Tapuai e ala i le Migao
O le migao e aofia ai le sili atu nai lo le leai o se pisa. O le migao e sau mai le loto e aofia ai le faalogo, mafaufau i mea a le Atua, ma le lagona faaaloalo, alofa, ma le faamamaluina o lo tatou Tama Faalelagi ma Lona Alo o Iesu Keriso.
O le fautuaga a Peresitene Tavita O. MaKei (1873–1970) lea e aumai ai le autu o le migao i se manatu manino: “O le migao o le faaaloalo tele lea e fefiloi ma le alofa.”1 O lenei manatu ua atili faatamaoaigaina i upu o le pese mai le Tusipese a Tamaiti:
O le faaaloalo e sili atu nai lo le nofonofo filemu.
O le mafaufau i le Tama o i luga,
O se lagona ou te maua pe a ou mafaufau i ana faamanuiaga
Ou te faaaloalo aua o le faaaloalo o le alofa lea.2
O upu autu e tele lava ina maua i tusitusiga paia o loo fesootai ma le migao o le faaaloalo, alofa, ma le ava. O le faaaogaina o nei tulaga faatonuina, e mafai ai ona tatou vaai ai o le faaaloalo e atagia mai ai gaoioiga o le loto, ae lē na o le lē faaaogaina o le gutu.
O le migao o se vaega taua o le tapuaiga. Sa aoao mai e Elder Dallin H. Oaks o le Korama a Aposetolo e Toasefululua:
“O le tapuaiga e tele ina aofia ai gaoioiga, ae o le tapuaiga moni e aofia ai se uiga faaalia faapitoa o le mafaufau.
“O le uiga faaalia o le tapuaiga e faaosofia ai i tatou i lagona loloto o le faatuatuaina, faaaloalogia, ma le maofa. O le tapuaiga e tuufaatasia ai le alofa ma le migao i se tulaga tuuto ma e aveina atu o tatou agaga ia latalata atu i le Atua.3
E moni lava o le faamoemoega autu mo le ulufale atu i se nofoaga o le tapuaiga o le faalatalata atu lea i le Atua.
Ao tatou suesue i le soifuaga ma aoaoga a Iesu Keriso ma mauaina se lagona talisapaia mo na aafiaga ofoofogia—i le faaletino ma le faavavau—o Lana Togiola i o tatou olaga, tatou te mauaina ia aafiaga ootia masani o le faaaloalo, alofa, ma le faamamaluina. Ona tafe mai lea o le usiusitai faale-talalelei ma auaunaga faaKerisiano e avea o ni uiga vaaia talafeagai o nei lagona ootia. Ae a aunoa ma le migao, ua le atoatoa uiga vaaia o le faaaloalo, alofa, ma le faamamaluina.
Ao tatou atiina ae le faaaloalo mo Iesu Keriso, ua sili atu le mafai ona tatou mamanuina o tatou olaga i Ana faataitaiga atoatoa. E tele vaega o nei ituaiga o le migao: o le faatuatua o loo soifua o Ia, faatuatua i Ana faamanuiaga folafolaina, ma le usitai i tulaga faatonuina o le talalelei. Peitai o se tasi o vaega sili ona taua tatou te lagonaina, o le faalogoga e i totonu o o tatou loto—le faaaloalo, alofa, ma le faamamaluina lea o le Atua. O i tatou o loo faaaloalo, alolofa, ma faamamaluina le Alii o le a le ta’uina fua lava Lona suafa ma o le a lē nofonofo lelei i tausuaga lē migao po o le lē ‘ano’ano e faia e uiga ia te Ia. Ae, tatou te viia ma migao i lo tatou Tama Faalelagi ma Lē o loo tatou tapuaia o lo tatou Alii ma lo tatou Faaola.
Na tuuina mai e le Alii ni faatonuga manino e faatatau i Ona faamoemoega mo le migao i le Levitiko 19:30, lea na Ia fetalai mai ai, “Ia outou tausiusi i ou sapati, ma ia migao i lo’u malumalu: o A’u o Ieova.” O le faaaloalo o loo tatou faaali atu mo Ona malumalu ma falelotu e atagia ai lo tatou migao mo Ia lea e lagonaina i totonu o o tatou loto. O le tulaga o lo tatou faaaloalo, alolofa ma le faamamaluina o le Alii e atagia tonu mai lava i lo tatou migao, e pei ona faaalia mai i o tatou uiga faapea foi ma o tatou tulaga lelei.
O Faamanuiaga o le Migao
Na tuuina mai e le Perofeta o Iosefa Samita se malamalamaaga manaia lava i le migao i lana tatalo i le faapaiaga o le Malumalu i Katelani i le 1836. Na tatalo Iosefa ina ia toe lilu mai ē ua salamo ma “toe fuataiina i faamanuiaga ua e faatonuina e liligi atu i e migao ia te oe i lou maota” (MFF 109:21). Sa faamamafaina i le tatalo a le Perofeta ia faamanuiaga o le migao: upu o le poto, o le atoatoaga o le Agaga Paia, fiafia mai le silafaga a le Alii, o le mana o le Atua, ma le faamagaloga (tagai i fuaiupu 14, 15, 21, 22, 34). E moni lava, o taui o le migao e matuai maoae lava!
O le tele lava o mea tatou te ta’u atua i le Ekalesia e uiga i le migao e masani lava ona taulai atu i le filemu i nofoaga o tapuaiga, ma le faamamafaina faapitoa i le filemu o tamaiti. E moni, o le ki autu o le migao o le filemu, ae o le uiga moni ma le atoa o le mataupu o le migao e aofia ai le sili atu nai lo le leai o se pisa ma le malomaloā. O le migao e le na o le leai o se pisa.
