Faamanuiaga o le Malumalu
Eaumai e le malumalu faamoemoega mo o tatou olaga. E aumai ai le filemu i o tatou agaga—e le o le filemu e aumai e tagata ae o le filemu lea na folafolaina mai e le Alo o le Atua ina ua Ia fetalai mai, “Ou te tuuina atu ia te outou le manuia; o lou manuia ou te avatu ai ia te outou.”
I totonu o le malumalu e mafai ai ona tatou latalata ai i le Alii
Ou te manatu e leai lava se isi nofoaga i le lalolagi ou te lagona ai le latalata i le Alii nai lo se tasi o Ona malumalu paia. I le toe faaupuina o se solo:
O le a le mamao o le lagi?
E le mamao tele lava.
I totonu o malumalu o le Atua.
I le mea tonu o loo tatou i ai.
Na fetalai mai le Alii:
“Aua tou te toloai oa mo outou i le lalolagi, o i ai le mogamoga ma le ele e faaumatia ai, o i ai foi tagata gaoi e eli atu ma gaoi ai:
“A ia outou toloai oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai:
“Aua o le mea ua i ai lo outou oa, e i ai atoa foi ma o outou loto.”1
I tagata o Le Ekalesia a Iesu Keriso o le Au Paia o Aso e Gata Ai, o le malumalu o le nofoaga silisili ona paia lea i luga o le fogaeleele. O le maota o le Alii, ma e pei lava o le faaupuga o loo vaneina i fafo o le tino o le malumalu, o le malumalu e “paia i le Alii.”
O le malumalu e siitiaina ma faaeaina i tatou
I totonu o le malumalu, o loo aoaoina ai le fuafuaga taua a le Atua. O totonu foi o le malumalu o loo osia ai feagaiga e faavavau. O le malumalu e siitia ai i tatou, faaea ai i tatou, o loo tu o se sulu taiala mo tagata uma e vaai i ai, ma faasino atu i le mamalu selesitila. O le maota o le Atua. O mea uma o loo faatinoina i totonu o puipui o le malumalu e faagaeetia ma faaeaina.
O le malumalu e mo aiga, o se tasi lea o oa silisili ua tatou maua i lenei olaga faitino. Ua matuai manino le fetalaiga a le Alii ia i tatou tamā, ua ta’u mai ai e i ai so tatou tiutetauave e alolofa i o tatou taitoalua ma o tatou loto atoa ma tausi ia i latou ma a tatou fanau. Sa Ia ta’ua o le galuega aupito sili e mafai e i tatou o matua ona faia o loo faatinoina lea i totonu o o tatou aiga, ma e mafai ona avea o tatou aiga ma lagi, aemaise lava pe a faamauina a tatou faaipoipoga i le maota o le Atua.
O le susuga ia Elder Matthew Cowley lea ua maliu, na avea o se tasi o le Korama a Aposetolo e Toasefululua, na faamatalaina sona aafiaga i se tasi Aso Toonai i le aoauli, i le avea ai ma se tama matua sa la uulima ai ma le afafine laitiiti o se tasi o le fanau a lana fanau ma malaga atu e faamanatu lona aso fanau—e le o se asiasiga la i se pa manu, po o se tifaga ae o se asiasiga i le lotoa o le malumalu. Faatasi ai ma le faatagaga a le tausifanua, sa la savavali atu ai i faitotoa tetele o le malumalu. Sa ia fautua atu e tuu lona lima i luga o le puipui mausali ma faapena foi i luga o le faitotoa tele. Na ia fai atu ma le agamalu ia te ia, “Ia e manatua o le aso lenei na e pa’i ai i le malumalu. E i ai se aso o le a e alu ai i totonu.” O lana meaalofa mo le teineititi ua le o se lole po o se aisakulimi ae o se aafiaga ua silisili le taua ma le faavavau—o le talisapaiaina o le maota o le Alii. Sa ia pa’i atu i le malumalu, ma na pa’i mai foi le malumalu ia te ia.
