O Le Vavega o le Iai i le Feagaiga
Saunia e Elder Gerrit W. Gong
O Le Korama a Aposetolo e Toasefululua
Mai se saunoaga i le Brigham Young University Women’s Conference, “Faamalosi o le Tasi i le Isi i le Alii,” sa fofogaina atu i le aso 4 o Me, 2018.
O le feauga lelei o a tatou feagaiga ma le Togiola a Iesu Keriso e faalogoina i fatuga ma pesega e faalagolago i le Togiola a le Faaola e fesoasoani tatou te faamalieina ai a tatou feagaiga i se auala fou ma le paia.
I le aoga o le olaga faaletino, e valaauina e le Alii i tatou e aoao ma ola i auala e faavavau e ala i le alofa ia te Ia muamua ma le faamalosia o le tasi ma le isi i Lona alofa.
O le faamalosia o le tasi ma le isi i le Alii ma Lona alofa o loo i le poloaiga sili muamua ma le lona lua. E pei ona aoao mai e le tusi a le Au Peresitene Sili, “O le auaunaga a le Faaola o loo faaalia mai ai ia poloaiga sili e lua: ‘E te alofa atu i le Alii lou Atua ma lou loto atoa, ma lou agaga atoa, ma lou manatu atoa’ ma ‘E te alofa atu i lē lua te tuaoi, ia pei o oe lava ia te oe’ (Mataio 22:37, 39).” Na faaauau mai le tusi a le Au Peresitene Sili: “I lena agaga, sa aoao mai foi Iesu, ‘O outou ia o e ua ou filifilia e auauna atu i lenei nuu.’ (3 Nifae 13:25).”1
O le pese o le alofa togiola a lo tatou Faaola toetu ua faamanatu ai le ogatasi o feagaiga, e fesootai ai i tatou i le Atua ma i le tasi ma le isi; ma le Togiola a Iesu Keriso, lea ua fesoasoani e tuu ese ai le tagata ma le tamaitai o le lalolagi ae ua’i atu i “galuega alofa a le Agaga Paia” (Mosaea 3:19).
O lena ogatasi ua faailoa mai i le ata o le fiafia, ua tatou aoao ma ola ai i le faia i aso uma o filifiliga o tiute faitalia o tagata taitasi ma ua le tuua ai i tatou e faasevasevaloaina o i tatou lava ae ua i ai le ala o le feagaiga ma le meaalofa o le Agaga Paia. Alefa ma le Omeka (tagai MF&F 61:1), o le Alii o Iesu Keriso, o loo i ai faatasi ma i tatou mai le amataga. Ma e i ai o Ia ma i tatou i le iuga, pe a “soloia ese e le Atua loimata uma mai o tatou mata” (Faaaliga 7:17), sei vagana o tatou loimata o le olioli.
O a tatou feagaiga e fesootai ai i tatou i le Atua ma i isi. O lona uiga ina ia faavavau, o a tatou feagaiga e aofia ai le Atua lo tatou Tama e Faavavau ma Lona Alo, o Iesu Keriso. O feagaiga e faavavau e aumai ai le mana o le alofa o le Atua—e maua ai le faamoemoe ma le alofa faateleina; ina ia siitia ma suia; ia faagaeetia ma faapaiaina; ia togiolaina ma faaeaina.
I le faaaliga o lo tatou lava moni ma le faavavau e ala ia tatou feagaiga ma le Atua, ua tatou aoao e iloa ma alofa i o tatou uso ma tuafafine e pei ona Ia faia. O lenei alofa ma le malamalama loloto e valaaulia, faamalosia ma faapaiaina i tatou ia iloa ma i o tatou lava ala, e avea atili ai e faapei o Ia.
Feagaiga ma le Togiola a le Alii
O le feauga lelei o a tatou feagaiga ma le Togiola a Iesu Keriso e faalogoina i fatuga ma pesega e faalagolago i le Togiola a le Faaola e fesoasoani tatou te faamalieina ai a tatou feagaiga i se auala fou ma le paia. I le tuufaatasiga, o a tatou feagaiga ma le Togiola a lo tatou Faaola e mafai ona faatulaga mea ua tatou manaomia, vaai, ma aafia i le soifuaga faaletino o aso uma, ma saunia ai i tatou mo le mafutaga o le lagi (tagai MF&F 130:2).
E ala i le Togiola a Iesu Keriso, ua tatou maua le faatuatua, malosi, ma le talitonuga e o mai ai ia Keriso, ma le iloa o le atoatoaga ua ia te Ia. O lenei iloa ua ofoina mai ai le solaese mai le taaviliga moomia pea o le atoatoa. Atonu e i ai se moni i le pese “Tuu ai pea e alu”2 afai e “tuu ai pea e alu” e faauiga o le “tuu e alu” o le tulaga faalelalolagi a le tagata lava ia e le mafai lava ona faamalieina ae a faauiga foi “taofi i ai” i le faamoemoe faalelagi mai le Atua ma le folafolaga ua ofoina mai e le Alii.
