Ia Iloa o Faaaliga o se Faagasologa

E faigofie ona vaai faalemafaufau faapea a finagalo le Atua e fesootai mai i se mea, e na ona Ia aapa atu lava i taitai o le Ekalesia e faailoa atu ia i latou. Ae o le talafaasolopito o le Toefuataiga ua faaalia ai o faaaliga o se faagasologa o le sailiga ia iloa le finagalo o le Atua ma e masani ona maua pe a uma ona mafaufau loloto ma aioi atu. E moni lenei mea mo perofeta ma mo i tatou taitoatasi. Ua uuna’ia i tatou uma e Peresitene Nelson ia, “faateleina lou tomai faaleagaga o i ai nei e maua ai faaaliga faaletagata lava ia.”¹

O ni nai mataupu faavae nei o le a fesoasoani ia te oe a o e suesue i le faailoaina mai o faaaliga, i le Ekalesia ma i lou lava olaga:

Manatua o faaaliga e masani lava ona amata i fesili. O le faataitaiga a Iosefa Samita o loo faaalia mai ai o lo tatou faitalia ma fesili faamaoni e i ai se matafaioi taua i le faagasologa o faaaliga. E toetoe lava o vaega uma o le Mataupu Faavae ma Feagaiga na oo mai o se tali i se fesili. Sa aoao e le Alii ia Iosefa e suesue i mea i lona mafaufau ma saili le agaga o faaaliga. O le faagasologa o le taulimaina o faafitauli, sailiga o le malamalama, faataitaia o tali eseese o loo i ai, ma le tatalo mo le taitaiga e saunia ai o tatou loto ma tatala ai o tatou mafaufau. E fesoasoani tatou te maua ai, malamalama, ma faatino e tusa ma faaaliga.
Ia iloa o faaaliga e oo mai i lea fuaitau i luga o lea fuaitau. “O i tatou o ni molimau i se faagasologa o le toefuataiga,” na saunoa mai ai Peresitene Russell M. Nelson. “Afai e te manatu ua toefuatai atoatoa mai le Ekalesia, ua na o le amataga o loo e vaaia.”² O se Ekalesia ola lenei. E ui o upumoni taua o le talalelei e lē masuia, ae o aiaiga faavae a le Ekalesia, polokalama, faalapotopotoga, ma aoaoga ua faaalia mai i lea fuaiupu i luga o lea fuaiupu i le aluga o masina, tausaga, ma le fia o tausaga. Ma o loo faaauau pea le faagasologa. E le mafai ona tatou vaaia i taimi uma le iuga mai le amataga, ae e mafai ona tatou talitonu o le a faaauau pea ona galulue le Alii ma Ana fanau e aumaia ia i latou le malamalama sili atu.
Manatua e fetalai mai le Atua ia i tatou e tusa ai ma lo tatou malamalama. O tagata soifua uma ua mamanuina i aganuu: o talitonuga, agaifanua, gagana, ma tulaga faatauaina tatou te faasoa atu. E matuā eseese lava aganuu mai lea nofoaga i lea nofoaga ma le āluga o taimi. O le naunautaiga o le Atua e tuuina mai faaaliga lea e fetalai mai ia i tatou i totonu o a tatou aganuu ma e tusa ai ma lo tatou malamalama o se upumoni matagofie o le Toefuataiga. O le manatuaina o lenei mea e mafai ona fesoasoani tatou te o atu ai i tusitusiga paia ma upu a perofeta ua mavae ma le lotomaualalo. Na fetalai atu le Atua ia Isaraelu anamua e tusa ai ma lo latou malamalamaaga anamua e lata i Sasae. Sa Ia fetalai atu ia Iosefa Samita e faaaoga ai faatusa ma le gagana mai lana aganuu faa-Amerika o le 1800. Ma e fesootai mai le Atua ia i tatou i aso nei e tusa ai ma lo tatou lava gafatia faatapulaaina i auala e mafai ona tatou malamalama ai.
Ia faamaoni ma talitonu. E masani ona tautino mai Le Au Paia o Aso e Gata Ai ‟Ou te iloa” pe a latou faasoa mai a latou molimau. O nei faailoaga mai le loto e faamatala ai aafiaga faaleagaga patino e maua e ala i le suesueina ma le ola ai i le talalelei. Ae tatou te savavali uma lava i le faatuatua i lenei olaga. Ua na ona fetalai mai lava o Iesu Keriso ia tatou amata e ala i le talitonu. E le afaina pe afai o i ai ni ou lē mautonu. E le afaina pe afai na o le pau le mea o ia te oe i le taimi nei o le manao e talitonu. E pei o le tamā na ole atu ia Iesu e faamalolo lona atalii e mafai ona e fai atu, ‟Le Alii e, ua ou faatuatua; ia e fesoasoani mai i lo’u le talitonu.”³
Manatua o mea lelei uma e mai le Atua. Ina ua faaali mai le agelu o Moronae ia Iosefa Samita, sa ia taulotoina le valoaga a Ioelu e faapea o le a liligi mai e le Alii Lona Agaga i luga o tagata uma i aso e gata ai.⁴ E ui e tele mea leaga i le lalolagi, ae ua faatumulia foi i le lelei ma le upumoni. E aofia ai le alualu i luma i le saienisi ma vailaau faafomai ma taumafaiga e faateleina ai le faaaloalo mo tagata uma. Ua aoao mai taitai o le Ekalesia e faapea e fetalai mai le Atua i tagata taitoatasi i aganuu uma. E pei lava ona tatou valaaulia isi e auai faatasi ma i tatou ma ‟aumai faatasi ma outou mea lelei uma ua ia te outou,” tatou te opomauina le upumoni i soo se mea tatou te mauaina ai.⁵
Ia iloa o le mauaina o faaaliga e mafai ona avea o se tauiviga. E ui o tali i a tatou fesili o nisi taimi e vave ma faigofie ona oo mai, ae o faaaliga e mafai foi ona tele ni tausaga o galuega. O lo tatou tulaga i le olaga e mafai foi ona mafua ai ona tatou tauivi pe a tatou sailia faaaliga faaletagata lava ia. Mo se faataitaiga, o nisi tagata e oo i ai ma’i e pei o le atuatuvale lea e atili faigata ai ona lagona le latalata atu i le Atua. E mafai ona tatou faia la tatou vaega e taulima ai nei luitau a o faaauau pea ona talitonu o le a fesoasoani mai le Alii ia i tatou ia maua le filemu. E le faapea ua e lē mauaina ni tali mai le Atua ona faapea lea o loo e faia se mea sese. Ia onosai ma atiina a’e lou faatuatua a o e faatalitali i le Alii.
Faaauau pea ona saili faaaliga. A o e saili mo le filemu e faatatau i au fesili, ia faaauau pea ona fai mea faavae masani: tatalo, suesue i tusitusiga paia, ai ma inu i le faamanatuga, taumafai e tausi poloaiga, ma tapuai i le malumalu. E le gata i lea, e mafai ona e sailia le latalata atu i le Alii e ala i le auauna atu i isi i lou aiga, faapotopotoga, po o le nuu; e ala i le faaaluina o le taimi i le natura; po o le mafaufau loloto i mea faaleagaga. O le faalatalata atili atu i le Atua o le a fesoasoani e faamautinoa ai o loo tumau pea ona matala auala o faaaliga.

Mau autu: Iakopo 1:5–6; 2 Nifae 28:30; 31:3; Alema 5:45–47; Mataupu Faavae ma Feagaiga 1:24; 88:63