Savali a le Au Peresitene Sili
Foi i le Aiga mo le Kerisimasi
Sa i ai se pese sa ou faalogo muamua lava i ai a o’u tamaitiiti—o se pese e uiga i le Kerisimasi ma le aiga. O aso na o le taua sa toatele tagata sa le i ai i o latou fale ma aiga—o se taimi pogisa mo i latou o ē sa atuatuvale ailoga a latou toe mafuta ma a latou pele i lenei olaga. Ou te manatua o’u lagona mo le fale ma le aiga ina ua ou savali atu ma pasia se tasi o fale i le ala i le aoga i le taimi o le Kerisimasi, ma sa ou vaaia ai se tama’i fu’a e i ai se fetu lanuauro o loo tautau i le faamalama. O le fale o se teine sa ou iloaina i le aoga. O lona tuagane, e le matua tele atu i lo a’u, sa fasiotia i le taua. Sa ou iloaina ona matua ma sa ou lagonaina foi le mea sa la oo i ai. I lo’u toe foi atu i le fale pe a tuua le aoga, ou te lagonaina lava le faafetai ma le naunautaiga ia faafeiloaia a’u ma le fiafia i lo’u aiga.
A o ou kiina le leitio e i lo matou potu malolo i le vaitau o le Kerisimasi, ou te faalogoina lava ia upu ma musika o loo olaola pea i lo’u mafaufau. O nai laina o lena pese na pa’i mai i lo’u loto faatasi ai ma se moomooga e fia faatasi ma le aiga. Sa matou nonofo ma o’u matua ma o’u uso i se fale e fiafia, o lea sa ou iloa ai o le moomooga sa ou lagonaina, sa sili atu i le na ona i ai i se fale po o se olaga faaleaiga sa ou sapi ai i lena taimi. O se nofoaga lea ma se olaga i le lumanai, e sili atu nai lo le mea sa ou iloaina pe o se mea ua ou mafaufau i ai.
O le laina o le pese e sili ona ou manatua o le “O le a ou fo’i i le aiga i le Kerisimasi/Tusa lava pe ua na o se miti.”1 O le fale sa matou teuteuina ai laau Kerisimasi ma lo’u tina ma lo’u tama i na aso fiafia o lo’u tamaitiiti o loo i ai pea, e le o suia lava. I ni nai tausaga ua mavae, sa ou toe alu ai ma tu’itu’i le faitotoa. Sa tali mai ni tagata ou te le masani ai. Sa latou faatagaina a’u ou te laa atu i totonu o potu sa i ai le leitio, ma le mea sa faapotopoto ai lo matou aiga e faataamilomilo i le laau Kerisimasi.
Ona ou iloa ai lea o le naunautaiga o lo’u loto, e le o le i ai lea i totonu o se fale. O le i ai faatasi lea ma lo’u aiga, ma o se naunautaiga ia lagonaina le fusia i le alofa ma le Malamalama o Keriso, e sili atu nai lo le mea sa lagonaina e si o’u aiga toaitiiti i le fale o lo’u olaga faatamaitiiti.
Faanaunau Atu mo le Alofa e Faavavau
O mea e faanauanu atu i ai i tatou uma i o tatou loto, i le taimi o le Kerisimasi ma aso uma, o le lagonaina lea o le fusia faatasi i le alofa faatasi ai ma le faamautinoaga suamalie e mafai ona tumau e faavavau. O le folafolaga lea o le ola e faavavau, lea sa ta’ua e le Atua o Lana meaalofa aupito sili lea i Ana fanau (tagai MFF 14:7). E mafai lena mea e ala i meaalofa a Lona Alo Pele mo i tatou: o le soifua mai o le Faaola, Togiola, ma le Toetu. E ala mai i le soifua ma le misiona a le Faaola ua tatou maua ai le faamautinoaga e mafai ona tatou mafuta faatasi i le alofa ma ola e faavavau o ni aiga.
