Mataupu Faavae mo le Auaunaga

Atiinaeina o le Tiga Alofa e Auauna Ai

O le Auaunaga o le siitiaina. E mafai ona tatou siitia ae isi a o tatou taumafai e malamalama i mea o loo latou aafia ai ma faailoa atu lo tatou naunautai e savavali faatasi ai ma i latou.

Ona o le finagalo o lo tatou Tama Faalelagi e fesoasoani ia i tatou e avea faapei o Ia, o luitau e feagai ma i tatou i lenei olaga e avea ma avanoa aoaoina pe a tatou talitonu ia te Ia ma tutumau i le ala. O le mea e leaga ai, e mafai ona faigata lava le tutumau ai i le ala pe afai tatou te lagona e faapei ua tatou feagai ma ia tofotofoga e na o i tatou lava.

Ae, sa tatou le i fuafuaina lava e savavali i le ala na o i tatou lava. Sa i ai i le Faaola le tiga alofa atoatoa, ma afio ifo i lalo o mea uma ina ia silafia e Ia le ala e tausia ai i tatou mai o tatou puapuaga ma vaivaiga (tagai Alema 7:11–12; Mataupu Faavae ma Feagaiga 122:8). Ua Ia finagalo mo i tatou taitasi e mulimuli i Lana faataitaiga ma e faailoa atu foi le tiga alofa. O tagata uma o le Ekalesia ua osifeagaiga e “faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga” (Mosaea 18:9) E ui lava i o tatou luitau, ua aoaoina i tatou mai tusitusiga paia e liliu agai atu i fafo ma “siitia ia lima ua gagase, ma [faamalolosi] i tulivae ua vaivai” ma ia “faia ala laulelei mo o outou vae, nei mapeva le vae ma ui ese ai mai le ala” (Eperu 12:12–13; tagai foi Isaia 35:3–4; Mataupu Faavae ma Feagaiga 81:5–6).

A o tatou taitai i lima o isi, ia latou faalagolago mai ia i tatou, ma savavali ma i latou, tatou te fesoasoani ina ia latou tutumau ai i le ala e oo i le taimi e le gata e faaliliu mai ai e le Faaola—o se tasi o faamoemoega autu o le auaunaga—ae ia faamaloloina foi i latou (tagai Mataupu Faavae ma Feagaiga 112:13).

O le a le Tiga Alofa?

O le tiga alofa o le malamalama o lagona o le isi tagata, mafaufauga, ma tulaga mai lo latou silafia ae le o i tatou lava.¹

E taua le tiga alofa i a tatou taumafaiga e auauna atu i isi ma faataunuuina ai lo tatou faamoemoega o ni uso ma tuafafine o auaunaga. E mafai ai ona tatou tuu i tatou lava i seevae o se isi tagata.

Savali i Seevae o le Isi Tagata

O le tala o loo faamatalaina ai se alii o le Au Paia o Aso e Gata Ai e matamuli ma e masani ona nofo na o ia lava i le nofoa i tua o le falesa. Ina ua maliiu faafuasei se tasi o le korama a toeaina, na tuuina atu e le epikopo se faamanuiaga faaleperisitua e faamafanafana ai i aiga o le ua maliu. Na auina mai e tuafafine o le Aualofa taumafa. Sa asiasi mai uo ma tuaoi lelei i le aiga ma faapea mai, “Faailoa mai pe afai o i ai se mea e mafai ona matou faia e fesoasoani atu ai.”

Ae ina ua asiasi atu lenei alii matamuli i le aiga i lena ituaso, sa ia oomi le logo o le faitotoa ma ina ua tali mai le tina ua maliu lana tane, sa ia faapea atu, “Ua ou sau e faamama a outou seevae.” I le lua o itula, sa faamamaina uma ai seevae o le aiga atoa ma faaiila e saunia ai mo le falelauasiga. I le Aso Sa na sosoo ai na nonofo ai le aiga o le ua maliu i tafatafa o le alii matamuli i le nofoa i tua.

