O A’u i Se A?
O mafatiaga na aoaoina ai a’u e aua le popole i lenei fesili—po o se isi lava mea e le taua tele.
O A’u i Se A? Aisea ua tupu ai i lenei taimi? Faatoa ou foi mai lava sa ou tauva i se faaaliga tele o solofanua na faia i Kalefonia ma na ou i le tumutumu o lo’u tomai e tietie ma faafoeina se solofanua e poto e oso ma tuli manu. Sa ou pisi i le aoga, lesona piano, ma le Ofagapi. Sa ou faia mea uma na aoaoina ai au e fai, ma sa ou manatu sa matua atoatoa lava lo’u olaga e pei ona tatau ona oo i ai.. Ona suia lea.
O Le Tofotofoga
Sa ou taoto nei i se moega i le falemai, ua matua ma’i lava e oo lava i le pupula o o’u mata. Sa suesueina ma faailoa mai ia te au ua ou maua i le kanesa tuga o le toto. Na oo mai lenei ma’i ia te au ina ua mavae le fa tausaga talu ona maliu lo’u tina i le kanesa lava e tasi. Sa faia o’u togafitiga o le kanesa o le tuiina lea o ni vailaau i lo’u tino ina ia aveese ai le ma’i, ma na fai mai fomai e tatau ona faia pea ia togafitiga mo le lua ma le afa tausaga ina ia mautinoa ai ua alu ese atoa le kanesa. Sa ou le malamalamala pe aisea ua tupu ai lenei mea ia te au ma pe aisea foi ua tupu ai i lenei taimi.
Sa vave ona ou iloaina o le maua i le kanesa e le na o le pau lea o le luitau o le a feagai ma au. O se tasi o vailaau e faaaoga i le togafitiina o le lukimia o se vailaau faalenatura [steroid] e tuuina mai i ni inumaga malolosi. E matua lelei lava i le tapeina o sela o le lukimia, peitai e i ai sina aafiaga laitiiti ma e mafai ona mamate ai ‘alava o ponaivi (o se tulaga lea e pepē ai ponaivi e lata i sooga ona o le le lava o le sapalai o le toto), aemaise lava i teineiti talavou. Sa manatu a’u fomai, i le 12 o tausaga, sa matuai ou laitiiti tele ma e le tatau ona tupu lena mea. Ae peitai, i totonu o le tasi masina talu ona amata ou togafitiga, na iu ai ina faaleagaina e vailaau le tele o sooga tetele [o lo’u tino] ma vaega o lo’u tuasivi. Sa ou ola ma le tiga i taimi uma. Ina ua mavae le fa masina talu ona maua au i le lukimia, sa faia loa lo’u taotoga muamua i lo’u suilapalapa e amata ai taumafaiga e faaleleia ai vaega na faaleagaina ona o vailaau ma ia faaitiitia ai le tiga. E lei sologa lelei lo’u taotoga e tusa ma lo’u faamoemoe, ma na ta’u mai e la’u fomai faapitoa o ponaivi e ono le mafai ona ou toe tietie i se solofanua. Na faafuasei, ona mou atu le lumanai na ou fuafuaina.
Sa avea au ma se teineitiiti aoga lelei, ma sa ou matuai fiafia lava i le aoga. I le taimi nei ua le mafai ona ou alu i le aoga po o fafo foi i nofoaga faitele ona ua faaleagaina e ou togafitiga le malosiaga o lo’u tino e puipuia ai a’u mai faama’i. Ae, ua ou nofo i le fale ma le toalua [stepmother] o lo’u tama. Sa ou manatu ua fai sina le lelei o le tulaga ua i ai nei, ae na faasolo ina sili atu ona leaga.
Ina ua mavae le ono masina talu lo’u taotoga i lo’u suilapalapa, sa manaomia le toe faia o se isi o’u taotoga i lo’u suilapalapa ona sa le’i manuia lo’u taotoga muamua. Sa ou faaaogaina le nofoa faataavalevale ona e tiga tele pe a ou savali. Sa ou matuai mautinoa lava o le a le mafai ona ou toe tietie i se solofanua, ma o lena la sa ou popole ai lava pe mata e mafai ona ou toe savali. E lei logo malie ia te au le ola ai i se olaga ma’i, lagonaina o le tiga i taimi uma, ma le noatia ai i se nofoa faataavalevale.
O Tatalo
Sa ou tatalo i lo’u Tama Faalelagi, ma na ou iloa sa tele foi isi tagata na tatalo mo au. I ou tofotofoga uma, sa ou tatalo ia faamaloloina au, ma ia manuia ou sooga [o ponaivi], ma ia ou le toe manaomia e faia le isi vaega o totoe o ou togafitiga. Sa ou lagona le le tali mai o au tatalo aua sa ou alu pea lava i le Falemai Autu o Tamaiti o le Peraimeri i le Aai o Sate Leki i vaiaso uma mo nisi togafitiga. Sa ou tiga pea. Ma sa noatia pea au i se nofoa faataavalevale. I se tasi o taimi, na amata ai ona ou mafaufau ua vālea o’u matua i le talitonu i se Atua e le faalogo lava i se teineitiiti laitiiti ma’i.
I tausaga ua mavae, sa ou oo ai foi i se tofotofoga e tai tutusa lava o lo’u faatuatua ina ua ou tatalo mo lo’u tina ina ia toe malosi. Sa faamanava o ia i le okesene i taimi uma ma sa matuai vaivai lava e oo lava i le savali i totonu o le fale. Sa ou tatalo ma faamoemoe ma toe tatalo atili ina ia faamaloloina o ia i se tulaga faavavega. Ae peitai, e lei faamaloloina o ia. Ina ua mavae lona maliu, sa ou aoaoina mai e mafai ona tatou tatalo mo mea tatou te mananao ai, mea uma tatou te fia tatalo atu ai, ae e manaomia ia tatou tatalo mo mea sao—tatalo ia faia pea le finagalo o le Alii—ina ia tali mai a tatou tatalo.
