O Se Meaalofa o le Alofa
E le’i fiafia o ia ina ua matou pepese. Ae aisea la sa matou tutu ai i luma o lona faitotoa i le Po o le Kerisimasi ma sauniuni e faasoa atu i ai se meaalofa o musika?
Ina ua gau le pisinisi fai fale’aiga a lo’u tama, sa feagai lo matou aiga ma se tulaga faaletonu matuia tautupe. Ou te manatua le sau o lo’u tina ma loimata i le fale, ma e le’i manao e ta’u mai ia i matou po o le a le mea sa sese e oo lava ina sa ou fesili foi i ai pe o le a le mea ua tupu. E le’i pine ae matou se’e atu i se tama’i fale totogi e tasi le potu ona sa pau lava lena o le mea sa matou gafatia.
A o le’i oo i lena taimi, o le vaitau o le Kerisimasi o se taimi lea o le pisi e fai ia kuka, o ofu fou, o patī, o asiasiga i nofoaga mananaia, ma meaalofa e tufa atu ma maua mai. Sa i ai i lo’u tina se tomai e avea ai ma, “Tina o le Kerisimasi” e pei ona matou faaigoa ai. E fiafia lava e foai atu, ma o Kerisimasi taitasi e tufatufa atu ai e ia ma le naunautai ma le agaalofa i ē e vagaia o ia. Ina ua matou matutua, o le mafaufau mo isi e sili atu nai lo mo i matou lava, sa avea ma se uiga sa matou taumafai foi e atiina ae.
Petiai, o lena tausaga sa matou le iloa le mea e fai. Sa popole lo’u tina ona o la matou Kerisimasi muamua lea i fafo atu o lo matou lava aiga. Sa popole o ia aua sa leai se mea sa mafai ona ia mafaufau i ai e tufa atu i isi. E ui o lea, sa matou faamalosiau atu ia te ia aua sa matou iloa e mafai, i sa matou lava auala itiiti, ona faia sina mea e faasalalau ai le agaga o le Kerisimasi.
Ae peitai, sa toetoe lava ina a le mafai ona matou tausia i matou lava, ma sa matou tauivi foi e tausi le filemu i lo matou siosiomaga fou. O le fafine e ona le fale sa matou mautotogi ai e le o se Kerisiano, ma sa le fiafia ia i matou ona matou te alapopo lava e fai le matou lotu faaleaiga ma usu ia viiga. E fafagu o ia ia matou pese aua e sosoo o matou potu. E tele taimi e faitio ai o ia, ona matou taumafai lea e usuusu lemu ina ia le faalavelave ai ia te ia. Ina ua ia iloa e le taofia le faia o a matou lotu faaleaiga i le taeao, sa i’u lava ina le toe faitio mai.
Ona oo ifo lea o se manatu i lo’u tama. Sa ia lagona e tatau ona matou usuusuina pese o le Kerisimasi i le fafine e ona le fale, e fai ma a matou meaalofa o le Kerisimasi ia te ia. Sa sagisagi fiafia tagata uma i lea manatu—se’i vagana ai au. Sa ou matua tetee lava, ma faamanatu atu i lo’u aiga faitioga a lea tina sa fai ia matou lotu faaleaiga. Sa ou fautuaina matou te o e pepese mo se isi tagata na te talisapaiaina ae le o ia.
Ae sa faauliulito lava lo’u tama, ma sa ia faamalamalama mai o le a avea ma se auala mo i matou e faaali atu ai ia te ia o i matou o ana uo, tusa lava pe eseese a matou tapuaiga. Sa leai sa’u filifiliga e fai ae auai ma lo’u aiga e filifili ma aoao ia pese e usu mo ia.
I le Po o le Kerisimasi, sa matou tutu atu i lona faitotoa ma tu’itu’i. Na te le’i tatalaina le faitotoa, ma sa toeitiiti lava a oso lo’u ita ma faamanatu atu i lo’u tama le maimau o a matou taumafaiga. Ae ina ua ou autilotilo solo, sa ou vaaia foliga ataata o tagata uma o lo matou aiga—o la e fiafia i le mea lea matou te faia. Sa ou lagonaina se naunautaiga i totonu ia te au, ia ou maua foi lea lava faalogoga e tasi.
Na i’u lava ina tatala mai e le fafine pule lona faitotoa, ma mo sina taimi sa na le iloa le mea a fai. Sa ta’u lemu atu i ai e lo’u tama, lo matou fia pesepese atu mo ia, ma afai e le afaina, o le a matou fiafia lava e o atu i totonu o lona potu. Sa laa o ia i tua, ae matou ulufale i totonu. Sa matou usuina pese uma o le Kerisimasi sa mafai ona matou manatua—o pese sa matou a’oa’oina ma pese matou te le’i a’oina. E le’i pine ae i ai se lagona matagofie i totonu o le potu. E ui ina sa matou iloa atonu o le a le malamalama o ia i le uiga o upu, ae sa ataata o ia a o matou pepese. Sa ia fai mai foi, sa lagona e ia le tuulafoaiina, ma o le vaai mai ia i matou o mafuta faatasi, sa moomoo ai foi o ia e fia mafuta ma lona lava aiga. Ae matou te le’i tuumuli, sa matou faamanuia atu ia te ia le Kerisimasi ma le Tausaga Fou. Sa faafetai mai o ia ia i matou, ona matou toe foi lea i lo matou potu.
A o ou taumafai e moe i lena po, sa ou mafaufau loloto i le mea sa tupu. Sa oo mai ia te a’u e faapea, o se meaalofa moni lava o le Kerisimasi e le tau faatau maia i le faleoloa pe tau gaosia foi i le fale; a o le uiga faaalia moni lava ma le mana’o ia tatou faia le mea e mafai ona tatou faia e faafiafia ai o tatou uso a tagata. Sa ou iloaina ai o le meaalofa aupito sili e mafai ona tatou foai atu i le taimi o le Kerisimasi e le manaomia ai ni tupe se tele, ae o se meaalofa o le alofa.
O lena po na ou iloa ai na lagonaina e lo’u aiga le agaga o le Kerisimasi e ala i le ofoina atu o sina auaunaga itiiti i se tuaoi tuua toatasi.
Ata na tusia e Dilleen Marsh