O Le Faamanuiaga o le Galue
O le galue e le na o se tulaga o manaoga tau i le tamaoaiga; ae o se tulaga tatau faaleagaga. I nei vaitaimi o le fesouaiina o le tamaoaiga, e moni lava o le poloaiga e galue o se tasi lea o poloaiga ua saunia le Alii e fesoasoani mai ia i tatou ia tausia.
O i latou na faaaluina se taimi i luga po o talaane foi o le sami e iloa le fesuiaiga o loo i ai. O galu, tai, peau, ma matagi o loo fesouaiina pea ma felafoa’i solo. O seila ma tagata faifaiva faamanuiaina e aoao e folau i galu ma tai ma faaaoga matagi ma peau ina ia malaga saogalemu ai i le mea e fia agai i ai.
Ua fesuisuiai foi le lalolagi, ma ua foliga mai ua televave tele le tulaga o le fesuiaiga. O se vaega tele o le tafe agai i tai ma le tafe malie o lo tatou lalolagi fesuisuiai o loo tupu lea i le fesuiaiga o le maketi o mea tau galuega. O le mea e lelei ai, e pei lava ona faaaoga e seila ia tomai na mauaina, o siata, ma isi fesoasoaniga e manuia ai le folauga, o loo i ai foi punaoa ma tomai aoaoina e mafai ona fesoasoani ia i tatou e faafoe ai ma le manuia ia tulaga o le fesuiaiga o mea tau galuega. O i latou e atamamai faapitoa e le gata i galuega ae faapena foi i le sailiga o galuega e sili atu ona faafoe ai nei taimi o fesuiga.
O Se Poloaiga ma o se Faamanuiaga
I lenei vaitaimi, e toatele ua faagaloina le taua o le galue. O nisi ua talitonu sese o le sini sili ona maualuga i le olaga o le ausia lea o se tulaga e le toe manaomia ai e se tasi ona galue. O Peresitene Tavita O. MaKei (1873–1970) na fiafia e faapea mai, “Ia tatou iloa o le avanoa e galue ai o se meaalofa, o lena mana e galue ai o se faamanuiaga, o lena fiafia e galue o se faamanuiaga.”1
O le galue e le na o se tulaga o manaoga tau i le tamaoaiga; ae o se tulaga manaomia faaleagaga. O loo galue lo tatou Tama o i le Lagi ia faataunuu lo tatou faaolataga ma le faaeaga (tagai Mose 1:39). Ma, e amata mai ia Atamu, na Ia poloaiina i tatou ia galulue. E oo lava i le Faatoaga o Etena, na faatonuina Atamu e “galueaiina ma leoleo ai” (Kenese 2:15). Ina ua mavae le Pau, na tauina atu ia Atamu, “E te ’ai foi au mea e ’ai ma le afu o ou mata” (Kenese 3:19). E pei o isi foi poloaiga, o loo i ai le fiafia i lona tausiaina. O le galue—faamaoni ma le faamanuiaina—e aumaia ai le fiafia ma le lagona o le taua o le tagata lava ia. A mae’a ona faia mea uma tatou te mafaia e ola faalagolago ai ia i tatou lava, ia saunia mo manaoga o i tatou lava ma o tatou aiga, e mafai ona tatou liliu atu ma le mautinoa i le Alii e aioi atu ai mo mea tatou te le’i mauaina.
O Meaalofa, Taleni, ma Mea e Fiafia I Ai
Na tuuina mai ia i tatou uma e le Tama Faalelagi taleni ma meaalofa e mafai ai ona fesoasoani ia i tatou e tausia i tatou lava ma o tatou aiga. O le aoaoina ia iloa a tatou taleni ma meaalofa—ma mea e fiafia ai—o se sitepu taua muamua lea i le sauniaina o se matata. O Peresitene Henry B. Eyring, Fesoasoani Muamua i le Au Peresitene Sili, na ia aoao mai lona tama, o Henry Eyring, e filifili i se matata e o gatasi ma mea e fiafia ai.
Ona o lona fiafia i le faasaienisi, sa uunaia ai e Polofesa Henry Eyring ona atalii e taulai a latou suesuega i le fisiki e avea o ni sauniuniga mo ni matata i le faasaienisi. A o aoga Peresitene Eyring i le fisiki i le Iunivesite o Iuta, sa la talanoa ma lona tama lea na suia ai le tulaga o lana matata. Sa ia fesili i lona tama mo se fesoasoani i se faafitauli lavelave o le matematika. “Sa tusitusi lo’u tama i luga o se laupapa sa i le fogafale i lalo o lo matou fale,” na toe tomanatu ai Peresitene Eyring. “Na faafuasei ona tu. ‘Hal,’ na ia fai atu ai, ‘sa ta faia foi le mea lava lea i le vaiaso talu ai. E foliga mai e te le o malamalama lava talu mai lena taimi. E te le’i faia?’”
