Ua Fanau Mai mo i Tatou le Tama

Na mua’i ta’u mai e le perofeta anamua o Isaia le afio mai o le Mesia ma e tele mea e uiga i Ana matafaioi na faaalia mai.

I le tele o seneturi a o le’i soifua mai Iesu Keriso, sa tusi faamaumauina ai e le perofeta o Isaia mea sa faaali atu ia te ia e uiga i tulaga o le afio mai o Keriso. O se tasi o ia valoaga, o loo maua i le Isaia 9:6, ua tuuina mai ai ia i tatou na o ni nai upu itiiti lava se tamaoaiga o le silafia e uiga i le Faaola ma Ana matafaioi i o tatou olaga ma le fuafuaga a le Tama Faalelagi. O nisi nei o ni nai faamatalaga o manatu o loo ta’ua i le fuaiupu lenei.

Ua Fanau Mai le Tama, ua Foaiina mai le Atalii

Na faailoa atu le Faaola ia Atamu, le uluai tagata, o le Atalii Pele e Toatasi o le Atua (tagai Mose 5:7, 9; 6:52, 57, 59, 62). Mai lava i lena taimi na molimau ai perofeta paia uma e uiga i le afio mai o le Alo o le Atua i le tino e togiola Lona nuu (tagai Galuega 10:43; Iakopo 4:4).

O le a le mea e faauiga i ai le soifua mai o Keriso?

O le agelu sa fofogaina mai le soifua mai o le Faaola i leoleo mamoe na ia folafola maia “le tala lelei e olioli tele, i le nuu uma” (Luka 2:10).

Ina ua vaaia e Nifae i se faaaliga le taupou o Maria o siiina le pepe o Iesu, sa uuna’ia o ia e faamaonia “le alofa o le Atua, ua salalau i loto o le fanauga a tagata” (1 Nifae 11:22).

O le Faaola lava Ia na tautino maia e faapea “aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16).

E I Lona Ua le Malo

I ona po o Isaraelu anamua, sa oofu faitaulaga ma tupu i se ofu talaloa ma tuu le pine po o le faailoga o lo latou tofi i luga o le tau’au (tagai Isaia 22:21–22). O Iesu Keriso, le Alo o le Atua, na afio mai “o sē ua i ai le pule” (Mataio 7:29). Ma o le a nofotupu o Ia o le Tupu o tupu ma le Alii o alii i le taimi o le Meleniuma, pe a “nofotupu lē e tatau ona nofotupu” (MFF 58:22; tagai foi Mataupu Faavae o le Faatuatua 1:10).

O Le Faipule Silisili Ese

O le upu silisili e sau mai le upu Eperu mo le “vavega,” o loo ta’u mai ai le soifua faavavega mai o le Mesia ma vavega o le a Ia faatinoina i Lona soifuaga. O le upu faipule e i ai le faiā ma poloaiga ma aoaoga o le a aumaia e le Mesia e toe taiala atu ai i tatou i le Tama Faalelagi. E pei ona fai mai le perofeta o Iakopo i le Tusi a Mamona, “[O le Alii] e faatonu mai o ia ma le poto, ma le amiotonu, ma le alofa tele lava i ana galuega uma lava” (Iakopo 4:10).

O Le Atua Malosi

“Talitonu ia Iesu Keriso, le Alo o le Atua, o le [tamalii] aupito sili o le olaga nei ma le faavavau. Talitonu i lona soifua lē mafaatusalia e tau i tua atu o le lalolagi a’o le’i faavaeina. Talitonu o ia o le Foafoa o le lalolagi o loo tatou ola ai. Talitonu o ia o Ieova o le Feagaiga Tuai, o ia o le Mesia o le Feagaiga Fou, ma sa maliu ma toetu mai, … ma o loo soifua o ia, o le Alo soifua o le Atua soifua, o lo tatou Faaola ma lo tatou Togiola.”

Peresitene Gordon B. Hinckley (1910–2008), “Be Not Faithless,” Tambuli, Apr. 1990, 4.

O Le Tama Faavavau

“O Ieova, o Iesu Keriso le Alo o Elohima, ua faaigoa ‘o le Tama,’ ma ‘o le Tama lava lea e Faavavau o le lagi ma le lalolagi’ (tagai … Mosaea 16:15). Faatasi ai ma le faauigaga faatusatusa ua faaigoaina Iesu Keriso ‘O Le Tama Faavavau’ (Isa. 9:6; faatusa i le 2 Ni. 19:6). … O Iesu Keriso, o le na Foafoaina, ua ta’ua pea lava pea o le Tama o le lagi ma le lalolagi … ; ma ona o ana foafoaga e faavavau lona taunuuga, ua alagatatau ai ona ta’ua o le Tama e Faavavau o le lagi ma le lalolagi.”

“O le Tama ma le Alo: O Se Faamalamalamaga Faamataupu Faavae a le Au Peresitene Sili ma le Korama a Aposetolo e Toasefululua,” Ensign, Ape. 2002, 13; mai le Improvement Era, Aug. 1916, 934–42.

O Le Alii o le Filemu

“Atonu ua se ese i tatou mai le ala lena e tau atu i le filemu, ma ua manaomia ai ona malolo e mafaufau ma manatunatu i aoaoga a le Alii o le Filemu ma manatunatu e tuu i totonu na aoaoga i o tatou mafaufau ma mea e fai, ma ola i se tulafono maualuga, ma savavali i se ala maualuga atu, ma avea ma se soo e sili ona lelei o Keriso.”

Peresitene Thomas S. Monson, “Mauaina o le Filemu,” Liahona, Mati 2004, 3.

“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27). ◼

“Aua ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili Ese, o le Faipule, O le Atua malosi, O le Tama o le Faavavau, O le Alii o le Filemu” (Isaia 9:6).

Mai le tauagavale: lagi i tua atu © Digital Vision; O Le Perofeta o Isaia o Loo Valoia le Soifua Mai o Keriso, saunia e Harry Anderson; Aua ua Fanau Mai mo i Tatou le Tama, saunia e Simon Dewey, faaaloaloga a Altus Fine Art; lagi i tua atu na saunia e Steve Tregeagle