O le lagona o le faanaunau e foi atu i le aiga, na tatou fananau mai ma i tatou. O lena miti matagofie e le mafai ona taunuu e aunoa ma le faatuatua tele—ia lava mo le Agaga Paia e taitai atu ai i tatou i le salamo, papatisoga, ma osia ma tausia ia feagaiga paia ma le Atua. O lenei faatuatua e manaomia ai le onosaia ma le lototoa o tofotofoga o le olaga faitino. Ona, mafai lea i le isi olaga, ona faafeiloa’ia ma talia i tatou e lo tatou Tama Faalelagi ma Lona Alo Pele i lena aiga tatou te moemiti i ai.
E oo lava i le olaga lenei, e mafai ona tatou maua se faamautinoaga o le oo mai o lena aso ma lagonaina se vaega o le olioli o le a tatou iloa pe a oo ina tatou taunuu i le fale po o lo tatou aiga. O le faamanatuga o le soifua mai o le Faaola i le Kerisimasi tatou te maua ai avanoa faapitoa e iloa ai na fiafiaga i lenei olaga.
Mauaina o le Olioli na Folafola Mai
E toatele i tatou ua maliliu nisi o a tatou pele. Atonu o loo siomia i tatou e tagata o loo saili e faaumatia lo tatou faatuatua i le talalelei ma folafolaga a le Alii o le ola e faavavau. O nisi o i tatou ua mafatia i ma’i ma le mativa. Atonu o feagai nisi ma le feitaga’i i le aiga po o le leai foi o se aiga. Ae e mafai lava ona tatou valaaulia le Malamalama o Keriso e susulu mai ia i tatou, ma ia tatou vaaia ma lagonaina se vaega o le fiafia ua folafola mai, lea o loo faamalumalu mai i o tatou luma.
Mo se faataitaiga, a tatou potopoto i lena aiga faalelagi, o le a siomia i tatou e i latou ua faamagaloina mai agasala uma ma ē ua fefaamagaloa’i. E mafai ona tatou tofo i se vaega o lena olioli i le taimi nei, aemaise lava pe a tatou manatua ma faamanatu ia meaalofa a le Faaola mo i tatou. Na afio mai o Ia i le lalolagi e avea ma Tamai Mamoe a le Atua, e totogi le tau o agasala uma a fanau a Lona Tama i le olaga nei, ina ia mafai ai ona faamagaloina tagata uma. I le vaitau o le Kerisimasi, tatou te lagonaina ai se naunautaiga sili atu e manatua ma mafaufau loloto i afioga a le Faaola. Sa Ia lapata’ia i tatou e faapea e le mafai ona faamagaloina i tatou sei vagana ua tatou faamagalo atu i isi (tagai Mataio 6:14–15). E tele lava ina faigata ona fai lena mea, o le mea lea e manaomia ai ona outou tatalo mo se fesoasoani. O lea fesoasoani ia faamagalo atu o le tele lava o taimi e oo mai ai pe a faatagaina oe e te vaai i le tele o lou faatiga atu pe sili atu foi ona e faatiga i isi nai lo le faatiga mai o oe.
A oo ina e faatinoina lena tali i au tatalo mo le malosi e faamagalo atu ai, o le a e lagonaina le sii ese mai o se avega mai ou tau’au. O le tauaveina o se mea faafatu’ulu o se avega mamafa. A e faamagalo atu, o le a e lagonaina le olioli o le faamagaloina. I le vaitau o lenei Kerisimasi, e mafai ona e tuuina atu ma mauaina mai le meaalofa o le faamagaloga. O le lagona o le fiafia o le a maua mai, o le a avea lea ma se ataata o mea e mafai ona tatou lagonaina faatasi i le aiga, i le aiga e faavavau lea o loo tatou moomoo i ai.
Lagonaina o le Olioli o le Limafoai
E i ai se isi ataata o lena aiga fiafia i le lumanai, lea e mafai ona sili atu ona faigofie lo tatou vaai i ai i le vaitau o le Kerisimasi. O le lagona lea o le limafoai ma se loto foai. E mafai ona oo mai pe a tatou lagonaina manaoga o isi e sili atu nai lo o tatou lava manaoga, ma pe a tatou lagonaina le tele o le agalelei o le Atua ia i tatou.
