Faatotonugalemu Lou Olaga ia Iesu Keriso

O le faatuatua ia Iesu Keriso e taua tele i lo tatou sailia o tali i fesili aupito sili ona faigata o le olaga. E masani ona tatou mafaufau i le faatuatua o se talitonuga malosi. Ae o le faatuatua e sili atu nai lo na o le talitonu. E aofia ai le faatuatuaina, mautinoa, ma le faamaoni. Pe a i ai ni a tatou fesili po o atugaluga luitauina, e mafai lava ona tatou liliu atu ia Iesu Keriso i taimi uma. O le a tuputupu a’e lo tatou faatuatua pe a tatou faalogo i Ana afioga, mulimuli i Ana aoaoga, ma taumafai e alofa atu i isi i le ala na Ia alofa mai ai.

Na aoao mai Peresitene Russell M. Nelson e faapea ‟e mafai ona oo mai le filemu i lou agaga a o e fausia le faatuatua i le Alii o le Filemu.”¹ O nisi nei o mea ia manatua:

O Iesu Keriso o le faavae mautinoa lea mo lo tatou faatuatua. I o tatou olaga i aso taitasi, tatou te tuu atu ai lo tatou faatuatua i le tele o tagata ma faalapotopotoga. E aofia ai tagata o aiga, uo, malo, ma pule o galuega. Ae o Iesu Keriso ua na o le pau lea o le tagata e mafai ona tatou faatuatuaina atoatoa ma lo tatou faamoemoe mo le filemu ma le faaolataga. Sa faatuina le Ekalesia e aumai ai tagata ia te Ia. E mafai ona e faatuatuaina atoatoa Iesu Keriso, e tusa lava pe o e tauivi ma isi vaega o lou faatuatua.
Ua i ai ia Iesu Keriso le loto malamalama atoatoa. O o tatou tofotofoga e sili ona faigata e mafai ona aumaia ai i tatou e latalata atili atu i le Faaola. E leai se tasi ua na o Keriso e mafai ona malamalama atoatoa i o tatou tauiviga. Sa tagi o Ia faatasi ma i latou sa Ia auauna atu i ai. Sa oo o Ia i le tuuatoatasi, tiga o le agaga, ma e oo lava i le aveesea mai o le mafutaga ma Lona Tama. E mafai ona e liliu atu ia te Ia ma maua le malamalama ma le agaalofa.
O le ata o le faaolataga a le Atua e maua ai se vaaiga. O le tele o a tatou fesili e foliga eseese pe a tatou vaai atu pea i le fuafuaga a le Tama Faalelagi . ‟Ona o lo tatou malamalama i lenei fuafuaga,” na aoao mai ai Peresitene Dallin H. Oaks, ‟tatou te amata ai i ni mafaufauga e ese mai nai lo i latou e le tutusa o tatou malamalama. O le taunuuga, tatou te oo i ni faaiuga eseese i le tele o mataupu tāua.”² O le iloiloina o a tatou fesili faatasi ai ma se vaaiga i le ata o le faaolataga e mafai ona fesoasoani tatou te iloa ai o tatou atugaluga ma se vaaiga e faavavau.
O loo i ai fesili autu ma ni fesili e mulimuli mai ai. O nisi taimi e i ai a tatou fesili po o atugaluga e faatatau i mea na tutupu i le talafaasolopito, aoaoga ma aiaiga faavae a le Ekalesia, po o toilalo faaletagata. O le mauaina o le filemu i na fesili e manaomia ai la tatou taumafaiga faamaoni. Ae e taua le iloa o le eseesega o upumoni autu o le talalelei mai mea e le tāua tele. Sa aoao mai Iosefa Samita e faapea “o isi mea uma ua na o ni faaopoopoga” i upumoni o loo siomia ai le misiona laveai a le Faaola.³
Filifili le faatuatua. O le mauaina o le malamalama faaleagaga e manaomia ai lo ‟tatou savavali i le faatuatua, ae le o le vaai.”⁴ Afai tatou te faatalitali seia tatou maua se faamaoniga faaletino o mea faaleagaga, o le a tatou le amataina lava le faagasologa o le atiina a’e o le faatuatua ia Iesu Keriso. Na aoao mai Elder Dale G. Renlund, ‟Mo le faatuatua ia tuputupu a’e ai, e tatau i se tagata ona filifili ia maua le faatuatua. E tatau i le tagata ona manao ia maua le faatuatua. E tatau i le tagata ona galue i le faatuatua.”⁵
Pipiimau i mea ua e iloaina. Pe a e lagonaina le lē mautinoa o lou faatuatua, ‟pipiimau i mea ua uma ona e iloa,” na fautua mai ai Elder Jeffrey R. Holland, ‟ma tu malosi seia oo mai se malamalama faaopoopo.”⁶ Faalagolago i ou aafiaga faaleagaga ua tuanai. O ni faamaoniga ia e tauia e le Atua lou faatuatua ia Iesu Keriso i se faamautinoaga faaleagaga.

Mau autu: Roma 8:35, 37–39; 2 Nifae 4:34–35; Mosaea 4:9; Helamana 5:12