Taimi o Fetufaaiga

O Le a Ou Manatuaina Iesu Keriso

Saunia e Cheryl Esplin

“Aua ua ou iloa, o loo soifua le na te togiolaina au, o aso amuli foi e tulai mai ai o ia i luga o le eleele” (Iopu 19:25).

A o soifua Iesu i le lalolagi, sa femaliuai o Ia ma faia galuega lelei.

Sa leai se agasala a Iesu, ae na puapuagatia o Ia ma maliu mo agasala a tagata uma. Ina ua mavae aso e tolu sa toetu mai o Ia. Na aumaia e Iesu le Togiola e ala mai i Lona tiga, maliu, ma le Toetu.

A o e tago atu i le faamanatuga i le lotu i Aso Sa taitasi, e tatau ona e manatuaina le Togiola a Iesu Keriso, faapea foi ma folafolaga na e faia i le Tama Faalelagi ina ua papatisoina oe. O le faamanatuga o se taimi lea e mafaufau ai e uiga i le tele o le alofa o Iesu Keriso ma le Tama Faalelagi ia te oe. O se taimi e salamo ma mafaufau ai e uiga i mea e mafai ona e faia ia avea ai faapei o i Laua.

Ao e usuina le pese faamanatuga, faalogo i upu. Faalogo lelei i tatalo o le faamanatuga. Mafaufau i mea ua e aoaoina ma ua e lagonaina.

Gaoioiga

Aveese le itulau U12 mai le mekasini, ma faapipii i se pepa malo. Gaugau le tusi o le faamanatuga i laina togitogi. A e usuina le pese faamanatuga i le lotu, faalogo po o le a se mea o ta’u mai e upu e uiga ia Iesu Keriso. Pe a e taunuu atu i le fale i vaiaso taitasi, tusi se mea e tasi i lau tusi sa e aoaoina mai le pese e uiga ia Iesu.

Manatu mo Taimi o Fetufaaiga

1. Ou te manatuaina Iesu pe a ou ‘ai ma inu i le faamanatuga. Faamatala le tala o le Talisuaga Mulimuli mai le. Mataio 26:17–30. Faitau faatasi Luka 22:19, ma fai i tamaiti e toe fai ia upu “Tou te faia le mea nei e fai ma faamanatuga ia te au.” Faamatala atu o le ‘ai ma inu i le faamanatuga e aumaia ai ia i tatou le avanoa e manatua ai le Faaola ma Lana Togiola. Faaali atu fata o le faamanatuga. Fesoasoani i tamaiti ia malamalama o le falaoa e faamanatu mai ai ia i tatou le tino o Iesu ma o le vai e faamanatu mai ai ia i tatou Lona toto. Tusi i luga o le laupapa: “O le a se mea e mafai ona e faia e manatua ai Iesu ao e ‘ai ma inu i le faamanatuga?” Tusi ia tali i luga o le laupapa. (Faataitaiga: faitau se mau e uiga ia Iesu, faalogo i tatalo o le faamanatuga, mafaufau e uiga i le Togiola a Iesu.) Uunaia tamaiti e faataitai se mea e tasi o nei fautuaga i le isi taimi latou te auai atu ai i le sauniga faamanatuga.

2. O le manatuaina o Iesu e fesoasoani lea ia te au e filifili ai le mea tonu. Ae e te lei sau i le Peraimeri, afifi le ata 240 (Iesu o le Keriso) mai le Pusa o Ata o le Talalelei ia foliga o se meaalofa o le Kerisimasi. Tau atu i tamaiti o loo i ai i totonu se mea o loo suitulaga i le meaalofa sili. Fai atu i tamaiti e fai mai ni fesili e taliina i le ioe po o le leai e mate ai [le meaalofa]. Tuu atu i le tamaitiiti na sa’o lana mate e tatalaina le meaalofa. Faapipii le ata o Iesu i luga o le laupapa. Ae lei amataina le vasega, faapipii solo i totonu o le potuaoga ia fasipepa o loo i ai upu ia e taua i lalo: “Sa papatisoina Iesu,” “Sa auauna atu Iesu i isi,” “Sa tatalo Iesu i le Tama,” “Sa femaliuai Iesu ma faia galuega lelei,” “E alofa Iesu ia i tatou,” “Sa aoao Iesu ia galue,” ma “Sa faamamaluina e Iesu Lona tina.” [Tusi se laina] e vaelua ai le laupapa i ni koluma e lua. I luga o le isi koluma, tusi “Manatuaina Iesu”. I luga o le [koluma] lona lua, tusi ai “Fesoasoani mai ia te au e filifili le mea tonu”. Tuu i vasega taitasi se mau po o se ata o loo faamatalaina ai se vaega o le soifuaga o Iesu. Faataitaiga: Mataio 3:13–17—Na papatisoina Iesu; Ioane 13:4–15—Na auauna atu Iesu i isi; 3 Nifae 17:15—Na tatalo Iesu i le Tama; Ioane 15:12—Sa alofa Iesu ia i tatou; Pusa Ata o le Talalelei 206 (Olaga Faatamaitiiti o Iesu Keriso)—Na aoao Iesu ia galue; 242 (O Iesu ma Lona Tina)—Na faamamaluina e Iesu Lona tina. Fai i tamaiti e faitau le mau pe matau le ata ma saili le fasipepa o i ai upu o loo faamatalaina mai ai. Pe a sao filifiliga a vasega taitasi, ona tuu lea o le fasipepa o loo i ai upu i le koluma muamua. Fesoasoani i tamaiti ia mafaufau i se filifiliga e tai tutusa e mafai ona latou faia, e pei “O le a papatisoina au.” Tusi i le koluma lona lua e faafeagai ma le fasipepa o loo i ai upu e tutusa.

Ata na tusia e Paul Mann

O Le a Ou Manatuaina Iesu Keriso

Manatua: O lenei gaoioiga e mafai ona kopiina pe lolomiina mai le Initoneti i le www.liahona.lds.org. E mafai ona lolomiina ata o le talalelei mai le Initoneti i le http://gospelart.lds.org.