O Meaalofa Faaleagaga E Tuuina Atu i le Peresitene o le Siteki
Sa ou feiloai atu i le fia selau o peresitene o siteki. O i latou o ni tamalii ua faataunuuina ni mea tetele ma le amio sao. Ua tumu i latou i le faatuatua, ma le naunautaiga e faafiafia i le Alii.
O le valaauga o le peresitene o le siteki o se aafiaga paia ma le faaleagaga. I lalo o le taitaiga a le Au Peresitene Sili, ua tofiaina ai le Au Pulega Aoao ma Fitugafulu Eria i lenei tiutetauave. I le 16 tausaga sa ou auauna ai o se tasi o le Au Pulega Aoao, sa ou tuuina atu valaauga i le tele o aganuu ma konetineta —mai Amerika i Matu seia oo atu i Amerika i Saute, ma mai Europe seia oo atu i Asia.
I aafiaga taitasi uma, sa ou faapelepeleina lava ni aoaoga se lua na ou mauaina i nai ou vaiaso muamua i le avea ai o au ma se Au Pulega Aoao. Mai ia Peresitene Thomas S. Monson: “Ona ua oulua i ai i le feau a le Alii, ua alagatatau ai mo oulua le fesoasoani a le Alii.” Mai ia Peresitene Boyd K. Packer, Peresitene o le Korama a Aposetolo e Toasefululua: “O le a outou maua ni aafiaga i la outou galuega pe a outou tuuina atu se fesili i le Alii i le veli ma mauaina mai se tali vave.” I tulaga taitasi ua uma ona faataunuuina nei folafolaga e lua.
O le aafiaga o le valaauina o se peresitene o le siteki e masani lava ona tutusa, ma e masani foi ona eseese. E tutusa ona o le Au Pulega Aoao toalua po o Fitugafulu Eria lea na auina mai ua la lagonaina se faalagolago lofituina i le Alii, ma e tatau ona maua e i laua uma ni musumusuga tutusa a o lei tuuina atu le valaauga. E lagolagoina malosi e le aunoa e le Agaga o le Alii ma faamautu le faiga o le filifiliga. E eseese ona o tamalii ua tofiaina e tele le eseesega mai lea siteki i lea siteki. I nisi o taimi o peresitene fou o siteki o tamalii e maoae ni poto masani ma le tele o tausaga o auaunaga; ae i nisi o taimi e talavou i latou ma e tumu i le faatuatua; o a latou galuega e leai se mamanu e mulimuli ai.
O Le Faaeeina Atu o Ki
E ui lava e masani ona filifilia se peresitene o le siteki mai taitai o le siteki o loo i ai nei, ae e i ai a tulaga e ese mai ai. I se tasi o taimi na matou faatalanoaina le usoga e oo lava i le leva o le afiafi, ma sa lei mauaina le lagona o le faamaoniga a le Agaga e uiga i nei tamalii maoae sa matou feiloai i ai. I le taimi mulimuli, ina ua uma ona matou faatalanoaina le lisi atoa na saunia, sa matou faasaga atu loa i tamalii taualoa e le o auauna i ni tofiga faaletaitai i le taimi nei A o matou feiloai ma se faiaoga o le vasega o le Mataupu Faavae o le Talalelei i le 10:00 i le po, sa matuai malosi le faamautuina mai ia i matou e le Alii o Lana filifiliga lea. Faatoa matou iloaina lava ina ua uma le faailoaina atu o le valaauga, sa i ai lenei alii i lona fale e faatalitali lo matou telefoni atu. I nai masina na muamua atu, a o lei faasalalauina le fesuiaiga i le au peresitene o le siteki, sa fafaguina i la’ua ma lona toalua i le po ua iloa o le a tuuina atu le valaauga ia te ia.
O i latou ua auauna atu o ni peresitene o siteki latou te le sailia tofiga ua latou umia. E lotomaualalo i latou uma pe a valaauina ma o nisi e lagona le lofituina. Ina ua ou valaauina se peresitene o le siteki i Europa lea na o le 10 tausaga talu ona avea o ia ma se tasi o le Ekalesia, sa taumanava ma fai mai, “Oi leai, leai, e le o au. E le mafai ona ou faia.” O le mea e lelei ai, o lona toalua lelei tele lea sa i ona autafa, sa ia tuu atu ona lima ma opo mai o ia ma fai atu i ai, “La’u pele, e mafai ona e faia. Ou te iloa e te mafaia.” Sa sa’o o ia, ma sa matuai lelei lana auaunaga.
