Potutusi
O Le Ekalesia Moni ma Ola e Tasi

“O Le Ekalesia Moni ma Ola e Tasi,” Autu ma Fesili (2023)

Ata
aulotu o loo lagiina viiga

Fesili i le Ekalesia ma le Talalelei

O Le Ekalesia Moni ma Ola e Tasi

O le sailia o tali i a tatou fesili e mafai ona tatou latalata atili ai ia Iesu Keriso pe afai tatou te faaaogaina mataupu faavae lelei. E taua le malamalama i le auala e maua ai faaaliga pe a sailia ni tali. Tagai i le autu “Ia Iloa o Faaaliga o se Faagasologa” e suesue ai nisi motugaafa i le taliina o fesili.

Vaaiga Aoao

Mai le amataga o le Toefuataiga o le talalelei e oo mai i le taimi nei, ua faamautu mai e taitai o le Ekalesia o tagata uma o fanau a le Atua. E alofa ma finagalo lo tatou Tama Faalelagi e faamanuia Ana fanau uma.

E le o faapea mai le Ekalesia a Iesu Keriso o le Au Paia o Aso e Gata Ai ua na o ia lava e maua ai le lelei ma le upumoni. E le mafaitaulia tagata i le lalolagi atoa o ni faataitaiga o le amiosa’o ma le agalelei. Ma o mataupu faavae moni ma lelei e mafai ona maua i lotu eseese ma faiga tau amiosao i le lalolagi atoa. Ua tofu i tatou ma le aia tatau e talitonu ai ma tapuai ai e pei ona taitaiina ai i tatou e o tatou lotofuatiaifo taitoatasi (tagai Mataupu Faavae o le Faatuatua 1:11).

I le taimi lava e tasi, ua i ai i Le Ekalesia a Iesu Keriso o le Au Paia o Aso e Gata Ai se tofiga tulaga ese mai le Atua e ofoina atu le atoatoaga o le talalelei a Iesu Keriso i le lalolagi. Sa tautino mai e le Alii lava ia o le Ekalesia “moni ma ola e tasi i luga o le fogaeleele atoa” (Mataupu Faavae ma Feagaiga 1:30). O le savali o le talalelei tatou te faasoa atu e aofia ai upumoni taua toefuataiina e le o maua i se isi lava mea e uiga i le Atua ma la tatou sootaga ma Ia. Ua i ai foi i le Ekalesia le pule o le perisitua mai le Atua e faatautaia ai sauniga lea tatou te ulu atu ai i se sootaga o le feagaiga ma Ia.

E talitonu ma molimau mai le Au Paia o Aso e Gata Ai o le ola ai i le talalelei toefuataiina e aumaia ai le olioli tumau, faamaloloina ai taunuuga o le agasala, ma saunia ai fanau a le Atua e toe ola i Lona afioaga.

Taiala e faatatau i le suesueina o le talalelei:

Suesueina o Au Fesili

O le a le vaaiga a Le Ekalesia a Iesu Keriso o le Au Paia o Aso e Gata Ai i isi tu ma aga faalelotu?

Matou te talitonu e musuia e le Atua tagata lelei o faatuatuaga ma talitonuga uma. I le 1978, na folafola mai ai e le Au Peresitene Sili o le Ekalesia: “O taitai faalelotu maoa’e o le lalolagi e pei o Mohammed, Confucius, ma le Au Toeiloilo, faapea foi le au faimanatu e aofia ai Socrates, Plato, ma isi, sa latou mauaina se vaega o le malamalama o le Atua. Na tuuina atu ia i latou upumoni tonu e le Atua e faamalamalama ai atunuu uma ma aumaia i se tulaga maualuga atu o le malamalama i tagata taitoatasi.” Tatou te auai faatasi ma tagata o le faatuatua ma le agalelei i le lalolagi atoa e faamalolosia nuu, tausia i latou e manaomia le fesoasoani, ma faia le galuega a le Atua i le lalolagi.

E faatauaina e le Au Paia o Aso e Gata Ai “soo se mea e mama, matagofie, pe logoleleia pe tauleleia” i isi lotu ma tu ma aga faalelotu a le lalolagi. Na aoao mai Peresitene Gordon B. Hinckley, “Tatou te fai atu… i se agaga o le alofa, aumai uma a outou mea e lelei ma mea moni sa outou maua mai soo se punavai, ma o mai sei vaai pe mafai ona matou faaopoopo atu i ai.”

