Faatuatua i le Alii

A oo mai uo ma e pele ia i tatou ma popolega e uiga i lo latou faatuatuaga, o la tatou tali muamua lava atonu o le popole po o le atuatuvale foi. O o latou atugaluga e ono taitai atu ai oe e fai atu ni fesili faigata: ‟O le a le uiga o lenei mea mo lo’u aiga?” ‟Pe na ou faia se mea sese?”

Pe a fesiligia e se tasi e latalata atu ia te oe o latou talitonuga, e le faapea ai ua e faatoilaloina i latou. O mafuaaga mo o latou atugaluga atonu e faigata. E tatau ona tatou faia mea tatou te mafaia e fesoasoani ai ia i latou, ae e tatau foi ona tatou faatuatua i le Tama Faalelagi ma Iesu Keriso. E alolofa i La’ua ia i latou e i ai fesili. O ni nai mea nei e mafai ona e faia e faatumau ai le filemu i lou loto ma lou mafaufau a o e lagolago atu i isi:

Talitonu o loo silafia e le Atua. E finagalo le Alii i le tuputupu a’e ma le fiafia o tagata soifua uma. Na te uunaia a tatou fesili faamaoni. E silafia e Ia o tatou tauiviga ma e tutulu foi mo o tatou mafatiaga. O le a faaauau pea ona Ia tuuina atu le alofa ma le fesoasoani i tagata o loo tauivi pe laa ese mai le Ekalesia.
Valaaulia le Alii i le faagasologa. E oo lava i punaoa sili ona lelei ma sāvali e sili ona mafaufauina ma le toto’a e mafai ona lē aoga pe afai e sese le taimi po o le leo. Tatalo ia fesoasoani le Alii ia te oe e auauna atu. E mafai ona fesoasoani le Agaga ia te oe ia malamalama i manaoga fitoitonu o se tagata ma iloa le taimi e nonofo faatasi ai ma faalogo i ai nai lo o le tautala pe aoao atu. E mafai foi ona fesoasoani ia te oe e filimaoti ai pe faapefea ae o le a foi le taimi e faasoa atu ai lau molimau pe valaaulia i latou e faia ni laasaga e latalata atili atu ai i le Atua.
Talia se vaaiga umi atu. O le faatuatua ma lagona o se tagata e uiga i le Atua e masani ona suia i le āluga o taimi. Ma o le a manaomia pea e i tatou uma ona aoao ma tuputupu a’e mo se taimi umi pe a mavae ona tatou pasi atu i le isi olaga. E mafai ona e maua le faamoemoe pe a e vaai i tauiviga a se tasi e pele ia te oe ma lenei vaaiga lautele. Faaauau pea ona toto ma le onosai ia fatu, ma le iloa o le taimi o le seleselega o loo i aao o le Atua.
Saili le faamoemoe i lou malamalama i le natura o le Atua. O la tatou vaaiga i lenei olaga e tapulaa. Ua tatou iloa o le Atua e atamai, onosai, ma agaalofa. Na Ia tuuina mai ia i tatou taitoatasi lo tatou faitalia. Sa Ia silafia o le a tofu i tatou uma ma luitau ma tofotofoga. Ma sa Ia saunia se Faaola o loo i ai le mana e toe tata’i atu ai i tatou ia te Ia.

Mau autu: Faataoto 3:5–6; Isaia 55:8–9; 2 Timoteo 1:7–8; Alema 26:11–12