“O Tupu i Matou e Toatolu

Saunia e Wendy Kenney

O le Au Makoi o se vaega lauiloa o se vaaiga masani o le soifua mai o le Faaola, peitai o a tonu lava ni mea tatou te iloa e uiga ia i latou?

Pe ua e silasila toto’a ea i se ata faaali o le soifua mai o le Faaola, ma mafaufau e uiga i tamalii laei taugata sa molimoliina ia meaalofa i le pepe o Iesu? Ua tatou iloa, ioe, na avea i latou ma sui o Makoi e toatolu, ae o ai ea i latou? Aisea na latou asiasi atu ai ia Iesu, ma aisea foi na latou aumaia ai ia te Ia na meaalofa uiga ese?

O le tala faatusi paia o le soifua mai o le Faaola o loo faaali tonu mai ai sina faamatalaga itiiti e uiga i le Au Makoi (tagai Mataio 2). Ae talu ai le matua maoae o la latou asiasiga, o lea na taumafai ai le au faitofa i le atufia o seneturi e saili ia maua ni faamatalaga e uiga i lo latou faasinomaga ma le faamoemoe na asiasi atu ai i le tamameamea o Keriso. E ui na i ai ni nai faamatalaga na alia’e mai i suesuega faasikola, ae o le tele lava o mea na masani ona talitonu i ai le lalolagi Kerisiano e uiga i le Au Makoi, e ono tele atu ona faavae i tala faafagogo ma taumatematega nai lo le talafaasolopito.

O mea nei ua matou iloa:

E Toa Fia le Au Makoi?

I talatuu e toatolu tamalii sa asiasi atu i le tamameamea o Keriso, o se talitonuga na maua mai i le mea moni e tolu ni meaalofa na tauaaoina atu: auro, pulu lipano, ma le pulu muro. E manatu faapea, na tofu le tamalii ma le meaalofa e tasi na aumai. Peitai, o nisi sikola ua talitonu atonu e ono toatele atu ni Au Makoi, atonu pe atoa lava le 12.¹ O loo ta’u mai i le Lomifefiloi o le Tusi Paia, talu ai ona o le Au Makoi o molimau taua o le soifua mai o le Faaola, atonu e le itiiti ifo ma le toalua pe toatolu (tagai Teuteronome 19:15; 2 Korinito 13:1; MFF 6:28).²

O le talitonuga o le Au Makoi o ni tupu, e maua mai fuaitau i le Feagaiga Tuai o loo muai ta’u mai ai e uiga i tupu na asiasi atu i le Alii. Fai mai le Isaia 49:7, “E iloa mai e tupu ma latou tulai,” ma le Isaia 60:10 o loo tusia ai, “E auauna mai o latou tupu ia te oe.” (Tagai foi i le Salamo 72:10.)

Ua maua e sikola isi faamaumauga o loo faasino i le Au Makoi o ni tupu. O tusitusiga a Mako Polo i le seneturi lona 13 o loo i ai se lipoti mai le taulaga o Saba i Peresia e uiga i tupu e toatolu sa latou aveina ni auro, pulu lipano, ma le pulu muro i se malaga e asiasi i se perofeta faatoa fanau mai. E tusa ai ma le faamaumauga a Mako Polo, o igoa o nei tamalii o Kasipale, Melekia, ma Paletasala, o igoa e masani lava ona fesootai ma le Au Makoi o aso nei.³

Faapogai o le Faaupuga Au Makoi

O le faaupuga Au Makoi, e pei ona faaaoga ai i le King James Version o le Tusi Paia, ua faaliliuina mai le upu Eleni o le magoi. Magoi, ua masani ona taua o le magi i le faa-Peretania,o le mea moni lava ia e pogai mai i Peresia, ma e faasino i faitaulaga o lotu anamua faa-Peresia. O le faaaogaga la lea o le upu magoi, ua manatu ai nisi o sikola o le Au Makoi atonu o ni faitaulaga o se vaega faalelotu i Peresia. E ui o lea, na ta’ua e Elder Bruce R. McConkie (1915–85) o le Korama a Aposetolo e Toasefululua i lana Doctrinal New Testament Commentary [Saunoaga Faaleoaoga Faavae o le Feagaiga fou]: “O le manatu faapea o i latou o ni tagata o se vaega faalelotu faatuiese o le Au Makoi o Ala o Faasalalauga anamua ma Peresia atonu e le sa’o. Ae, e ono foliga mai o i latou o ni perofeta moni, o ni tamalii amiotonu e pei o Simeona, Ana, ma leoleo mamoe, ia na faaali i ai e le Atua ua fanau mai i tagata le Mesia na folafolaina.”⁴

O Sasa’e?