I Filipaina, sa i ai se alii sa vaaia le vave o le tuputupu ae o le Ekalesia ma ona taitai talavou tele, sa tali mai ina ua tofia, “Oi e leai, e le o au. Ua ou toeaina tele. Ina ua ta’u atu ia te ia o nisi o uso o le Toasefululua e ta’i tolusefulu tausaga e matutua atu ai ia te ia, na ia taliaina ma sa matua lelei lana auaunaga.
“Ua le filifilia a’u e outou, a ua filifilia outou e a’u, ma faauuina outou” (Ioane 15:16), na fetalai mai ai le Faaola. Tatou te le sailia pe teena ni valaauga e oo mai ia i tatou.
O nisi o taimi, pe muamua mai, pe i le taimi o le valaauga, po o le maea ai ona maua le valaauga e faamautinoa mai ai e le Alii i le tagata o lona valaauga e mai le Atua lea. Na lipotia mai e se peresitene talavou o le siteki sana faamautinoaga i le auala lenei:
“E 32 ou tausaga ae faatalanoaina au, ma e fa tausaga sa ou epikopo ai. O le tasi o i latou sa faafoeina le faatalanoaga na fesili mai i ni fesili ootia se lua: (1) Pe na faapefea ona e mauaina lau molimau? ma le (2) Pe mafai ona e faasoa mai ia i matou lau molimau i le Faaola? Sa ou faasoaina atu lo’u aafiaga a o o’u talavou, i se taimi e lei mamao atu le maliu o lo’u tina, ina ua ou iloaina ai mo au lava le moni o le talalelei toefuataiina, aemaise lava e uiga i le Tusi a Mamona.
“Ao ou faasoaina atu la’u molimau e uiga i le Faaola, sa ou mauaina se faaaliga o le a valaauina au e avea ma peresitene e sosoo ai o le siteki. Sa ou alu i la’u taavale i le fale ma ta’u atu i lo’u toalua le mea na oo ia te au. Ina ua ou fai atu ia te ia ou te manatu e ono valaauina au e avea ma peresitene o le a sosoo ai o le siteki, sa ia tali mai, ‘E te lelei, ae le’i lelei tele.‘Sa tatagi le telefoni i le lua itula mulimuli ane, ma sa valaauliaina i ma’ua ma te toe foi atu ma lo’u toalua, ma sa tuuina mai le valaauga.”
A maea le palota o le lagolagoina i se sauniga aoao o le konafesi a le siteki, o i matou e auina atu e tuuina o matou lima i luga o le ao o le peresitene fou o le siteki ma faaee atu ia te ia ki e tatau ai o le perisitua e pulefaamalumalu ai ma taitaia mataupu o le siteki. O nei ki e pulefaamalumalu ai i le siteki, e faamatuu mai e le Peresitene o le Ekalesia ma isi Aposetolo e 14 lea o loo latou umia ki uma i le lalolagi. I nei ki o loo i ai le pule ma le mana faaleagaga.
Sa tuuina atu e le aunoa e le Alii ia ki i Ana Aposetolo filifilia. Na Ia fetalai atu ia Peteru, “Ou te avatu foi ia te oe ki o le malo o le lagi: o se mea foi e te fusifusia i le lalolagi, e fusifusia foi lea i le lagi: o se mea foi e te tālā i le lalolagi, e tatalaina foi lea i le lagi” (Mataio 16:19). O nisi o nei ki o loo faasafua atu i taitai o le lotoifale. I Saraemila, na tofia e Alema “ia faitaulaga ma toeaina i le faaee atu o ona lima, e tusa ma le tofiga paia mai le Atua, e pule ma leoleo i le ekalesia” (Alema 6:1).
