O Le Faatomuaga

A oo atu se uso o le Au Paia o Aso e Gata Ai ia te oe ma ni fesili po o ni atugaluga e uiga i lo latou faatuatua, mafaufau i ai o se avanoa paia. Ua ia te oe se avanoa e faaloloto ai lou sootaga ma i latou ma auauna atu ai i o latou manaoga. E le manaomia ona i ai ni au tali ia latou fesili uma. Tau lava o lou naunautaiga e alofa, faalogo, ma fesoasoani.

O nisi e i ai a latou fesili po o atugaluga ae tumau pea le malolosi i le Ekalesia ma maua le olioli i le talalelei. O isi ua faataumamao ese mai i latou lava mai le Ekalesia mo ni mafuaaga eseese. O nisi e i’u lava ina toe foi mai ma toaaga atoatoa. O le toatele ua faia se faagasologa o le toefausiaina o lo latou faatuatua, ma le taunuuga ua avea ai le faatuatua ma le toe toaaga mai o se mea ua ese le uiga ia i latou. O isi ua sili atu ona o ese tumau mai le Ekalesia, e ui atonu latou te filifili e faatumauina ni fesootaiga vavalalata ma aiga ma uo o ē o loo tumau pea o ni tagata auai toaaga.

Po o a lava a latou filifiliga, e mafai lava ona tumau pea lau sootaga o se faatosinaga mo le lelei i o latou olaga. E mafai e se uo faamaoni po o se tagata o le aiga ona auauna atu o se faailoilo taiala pe a latou sailia se auala e toe foi mai ai i se olaga o le faatuatua ma malosi i le Ekalesia. O tusitusiga i lenei vaega ua talanoaina ai mataupu faavae taiala mo oe a o e auauna atu ma le alofa ia i latou o ē o loo i ai fesili e uiga i le Ekalesia.