Pe o le Au Makoi e mai Sasa’e, e pei ona ta’ua ai i le pese o le Kerisimasi “O Tupu i Matou e Toatolu”?⁵ Soo se mea lava i sasa’e o Palesitina sa tulaga ese sa faasino lava i ai o le itu i Sasa’e. O le faaaogaina e Mataio o le itulagi lautele “o sasa’e” e mafai ona faigofie ai ona iloa faapea, e leai lava se tasi na ia mautinoaina po o fea na o mai ai le Au Makoi.⁶

Na ta’ua e nisi sikola le Salamo 72:10 e fai ma faamaoniga o nei tamalii na malaga mai le itulagi lea ua ta’ua i aso nei o Sepania, Itiopia, ma Saudi Arabia: “O tupu o Tasesa, ma nuu tu matafaga latou te avane meaalofa: o tupu o Seepa ma Sepa latou te ofoina atu meaalofa.” Ua talitonu isi o le Au Makoi e o mai i Peresia (lea ua ta’ua i ona po nei o Iran) ma atonu o ni Tagata Iutaia, talu ai sa toatele ni tagata e tupuga mai i Iutaia sa nonofo ai i lena itulagi i le taimi lea.⁷

O Anafea na Asiasi Ai le Au Makoi ia Iesu?

O ata o faiva alofilima o le Soifua mai o le Faaola o loo faaali mai ai le Au Makoi o loo ifo atu i se pepe meamea, e faapei e lei leva ona soifua mai le Faaola ae taunuu loa la latou asiasiga. Peitai, o loo faaalia mai i tusitusiga paia e le’i i ai le Au Makoi i le taimi na soifua mai ai Iesu i le falemanu po o se taimi o Lona pepe meamea. Na asiasi tonu lava le Au Makoi i le tamaitiiti o Iesu ma Lona tina, o Maria. “Ua latou ulufale atu i le fale, ua latou iloa ai le tama itiiti ma Maria lona tina, ona latou faapauu ai lea, ma ifo atu ia te ia: ona … latou avatu ai lea ia te ia o meaalofa, o le auro, ma le pulu lipano, ma le pulu muro” (Mataio 2:11).

O Meaalofa a le Au Makoi

Aisea na aumaia ai e le Au Makoi mo Iesu ia meaalofa tulaga ese? O le toatele lava o sikola ua ioe o meaalofa e faafaatusa. O le auro o le faatusa o le itu tautupu o Iesu, pulu lipano o Lona paia, ma le pulu muro o Ona mafatiaga ma le maliu, talu ai o le pulu muro o se mea sa faaaoga e faamanogi ai tino oti a o le’i tanuina.⁸

Lapataia e le Atua

Ina ua faatonuina e Herota le Au Makoi i Peteleema, sa ia fai atu ia te i latou, “O atu ia outou, ina matua saili ia i le tama itiiti; pe a outou iloa, ia outou faailoa mai ia te au, o a’u foi ou te alu atu ai e ifo atu ia te ia” (Mataio 2:8). E ui i lea, e tusa ai ma le faamatalaga a Mataio, o le Au Makoi na “faailoa atu ia te i latou e le Atua i se miti, e aua ne’i foi atu ia Herota,” o le mea lea, ina ua mae’a la latou asiasiga i le tama itiiti o Keriso, sa le’i toe foi atu le Au Makoi ia Herota a “ua latou o atu i lo latou nuu i le tasi ala” (Mataio 2:12). Sa matua ita tele Herota, e le gata ua le amana’iaina e le Au Makoi lana faatonuga, ae o lo ua i ai nei se tamaitiiti ua nofo i Peteleema o le a i ai se aso e pule ai i le atunuu.

I Le Feau a le Alii

O loo iloga ona aotele mai i le Lomifefiloi o le Tusi Paia o tatou talitonuga e uiga i le Au Makoi. “O i latou o ni tamalii amiotonu na auina atu i se feau e molimauina le i ai o le Alo o le Atua i luga o le fogaeleele. … E foliga mai o i latou o ni sui o se lala o le nuu o le Atua i se mea i le itu i sasa’e o Palesitina, o e na malaga mai, ma taitai mai e le Agaga, e vaavaai i le Alo o le Atua, ma toe taliu atu i lo latou nuu e tuuina atu se molimau e moni lava ua fanau mai le Tupu o Emanuelu i le tino.”⁹

Ata na Tusia e Paul Mann