E fesoasoani tatou te iloa ai le agalelei o isi i le taimi o le Kerisimasi. Ua faafia ona e alu ma tuu se meaalofa i luma o se faitotoa o se fale o se tagata, ma le faamoemoe e le iloa mai oe, ae e te alu atu ua sili atu ma le tasi ni meaalofa e le o tusia ai ni igoa ua i ai iina? Pe ua e lagonaina, e pei foi o a’u, le uunaiga e fesoasoani i se tasi ae e iloa mulimuli ane o le mea sa musuia oe e foai atu o le mea tonu lava lea na manaomia e se tagata i lena lava taimi? O se faamautinoaga matagofie tele lenei, o loo silafia e le Atua mea uma tatou te manaomia, ma ua faalagolago mai ia i tatou e faataunuuina mea o manaomia e isi o loo vagaia i tatou.
E auina mai e le Atua na feau ia i tatou ma le mautinoa tele i le taimi o le Kerisimasi, ma le silafia o le a tatou tali atu aua e tele atu lo tatou faananau i le faataitaiga a le Faaola ma upu a Ana auauna. I le taimi o le Kerisimasi, e foliga mai na tatou faitau talu ai nei ma ootia i tatou i upu a le Tupu o Peniamina. Sa ia aoaoina lona nuu, ma ua ia aoao mai i tatou, e faapea o le meaalofa lofituina o le faamagaloga ua tatou maua, e tatau ona tatou maua ai se lagona o le limafoai taumasuasua mo isi:
“Faauta foi, o lenei lava itula, ua tatou valaauina lona suafa, ma ua aioi atu ia te ia i le faamagaloina o a outou agasala. Pe ua ia tuu ea ia te outou e aioi atu faaleaoga? E leai, a ua ia liligi tele mai lona agaga ia te outou, ua faatumuina foi o outou loto i le olioli, ma ua tapunia o outou gutu ina ia le mafeganavai outou, ua faapea ona tele lo outou olioli.
“O lenei foi, afai e foaiina ia te outou e le Atua, o Le na faia outou, o Le foi ua outou faalagolago i ai i o outou ola ma mea uma ua ia te outou---o mea uma ua tatau ua outou faatoga atu ai ia te ia ma le faatuatua, o loo talitonu tou te maua, ona matua tatau lava lea ona outou foai i mea ua ia te outou o le tasi i le tasi.
“Afai foi e te faamasino i le tagata e tuu ae lana tagi ia te oe i ni au mea ina ia le fano o ia, ma e ta’usalaina o ia, pe le matua sili ona tatau ea le ta’usalaina o oe ona ua e taofi lou oa, e le ni au mea foi, a o mea a le Atua, o Le ana foi lou ola, a ua e le avae se tagi, pe salamo i le mea ua e faia?
“Ou te fai atu ia te outou, oi talofa i lena tagata, aua e fano ana mea faatasi ma ia. O lenei foi, ou te fai atu nei mea i e ua mau’oa i mea a lenei lalolagi” (Mosaea 4:20–23).
Ua uma ona outou lagonaina le olioli o le foai atu o meaalofa ma le mauaina mai o meaalofa. O lena olioli i lenei olaga o se ataata lea o mea o le a tatou lagonaina i le olaga a sau, pe afai tatou te limafoai iinei ona o lo tatou faatuatua i le Atua. O le Faaola o lo tatou faaa’oa’o sili lea. I le vaitau o le Kerisimasi tatou toe manatunatu loloto ai po o ai o Ia ma le agalelei na Ia faaalia mo i tatou e ala i le afio mai lea i le lalolagi e avea ma o tatou Faaola.
Ona o Ia o le Alo o le Atua, na soifua mai ia Maria, ua ia te Ia le mana e tetee atu ai i tofotofoga uma ia agasala. Sa soifua o ia i se olaga atoatoa ina ia mafai ai ona avea o Ia ma taulaga e le i’u, o le Tamai Mamoe e lē ponā na folafola mai i le faavaega o le lalolagi (tagai Faaaliga 13:8). Sa mafatia o ia i tiga o le ta’usalaga o a tatou agasala ma agasala uma a fanau a le Tama Faalelagi, ina ia mafai ona faamagaloina i tatou ma toe foi atu ma le mama i lo tatou aiga.
Na Ia foai mai ia i tatou lena meaalofa i se tau e le mafai ona tatou malamalama i ai. O se meaalofa Na te le’i manaomia mo Ia lava; Sa le manaomia e Ia se faamagaloga. O le olioli ma le lotofaafetai tatou te lagonaina i le taimi nei mo Lana meaalofa o le a faateleina ma o le a tumau e faavavau a o tatou faamamaluina ma tapuai atu ia te Ia i lo tatou aiga faalelagi.