E aumai e le malumalu le filemu i o tatou agaga
A o tatou pa’i atu ma fiafia i le malumalu, o le a atagia mai i o tatou olaga lo tatou faatuatua. A o tatou o atu i le maota paia, a o tatou manatuaina feagaiga ua tatou osia ai i totonu, o le a mafai ona tatou onosaia tofotofoga uma ma faatoilaloina faaosoosoga taitasi. E aumai e le malumalu faamoemoega mo o tatou olaga. E aumaia le filemu i o tatou agaga—e le o le filemu e aumai e tagata ae o le filemu lea na folafola mai e le Alo o le Atua ina ua Ia fetalai mai, “Ou te tuuina atu ia te outou le manuia; o lou manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”2
E i ai i le Au Paia o Aso e Gata Ai le faatuatua maoae. Ua tuuina mai e le Alii ia i tatou ni avanoa e iloa ai pe tatou te mulimuli i Ana poloaiga, pe tatou te mulimuli i le ala na mulimuli ai Iesu le Nasareta, pe o le a tatou alolofa i le Alii ma o tatou loto atoa, manatu, mafaufau, ma le malosi atoa, ma alolofa i o tatou tuaoi e pei o i tatou lava.3
Ou te talitonu i le faataoto “Ia e faatuatua ia Ieova ma lou loto atoa; ae aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”4
O lea sa i ai lava; o lea e tatau ona i ai pea. Afai tatou te faia o tatou tiute ma faatuatua atoatoa i le Alii, o le a tatou faatumuina Ona malumalu, e le gata i le faia o o tatou lava galuega ma sauniga, ae faapena foi ona maua le avanoa e faia ai galuega mo isi. O le a tatou tootutuli i fata faitaulaga paia e fai ma sui i faamauga lea e faatasia ai tane ma ava ma fanau mo le faavavau atoa. O alii talavou ma tamaitai talavou agavaa ua atoa le ta’i 12 tausaga, e mafai ona fai ma sui mo i latou ua maliliu ae lei mauaina faamanuiaga o le papatisoga. O le finagalo lea o le Tama Faalelagi mo oe ma a’u.
Sa tupu se vavega
I le tele o tausaga ua mavae, sa valaauina ai se peteriaka agamalu ma le faatuatua, o Uso Percy K. Fetzer, e tuuina atu ni faamanuiaga faapeteriaka i tagata o le Ekalesia o loo nonofo i tua atu o le Pa Uamea.
Sa malaga atu Uso Fetzer i le laueleele o Polani i na taimi faigata. Na malupuipuia uma le tuaoi, ma sa leai se tagatanuu na faataga ona o ese. Sa feiloai atu Uso Fetzer i le Au Paia i Siamani o e na saisaitia ai iina ina ua toe faatulagaina tuaoi ina ua mae’a le Taua Lona II a le Lalolagi, ma o le laueleele sa latou nonofo ai ua avea nei ma se vaega o Polani.
O lo tatou taitai i na tagata uma o le Au Paia i Siamani o Uso Eric P. Konietz, sa nonofo ai iina ma lona faletua ma le la fanau. Sa tuuina atu e Uso Fetzer ni faamanuiaga faapeteriaka ia Uso ma Tuafafine Konietz ma le la fanau matutua.
Ina ua toe taliu mai Uso Fetzer i le Iunaite Setete, sa ia valaau mai ma talosaga mai pe mafai ona asiasi mai ia te au. A o nofo o ia i totonu o lo’u ofisa, sa amata ona tagi. Fai mai a ia, “Uso Monson, a o ou faaee atu o’u lima i luga o ulu o tagata o le aiga o Konietz, sa ou faia ni folafolaga e le mafai ona faataunuuina. Sa ou folafola atu ia Uso ma Tuafafine Konietz o le a mafai ona toe foi atu i lo latou atunuu moni o Siamani, o le a le taofia faatagataotauaina i latou ona o faaiuga pulepuletutu a atunuu malolosi ma o le a faamauina faatasi i latou o se aiga i le maota o le Alii. Sa ou folafola atu i le la tama tama o le a ia faataunuuina se misiona, ma folafola atu foi i le la tama teine o le a faaipoipo o ia i totonu o le malumalu paia o le Atua. Ua e silafia ma ou iloa, ona o le tapunia o tuaoi, o le a le mafai ai ona latou maua le faataunuuina o na faamanuiaga. O le a le mea lea ua ou faia?”
Sa ou faapea atu, “Uso Fetzer, ua lava lo’u malamalama ia te oe ou te iloa ai ua e faia le mea tonu lava e finagalo ai lo tatou Tama Faalelagi e te faia.” Sa ma tootutuli i talaane o la’u kesi ma sasaa atu o ma loto i le Tama Faalelagi, ma ta’u atu ai folafolaga ua maea ona tuuina atu i se aiga tuuto e faatatau i le malumalu o le Atua ma isi foi faamanuiaga ua taofia mai ia i latou. Ma ua na o Ia lava e mafai ona aumaia se vavega ma te manaomia.
