Uiga o le Peraimeri
“Ia filemu ma ia iloa o a’u o le Atua” (MFF 101:16).
Sa uumau e Natanielu le lima o Tinā a o la savavali atu i le potu o le Peraimeri. O le asō o le vaiaso lona lua lea o Natanielu i le vasega o le Aveolela. Sa le’i lelei lana faalogo i lona manava, ma i laa taitasi, sa lemu teisi lana savali.
I le vaiaso ua te’a, sa tau vevesi ai le Peraimeri. I le taimi o pesepesega, sa tu ai pea i luga Mia ma feliuliuai. Sa le lava e Natanielu nofo i lalo, o lea sa ia tu ai foi i luga. Ae na fai atu lona faiaoga ia te ia e toe nofo i lalo. I le taimi o le fetufaaiga, sa talanoa ma toē nisi o tamaiti matutua. O nisi o taimi sa pisa tele ma lē lagona mea sa fai mai ai Tuafafine Miranda, le peresitene o le Peraimeri. Ina ua amata ona tagi lana uo o Kara, na avea lena ma mea sa fia tagi ai foi Natanielu ia.
Sa lei manao Natanielu e tuu ese atu le lima o Tina ao ia latalata atu i le laina i luma. Sa popole o ia nei vevesi foi le Peraimeri i lenei vaiaso. Ona ia iloa atu lea o lona faiaoga.
“Talofa, Natanielu,” o le tala lea a Tuafafine Tejada. “Ua ou fiafia e vaai ia te oe.” Sa popo e Tuafafine Tejada le nofoa i ona autafa.
Sa fiafia Natanielu i le ataata fiafia a lona faiaoga. Sa ia tuuese le lima o Tina ma nofo i lalo i talaane o Tuafafine Tejada.
“Ou te toe sau e avatu oe pe a uma le vasega,” o le tala lea a Tina. “Manatua ia migao.”
Sa lei mautinoa e Natanielu pe faapefea ona fai.
Ina ua uma le tatalo amata, sa tu i luga ia Tuafafine Miranda. “O le aso lenei ua i ai sa tatou malo faapitoa,” o lana tala lea.
Na faafuasei ona oso ae se papeti mai tua o le laulau lea na sosoo ma Tuafafine Miranda. Sa minoinoi solo le papeti, talotalo ona lima, ma fai mai, “Ua oo ea i le taimi e o ai? Ua ou fia inu!”
O nisi o tamaiti sa talie lemu.
“O le taimi muamua lenei o Arlo i le Peraimeri,” o le tala lea a Tuafafine Miranda, “ma na te le iloa pe faapefea ona faaaloalo. A o lei mafai ona migao o ia, e manaomia lona aoaoina o ni uiga lelei o le Peraimeri.”
Sa ofo Natanielu. O nisi o taimi e faamanatu atu ai e Tina ia te ia e tuu lana pepa sololima i luga o ona vae. O ni uiga lelei na. Ma e masani lava ona fai atu Tama i tagata uma e faafetai ia Tina mo le meaai lelei ae latou te lei tapenaina le laulau. O ni uiga lelei foi na. Ae o a uiga o le Peraimeri?
Sa faalagolago i tua Arlo i luga o le pito i luma o le laulau. “E, e ese le malie o foliga o tagata pe a u i lalo!” o lana tala lea.
O amioga lelei o tulafono ia e faaali atu ai tatou te faaaloalo i isi tagata,” sa faamatala mai e Tuafafine Miranda. E le iloa e Arlo tulafono mo uiga lelei o le Peraimeri. Tou te manatu e mafai ona tatou aoao atu ia te ia?” na ia fesili ai.
Sa alu atu Tuafafine Miranda i le laupapa ma tusi le ata o se lima. “O le a se mea e tatau ona fai e Arlo i ona lima?” na ia fesili ai.
“Piilima [ona lima]!” o le valaau mai lea a Mia.
“E sa’o lena,” o le tala lea a Tuafafine Miranda.
Sa nofo i luga Arlo. Sa piilima ona lima ma tuu i luga atu o lona ulu. “Oi, o e fai mai e faapea?” na ia fesili ai.
Sa iloa e Natanielu e le sa’o lena.
Sa fesili atu Tuafafine Miranda pe mafai e tamaiti uma o le Peraimeri ona faasino ia Arlo le auala e piilima ai ona lima.
Sa vave lava ona piilima ia Natanielu. Sa piilima foi Arlo.
Sa tusi e Tuafafine Miranda i luga o le laupapa i autafa o le ata o le lima, “Piilima.”
Ao tusi e Tuafafine Miranda nisi ata faaopoopo, sa aoao atu e tamaiti ia Arlo tulafono mo uiga lelei o le Peraimeri. Sa fiafia Natanielu aua o le tele o nei [uiga] ua uma ona ia iloa.
O lea la ua le toe minoi pe talotalo solo ona lima pe valaau mai. Ua filemu ona vae, ma ua piilima. Sa faalogologo foi ma le filemu ia tamaiti. Na foliga mai na le toe pisapisao ma vevesi le Peraimeri mai lena lava taimi. Sa lagona e Natanielu le to’a ma le fiafia. O le a le toe faigata ona migao i totonu o le Peraimeri. Ua uma ona ia iloa le ala [e migao ai].
Piilima.
Savali filemu.
Sii i luga o tatou lima mo se avanoa e tautala ai.
Faaaoga se leo filemu.
Faalogo i lo tatou faiaoga.
Ata na tusia e Jennifer Tolman.
Ata pue, mai le faaaloaloga a le Siteki a Kahului i Hawaii
Sa galulue malosi tamaiti o le Uarota a Kahului i le Siteki a Kahului i Hawaii e fesoasoani i le tausiaina lelei o le fale o le Tama Faalelagi. Mo se gaoioiga fesoasoani, sa latou faamamaina nofoa ia latou te faaaogaina i vaiaso taitasi i le Peraimeri.
O tamaiti matutua o le Peraimeri sa latou oloina nofoa i vai ma pauta (baking soda), ao tamaiti feoloolo o le Peraimeri sa latou faamamagoina nofoa. E oo lava i tamaiti pito i laiti na galulue ma le naunautai ma foliga fiafia. Ina ua maea, sa maua e tagata uma se lagona lelei e uiga i le faamamāina o le fale o le Tama Faalelagi.