O le a le uiga o le faaupuga, O Le Ekalesia a Iesu Keriso o le Au Paia o Aso e Gata Ai ua “na o le pau lea o le ekalesia moni ma ola?

O loo taialaina le Ekalesia e Iesu Keriso, o lē e faaali mai Lona finagalo i o tatou aso i perofeta soifua ma isi taitai musuia. O faaaliga faifai pea mai le Faaola e mafai ai ona ogatasi le Ekalesia ma le lagi ma tuputupu a’e ai foi ma alualu i luma—ia avea ma se ekalesia e moni ma ola. E tuputupu a’e ma suia meaola uma. E pei onaa saunoa Peresitene Russell M. Nelson: “O i tatou o molimau i se faagasologa o le toefuataiga. Afai e te manatu ua toefuatai mai atoatoa le Ekalesia, ua na o le amataga ua e vaaia. E tele nauā isi mea e oo mai.”

O le talalelei toefuataiina o loo maua i le Ekalesia a le Alii ua maua ai le malamalama ma le upumoni e le o maua i se isi lava mea. E maua ai e le tagata lava ia le mana faapaiaina o le Atua e ala i le Agaga Paia ma le faaolataga ma le faaeaga o le aiga o le Atua e ala i sauniga o le perisitua. I le Mataupu Faavae ma Feagaiga 1:30, na folafola mai ai e le Alii o Le Ekalesia a Iesu Keriso o le Au Paia o Aso e Gata Ai o “le ekalesia moni ma ola e tasi i luga o le lalolagi atoa, lea ua fiafia tele i ai A’u, o le Alii, i le tautala atu lea i le ekalesia atoa ae le i tagata taitoatasi.”

E tatau ona avea oe ma se tasi o Le Ekalesia a Iesu Keriso o le Au Paia o Aso e Gata Ai ina ia faaolaina?

I le avea ai ma tagata o Le Ekalesia a Iesu Keriso o le Au Paia o Aso e Gata Ai, matou te talitonu ua saunia e le Atua se ala mo Ana fanau uma e maua ai le faaolataga e ala i le Togiola a Lona Alo, o Iesu Keriso. O le a faaolaina tagata uma mai le oti e ala i le Toetu o Iesu Keriso. O se faaaliga mamalu na faaalia i le Perofeta o Iosefa Samita ua aoao atili mai ai e toetoe lava o fanau uma a le Atua o le a mautofi i se malo o le mamalu pe a mavae le Toetu.

O nei aoaoga ua faamautu ai le mana sili o lo tatou Atua e laveai ai ma Lona manao loloto e faia lena mea. Ua ofoina mai e le Atua ia i tatou mea uma ua Ia maua. Ae e tatau ona tatou filifili e talia nei faamanuiaga. Ina ia maua le faaeaga, le atoatoaga o le mamalu ua ofoina mai e le Atua, e tatau ona tatou osia feagaiga ma Ia, talia Iesu Keriso ma Lana talalelei, taumafai e ola e tusa ai ma aoaoga ma faataitaiga a Iesu, ma salamo ma le lotomaualalo i a tatou agasala pe a tatou le atoatoa. Ua i ai i le Ekalesia a Iesu Keriso o le Au Paia o Aso e Gata Ai le pule mai le Atua e ofoina atu ai feagaiga ma sauniga o le talalelei a Iesu Keriso lea e saunia ai i tatou mo le tikeri aupito maualuga o le mamalu i le malo selesitila o le Atua.

Ioe, o le toatele o fanau a le Atua i le talafaasolopito atoa o le lalolagi e lei avea lava ma tagata o le Ekalesia a Iesu Keriso. O le mea moni, o le to’atele o tagata na soifua i le lalolagi e le’i faalogo iā Iesu Keriso. Ae e le mafaitaulia tagata lelei—i vaitausaga uma, tapuaiga, ma aganuu a le lalolagi—o e faaalia le amioatua i o latou olaga. O le a maua e tagata taitoatasi se avanoa, i lenei olaga po o le isi, e aoaoina ai i le atoatoaga o le talalelei ma talia pe teena ona sauniga ma feagaiga (tagai Mataupu Faavae ma Feagaiga 138:30–35, 57–59).

Aisea e le talia ai e le Ekalesia papatisoga a isi Kerisiano?

