Galue ia Malamalama i le Taimi ua Tuanai

O le suesueina o le talafaasolopito o le Ekalesia e mafai ona fesoasoani ia i tatou e vaai ai i le aao o le Atua i olaga o Ana fanau. E tamaoaiga i tala o le faatuatua, lototele, ma le agalelei o Au Paia o Aso e Gata Ai i le taimi ua tuanai. I nisi o taimi, e faaalia ai foi o latou vaivaiga faaletagata ma atagia mai ai faigata e feagai ma i tatou uma lava a o tatou taumafai e mulimuli ia Iesu Keriso. O le fetaia’i ai ma faigata o le talafaasolopito o le Ekalesia po o le aoao e uiga i mea i le taimi ua tuanai ia e lē fetaui ma o tatou faamoemoega e mafai ona luitauina ai lo tatou faatuatua.

E eseese uma lava le tali atu a i tatou taitoatasi i faamatalaga fou e uiga i le talafaasolopito. O fesili e le fiafia ai se tagata se toatasi e ono faamalosia ai se isi tagata. Tatou te aumaia uma lava ni mafaufauga eseese, faamoemoega, aafiaga o le olaga, ma le malamalama i la tatou sailiga mo le malamalama. O le faaaogaina o mataupu faavae nei a o tatou suesue i le talafaasolopito e mafai ona fesoasoani tatou te iloa manino atili ai ma aoga mea ua tuanai:

Ia iloa tapulaa o lo tatou malamalama. O talafaasolopito o faauigaga ia o mea ua tuanai e fua i punāvai faatapulaa o loo totoe. E tele mea e mafai ona tatou tautatala atu ai ma le mautinoa e uiga i le taimi ua tuanai. Ae e tele mea tatou te matuā lē iloaina lava. Ma o faamatalaga o loo ia i tatou e toetoe lava o taimi uma e mafai ai ona sili atu ma le tasi le faauigaga. Pe a tatou tumau i le lotomaualalo e uiga i mea tatou te manatu ua tatou iloa, o le a sili ona tatou gauai atu i ni faamatalaga fou a o faaalia mai nisi punaoa. Manatua o nisi taimi e tatau ai ona tatou ola faatasi ma le lē mautinoa po o le lē mautonu, e oo lava i fesili e foliga tāua.
Faamoemoe e i ai suiga. A tatou suesue i le taimi ua tuanai, o nisi taimi tatou te iloa ai o faatinoga, aoaoga, ma auala sa tatou manatu e le suia a o lea lava ua i ai ni nai suiga. O mataupu faavae autu o le talalelei e faavavau, ae o auala ua malamalama ai ma faaalia i le aluga o taimi e atagia mai ai le natura o faaaliga o le fuaitau i luga o lea fuaitau ma le suiga faifai pea o le aganuu faaletagata. O le mataupu faavae o faaaliga faifai pea e fesoasoani ia i tatou e faatautaia nei suiga. Atonu e te iloaina o le aoao atili e uiga i le tele o mea ua suia e faigofie ai ona iloatino mea o loo tumau pea.
Tuu mea i le matalalaga. Na faapea mai se tasi, “O le taimi uma tuanai o se atunuu e mamao, e ese foi le faiga o a latou mea i o.”¹ Sa eseese manatu o tagata i aso ua mavae e uiga i le lalolagi nai lo i tatou. Sa latou faaaogaina ata ma upu eseese e faamatala ai lo latou aafiaga. Afai tatou te mananao ia malamalama atili i upu ma faatinoga a i latou i le taimi ua tuanai, e manaomia foi ona tatou malamalama i le aganuu ma le talaaga na latou tutupu ai. E le faapea la e le mafai ona tatou teenaina mea e uiga i aganuu ua mavae. O le mea moni, o loo i ai nisi o mea mai le taimi ua tuanai ua valaau mai le talalelei ia i tatou e teena. Ae o le malamalama i le talaaga faasolopito e fesoasoani e taofia ai i tatou mai le tuuina atu o o tatou manatu i le taimi nei i tagata o le taimi ua tuanai i se auala e taofia ai le malamalama.
Manatua e faia e tagata soifua ni mea sese. Pe a tatou faamatalaina tala mai le talafaasolopito o le Ekalesia, e matele ina tatou taulai atu i faatinoga lototoa ma faaiuga fiafia. E lelei le manatua o tagata i o latou taimi na faia ai ni mea sili ona lelei. Ae o nisi taimi e galo ai ia i tatou o Au Paia o Aso e Gata Ai i taimi ua tuanai, e aofia ai uluai taitai o le Ekalesia, o ni tagata soifua. E i ai vaivaiga o tagata soifua. Latou te faia ni mea sese. E agasala i latou. Ia manatua e faaaoga e le Atua tagata e lē atoatoa e faataunuu ai Lana galuega. E mafai ona tatou aoao mai e le gata i a latou saofaga ae faapena foi o latou sese. Ma e ui e lelei le vaai sao atu i vaega luitauina o le talafaasolopito o le Ekalesia, aua le taulai atu i ai i se auala e punitia ai lou iloa atu o le lelei ma le matagofie.
Vaavaai mo faauigaga e masalomia. E le o faauigaga uma o mea na tutupu i le taimi ua tuanai e tutusa le aoga. E tele faamatalaga e fai e tagata e uiga i le talafaasolopito o le Ekalesia, o tala e lelei faapea foi tala tetee, ua le ausia ai tulaga faatonuina mo le sa’o atoa, faatuatuaina, ma le lē faaitū’au. E faapitoa le moni o lenei mea i se vaitau e mafai ai e soo se tasi ona lolomi o latou manatu i le na’o le kiliki o se ki. Na faatonuina i tatou e le Alii e saili le poto ‟mai tusi sili ona lelei.”² I le avea ai ma se tagata a’oga o le talafaasolopito o le Ekalesia, e mafai ona e faaaogaina uma meafaigaluega faaleatamai ma le meaalofa o le Agaga Paia.

Mau autu: 1 Nifae 11:17; Mataupu Faavae ma Feagaiga 88:118