Ua e iloa o sauniga taitasi e valaauina ai i tatou i o tatou igoa ma fesootai i tatou e o tatou igoa i le suafa o Iesu Keriso?
O sauniga e tulaga aoao ma patino (taitasi) i le taimi e tasi. I ni tausaga ua mavae, i le avea ai ma fautua maualuga e gafa ma papatisoga a le siteki, sa ou iloa ai o sauniga o le papatisoga e laugatasi ai le faatinoga i tagata taitasi ae patino lava i le tulaga o tagata taitasi e papatisoina e valaau, taitoatasi, i o latou igoa, ma o latou igoa sa fesootai e ala i feagaiga i le “suafa o le Tama, ma le Alo, ma le Agaga Paia” (3 Nifae 11:25),
E uiga ese le alofa tunoa i lona tulaga aoao ma le tulaga ese e faapei o lo tatou Faaola lava Ia. O le Tamai Mamoe e le pona, sa Ia faatulagaina le mamanu i le papatisoina ina ia faataunuuina ai le amiotonu uma (tagai 2 Nifae 31:6). E taua i tusitusiga paia, ma e aoao atu e o tatou faifeautalai, “le mataupu faavae a Keriso” (2 Nifae 31:21; tagai foi 3 Nifae 11:38–40). O le mataupu a Keriso e aofia ai “le mulimuli i faataitaiga a Iesu Keriso e ala i le papatisoina e se tagata o umia le pule o le perisitua a le Atua.”3
Tatou te ulufale atu i le faitotoa o le salamo ma le papatisoga i le vai, “ona oo mai ai lea o se faamagaloga o a outou agasala i le afi ma i le Agaga Paia.” (2 Nifae 31:17). O le ala sao ma le vaapiapi--o le ala o le feagaiga--e taitai atu ai i le ola e faavavai (tagai 2 Nifae 31:18). O se vaega o le auala e faamalosia ai i tatou taitoatasi i Lona alofa.
O a tatou feagaiga ma le Togiola a Iesu Keriso e fesootai foi i isi ala.
O le i ai i se Feagaiga
E ala i feagaiga paia, tatou te i ai i le Atua ma i isi. O le i ai i se feagaiga o se vavega. E le o se mea e patino i se tagata. “E faapei o le alofa mama, e “onosai, ma agamalu,” ma e “le losilosi; … e le mitamitavale, e le faafefeteina” (1 Korinito 13:4; tagai foi Moronae 7:45). O le i ai i se feagaiga e maua ai a’a ma apa’au. E tuusaoloto e ala i le tuuto. E faateleina e ala i le alofa.
I le i ai i se feagaiga, tatou te faamalosia o le tasi i le isi i le alofa o le Faaola, e mafai ai ona faateleina le alofa i le Atua ma isi. E tupu lenei mea aua o le i ai i se feagaiga “e le sailia e ia ana lava mea, e le faaitaitagofie, e le tuuina atu i nisi le leaga” (1 Korinito 13:5). O le i ai i se Feagaiga “e le fiafia i le amio leaga, a e fiafia i le faamaoni” (1 Korinito 13:6). O le i ai i se feagaiga o le sau ma vaai faafesagai, o le iloatino e pei ona iloatinoina ai o i tatou (tagai 1 Korinito 13:12). O lo tatou faatuatua i feagaiga e tutumau ma le le mafaagaaeetia (tagai Mosaea 5:15; Alema 1:25).
O le i ai i se Feagaiga o le faamoemoe i mea uma, onosai i mea uma, ma “faamoemoe o le a mafai ona onosai i mea uma” (tagai Mataupu Faavae o le Faatuatua 1:13; tagai foi 1 Korinito 13:7; Moronae 7:45). O le i ai i se feagaiga o le tausia o le faatuatua. E le o le musu ia i tatou lava, o le tasi i le isi, po o le Atua.
O le i ai i se feagaiga o le fiafia faatasi ma e fiafia ma olioli ma i latou ua iai le mafuaaga e olioli ai, ma tutu o ni molimau i le alofa mutimutivale ma vavega o aso uma a le Atua i aso uma, ma mea uma, atoa ma nuu uma.” (tagai Mosaea 18:8–9).
O le i ai i le Atua ma i isi i le iai i se feagaiga o le ataata i nofoaga e le faamoemoeina a o tatou vaai i mata e vaai ai ma faalogo i taliga e faalogo ai. Ua ia suia i tatou ma o tatou fesootaiga—e aofia ai a tatou feagaiga o le faaipoipoga—ina ia avea atili e faaeaina ma paia.