O lenei alii sa mafai ona ia faataunuuina se manaoga sa le mafai ona faamalieina. Sa faamanuiaina le aiga ma le alii lenei e ala i le auaunaga e taitaiina e le tiga alofa.

E Faapefea Ona Faagaoioi Le Tiga Alofa?

I le silia ma le 30 tausaga ua mavae, ua faatupulaia ai le toatele o tagata suesue ua suesueina le tiga alofa. A o sailia e le tele o tagata le mataupu e faaaoga ai auala eseese, o le toatele o i latou ua malilie o le tiga alofa o se mea e mafai ona aoaoina.²

Ina ia faaleleia atili ai lo tatou tomai e tiga alofa ai, e fesoasoani le i ai o le malamalamaaga sili i le auala e faagaioia ai le tiga alofa. O fautuaga o mulimuli mai ua talia i se tulaga aotele e avea o elemene faavae o le tiga alofa.³ E ui o nei mea e masani ona tutupu e aunoa ma lo tatou manatu o loo tutupu, o lo tatou iloa e maua ai lo tatou malamalama e vaai ai i avanoa e faaleleia ai.

1. Malamalama

O le tiga alofa e manaomia ai se malamalamaaga o le tulaga o le isi tagata. O le lelei ona e malamalama i o latou tulaga, o le a faigofie ai foi ona malamalama i o latou lagona e tusa ai ma ia tulaga ma mea tou te faia e fesoasoani ai.

O le faalogo ma le totoa, fai ni fesili, ma fautua ma i latou ma isi o ni gaioioiga taua ia mo le malamalamaaga i o latou tulaga. E mafai ona e aoao atili i nei mataupu i muai tusiga e faatatau i Mataupu Faavae mo le Auaunaga:

• “O Mea e Lima e Fai e Tagata e Faalogo Lelei,” Liahona, Iuni 2018, 6.

• “Fautua e uiga i o Latou Manaoga,” Liahona, Sete. 2016, 6.

• “Faaauai Isi i le Auaunaga—pe a Manaomia,” Liahona,Oke. 2018, 6.

A o tatou saili e malamalama, e tatau ona tatou faaavanoa a tatou taimi e malamalama ai ia latou tulaga patino nai loo le faia o ni taumatematega e faatatau i se isi na i ai se aafiaga faapea. A leai, atonu tatou te misia le faailoga ma tuua i latou ma le lagona e le malamalama.

2. Manatunatu

A o afio ifo le Faaola i se ala toilalo i mea uma ina ia Ia tausia ai i tatou, sa le mafai ona tatou iloa aafiaga taitasi o loo i ai i se isi tagata. Ma le isi, o le tuu o i tatou lava i seevae o se isi e faigofie mo nisi o i tatou ae le o isi.

I lo tatou taumafai e tausia la tatou feagaiga e faanoanoa faatasi ma e ua faanoanoa ma faamafanafana i e ua tatau i ai le faamafanafanaga (tagai Mosaea 18:9), e mafai foi ona tatou tatalo mo le Agaga Paia e fesoasoani mai ina ia tatou malamalama i lagona ua oo i se tasi ma le auala tatou te fesoasoani ai.⁴

Ae ui i lea, o le taimi lava tatou te malamalama ai i tulaga o se tasi, o i tatou taitoatasi—pe tupu faalenatura pe leai—o le a manatunatu i o tatou mafaufau ma lagona pe afai ua tatou i ai i o latou tulaga. Ao tatou faia o lea, e mafai ona tatou faaaoga o tatou lava manatu ma lagona e fesoasoani e taitaiina la tatou tali atu.

A o tatou malamalama i tulaga o se isi tagata ma manatu ane poo a o tatou lagona i o latou tulaga, e taua lo tatou faaeteete la tatou faamasinoga mo i latou (tagai Mataio 7:1). O lo tatou faamasino i le mafuaaga na oo ai lena tagata i lea tulaga e mafai ona taitaiina atu ai i tatou e faamamaina le tiga ua oo mai ona o le tulaga.

