele o vaega o le lalolagi ma o le a faaauau pea ona faalauteleina lenei polokalama i le mea e gata mai ai, aua o loo i ai le tiutetauave, e tusa ai ma faaaliga faalelagi, ina ia aoaoina atu le talalelei i “atunuu uma, ituaiga, gagana, ma nuu.”
Ae e le o mafaitaulia le faitau miliona o e na savalia le fogaeleele ma e lei maua lava le avanoa e faalogo ai i le talalelei. Pe tatau ea la ona taofia nei faamanuiaga mai ia i latou e pei ona ofoina atu i totonu o malumalu o le Alii?
E ala mai i e o loo soifua e suitulaga i e ua maliliu, o sauniga lava nei e tasi e avanoa mo i latou o e ua mavae atu mai le olaga faaletino. I le lalolagi o agaga e tuusaoloto ai nei lava tagata e talia pe teenaina ia nei sauniga faalelalolagi ua faataunuuina mo i latou, e aofia ai le papatisoga, faaipoipoga, ma le faamauina o sootaga faaleaiga. O le galuega a le Alii e le faamalosia ai se tasi na te faia se mea, ae e tatau lava ona i ai se avanoa.
O le galuega i totonu o le malumalu o se galuega o le alofa o ē o loo soifua, mo i latou ua maliliu.
O lenei galuega sui mo isi e aofia ai se faatinoga tulaga ese o le alofa i le vaega a le tagata o loo soifua mo le ua maliu. E mafai ona tele se galuega o le sailia o talafaasolopito o aiga ma iloa ai i latou ua leva ona maliliu. Ina ia lagolago atu i lenei sailiiliga, ua faatulagaina ai e le Ekalesia se polokalama o talafaasolopito o aiga ma saunia ai mea e faaaoga mo le sailiiliga lea e le mafaatusalia i le lalolagi atoa. O loo tatalaina atu i le lautele ana faamaumauga teumalu ma ua faaaogaina e le toatele e le auai i le Ekalesia i le sueina o o latou tuaa. Ua viia lenei polokalama e tagata e saili gafa i le lalolagi atoa ma ua faaaogaina e le tele o malo e avea ma se malupuipuiga o a latou lava faamaumauga. Ae o lona faamoemoega autu lava o le tuuina atu ai lea i tagata o le Ekalesia o punaoa e manaomia e sailia ai o latou tuaa ina ia mafai ona tuuina atu i ai ia faamanuiaga ia ua latou aeae ai. Latou te faapea ifo ia i latou lava, “Afai ou te alofa faapelepele i lo’u toalua ma la’u fanau ma e ou te manao ia i latou mo le faavavau atoa, pe le tatau ea la ona maua e tama matua ma tuaa le avanoa e taliaina ai nei lava faamanuiaga faavavau e tasi?”
Ua aumai e malumalu se avanoa e aoao ai i mea aoga moni lava o le olaga
Ma o nei la maota paia o ni vaaiga ia o gaoioiga ofoofogia, e faataunuuina ma le filemu ma le migao. Latou te faamanatu maia ia i tatou se vaega o le faaaliga ia Ioane le Tali Faaaliga lea o loo faamaumauina ai lenei fesili ma lenei tali: “O i latou ia o e ua oofu i ofu sisina, o ai ea i latou? A o fea foi na latou o mai ai? …
“O i latou ia e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai Mamoe.
“O le mea lea ua latou i luma ai o le nofoalii o le Atua, ua latou auauna foi ia te ia i lona malumalu i le ao ma le po” (Faaaliga 7:13–15).
O i latou o e malaga mai i nei maota paia ua laei papae a o latou auai atu i totonu. Na o le faatagaga lava a o latou taitai faale-talalelei i le lotoifale e mafai ona latou o mai ai, ma ua faamaoniaina lo latou agavaa. Ua faamoemoe latou te o mai ma le mama o mafaufau, mama i le tino, ma mama laei e ulufale mai ai i le malumalu o le Atua. Ao latou ulufale mai ua faamoemoe latou te tuuesea le lalolagi ae gauai atu i mea paia.
O lenei lava gaoioiga, pe afai e mafai ona ta’ua faapena, o loo tauaveina lona lava taui, aua o ai se tasi i nei taimi o le popole, na te le taliaina se avanoa e tapunia ai le lalolagi ae ulufale atu i le maota o le Alii, e mafaufau ai ma le filemu iina i mea e faavavau a le Atua? E ofoina atu e nei nofoaga paia le avanoa, e le maua i se isi lava mea, ina ia aoao ai ma manatunatu ai i mea aoga moni lava o le olaga—o lo tatou sootaga ma le Silisiliese ma la tatou faigamalaga e faavavau mai le muai olaga e oo mai i lenei olaga ma agai atu ai lava i le nofoaga i le lumanai lea o le a tatou iloa ma fegalegaleai ai ma isi, e aofia ai ma e pele ia i tatou ma o tatou augatama o e na muamua atu ia i tatou, ma o i latou ia na maua mai ai lo tatou tofi o mea i la le tino, o le mafaufau, ma le agaga.
I totonu o malumalu ua tuuina mai ia i tatou folafolaga o faamanuiaga e faavavau a le Atua
E moni lava o nei malumalu e tulaga ese mai fale uma. O ni fale o le aoaoga. O ni fale o feagaiga ma folafolaga. O o latou fata faitaulaga tatou te tootutuli ai i luma o le Atua, lo tatou Foafoa, ma tuu mai ai folafolaga o Ana faamanuiaga e faavavau. I le paia o o latou tulaga tatou te fagatua ai ma Ia ma mafaufau i Lona Alo, lo tatou Faaola ma le Togiola, le Alii o Iesu Keriso, o le na fai ma sui o i tatou taitoatasi i se taulaga ofoofogia mo i tatou. O i tatou te tuuese ai lo tatou manatu faapito ae auauna atu i isi o e ua le mafai ona auauna mo i latou lava. O i, i lalo o le mana moni o le perisitua a le Atua, e fusia faatasi ai i tatou i sootaga sili ona paia faaletagata—i le avea ai ma tane ma ava, o fanau ma matua, o ni aiga i se faamauga e le mafai e le taimi ona faataumaoia, e le mafai foi e le oti ona faalavelaveina.
Na fausiaina nei fale paia e oo lava i le vaitaimi o na tausaga pogisa ao tutulieseina pea ma sauaina le Au Paia o Aso e Gata Ai. Sa fausiaina ma faaleleia pea i taimi o le mativa ma le faamanuiaina. Na tupu mai i le faatuatua tele o se fuainumera ua faatupulaia pea o e na tauaveina le molimau o se Atua soifua, o le Alii toetu, o perofeta ma faaaliga faalelagi, faapea ma le filemu ma le mautinoa o faamanuiaga e faavavau lea e na o totonu lava o le maota o le Alii e maua ai.
Faatanoa vai o le papatisoga. Malumalu o Papeete Tahiti.
Malumalu o Stockholm Suetena. Faapaiana i le aso 2 Iulai, 1985.
Malumalu o Manti Iuta. Faapaiaina i le aso 21 Me, 1888. Toe faapaiaina i le aso 14 Iuni, 1985.