I se lagona ma, sa ta’u atu e Peresitene Eyring na te le’i faia. Na tomanatu Peresitene Eyring i le tali a lona tama: “Ina ua ou ta’u atu ia te ia e leai, sa tu lo’u tama. O se taimi matuai maaleale tele ma le ootia, aua na ou iloa e matuai alofa lava o ia ia te au ma e matuai manao lava o ia ia avea au ma se saienisi. Ona ia fai mai lea, ‘Hal, ou te manatu e tatau ona e aluese mai le fisiki. E ao ona e sailia le mea e te matua fiafia lava i ai, a oo ina leai se mea e te mafaufau i ai, o le mea lena e te mafaufau i ai.’”2
Sauniuniga ma Aoaoga
Pe a suesueina i tatou lava ma mea tatou te fiafia i ai ma tomai ma pe a tatou faaaogaina fautuaga mai ia i latou e iloa ma alolofa ia i tatou—aemaise lava le Alii—e manaomia ona tatou sailia ia aoaoga ma le poto masani i o tatou tulaga o matata ua filifilia. O aoaoga ma sauniuniga o ni teugatupe sili ona aoga ia e ono faia e se tagata.
Aoao e fiafia i le aoaoina. Faapei ona taua le faaauau pea ona faia o ni teugatupe i totonu o se tusi tupe, e taua foi le faaauau pea ona aoaoina outou lava i se galuega po o matata ua outou filifilia ina ia tele ai le taua o outou tomai i le maketi o mea tau galuega. Faapei ona taulai atu le vaai a se alii seila i le itulagi mo se suiga i le tau, o le tulimataia o suiga mai lea taimi i lea taimi o la outou matata o le a fesoasoani lea tou te matauina ai fesuiaiga o tulaga i o outou eria ma faia ai ni faasaoga tatau o mataupu.
O Le Tuuina Atu ma le Taliaina o le Fesoasoani
E leai lava se tasi o i tatou o loo tuua toatasi i se ogasami; o i tatou o se vaega o le fogavaa tele. Ma e faapei ona i ai le tele o vaa fesoasoani a le vaega o le fogavaa a le neivi, e i ai i le Ekalesia epikopo ma peresitene o paranesi, peresitene o le Aualofa, peresitene o korama, tagata tomai faapitoa mo mea tau galuega, ma isi o loo ua tutu e sauni e fesoasoani ia i tatou ia amataina loa. O lenei fesoasoani e tele lava ona aofia ai le faasinoina o i tatou i punaoa ma aoaoga e fetaui i o tatou lava tulaga—e pei o le tusiaina o se faamatalaga mo oe lava, faia o se sailiga manuia o se galuega, ma le aoaoina ia lelei le faia o a tatou faatalanoaga.
A o le’i taitai ona oo mai le faaupuga upega fesootai na fefaasoaai le au seila i faamatalaga e uiga i mea e pei o ogasami matautia, auala fou, ma le faapogai o sapalai. O se seila o le a ulufale atu i se ogasami e le masani ai na te talanoa atu i tagata uma lava e ono i ai ni faamatalaga aoga ma aafiaga e faasoa mai. I siosiomaga o mea tau galuega i lenei vaitaimi, o le faatumauina ma le faamautuina o fesootaiga ma isi o e e i ai faamatalaga aoga ma aafiaga e tutusa lava le taua. O taitai o uarota po o paranesi i le lotoifale ma aiga lautele o ni vaega lelei ia e amata ai.
Aoaoina o Tamaiti ia Galulue
O se tasi o tiutetauave sili ona taua a matua o le aoao atu o a latou fanau ia galulue. E oo lava i tamaiti laiti e mafai ona amata ona iloa le aoga o le galue pe a faaaofia i latou i le faia o galuega i le fale ma le auauna atu i isi. O matua atamamai e galulue faatasi ma a latou fanau, ma tuuina atu lava pea viiviiga, ma ia mautinoa e leai se galuega e lofituina.
Ao laitiiti Peresitene Thomas S. Monson, na aoao o ia e ona matua i mataupu faavae o le galue e ala i a laua faataitaiga. O lona tama, o se lomitusi, na galue ma le malosi i le tele lava o aso o lona olaga. Pe a i ai i lona fale, e le malolo mai ana galuega ina ia fai sana malologa e matua-tatau ai lava. Na te faaauau pea ona galue i le tuuina atu o auaunaga tutusa i aiga ma tuaoi.3 Sa galue pea lava lona tina i le tuuina atu o nisi o auaunaga manaomia i se tagata o le aiga po o se uo. E masani lava foi ona fai atu matua o Peresitene Monson ia te ia latou te o faatasi e fai nisi o auaunaga mo i laua, e faatagaina ai o ia e aoao i se tulaga muamua e uiga i le galue e auauna atu i isi.
Na aoao mai Peresitene Monson mai lona tama i auala e galue ai i se pisinisi ma na amata ai lana galuega lē tumau ina ua 14 ona tausaga, na galue ai i le fale lomitusi sa pulea e lona tama. Na toe ta’ua e Peresitene Monson i le mavae ai o le 14 o ona tausaga, e le’i tele ni aso o lona olaga—e ese mai Aso Sa—e lei faigaluega ai. “Pe a e aoao e galue a o e laitiiti, o le a tumau ia te oe lena tulaga masani,” o lana tala lea.4
O Faamanuiaga o le Faatauanau
I tulaga o mea tau galuega, e pei o le tele o isi foi mea ua tofia i ai i tatou e faia i lenei olaga, e taua lo tatou agai i luma. Pe a tatou faia le mea sili tatou te mafaia, i le sailia lea o taitaiga uma mai tagata ma mai le lagi ma talitonu i lo tatou Tama Faalelagi alofa, o le a Ia faamanuiaina le taunuuga.