Faailoaga o Ki i Tua Atu
O se mea malie lava, sa i ai se taimi sa manaomia ai le saini a le Peresitene o le Ekalesia pe a fia maua se pepa faataga o le malumalu. O le taimi nei o lena pule ua i ai i ki ia ua faamatuu atu i le peresitene o le siteki. Faatasi ai ma ona fesoasoani, na te fautuaina atu foi i le Au Peresitene Sili ni epikopo ma faauuina i latou pe a faamaonia mai; na te faamaonia i latou e faauuina i le Perisitua Mekisateko; na te fautuaina mai ma vaetofia ia faifeautalai faamisiona; ma e avea o ia o se faamasino o Isaraelu e fesoasoani atu ia i latou o loo i ai agasala matuia ina ia maua le faamagaloga atoatoa. Na te taialaina galuega ma faaiuga fai a epikopo ma peresitene o paranesi a le siteki.
I nei matafaioi, e liligi mai e le Alii faaaliga i luga o Ana peresitene o siteki. Na faasoa mai ia te au e se peresitene o le siteki o loo nofo i le itu i saute o le Iunaite Setete le aafiaga lenei:
“Ia Oketopa i le 2007, na sau ai se tuafafine ma te talanoa e fia maua sona pepa faataga o le malumalu. I le taimi o le faatalanoaga, sa ou fesili atu ia te ia pe o le a sau lona toalua ma te talanoa mo lona pepa faataga pe a maea lana faatalanoaga. Sa fai mai o ia ua silia ma le 20 tausaga talu ona le toe alu lona toalua i le malumalu ma e lei faamauina lava i laua i le malumalu i le 40 tausaga o la la’ua faaipoipoga. Sa ou lagonaina se uunaiga malosi e talanoa loa lava i lenei uso. Sa matua malosi tele le uunaiga ma na ou tuua ai loa lo’u ofisa, ma maua ai o ia i le isi itu o le fale, ma aumaia ai o ia i lo’u ofisa mo se faatalanoaga. Ina ua maea le faatalanoaga, i le taimi lea sa faatasi atu ai lana epikopo, sa tuuina atu ia te ia se pepa faataga o le malumalu. Sa avea o se aafiaga ootia lenei aafiaga mo i matou uma lava, aemaise lava o lona faletua. Sa ou mauaina se valaaulia i le faaiuga o lena vaiaso ia ou auai atu i le la faamauga i le malumalu.
“I le amataga o le 2008, pe tusa ma le fa masina talu ona faamauina lenei ulugalii, sa ala ae lenei uso i le taeao e sauni e alu e faigaluega, ae palasi i lalo ma maliu ai i lona aiga. E le uma lo’u faafetai i lo’u faalogo i uunaiga a le Agaga ma fautuaina lenei uso e faia le mea e matua manaomia ona ia faia i lona olaga.”
O Meaalofa Faaleagaga ma Folafolaga Faaleagaga
Na folafola mai e le Alii o le siteki o le a avea “ma olo, ma sulufa’iga mai le afā” (MFF 115:6). O se peresitene o le siteki o le leoleo mamoe lea a le Alii, o lē e tatau ona fesoasoani ia mautinoa o loo lagonaina i totonu o le usoga a le Ekalesia ia le agaga o le saogalemu ma le puipuiga faaleagaga. E tatau ona ia faamautinoaina ma le faaeteete o mataupu faavae o loo aoaoina e moni ma mama. O Peresitene Gordon B. Hinckley (1910–2008) na saunoa mai:
“O tiute o se aoao i le Perisitua Arona e mafai foi ona aoga i le peresitene o le siteki. E tatau ona ia ‘vaaia le [siteki atoa], ma mafuta ma [tagata o le au paia] ma faamalolosia,
“‘Ma vaai ina ia leai se amioleaga i le ekalesia, po o le feitagai o le tasi i le isi po o le pepelo, po o le faatuaupua, po o le tautala leaga;
“‘Ma vaai ina ia potopoto soo le ekalesia, ma vaai foi ia faia e le au paia uma o latou tiute’ (MFF 20:53–55).”1
E aofia i lana galuega ia musumusuga i auala e faamalolosia ai aiga, faamalolosia ai tupulaga fai ae, valaaulia le tele o fanau a le Tama Faalelagi i le vai faamama o le papatisoga, aapa atu ia i latou ua se ese mai le Ekalesia, ma avatu ia sauniga o le malumalu i au paia o loo soifua ma i latou na muamua atu ia i tatou.
