O Se Kerisimasi i le Lotoa o le Malumalu
O le tele o tagata e fiafia e asiasi atu i le Lotoa o le Malumalu i le taimi o le Kerisimasi. O Lisa, e 11 tausaga, ma Ailama e 10 tausaga o ni tausoga mai Kaysville, Iuta, na o mai e matamata i moli matagofie ma vaaiga mataina i le Lotoa o le Malumalu.
E ono faigata ona filifili po o fea le mea e muamua ona matamata ai. O laau i soo se mea ua lilo i tamai moli emoemo lanu piniki, lanu samasama, lanu moana, ma le lanu meamata. I luga atu o na mea uma, o loo susulu mai ai le Malumalu o Sate Leki i le paepae matagofie, ma o loo susulu mai i le pito i luga le faatagata auro o Moronae.
Na fiafia Lisa ma Ailama e matamata i nisi o seti o le fanau mai o le Faaola e tulaga tutusa ma seti lea na faia faapitoa lava mo tamaiti ia na o mai mo le Olimipeka 2002 o le Taumalulu i le Aai o Sate Leki.
O tufuga mai le tele o atunuu na mamanuina seti e faafeiloai atu ai i tamaiti mai vaega uma o le lalolagi ma fesoasoani ia i latou e mafaufau ai e uiga i le Faaola. O na seti o loo faaalia pea i taimi o le Kerisimasi i le Lotoa o le Malumalu. E i ai seti mai Iapani, Mekisiko, Niu Sila, ma Polani. Afai e te vaai faalatalata i ai, o le a e iloaina nisi o meaalofa tulaga ese mo le pepe o Iesu!
Luga: O Lisa ma Ailama o loo tutu e matamata i seti i se vaaiga e pei o tagata le lapopoa o le soifua mai o le Faaola i autafa o le Tapeneko ma faalogologo i le faaleoteleleo i se tala o le Kerisimasi.
Luga: I luma o le malumalu o se seti paepae-atoa o le soifua mai o le Faaola. O se vaitaele o loo atagia ai vaega uma e lua, o le malumalu ma Maria, Iosefa ma Iesu. O se vaaiga maofa tele.
Ata na pueina e Craig Dimond