Ma Le Alofa mai i O’u Uso
“O loo matou manuia,” sa ou fai atu ai i o’u faiaoga asiasi. Peitai, o le la auaunaga i lena Kerisimasi sa suia ai mea uma.
O le latalata atu i le Kerisimasi, o le tele foi lena o le mamafatu o lo’u loto. Ia Novema, e leai se isi o i ma’ua ma lo’u toalua na i ai ni galuega tumau. Sa ou totogiina le pili o le fale, eletise, ma le telefoni mai au tupe maua lea ua faaitiitia, a o lo’u toalua na totogiina le tupe e tatau ona totogi o le taavale mai si ona totogi laitiiti. O le tupe na totoe ai sa tau le lava matou te ola ai. Ia Tesema na toe tele ai galuega ma na toe foi ai i le mea masani, ae peitai e faatoa totogi i ma’ua ia Ianuari. I nei tulaga, e oo lava i se toonai o aso malolo sa le’i mafaufauina.
“O le a lelei mea uma,” sa ou fai ifo ai ia te au lava. Sa tauina e lo’u toalua le tele o vine suamalie i lena taumafanafana, ma sa fai a matou siamu. Sa fai a matou panikeke ma siamu ma faia a matou lava meaalofa. Peitai, sa ou lagona le ma’i i lo’u loto, ina ua amata ona faia e la’u fanau teine e toatolu (6, 8. ma le 14 tausaga) ona fai ia teuteuga i fatu na latou filiina, ma i lea foi taimi atoa sa latou talatalanoa ai po o a ni a latou meaalofa e ono maua atu i o latou matua mo le Kerisimasi.
I se tasi afiafi na o mai ai o’u faiaoga asiasi i se la asiasiga e le’i fuafuaina. E leai ni ou tuagane po o ni ou lava uso, o lea na avea ai le usoga a le Aualofa i la’u paranesi—aemaise lava o’u faiaoga asiasi—ma o’u uso moni lava. I lena po sa la faasoaina mai ai se lesona manaia, ona amata lea ona la talanoa e uiga i le aso malolo ua lata mai. Sa ou ta’uina atu ia i laua o loo lelei mea uma ae o le a avea o se Kerisimasi “mativa” mo i matou. Sa la ta’uina mai ia te au o le la tatalo mo lo matou aiga.
I se tasi aso ina ua sau lou toalua e piki au mai le galuega, sa ia fai mai ua lē lavava tagata uma la e i le fale i le faataliga o lo’u taunuu atu. Sa avatu e se tasi o uso mai le matou paranesi ni pusa. Ina ua matou tatalaina, sa i ai i totonu mea mananaia uma lava o le kerisimasi: o fualaau’aina suamalie, kuki, lole, o isi faatauga meaai, o mea teuteu, ma meaalofa ua uma ona afifiina ma le alofa. Sa faatumuina ou mata i loimata o le loto faafetai. Ma e lei gata ai iina. Sa faateia i matou i le taeao o le Kerisimasi e le aiga o se tasi o o’u faiaoga asiasi i se pusa o meaalofa.
I le faaiuga sa avea la matou Kerisimasi “mativa” ma se Kerisimasi pito i fiafia mo i matou. Sa faatumuina lo matou fale e le gata i le agaga o le Kerisimasi a o le mafanafana foi o le alofa o o’u faiaoga asiasi ma isi tagata o la matou paranesi. Sa ou malamalama ai e faataunuuina lava e le Alii o tatou manaoga ma i le tele lava o taimi e ala mai lea i isi tagata—aemaise lava i latou ua Ia tofia ma musuia e vaaia ma tausia i tatou.
Ata na tusia e Gregg Thorkelson