I nei tiutetauave taua uma, e faamanuiaina e le Alii ia peresitene o siteki i le faatupulaia o meaalofa faaleagaga. I le vaega e 46 o le Mataupu Faavae ma Feagaiga, o loo fetalai mai le Alii e uiga i le tele o meaalofa faaleagaga ma folafola mai ai:
“Aua e le tuuina atu meaalofa uma ia te i latou taitoatasi; aua e i ai meaalofa e tele, ae tuuina atu e le Agaga o le Atua se meaalofa i tagata taitoatasi.
“Ua tuuina atu i nisi le tasi, a o isi ua tuuina atu i ai se isi, ina ia manuia ai i latou uma” (MFF 46:11–12).
Ona faaopoopo mai lea o le Alii, “Ma e o le a tofia ma faauuina e le Atua e leoleo i le ekalesia … o le a tuuina atu ia te i latou ia iloatino le tonu o na mea alofa … ina ia i ai se fai ma ulu, e manuia ai le au paia uma” (MFF 46:27, 29).
I nisi o taimi o nei meaalofa ua tuufaatasia ma ni folafolaga faaleagaga o le a faataunuuina e le Alii. Sa faasoa mai e se peresitene talu ai o le siteki mai i Pasila le aafiaga lenei:
“O se tina faatuatua nofo toatasi ma se fanau talavou e toafa na tauivi ma le faigata o le tamaoaiga. Sa ou fesili atu ia te ia, ‘Tuafafine, o auai e le aunoa lau fanau i le seminare?’ Sa ia tali mai, ‘e tele o’u luitau ma e mamao tele lo matou fale mai le falesa. E le saogalemu.‘Sa ou lagonaina se uunaiga malosi i lena taimi, e fautua ma folafola atu ia te ia. Sa ou fai atu, ‘Afai e leai se tou tupe, e manaomia lou savali i le mamao ma i latou. O faatasi ma i latou; nonofo faatasi ma i latou i le vasega. Afai e te faia lena mea, o le a e lavea’ia lau fanau, ma o le a faaipoipo uma i latou i le malumalu.‘Sa ou te’i i upu sa ou fai atu ai ae sa le mafai ona ou teena le musumusuga mamana.
“Sa ia taliaina le fautuaga ma savavali faatasi ma lana fanau i le seminare i le tele o tausaga. Ua faataunuuina nei lana folafolaga. Ua faaipoipo uma i latou i le malumalu, ma o lana tama tama o loo epikopo nei i lana uarota.”
Atonu o se tasi o meaalofa pito sili e tuuina atu i se peresitene o le siteki o le alofa o’oo’o ma le tele mo tagata ua valaauina o ia e auauna atu i ai. Ina ua valaauina au o se peresitene o le siteki, sa ou fefe ona o le malosi o le lagona popole ma le alofa ia i latou i le siteki. E oo lava ia i latou sa aafia i agasala mamafa, sa ou lagonaina se alofa tele ma le naunau e fesoasoani atu i ai. O nei lagona o le alofa e masani lava ona tuufaatasia ma le naunautai e fesoasoani i au paia ina ia liliu moni atu i le Faaola ma Lana talalelei toefuataiina. Sa ou auauna atu i le tele o tausaga o se fesoasoani, peitai ina ua ou maua ki o le au peresitene, ua sili atu le malosi ma le faaosofia o lagona. Sa ou lagona atonu o loo ou mauaina sina vaega o le meaalofa o le alofa lea na saunoa mai ai Mamona i lana lapataiga, “Ia outou tatalo atu ai i le Tama ma le malosi uma o le loto, ina ia faatumuina outou i lenei alofa ua foaiina mai ia te i latou uma o e ua fai ma soo faamaoni o lona Alo o Iesu Keriso” (Moronae 7:48).