O le manatuaina o lenei lesona, na suia ai au tatalo mai le “Faamolemole ia faamaloloina au” i le “Tama Faalelagi, ou te matuai manao ia aveeseina nei tofotofoga, ae ou le a ou talia Lou finagalo.” I le taimi lava na ou sui ai au tatalo, sa ou iloaina ai sa sili atu ona faigofie ona ou gafatiaina ou togafitiga, ma sa i ai ia te au se uiga lelei sili atu. Ua na o sina amataga lena o faamanuiaga ma tali o au tatalo ma fesili.
Sa faia e lo’u tama ma lo’u tama matua le tele o ou faamanuiaga faale-perisitua. Soo se taimi lava ou te alu ai mo se taotoga, ou te talosaga ai mo se faamanuiaga. Na fesoasoani faamanuiaga ia te au ma lo’u aiga e maua ai le toafilemu e uiga i le taotoga. I se tasi o taimi sa maualuga ai lo’u fiva, ma sa tatau ai ona matou o i le falemai. Sa ou mauaina se faamanuiaga mai lo’u tama ma lo matou tuaoi ae matou te lei malaga ese atu. E oo atu i le taimi na matou taunuu ai i le faitotoa o le potu o faalavelave faafuasei, sa leai so’u fiva, ma sa lei manaomia ou te nofo i le falemai i le po. Ou te iloa o le mana o le perisitua o se meaalofa mai se Tama Faalelagi alofa.
O Lesona
O se mea e tasi e tu mai pea i lo’u mafaufau o le aso lea na ou sau ai i le fale mai le falemai ina ua maea le suesuega ua ou maua i le lukimia. Na tapenaina mai e le usoga a tamaitai talavou laiti ma le Aualofa a’u mea mai le fogafale i lalo o lo matou fale i se potu i le fogafale autu ia ou latalata ai i o’u matua ma lē faaaogaina ai le faasitepu. Sa latou faamamaina ma teuteuina le potu ina ia avea ai o se nofoaga maoae mo au ou te nofo ai a o ou ma’i. Sa mauaina e lo’u aiga le tele o isi auaunaga faatino. I le amataga, sa faigata lava ia te au le talia o auaunaga. Pe a fai e ni tagata ni auaunaga mo au, e aumaia ia te au se lagona o le le mafai ona ou faia se mea mo au lava. Ae peitai, sa vave ona ou aoaoina e le afaina le talosaga atu mo se fesoasoani. Ina ua amata ona ou maua se faalogoga sili atu, na amata loa ona ou vaavaai mo ni avanoa e auauna atili atu ai i isi tagata. I le taimi nei ua ou taumafai ai e auauna atu i le mea ou te mafaia. Ou te maua se lagona lelei pe a ou auauna atu i isi tagata. Ua ou iloaina o le tuuina atu i isi tagata e auauna mai ia te au, ua ou faatagaina ai i latou ia maua foi e i latou nei lava lagona lelei.
Sa ou aoaoina ai ia mafaufau atili e uiga i le lumanai ma a’u filifiliga aua sa ou matua latalata lava i le oti. I le aoga, sa ou faalogoina faitioga a teneiti e uiga i le “lē lelei o lauulu i se aso”. Ao ou saofai ai iina i luga o lo’u nofoa faataavalevale lanu piniki vevela ma se lauulu faapipii i lo’u ulu, sa ou mafaufau, “Ia a o le mea sili e i ai o outou lauulu!” E masani foi ona faitio teneiti e uiga i le tiga o o latou vae mai le savavali solo i seevae muli uumi. Ou te mafaufau ia te au lava, “Ao le mea sili e mafai ona outou savavali.” Ua ou taumafai i le taimi nei ia taulai atili atu la’u vaai i le vaaiga lautele o le olaga nai lo mea laiti sa masani ona ou popole ai.
I nai tausaga ua mavae atu sa ou aoaoina ai le tele o isi mea na ala mai i faamanuiaga o le maua i le lukimia ma faafitauli na oo mai ona o togafitiga. Ua ou latalata atili i lo’u Tama Faalelagi. Ua tupu la’u molimau. Ma na ou aoaoina se mea e sili lona taua. Na ou aoao ia faataua mea laiti uma e faia e tagata mo au. Ua amata nei ona ou manuia, ua faaitiitia foi le tiga, ma ua amata ona auauai mai pea le faaaogaina o o’u sooga [o ponaivi]. A o faasolosolo pea ona ou maua le malosi, ua faaauau foi ona oo mai faamanuiaga ma aafiaga e aoao ai.
O le mea lea, o a’u ea i se a? Aisea ua tupu ai i lenei taimi? Ou te le o toe fesili i na fesili aua na ou tuputupu ae faaleagaga i le taimi o ou tofotofoga. Ua ou iloa po o ai moni lava a’u aua na matua alofa le Alii ia te au ma faataga mai au ia ou tofo i puapuaga ma faamanuiaga na mafai ona maua mai ai.
Ata pue mai le faaaloaloga a le aiga o Quigley, sei vagana ua faamatalaina; taumatau: ata na pueina e Matthew Reier
Na iliina e Elisapeta le oboe i le sauniga aoao a Tamaitai Talavou ia Mati o le tausaga nei (lea e mafai ona maimoaina i le www.generalconference.lds.org).
Taumatau pito i luga: ata na pueina e Craig Dimond