Saolotoga o Tapuaiga

O le saolotoga o tapuaiga o se mataupu faavae autu o Le Ekalesia a Iesu Keriso o le Au Paia o Aso e Gata Ai, ma o se aia tatau taua a le tagata. O le filifiliga saoloto, o le tomai e filifili ai le sa’o mai le sese ma galue ai mo i tatou lava ia, e taua i le ata o le faaolataga a le Atua. O le saolotoga o tapuaiga e faamautinoa ai e mafai e tagata ona faaaoga o latou faitalia i mataupu tau i le faatuatua.

Vaaiga Aoao

Fai mai le mataupu faavae o le faatuatua lona sefulutasi a le Ekalesia, “Matou te taʼutino atu ua ia i matou le aiā tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea lava aiā tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai.” O le saolotoga o tapuaiga e le gata ina taliaina le aia tatau e tapuai saoloto ai ae faapea foi ona tautala ma galue ai e faavae i talitonuga faalelotu a le tagata. I faaaliga i onaponei, ua ta’u mai ai e le Alii o tulafono tonu e tatau ona “tausia mo aiā tatau ma le puipuiga o tagata uma, … ina ia mafai e tagata taitoatasi ona faia … e tusa ma le faitalia ua Ou tuu atu ia te ia, ina ia mafai e tagata taitoatasi ona tali mo ana lava agasala i le aso o le faamasinoga” (Mataupu Faavae ma Feagaiga 101:77–78). E le mafai e malo ona “ola i le fīlemu, vagana ua faia ma faamalosia ituaiga tulafono e mautinoa ai le maua e tagata taitoatasi o le faaaoga saoloto o le mafaufaufuatiaifo” (Mataupu Faavae ma Feagaiga 134:2). O lea, ua fusia malo “e faia ni tulafono mo le puipuiga o tagatanuu uma i le faaaogaina saoloto o o latou talitonuga faalelotu” (Mataupu Faavae ma Feagaiga 134:7).

O le saolotoga o tapuaiga e malupuipuia ai le aia tatau o tagata uma ia i ai o latou talitonuga faalelotu ma faailoa atu faalauaitele e aunoa ma le fefe i sauaga po o le teenaina o aia tutusa o le avea ma tagatanuu. E faamautinoa ai e mafai e tagata ona saoloto e filifili pe sui a latou tapuaiga, aoao atu o latou faatuatuaga i a latou fanau, maua ma faasoa atu faamatalaga faalelotu, faapotopoto faatasi ma isi e tapuai, ma auai i sauniga ma faiga masani a le latou tapuaiga. E puipuia ai tagata mai le faailogatagata i mea tau tapuaiga i galuega, fale, ma isi auaunaga masani, ma taofia ai tagata mai le teenaina o le aia tatau e faia ai se pisinisi, galuega, po o se laisene faapolofesa e faavae i o latou tapuaiga.

O le saolotoga o tapuaiga e puipui ai e le gata i na’o tagata taitoatasi ae faapea foi i faalapotopotoga faalelotu ia mafai ai ona faia tauaofiaga faalelotu. E aofia ai le aia tatau e faatutu ai lotu ma isi aoaoga faalelotu, e pei o aoga a ekalesia ma faalapotopotoga o galuega alofa. E tuuina atu ai i faalapotopotoga faapena le saolotoga e faatulaga ai a latou aoaoga faavae ma faataitaiga o tapuaiga; e faatulaga ai a latou lava mataupu faale-ekalesia; e iloilo ai mea e manaomia e avea ai ma se tagata auai, tofi faale-ekalesia, ma galuega; ma ia anaina mea totino ma fatu ni malu tapuai. “Ua matou lē talitonu ua i ai i tulafono faaletagata se aiā e faalavelave ai i le faia o tulafono faaletapuaiga” pe ina ia “faatonu ai ala e fai ai tapuaiga faitele pe faaletagata lava ia” (Mataupu Faavae ma Feagaiga 134:4).

O le tele o nei mataupu faavae ua faaalia i le Uluai Teuteuga i le Faavae o le Iunaite Setete, lea o loo faapea mai ai, “Ia le faia e le Fono Faitulafono se tulafono e faaaloalogia ai se faavaega o tapuaiga, pe faasa ai le saolotoga e faatino ai.” E faapena foi ona iloa i pepa faamatalaga o aia tatau a tagata faavaomalo le tulaga aoao o le saolotoga o tapuaiga ma talitonuga. Fai mai le fuaiupu 18 o le Universal Declaration of Human Rights a Malo Aufaatasi: “Ua i ai i tagata uma le saolotoga o manatu, mafaufauga ma tapuaiga; o lenei aia tatau e aofia ai le saolotoga e suia ai lana tapuaiga faalelotu po o talitonuga, ma le saolotoga, pe tutoatasi pe aufaatasi ma nuu ma isi i nofoaga faitele pe faalilolilo, e faailoa atu ai lana tapuaiga po o talitonuga i le aoao atu, faataitaiga, tapuaiga ma le faamamaluina.”

O le saolotoga o tapuaiga e le faapea e le i ai ni ona tapulaa. O tapulaa o gaoioiga faalelotu e talafeagai i le mea e tatau ai e puipuia ai naunauga taua, e pei o le ola, meatotino, soifua maloloina, po o le saogalemu o isi. Ae o na faatapulaaga e tatau ona alagatatau moni, nai lo na’o se ‘alofaga mo le taotaomiaga o le saolotoga o tapuaiga. I tulaga e taofiofi ai e le tulafono le saolotoga o tapuaiga, e talitonu le Au Paia o Aso e Gata Ai i le usitaia o le tulafono a’o sailia le puipuiga mo o latou aia tatau faavae e ala i auala faatulafonoina e ono maua i itumalo po o atunuu taitasi.

E talitonu le Au Paia o Aso e Gata Ai i le puipuia o le saolotoga o tapuaiga a isi e pei lava foi o a latou lava. Na folafola mai e le Perofeta o Iosefa Samita, “Ua tutusa lava ma lo’u saunia ou te oti i le puipuia o aia tatau a se Peresipetiriane, o se Papatiso, po o se tagata lelei o soo se ituaiga lotu [e faapei foi o se Mamona]; mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau a le Katoliko Roma, po o soo se isi lava ekalesia o e atonu e le ta’uta’ua pe e vaivai tele foi e puipuia i latou lava” (History of the Church, 498–99 [discourse given by Joseph Smith on July 9, 1843, i le Nauvoo, Illinois; na lipotiaina e Willard Richards]).

Sa faavasegaina e le Au Paia o Aso e Gata Ai anamua lenei manatu i se folafolaga aloaia a le Aai o Navu e faamautinoa ai le faapalepale mo tapuaiga uma: “Ua faatulagaina nei i se ala aloaia e le Aufono a le Afioaga o le Aai o Navu, o Katoliko, Peresipetiriane, Metotisi, Papatiso, Au Paia o Aso e Gata Ai, Saluu, Episcopals, Universalists, Unitarians, Mohammedans [Mosalemi], ma isi vaega ma po o le a lava le aulotu, ia saoloto le faatagaina, ma maua avanoa tutusa i lenei aai” (Ordinance in Relation to Religious Societies, City of Nauvoo, Illinois, headquarters of The Church of Jesus Christ of Latter-day Saints, March 1, 1841).

Tusifaamaumau Ou Lagona Uunai