O Anafea Foi Na Matou Iloa Ai Oe Ua Ma’i?
Araceli López Reséndiz, Veracruz, Mekisiko
Mai le 2003 i le 2005 sa avea a’u o se peresitene o Tamaitai Talavou i le Uarota o Gutiérrez Zamora, i Veracruz, Mekisiko. I Kerisimasi taitasi e taoina ai [keke po o pai] e tamaitai talavou ma o latou taitai e ave mo tagata matutua o la matou uarota.
Ina ua lata mai le Kerisimasi o le 2005, sa matou aoaoina le usuina o pesepesega o le Kerisimasi ma fai pulou mumu ma sikafu. I le taimi o le taumalulu e oo mai i lo matou nuu timuga laiti faifai pea ma le tele o matagi malulu mai le itu i matu. Peitai e lei taofia mai ai le tusa ma le toasefululua o alii ma tamaitai talavou mai le o atu ma uta o pai fala.
Ina ua matou taunuu atu i fale o o matou uso ma tuagane matutua, sa matou pepese ma le olioli tele. Sa matou tuua fale taitasi ma le lagona fiafia aua, e tusa lava pe ua na o sina minute, ae sa matou avatua le fiafia ia matou pesepesega ma pai.
O se uso mulimuli lava sa matou asia sa tele tausaga sa le toe auai mai ai [i sauniga lotu]. E ui lava sa leai se isi o le autalavou sa feiloai muamua ia Uanita, ae ua leva ona ma iloaina ma lo’u toalua o ia. Ua le toe mafai nei ona tuua lona moega, ua ma’i tigaina, ma ua matua mativa lava. I ni nai aso ua mavae, sa asia lona fale e le korama a le au toeaina e faalelei nisi o mea.
Ina ua matou taunuu atu i lona fale, sa ou valaauina lona igoa. Sa leai se isi na tali mai, o lea sa ou valaau ai pea. E lei pine ae ou faalogoina se leo malu o faapea mai, “Sau i totonu, Uso Araceli.” Sa matou ulufale atu ma pepese ma le fiafia ma le naunautai, e ui lava sa matou faanoanoa i lona tulaga. I se taimi e lei mamao atu, sa matuai tumu Uanita i le fiafia. I le taimi nei a o ia nofo mai i luga, sa le mafai e le autalavou ona taofia o latou loimata. Sa matua faagaeetia o ia ma faafetai mai ia i matou mo le asia o ia ma le fesoasoani atu ia te ia e lagonaina o loo manatua pea ma alofa le Tama Faalelagi ia te ia, e ala ia matou pesepesega.
Ina ua matou tuua lona tamai fale, sa faaalia mai e le autalavou le agaga faafetai mo le avanoa sa pepese ai mo ia. Sa latou le’i popole ina ua latou susu ma maalilili i le faaiuga; ae na faatumulia o latou loto i le olioli mo le faasoaina atu o sina vaega itiiti o le fiafia sa latou lagonaina. O iina sa ou malamalama atili ai i fuaiupu sa faitauina:
“Na ou ma’i, na outou asiasia mai lea o au. …
“… O anafea foi na matou iloa ai oe ua ma’i … ma matou o atu ai ia te oe?
“Ona tali atu ai lea o le Tupu, e faapea atu ia te i latou, E moni, ou te fai atu ia te outou, auā na faia e outou i le tasi o e aupito itiiti o ou uso nei, o au lea na outou faia i ai” (Mataio 25:36, 39–40).
Sa ou faanoanoa ina ua maliu Uanita i ni nai aso mulimuli ane, peitai ou te iloa e aunoa ma se masalosalo e alofa le Tama Faalelagi i Ana fanau. Ou te iloa foi pe afai tatou te mulimuli i le Agaga, e mafai ona avea i tatou ma meafaigaluega i Ona aao i le faamanuiaina o isi.