Faalogo ma le Lotomaualalo

Na manatua e Elder Jeffrey R. Holland, ‟sa ta‘u mai e [Peresitene Russell M. Nelson] ia te a’u e faapea o se tasi o uluai tulafono o fesili faafomai o le ‘Fesili atu i le tagata ma’i po o fea e tiga. O le tagata ma‘i,’ sa ia fai mai ai, ‘o le a avea ma ou taiala sili ona lelei i se suesuega sa’o ma se fofo o le gasegase.’”¹ Pe a aapa atu se uo po o se tagata o le aiga ia te oe ma ni fesili faigata po o ni atugaluga e uiga i le Ekalesia, faaalu se taimi e faalogo ai. O loo latou aapa atu ia te oe ona latou te faatuatuaina oe. Ia e taui atu lo latou faatuatuaina o oe e ala i le saili muamua ia malamalama i o latou manaoga.

O le faalogo ma le lotomaualalo e faigata ona fai. E manaomia ai le taula’i atu ma le onosai. Ae o se tomai foi e mafai ona tatou aoaoina. O le faalogo lelei ma le mataalia ma le faia o se fesootaiga faamaoni e mafai ona faamaloloina ai se tasi o loo faasoaina atu se faafitauli maaleale po o se fesili. Faataitai nisi o auala nei e faalogo ai ina ia mafai ona e faalogo lelei ai ma malamalama i ē pele ia te oe:

Saili muamua ina ia malamalama. E masani ona tatou manatu ua tatou iloa le auala e foia ai popolega o isi. Tatou te mananao e tau ina tali a latou fesili ma faapea atu ia i latou e aua le popole. O lenei uunaiga e tele ina faatotonugalemu ia i tatou lava ae le o ō latou manaoga. Faaalu se taimi e faalogologo ai i le tala i le ala na latou taunuu ai i le mea ua latou i ai i le asō. Ia mautinoa ua e malamalama i a latou fesili. Faaali atu le faaaloalo pe afai e te iloa e feteenai o latou manatu ma ou lava manatu. Aloese mai le faitioina o i latou po o le faia o ni tuuaiga. A vave ona tatou ofoina atu se tali faigofie, atonu latou te lagonaina e pei ua tatou faaitiitia lo latou aafiaga. O le vaega sili e amata ai o le saili ia malamalama i o latou manatu nai lo o le taumafai e sui.
Faailoa le aloaia o lo latou aafiaga. E ui atonu tatou te le malamalama pe ioeina popolega o se isi tagata, e mafai ona tatou faailoa atu lo latou faamaoni ma le tiga atonu o loo latou lagonaina. I se taumafaiga e faaali atu le agaalofa, o nisi taimi tatou te maua ai faatusatusaga i le va o o latou aafiaga ma o tatou lava aafiaga. E taua le manatua e eseese aafiaga o tagata uma. Atonu e sili atu le fai atu o se tala faapenei, ‟E le mafai ona ou vaai faalemafaufau i ou lagona” po o le ‟Fesoasoani mai ia ou malamalama.”
Aloese mai le manatu faatauvaa po o le faamasinosino. E oo atu i le taimi ua filifili ai se uo po o se tasi e pele e talanoa atu ia te oe e uiga i a latou fesili, atonu ua mae’a ona latou faaaluina se taimi paganoa e suesue ma mafaufau ai. Ia faaeteete ia aua nei tapunia le talanoaga e ala i le faate’aeseina o a latou fesili po o le faia o ni faamasinoga. Atonu e faatiga lenei mea ia i latou ma lou tomai e fesoasoani ai. O a latou fesili faamaoni e manaomia ai lau taumafaiga faamaoni e faalogo.
Ia pulea lelei ou lagona. O se mea masani le lagona o le atuatuvale po o le popole pe a faalatalata atu se tasi e pele ia te oe ma ni fesili e uiga i lo latou faatuatua. Taumafai e aua nei faatagaina nei lagona e faalavelave i se talanoaga aoga. Afai e te lagona le ita, atonu e sili lou fesili atu pe mafai ona e faia se malologa ona toe faaauau ai lea i le talanoaga i se taimi mulimuli ane. Na fautuaina i tatou e le Faaola ia aloese mai finauga ma le ita.² E mafai ona tatou aoao e lē ioe e aunoa ma lo tatou lē ioeina.³
Fai ni fesili-tatala e lē tasi se tali. O fesili-tatala e uunaia ai isi e faasoa mai o latou manatu, lagona, ma aafiaga. E le faapea e tatau ona i ai sa latou tali sa’o pe sese. Mo se faataitaiga: “E mafai ona e faamatala maia nisi mea?” ‟O le a sou lagona i lena mea?” ‟E mafai ona e fesoasoani mai ia te a’u ia ou malamalama?” ‟O le a se mea e mafai ona ou faia e fesoasoani atu ai?” O le faia o fesili lelei e faaalia ai e te popole ma o le a fesoasoani ia te oe e aloese ai mai le lē malamalama.
Faailoa atu ou tapulaa. E i ai se avanoa lelei atonu sa suesue lautele ai uo ma e pele e o mai ia te oe e uiga i a latou fesili nai lo oe. E le afaina pe afai e te le’i saunia i ni tali pe o le taimi muamua foi lenei ua e iloa ai e uiga i se mea. Aua le fefe e fai atu ni fesili e faamanino ai se mea e te le’i malamalama ai. Atonu e te le ioe i a latou faaiuga uma, ae taumafai e ioe i mea e mafai ona e ioe i ai e aunoa ma le faasesē o ou lava lagona. E mafai foi ona e fesili atu mo se taimi e suesue ai e oe lava ia le autu ona faaauau ai lea o le talanoaga pe a i ai nisi au faamatalaga.

Mau autu: Efeso 4:29; Mosaea 18:21; 3 Nifae 11:29