3. Tali Atu

E taua le auala tatou te tali atu ai aua o le ala lea e faailoa atu ai lo tatou tiga alofa. E le mafaitaulia auala e fesootai ai o tatou malamalamaaga i upu e tautala ai pe faatino foi i isi auala. E taua ona manatua o lo tatou sini e le faapea o le faaleleia o le faafitauli. E masani o le sini o le siitia ae ma le faamalosia e ala i le faailoa atu ia i latou e le o tuuatoatasi i latou. E mafai ona faauigaina lenei saunoaga, “Ua ou fiafia lava ua e ta’u mai” po o “Ua ou faanoanoa lava. Ou te iloa le uiga o lena mea” po o le “Ua tiga lena.”

I tulaga taitasi uma o la tatou tali atu e le mafai ona avea ua na o se ata faataitai, e ao lava o se mea moni. Ma pe a talafeagai, o le vaivai e iloa ai e le isi ia lo oe lava vaivaiga ma le le mautonu e avea ma auala e maua ai se lagona fesootai taua.

Valaaulia e Faatino

A o e mafaufau i tulaga o i latou e te auauna atu i ai, manatunatu pe a faapea ua e i ai i o latou tulaga. Tatalo ina ia malamalama i o latou lagona ma mea o le a sili ona fesoasoani pe afai o loo e i ai i o latou seevae. Atonu e faigofie lau tali atu, ae o le a aoga.

Faamatalaga

1. Tagai foi W. Ickes, Empathic Accuracy (1997); and M. L. Hoffman, Empathy and Moral Development: Implications for Caring and Justice (2000).

2. Tagai, mo se faataitaiga, Emily Teding van Berkhout and John M. Malouff, “The Efficacy of Empathy Training: A Meta-Analysis of Randomized Controlled Trials,” Journal of Counseling Psychology (2016), 63(1), 32–41.

3. Tagai, mo se faataitaiga, Brené Brown, I Thought It Was Just Me (But It Isn’t) (2008); Theresa Wiseman, “A Concept Analysis of Empathy,” Journal of Advanced Nursing (1996), 23, 1162–67; and Ed Neukrug and others, “Creative and Novel Approaches to Empathy: a Neo-Rogerian Perspective,” Journal of Mental Health Counseling, 35(1) (Jan. 2013), 29–42.

4. Tagai Henry B. Eyring, “O Le Faamafanafana,” Liahona, Me 2015, 17–21.

O tala “O Mataupu Faavae o le Auaunaga” ua faamoemoe e fesoasoani ia i tatou e aoao e fetausia’i ai le tasi ma le isi—ae aua ne’i faasoaina atu o se savali i le taimi o asiasiga. A o tatou iloaina i latou tatou te auauna atu i ai, o le a uunaia i tatou e le Agaga Paia ia iloa po o le a le savali latou te ono manaomiaina e faaopoopo atu i la tatou tausiga ma le agaalofa.

Sa Auauna Atu Iesu Keriso ma le Tiga Alofa

Ina ua faaali atu le Faaola i Sa Nifae, na Ia aoao ai latou seia ona Ia silafia e faapea, i lo latou tulaga o iai nei, ua latou le malamalama i mea uma sa Ia aoao atu ai i latou. Ae sa Ia silafia foi sa le mananao i latou e afio ese o Ia.

Na Ia tali atu e ala lea i le suia mai le aoao atu o i latou e ala i le faamalamalamaina o le talalelei i le auauna atu i o latou manaoga faaletino—ma valaau atu ia latou auina mai i luma o e o loo mamai, vaepio, tauaso, poo faamanualia. Na Ia faamalolo i latou. Ona ia tatalo lea mo i latou ma auauna atu i a latou fanau, ma faaaoga le taimi ma i latou taitoatasi ma faamanuia ia i latou.

O le a se mea e mafai ona tatou aoaoina mai i faataitaiga a le Faaola o le tiga alofa i le auaunaga i Sa Nifae?