Na tupu le vavega. Na sainia se maliega i le va o taitai o le malo o Polani ma le Malo Ripapelika o Saimani, e faatagaina ai tagatanuu o Siamani lea na saisaitia i na nofoaga ona toe foi atu i Siamani Sisifo. Sa toe foi Uso ma Tuafafine Konietz ma le la fanau i Siamani Sisifo, ma avea ai Uso Konietz ma epikopo i le uarota sa latou nonofo ai.
Sa malaga atu le aiga atoa o Konietz i le malumalu paia i Suitiselani. Ma o ai la le peresitene o le malumalu lea sa faafeiloaia i latou i lona suti paepae ma aao mafola? E leai lava se tasi nai lo Percy Fetzer—o le peteriaka lea na tuuina atu ia i latou le folafolaga. O lea la, i lona tulaga o se peresitene o le Malumalu o Bern Suitiselani, sa ia faafeiloaia ai i latou i le maota o le Alii, i le faataunuuga o lena folafolaga, ma faamauina faatasi ai le tane ma le ava ma le fanau i o latou matua.
Mulimuli ane sa faaipoipo ai le afafine talavou i le maota o le Alii. Sa maua le valaauga o le atalii talavou ma sa faataunuuina ai se misiona tala’i.
“Tatou feiloai i le malumalu!”
Mo nisi o i tatou, o la tatou faigamalaga i le malumalu ua le o toe mamao. Mo isi, e tele vasa e asaina ma maila e malaga ai ae latou te le i ulu atu i le malumalu paia o le Atua.
I ni nai tausaga e le i mamao atu, a o le i faamaeaina se malumalu i Aferika i Saute, ma a o auai i se konafesi faaleitu i le mea lea sa faaigoa muamua i a Salisbury, Rhodesia, sa ou feiloai atu ai i le peresitene o le itu, o Reginald J. Nield. Sa latou faafeiloaia ma lona toalua ma le la fanau teine aulelei a’u a o ou ulu atu i le falesa. Sa latou faamalamalama mai ia te au o loo faaputuputu a latou tupe ma sauniuni mo le aso e mafai ai ona latou faimalaga i le malumalu o le Alii. Ae peitai, oka, e matua mamao lava le malumalu.
I le faaiuga o le sauniga, sa fesiligia au e nei afafine lalelei e toafa e uiga i le malumalu: “E faape’ī le malumalu? Pau lava le mea na matou vaai i ai o se ata.” “O a ni o matou lagona pe a matou ulu atu i le malumalu?” “O a ni mea o le a sili ona matou manatuaina?” Pe a ma se itula sa ou maua ai le avanoa e talanoa ai i teineiti e toafa e uiga i le maota o le Alii. A o ou alu ese mai mo le malae vaalele, sa latou talotalo mai ia te au, ma na fai mai le teineitiiti pito i laitiiti, “Tatou feiloai i le malumalu!”
I le tausaga mulimuli ane, sa ou maua ai le avanoa e faafeiloai ai le aiga o Nield i le Malumalu o Sate Leki. I se potu o faamauga toafilemu sa ou maua ai le avanoa e tuufaatasia ai mo le faavavau, faapea foi mo le olaga nei, ia Uso ma Tuafafine Nield. Ona matala lea o faitotoa, ma ulufale mai i totonu na afafine lalelei, ua taitasi ma laei uma i laei papae sinasina. Sa latou fusi mau ia tina, ona sosoo ai lea ma tama. Sa maligi o latou loimata, ma le agaga faafetai i o latou loto. Sa tuaoi i matou ma le lagi. Sa taitasi ma latou fai mai, “O lenei la ua avea i tatou o se aiga e faavavau.”
O le faamanuiaga ofoofogia lenei o loo faatalitali mo i latou o e e o mai i le malumalu. Ia taitoatasi i tatou ma ola i ni olaga agavaa, ma lima mama ma loto mama, ina ia mafai ai ona pa’i mai le malumalu i o tatou olaga ma o tatou aiga.
O le a le mamao o le lagi? Ou te molimau atu, i totonu o le malumalu, e le mamao lava—aua o totonu o nei nofoaga paia e feiloai ai le lagi ma le lalolagi ma tuuina mai ai e le Tama Faalelagi i Ana fanau Ana faamanuiaga silisili.
Malumalu o St. George Iuta. Faapaiaina i le aso 6 Ape., 1877. Toe faapaiaina i le aso 11 Nov., 1975.
Malumalu o Manila Filipaina. Faapaiaina i le aso 25 Sete., 1984.
Malumalu o Bountiful Iuta. Faapaiaina i le aso 8 Ian., 1995.
Malumalu o Bern Switzerland. Faapaiaina i le aso 11 Sete., 1955. Toe faapaiaina i le aso 23 Oke., 1992.
Potu o faamauga, Malumalu o Sate Leki.