O le vaitau o le Kerisimasi tatou te maua ai le faamalosiauga e manatua o Ia ma Lona agalelei e le i’u. O le manatuaina o Lona agalelei o le a fesoasoani tatou te lagonaina ai ma tali atu i le musumusuga e faapea, o loo i ai se tasi o loo manaomia la tatou fesoasoani, ma o le a mafai ai ona tatou vaaia le aao o le Atua o aapa mai ia i tatou, pe a Ia auina mai se tasi e fesoasoani ia i tatou, e pei ona Ia faia pea e le aunoa. E i ai le olioli i le foai atu ma le mauaina o le agalelei e musuia e le Atua, aemaise lava i le Kerisimasi.
Faamanuiaina i Lona Malamalama
O loo i ai se isi ataata o le lagi e faigofie atu ona iloa i le taimi o le Kerisimasi. O le malamalama lea. Sa faaaoga e le Tama Faalelagi le malamalama e fofoga mai ai le soifua mai o Lona Alo, o lo tatou Faaola (tagai Mataio 2; 3 Nifae 1). Sa vaaia se fetu fou i le Lalolagi i Sasae ma Sisifo. Na taitai atu ai le Au Makoi i le pepe i Ierusalema. E oo lava i le Tupu amioleaga o Herota na ia vaaia le faailoga; sa fefe ai aua sa amioleaga o ia. Sa olioli le Au Makoi ona o le soifua mai o le Keriso, o Ia o le Malamalama ma le Ola o le Lalolagi. O aso e tolu o le malamalama e aunoa ma se pogisa o le faailoga na tuu atu e le Atua i le fanauga a Liae, e faailo atu ai le soifua mai o Lona Alo.
Tatou te manatua i le taimi o le Kerisimasi e le gata i le malamalama na fofoga mai ai le soifua mai o Keriso i le lalolagi ae faapea foi le malamalama e sau mai ia te Ia. E toatele molimau na faamautuina lena malamalama. Na molimau Paulo na ia vaaia le malamalama i luga o le ala i Tamaseko:
“Na ou iloa atu i le ala le malamalama mai le lagi, ua sili lona pupula i le la, ua pupula faataaliolio mai ia te au ma la matou au malaga.
“Ua pauu i matou uma i lalo i le eleele, ona ou faalogo atu lea i le siufofoga ua fetalai mai ia te au, ua faapea mai i le upu Eperu, Saulo, Saulo e, se a le mea ua e saua mai ai ia te a’u? o le mea faigata ia te oe ona e aa i tui.
“Ona ou fai atu lea, Le Alii e, o ai ea oe? Ona fetalai mai lea o Ia, O a’u o Iesu ua e saua i ai.” (Galuega 26:13–15).
Na molimau foi le taulealea o Iosefa Samita na ia vaai i se malamalama ofoofogia i se vao o laau i Palamaira, Niu Ioka, i le amataga o le Toefuataiga.
“I lea lava taimi tonu o lo’u atuatuvale, sa ou vaai ai i se malamalama faaniutu i luga ae tonu o lo’u ulu, e sili atu le pupula nai lo le la, ua alu ifo malie lava seia oo mai ia te au.
“Sa lei pine ona oo mai lea malamalama ae ou faalogoina loa ua tatalaina au mai le fili na taofia au. Ina ua oo ifo le malamalama i o’u luga, sa ou vaaia ni Tagata se toalua e le mafaamatalaina lo la’ua mamalu ma lo la’ua pupula, o tutu mai i ou luga ae i le ea. Sa fetalai mai le tasi o i laua ia te au, ma sa ia ta’u lou igoa ma fetalai mai a o tusi ane lona aao i le tasi—O Lo’u Atalii Pele lenei. Faalogo ia te Ia!” (Iosefa Samita—Talafaasolopito 2: 16–17).