I se tasi o vasega o sootaga i le faaipoipoga, na sii ai le lima o se tamaitai o le vasega ua faaipoipo ma faapea atu i le faiaoga, “Faamolemole lava, o loo e fai mai pea lava o le faaipoipoga e faigata. E le o le faaipoipoga e faigata ae o le olaga e faigata, ma o le faaipoipoga, i ona tulaga luga ma lalo, e mafai ona avea o se faamanuiaga tatou te feagai ai ma le olioli ma luitau faatasi o le olaga.”
E ui o le faaipoipoga e faavavau o lo tatou manatu, le faamaoni, faatautala eseese, ma le anoanoai o feeseeseaiga ua alagatatau ai gaoioiga vave e puipuia ai poo le nonofo eseese ma atonu e oo lava ina tete’a ai faaletulafono. Tatou te iloa o feagaiga e faamauina ma faavavau e ala i le maliega faatasi a itu e aafia ai ma pe a faamaonia e le faaaliga alofa faalelagi o le Agaga Paia, ua faamatala mai i tusitusiga paia o “le Agaga Paia o le folafolaga” (MF&F 88:3).
O loo i ai le mafanafana, filemu, ma le faamoemoe i le faamaoniga a le Alii e faapea o tagata agavaa taitasi o le a maua faamanuiaga folafolaina uma.4 O se vaega o Lana folafolaga o le faamalosia lea o i tatou taitasi i Lona alofa, i Lana ala, ma i Lona taimi (tagai MF&F 88:68).
“O Ie Ala e Faia ai le Auaunaga”
A o avea au ma se epikopo talavou, sa aoaoina au e se mea na tupu i la matou uarota e uiga i le iai i se feagaiga e pei ona faailoa mai i le faamalosia o le tasi ma le isi i le alofa o le Faaola. O aiga o le uarota o Hans ma Fay Ritter ma Larry ma Tina O’Connor, faatasi ai ma isi aiga ofoofogia, sa auauna atu pea lava pea i isi ma e sa alofagia e tagata uma.
I se tasi aso na fesili mai ai la matou peresitene o le siteki pe mafai ona ou siaki atu i le aiga o Ritter. Ina ua ou taunuu i lo latou aiga, sa ou iloa ai ni omoomo i le fola ma se titata sa faaaogaina soo.
“Epikopo, e faapenei,” na fai mai ai le uso ia Ritter. “E mama la matou vai vevela, ma e tafe mai le vai vevela i le fola o le fale. E o mai iniseti laiti o le ane. O le mafuaaga lena o le omoomo laitiiti o le fola. Sa matou tape le vai vevela, ma o le ala lena o le tunu o le suavai i le titata.”
Na malilie le aiga o Ritter oute talanoaina lo latou tulaga ma le matou aufono a le uarota. Sa uigaese la matou aufono a le uarota. Na iloa e tagata o le uarota nisi e mafai ona fesoasoani i le fola poo le puipui poo le kapeta ma mea e faaaoga, poo le vali. Sa ofoina mai e tagata o latou taimi ma fesoasoani ai i le tele o auala alofa. O nisi o i latou na i ai Larry O’Connor, o se faufale agavaa o le sa i ai pea lava pea i le fale o Ritter.
Na manatua e Tina le toalua o Larry e faapea o Larry ma isi uso o le korama i nisi o taimi e o atu i le fale o Ritter i le Aso Faraile ma nonofo ai i le po atoa. “I se tasi taeao o se Aso Toonai, sa ou auina atu ia i latou se taumafataga o le taeao,: na ia faapea mai ai. “O Larry le la o loo sau mai le fale taele ma uu mai ia meafaigaluega palama.”
Na faaopoopo mai Tina e faapea o alii e pei o Hans Ritter ma isi “na aoao mai ai lo’u toalua ia avea ma se tane--agalelei, mafaufau, ma agamalu. A o auauna atu lou toalua o Larry faatasi ma ni alii lelei, e aofia ai ma le vasega a tamaiti laiti, ua atili ona avea ai o ia ma se tane ma tama ofoofogia.”
Ina ua maea le galuega o le fale, sa matou olioli faatasi.
E i ai se taimi na toesea ai Hans ma Fay Ritter, ae sa ou talanoa i se taimi lata mai ma le toalua o o laua atalii, o Ben ma Stephen. Na manatua e i laua o le auaunaga le leoa a isi sa faatumauina ai le mamalu o lo laua tama, o le na galue e aunoa ma se faavaivai e tausia lona aiga.