I le avea ai o se alii talavou, sa manao Peresitene Dieter F. Uchtdorf, Fesoasoani Lua i le Au Peresitene Sili, i se galuega faamasani e ese mai nai lo le avea o se tama e tilivaina tagamea mo lona aiga. Na te le’i matuai fiafia tele i le taavale toso, o le uila mamafa, po o le galuega; ae ui i lea, sa ia galue malosi e fesoasoani i lona aiga.
Na ia toe ta’ua ni faamatalaga o loo taua i lalo e faatatau i se faamanuiaga na oo mai ona o lena aafiaga faigata faalegaluega:
“I le tele o tausaga mulimuli ane, ina ua lata ona ave au i le militeli, sa tonu ia te au ou te ofo atu e auai i le Ea Fosi ina ia avea ma se pailate. Sa ou fiafia lava e lele ma ou manatu ai o le pailate o se mea tonu lava lea mo au.
“Ina ia talia la i le polokalama e tatau ona ou pasiina ni suega, e aofia ai se suega auiliili faaletino. Sa fai si popole o fomai i iuga ma sa toe faia nisi suesuega faafomai. Ona latou faasilasila mai ai lea, ‘O loo i ai ni ma’ila i o’u māmā o loo ta’u mai ai se faama’i o māmā i le popofou o lo’u olaga talavou, peitai o lea ua manuia i le taimi nei. ‘Sa tau mafaufau fomai pe o le a le ituaiga togafitiga sa faia mo au na foia ai le faama’i. E oo mai lava i le aso o lena suesuega, ou te lei iloaina lava se faama’i na lavea ai o’u māmā. Ona faafuasei ai lea ona manino mai ia te au o au faamalositino masani o se tama tiliva tagamea i le ea fou o le mea taua tele lena na faamaloloina ai a’u mai lenei ma’i. A na leai le isi galuega o le viliina o lena uila mamafa i aso uma, ma toso le taavaletoso o le tagamea i luga ma lalo o magaala o lo matou taulaga, semanu ou te le avea lava ma se avevaalele tau ma se kapeteni o se vaalele 747 mulimuli ane. …
“A na se’i ou iloaina i lena taimi le mea lea na faatoa ou iloaina ina ua mavae le tele o tausaga—a na se’i faapea na mafai ona ou iloa le iuga mai le amataga—semanu e ia te au se agaga talisapaia sili atu o nei aafiaga, ma atili ai ona faigofie ai la’u galuega.”5
Faatulagaina se Folauga
I nei vaitaimi o le fesouaiga o le tamaoaiga, ma foliga mai ua faaitiitia ia avanoa, pe a foliga mai e tetee atu e matagi ma galu lo tatou agai atu i luma, e taua lo tatou manatua e le aumaia e le Atua ni poloaiga i le fanauga a tagata, “sei iloga na te saunia le ala mo i latou ia mafai ai e i latou ona fai le mea ua ia poloaiina ai i latou” (1 Nifae 3:7). E moni lava o le poloaiga e galue e tausia oe ma lou aiga o se tasi lea o poloaiga ua saunia le Alii e fesoasoani ia i tatou e tausia.
Mo nisi, e ono foliga faavaivailoto le luitau, e pei o le luitau a Nifae a o ia tilotilo atu i le vasa o loo vaaia i tua atu o le lagi. O se alii talavou o le toafa o le a avea o se tufuga fauvaa ma se seila. O le suiga lena o se matata. Na sailia e Nifae faatonuga ma amata loa ona galue (tagai 1 Nifae 17:8–11). E oo lava i lenei vaitaimi, o le a faamanuiaina i tatou e le Alii pe a tatou faaauau pea ona ositaulaga ma auauna atu i le malo ma a o tatou faimalaga atu ma le faatuatua, ia iloa tatou te le o folau na o i tatou. ◼
O tua atu ma ata na saunia e Doug Fakkel; ata pue na tusia e Welden C. Andersen, sei vagana ua faamatalaina
E le manaomia le folau toatasi o se tagata i lenei vaitaimi o vai faigata o le leai o ni galuega. E le gata i taitai o le lotoifale o le Ekalesia, o tagata tomai faapitoa e pei o i latou i le Nofoaga Autu o Punaoa o Mea Tau Galuega i le Aai o Mekisiko e mafai ona tuuina atu ni taiala taua.
Faapei o seila ua sauni e ulufale atu i ogasami e le masani ai, o i latou o le a ulufale atu i maketi faigaluega o le a atamamai pe a latou faaaogaina fautuaga mai ia i latou na muamua atu ia te i latou.
Tauagavale: ata pue na saunia e Matthew Reier