O le a iloagofie lena malamalama i lo tatou aiga faalelagi. O le a tatou maua ai le olioli. Ae e oo lava i lenei olaga ua faamanuiaina outou i se vaega o lena aafiaga matagofie, e ala i le Malamalama o Keriso. O tagata uma lava e fananau mai i le lalolagi, e mauaina lena malamalama o se meaalofa (tagai Moronae 7:16). Mafaufau i taimi na i ai sou aafiaga na avea ai oe ma se molimau e moni ma taua le Malamalama o Keriso. O le a e iloa ai mai lenei mau matagofie faamautinoa, sa taialaina oe e lena malamalama.
“O mea foi e le faamanuiaina e le mai le Atua a o le pouliuli.
“O mea mai le Atua o le malamalama lava ia; o lē talia foi le malamalama, ma tumau pea i le Atua, e faateleina atu i ai le malamalama; ma e tuputupu pea le pupula o lea malamalama seia oo mai le aso atoatoa ona lelei.
“O lenei foi … ou te fai atu ia te outou, ua ou fai atu ai foi ina ia outou iloa le mea moni, ina ia outou tulieseina le pogisa mai ia te outou” (MFF 50:23–25).
I se lalolagi ua faapogisaina e ata leaga ma feau po o savali lē faamaoni, ua faamanuiaina outou i le iloagofie lea o emo o le malamalama ma le upumoni. Ua outou aoaoina mo outou lava e malmalama atili lena malamalama pe a e taliaina ma le fiafia. O le a saga malamalama atili seia aulia le aso atoatoa o le a tatou i ai i le afioaga o le Faapogai o le malamalama.
E faigofie atu ona iloatino lena malamalama i le taimi o le Kerisimasi, pe a tatou tatalo ia iloa pe o le a le mea e finagalo le Atua tatou te faia ma faitau atili i tusitusiga paia ona atili ai lea ona talafeagai ona tatou i ai i le feau a le Alii. A tatou faamagalo atu ma lagonaina lo tatou faamagaloina, a tatou sii a’e lima o loo tautau i lalo (tagai MFF 81:5), o le siitia foi lena o i tatou lava a’o tatou agai atu i le Faapogai o le malamalama.
Tou te manatua o loo faamatala mai i le Tusi a Mamona se taimi viia ina ua faasusulu atu e soo faamaoni o le Faaola Lona malamalama mo isi ia iloa (tagai 3 Nifae 19:24–25). Tatou te faaaogaina moli e faamanatu ai le vaitau o le Kerisimasi. O lo tatou tapuai i le Faaola ma a tatou auaunaga mo Ia e aumaia ai le malamalama i o tatou olaga ma olaga o i latou e vagaia i tatou.
E mafai ona tatou faatuina ma le mautinoa se sini ia malamalama atu lenei Kerisimasi nai lo le tausaga talu ai, ma malamalama atili isi tausaga taitasi e mulimuli mai ai. Atonu e matua faateleina tofotofoga o lenei olaga, ae mo i tatou, e le tatau ona faateleina le pogisa pe a taulai tasi atu o tatou mata i le malamalama lea e susulu mai i o tatou luga pe a tatou mulimuli i le Matai. O le a Ia taitai i tatou ma fesoasoani ia i tatou i le ala e agai atu ai i luga i lo tatou aiga lea o loo tatou moomoo i ai.
E i ai taimi, e tele lava o le Kerisimasi, tatou te lagonaina ai vaega o mea o le a tatou oo i ai pe a oo ina tatou taunuu i lo tatou aiga i lo tatou Tama o lē alofa ia i tatou ma tali mai i a tatou tatalo ma le Faaola o lē sa faamalamalamaina o tatou olaga ma sii a’e i tatou i luga.
Ou te molimau atu ona o Ia, ua mafai ai ona e maua se faamautinoaga e mafai ona e toe foi atu i le aiga e le gata i le taimi o le Kerisimasi ae e mafai foi ona e ola e faavavau faatasi ma se aiga e te alofa i ai ma ē e alolofa le tasi i le isi.
Ata na saunia e Steve Bunderson; O Le Soifua mai o le Faaola, © Gemaldegalerie, Dresden, Germany/A.K.G. Berlin/Superstock; ata o le holly na pueina e Lana Leishman
O Le Fofogaina Atu o le Soifua mai o Keriso i Leoleo Mamoe, saunia e Del Parson
Ata na tusia e Paul Mann