O o tatou falelotu o ni nofoaga muamua ma le taua tele lea e tatau ona tatou nonofo filemu ai ma manatunatu ai i le matagofie o le talalelei toefuataiina, ma saunia o tatou loto ma mafaufau mo le faamanatuga, ma mafaufau loloto ai i le mamalu o lo tatou Tama Faalelagi ma le mamana o le Togiola a le Faaola ao taina le musika i le taimi e lei amataina ai le sauniga. O fea se nofoaga sili e manatunatu ai i nei tulaga paia ma le matuai taua lava? O nei faaaliga o la tatou tapuaiga e masani lava ona faafeao mai e se uiga faaalia o le migao.
O nei avanoa o tapuaiga o ni vaega autu mo le faamalosia o lo tatou faatuatua ma e mafai ona avea o se alavai lea e tafe mai ai le agaga o le molimau ma faaaliga e agai mai i o tatou loto. O lenei mea na matuai faaalia manino mai lava ia te au i se tasi aso Sapati a o ou nofo ai i le taimi na tataina ai le musika a o lei amataina le sauniga faamanatuga. Sa ma sailia ma lou toalua ni faatonuga faaleagaga i se fesili faapitoa i o maua olaga. E faafetai ai, aua na oo mai le tali e ala i le viiga na filifilia e mua’i tataina. I le tali mai i le musika malie, na faailoa manino mai e le Agaga le auala talafeagai mo i maua. O le mea e faanoanoa ai, e lei mae’a le musika, ae na faalagolago mai se tagata na nofo i o’u autafa ma talanoa mai ia te au, ma na vave lava ona alu ese atu le Agaga. Na motusia vave se oa taua o faaaliga matagofie ona o le leai o se migao.
Mai lenei aafiaga na ou mauaina ai se lagona faafetai faapitoa mo le tulaga paia o se taimi filemu o lena musika na muai tataina. Sa faamamafaina lenei upumoni e Peresitene Boyd K. Packer o le Korama a Aposetolo e Toasefululua ina ua ia saunoa mai: “O le lē migao e fetaui lelei ma faamoemoega o le fili, e ala i le faaleagaina o fesootaiga maaleale o faaaliga i le mafaufau ma le agaga.”4
Fuafaatatau o le Migao
O fuafaatatau o le migao e le faigata. Nai lo le tuua o o tatou mafaufau e evaeva solo i mea masani o le lalolagi, e ao ona pulea lelei o tatou mafaufau i nofoaga ma taimi o le migao e mafaufau ai i mea a le Atua: o le mamalu o le Togiola, o aiga faavavau, o le Toefuataiga o le talalelei i lona atoatoaga. O fuafaatatau nei o le migao e aofia ai le pulea lelei o a tatou amio ia atagia ai ia uiga o le faaaloalo, alofa, ma le faamamaluina. E aofia ai le oofu ai i o tatou ofu talafeagai mananaia, aloese mai i tifiga o nei ona po, ma aloese mai le talanoa leotetele ma amioga faasoesa i totonu o falelotu o le Ekalesia. Ma pe a i ai i totonu o le falesa, e tatau ona tatou saili ia sili atu le “filemu”, aemaise lava i le taimi o le faapaiaina ma le tufatufaina o le faamanatuga.
O se naunautaiga mo se amioga faaaloalo o le a uunaia ai i tatou e fuafua mamao pe a fai ua tatou iloa e manaomia ona tuua le sauniga mo soo se mafuaaga lava, ma nonofo i le pito i tua e lata i le faitotoa ina ia mafai ona tatou o ese filemu. O le alu ese i le ogatotonu o se sauniga, aemaise i le taimi o se lauga po o se isi lava vaega o le sauniga, e faalavelave i le failauga ma i latou o loo nonofo i ou autafa. I le faaaloalo ai i isi faapea foi mo le Alii, e tatau ona tatou aloese mai le feoai i taimi e le talafeagai.
I le tele o taimi tatou te faatusaina le migao o le faalapotopotoga i amioga a tamaiti o loo auai. E moni, e mafai ona aumaia e tamaiti laiti se luitai faapitoa o le migao. Ae o le tulafono muamua lava e faatatau i tamaiti o le aumaia lea o i latou [i sauniga lotu]! E mafai ona aoaoina i latou, e mafai ona aveina i latou i fafo, ma e mafai foi ona toe aumai i latou i totonu o le sauniga. Ma i le aoaoina e sili le tuuitiitia le numera o mea faaleaoaoga e aumai i le lotu, e pei o meataalo masani ma meaai. O faalapotopotoga a le Au Paia o Aso e Gata Ai e masani lava ona faamanuiaina i le toatele o tamaiti ma le autalavou, ma e tatau ona tatou loto faafetai ai. O i latou o le lumanai o le Ekalesia.
O le migao o loo lagona i totonu o le loto o se vaega taua o la tatou tapuaiga i lo tatou Tama Faalelagi ma i le Alii. I a tatou gaoioiga uma ma manatu o o tatou olaga i aso taitasi, ia tatou aloese mai mea o loo atagia mai ai le leai o se migao mo i Laua. Ia tatou saili e faalautele ma faaleleia o tatou lagona o le faaaloalo, alofa, ma le faamamaluina o le Tama Faalelagi ma Lona Alo o Iesu Keriso i a tatou gaoioiga uma faaletapuaiga. O nei lagona o ni faailoga o se tagata Kerisiano moni.
Ata pue na tusia e Cary Henrie