O nei lagona e uunaia ai se peresitene o le siteki e aapa atu [i isi], ma mulimuli mai ai vavega. Sa toe ta’ua e se peresitene o le siteki mai Amerika i Saute se faataitaiga i le auala na uunaia ai o ia e lenei alofa e saili se tasi na leiloa:
“Sa ia te au se uunaiga malosi lava e manaomia lo’u taumafai e saili se uso lea sa auauna atu o sa’u soa faifeautalai i le tele o tausaga ua mavae. Sa faaipoipo o ia ma ua le toe malosi i le Ekalesia. O lona pepa faamaumau sa i se iunite laitiiti e 150 kilomita [93 maila] mai le nofoaga autu o le siteki. Sa ou malaga iina ma talanoa ma le peresitene o le paranesi, lea na ta’u mai ia te au o la’u soa faifeautalai sa ma tala’i e mamao ese mai le taulaga le mea e nofo ai. Na faasino mai e le peresitene ia te au le auala i le tamai nuu. Ina ua mavae sina taimi na suia le auala ta i se auala pefu. Ina ua mavae atu le tele o kilomita, sa ou iloaina ua ou se. Sa faatu la’u taavale ma sa ou faapea ua lava lea. Sa matuai vevela lava le aso, ma e leai foi se ea malulu o le taavale. Sa faigata mo lo’u toalua ma la’u fanau le pefu o le auala. Sa ou tootuli ifo i le auala ma aioi atu mo se fesoasoani mai le Alii.
“I ni nai itula mulimuli ane, sa matou taunuu ai i se tamai nuu ma maua ai la’u soa faifeautalai. Sa ou valaauliaina o ia e toe foi mai. Na toe malosi o ia i le Ekalesia ma na auauna atu i le tele o tofiga faaletaitai. Sa faamamaluina le misiona a lona atalii, ma o le taimi nei, o la’u uo ma la’u soa i le misiona o loo avea nei o se fesoasoani i le au epikopo.”
E i ai le mana i le tofiga. E tutu faatasi le Alii ma Ana peresitene o siteki. O [le tala] lenei mai se peresitene o le siteki i Ekuatoa: “Sa ou matauina se tamaloa i le siteki e masani lava ona foliga faanoanoa. Sa ou mauaina se uunaiga malosi i se tasi aso e manaomia lo’u asia o lenei tamaloa. Sa ou tietie atu loa i lona fale. Sa fai mai o ia sa matuai faanoanoa lava ona ua tele tausaga la te lei toe fetautalaa’i ma lona tama. Sa ia faamatala mai o lona tama o se tagata saua ma ua ia motusiaina le la sootaga. Sa ou fesili atu ia te ia pe manao e foia lea tulaga. Ina ua ma taunuu atu i le fale o lona tama, sa ou faatuina le taavale i luma. Sa ou tuitui i le faitotoa ma faalogoina se leo o fesili mai, ‘O ai lea?’ sa ou iloaina le leo o lona tama ma tali atu, ‘Uso, o lau peresitene o le siteki.‘Sa ia tatalaina le faitotoa ma iloa mai ai au o ma tutu atu ma lona atalii. E aunoa ma se upu e tasi, sa la feopoai ma fetagisi. Sa foia le faafitauli.”
E silia ma le 2,800 peresitene o siteki i le salafa o le lalolagi. I le tele lava o tulaga, o i latou o ni tagata lē taualoa—e pei foi o oe ma a’u. O loo latou galulue mo lo latou faaolataga e pei foi ona tatou galulue mo lo tatou faaolataga. Ae ua latou mauaina se valaauga e tulaga ese. Na faaee atu aao i o latou ao, ma ua latou mauaina ki o le perisitua.
Ua ou feiloai atu i le fia selau o peresitene o siteki. O i latou o ni tamalii ua faataunuuina ni mea tetele ma le amio sao i o latou soifuaga patino ma le lautele. Ua tumu i latou i le faatuatua, ma se naunautaiga tumau e faafiafia i le Alii.
Ua ou i ai i o latou maota ma laoa, tootutuli faatasi i le tatalo ma i latou, ma lagona le faamaoni o a latou talosaga i le Tama Faalelagi. Ua ou lagonaina le mana o le Alii i o latou luga. E alofa le Alii ia i latou ma faaee atu i o latou luga meaalofa faaleagaga.
Ia taitasi i tatou ma tatalo mo o tatou peresitene o siteki. Ia tatou tutu i ona autafa ma fesoasoani atu ia te ia. Ia tatou faalogo ia te ia ma faatuatuaina o ia. “O le a faaolaina lava Isaraelu … ; ma o ki foi ua ou tuuina atu o le a taitaiina ai i latou, a e le toe faafememeaiina ai lava” (MFF 35:25).
Ata pue na tusia e John Luke ma Christina Smith