Migao

Vaaiga Aoao

O le faaaloalo o le o’oo’o o le ava ma le alofa. O se uiga migao agai i le Atua e aofia i le faamamaluina o Ia, ma faailoa atu lo tatou agaga faafetai ia te Ia, ma tausia Ana poloaiga.

Ao faaalia e tagata le migao mo le Atua, latou te faaali atu foi le migao ma le agaga faafetai mo Ana faamanuiaga, Ana poloaiga, Ana perofeta, Lana Ekalesia, Ana sauniga, Lana perisitua, ma Lana fuafuaga mo Ana fanau. O se uiga migao e aofia ai le faaaloalo ia te oe lava ma le mama a’ia’i patino. E taitai atu ai i le tapuaiga e tatau ai ma le amio sa’o.

O le amio migao e aofia ai le tatalo, suesuega o tusitusiga paia, anapogi, ma le totogiina o sefuluai ma taulaga. E aofia ai le mauaina o mafaufauga lelei, laeiina o ofu onomea, ma le faaaogaina o le gagana mama, ma lelei atoatoa. O le loloto o le migao o se tagata e iloa i ana filifiliga o musika ma isi mea faafiafia, i le ala e tautalagia ai mea paia, ma i le ala e laei ai le tagata ma amio ai pe a auai i sauniga lotu ma tapuaiga i le malumalu. O le migao e aofia ai foi le faia o filifiliga amiotonu e tusa lava pe leai se tasi o matamata mai. O le migao mo le Alii e taitai atu i le auauna atu i isi tagata ma le taulimaina o i latou ma le agalelei ma le faaaloalo.

O le migao e taitai atu i se suiga le leoa i le olaga. O le a sili ona faateleina ona liligi atu e le Alii Lona Agaga i luga o i latou e migao. E itiiti lo latou faalavelavea ma le le mautonu. E mafai ona latou maua faaaliga e fesoasoani ia i latou e foia faafitauli patino ma faaleaiga.

E pei lava ona aumaia e le migao se tagata ia latalata atili i le Atua, o le le migao e fetaui lelei ma faamoemoega a le tiapolo. O le a faaosoosoina e Satani tagata e mulimuli i leo malomaloā a le lalolagi, i fiafiaga pupuu, ma finauga ma le faaitiitia o le puleaina ma le malualii le leoa.

Tusifaamaumau Ou Lagona Uunai