E lei leva ona faatulagaina le Ekalesia a Iesu Keriso i le 1830, ae mafaufau tagata faamoemoeina o e na papatiso muamua pe manaomia ona toe papatisoina i latou i le Ekalesia fou ua toefuataiina. I le tali atu i ai, na faaali mai e le Alii e ala mai ia Iosefa Samita e tatau ona papatisoina e le pule o le perisitua lea na Ia toefuatai mai. E ui ina faamamaluina e le Ekalesia faamoemoega amiotonu o isi Kerisiano i o latou papatisoga ua mavae, ae tatou te mulimuli i lenei aoaoga i le aso.

Pe o i ai se “nuu filifilia” o le Atua?

O i tatou taitoatasi o se atalii po o se afafine faapelepele o le Atua. Ua aoao mai tusitusiga paia e osia e le Atua feagaiga ma Ana fanau e valaaulia ai i latou i se sootaga e faavavau ma Ia. Mai le Tusi Paia, ua tatou aoao ai na faatuina e le Atua Lana feagaiga ma Aperaamo, ma folafola atu e ala mai i le aiga o Aperaamo o le a faamanuiaina ai le lalolagi atoa (tagai Kenese 17:1–7; 22:17–18). Na faafouina lenei feagaiga ma le fanauga a Isaraelu, o e na tupuga mai ia Aperaamo (tagai Kenese 28:10–15). E ui lava sa malamalama tagata i taimi eseese i le talafaasolopito atoa i lenei feagaiga e faatapulaa i se gafa patino, ae na faaali mai e le Alii i Ana Aposetolo e faapea “e le faailoga tagata le Atua: a e peitai, o le mata’u ia te ia i nuu uma lava, ma fai le amiotonu, ua talia i latou e ia.”

O le Toefuataiga o le talalelei e ala mai ia Iosefa Samita o se faafouina lea o le feagaiga tumau-faavavau a le Atua i aso e gata ai. Soo se tasi lava e filifili e ulu atu i se feagaiga ma le Alii e ala i le pule tatau o se vaega o Lona nuu o le feagaiga. E pei ona fetalai atu le Atua ia Aperaamo, “O le toatele … e taliaina lenei Talalelei o le a … faitauina o au fanau.” O se taunuuga o le filifili e mulimuli ia Iesu Keriso, ua avea ai i latou “o se tupulaga ua filifilia outou, o tupu ma ositaulaga, o le nuu paia, ma le nuu na faatauina mai [faasaoina].”

O a manatu o le Ekalesia i le saolotoga o tapuaiga?

O le fuafuaga o le faaolataga a lo tatou Tama Faalelagi e faalagolago i lo tatou gafatia e filifili ai mo i tatou lava, ma avea ai le saolotoga faalelotu o se mataupu faavae autu o le talalelei a Iesu Keriso.

Ua faatauaina e le Au Paia o Aso e Gata Ai le saolotoga o tapuaiga talu mai le popofou o le Ekalesia. O le aafiaga o Iosefa Samita o se tagata na aafia fua i sauaga ma vevesi na aoaoina ai o ia e tu atu mo le saolotoga faalelotu, e le gata mo le Au Paia o Aso e Gata Ai ae mo tagata uma. Sa ia uunaia le Au Paia ina ia “[tuli ese] mai ia i tatou agaga uma o le faailogalanu ma le le faapalepale i lagona faalelotu o se tagata.” Sa ia aoao mai “o le aia tatau e le mavavaeeseina o le tagata o le mafaufau e pei ona ia fiafia i ai [ma] tapuai e pei ona ia manao ai” o le “tulafono muamua lea o mea uma e paia.”

Ua faamautu mai e taitai o le Ekalesia i aso nei le taua o le faatagaina o tagata uma e “tapuai pe faapefea, po o fea, po o le a foi le mea latou te tapuai atu i ai.” A o saunoa atu i tagata uma o le faatuatua, sa uunaia ai e Peresitene Dallin H. Oaks: “Faatasi ai ma le alofa ma le fefaaaloaloai ua aoao mai e poloaiga paia, e manaomia ai ona tatou sailia ni auala e aoao ai mai le tasi i le isi ma faamalolosia ai tautinoga masani ia e fusia faatasi ai i tatou ma faalauiloa ai sosaiete mautu eseese. E tatau ona tatou savavali faatasi i le ala o le saolotoga faalelotu mo tagata uma, a o faaaogaina pea lena saolotoga e tulitulimatagauina ai o tatou talitonuga tulaga ese.”

Aoao atili