A o i ai i se gaoioiga a le uarota ao lei mamao ona maea le fale o Ritter, na maua ai e Larry ma Tina O’Connor se tala faafuasei ua mu lo laua fale. Sa laua faatopetope atu i lo la aiga ma iloa ai faamalama taei ua salalau solo (i asu) ma puipui pupu (e siaki ai afi ua le iloa atu).
“Sa lofituina i ma’ua,” sa fai mai ai Tina. Ae o lea na o mai le uarota.
“Sa fesoasoani tagata uma,” na fai mai ai Tina ma Larry. “Na o mai faatasi le uarota i le alofa. Sa matou i ai iina o se aiga.”
Ma e o ai na muamua o mai ae na mulimuli ona o ese a o fausia le fale o O’Connor? Ioe, o le aiga o Hans ma Fay Ritter.
Na lotomaulalo Ben ma Stephen ae na manatua lo latou aiga na o mai e fesoasoani i le au O’Connors. “Sa matou i ai faatasi uma iina,” na la fai mai ai. “O le auala lena e faatino ai le auaunaga.” Tatou te tausi uma lava o le tasi i le isi, o nisi o taimi e fesoasoani ai i isi ma o nisi o taimi e ala i le tuuina atu o le avanoa i isi e auauna mai ia i tatou.”
Ia te au, e mafai ona avea o se lio maoae, mama, ma le ogatasi a o tatou faamalosi o le tasi i le isi i le alofa o le Faaola. Ua fesoasoani le aiga o O’Connors i le aiga o Ritters, ua fesoasoani le aiga o Ritters i le aiga o O’Connors, ma a o faia o lea o loo atinaeina ai se nuu o le Au Paia o Aso e Gata Ai. I aso taitasi i le tele o auala, e manao i tatou taitoatasi, ma e mafai ona ofo atu, auaunaga alofa ma le lagolagoina i auala laiti, faigofie, mamana, ma e suia ai olaga.
Ma o lea, ua tatou iloa ai le vavega o falaoa e lua ma i’a: muamua, o se nuu o le Au Paia e mafai ona o mai faatasi i le agaga tuufaatasi e foia se manaoga maoae; ma le lua, i le taimi lava e tasi, o se faatasiga o le Au Paia e mafai ona sui faatasi i le alofa i aso uma, alofa i le auaunaga i le tele o tulaga filemu—e pei ona i ai i se aiga, paranesi, uarota, poo le nuu i le tele o tausaga --e tutoatasi mai soo se manaoga maoae.
Faamalosia i le Alofa o le Faaola
O nei mea uma e toe aumaia i tatou i le mea na tatou amata mai ai--o le poloaiga silisili muamua ma le lua ma le valaaulia ia faamalosia ma le faamalosia o le tasi i le isi i le alofa o le Alii.
Na saunoa mai ma le mana Peresitene Russell M. Nelson e faapea, “O la tatou savali i le lalolagi e faigofie ma faamaoni: tatou te valaauliaina fanau uma a le Atua i itu uma e lua o le veli ia o mai i lo latou Faaola, maua faamanuiaga o le malumalu paia, maua le olioli tumau, ma agavaa mo le ola e faavavau.”5
A o tatou fiafia i le upu o Keriso (tagai 2 Nifae 32:3) ma faamuamua le Atua (tagai Mataio 6:33), e faamalosia ma faamanuia e le Alii tulaga uma o lo tatou olaga. E i ai le ogatasi paia ma le loloto o le i ai i se feagaiga a o faamalosia i tatou i le alofa o le Alii ma a o tatou faamalosia le tasi ma le isi ia te Ia.
O upu a le Aposetolo o Paulo e faaleoa mai le ogatasi o a tatou feagaiga ma le Togiola a le Alii o Iesu Keriso:
“O ai se na te vavaeeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lē lavalavā, po o le pagatia, po o le pelu? …
“Aua ua ou mautinoa, e le mafai e le oti, po o le ola, po o agelu, po o alii, po o e malolosi, po o mea i nei ona po, po o mea atali,
“Po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii” (Roma 8:35, 38–39).
O lau foi lea molimau paia.
Oute molimau o le Atua lo tatou Tama Faalelagi ma Lona Alo, o Iesu Keriso. La te iloa lelei i tatou ma alofa atili ia i tatou nai lo tatou iloa poo le alofa e i tatou lava. Tatou te faatuatua ia Ieova ma o tatou loto atoa a e aua le faalagolago i lo tatou lava atamai (tagai Faataoto 3:5).
I le 159 malumalu o le Alii i atunuu e 43, e mafai ona faamalosia i tatou i le Alii e ala ia tatou feagaiga ma le Togiola a Iesu Keriso.
Ua faamanuiaina i tatou e le pule o le perisitua ma faaaliga faaperofeta pea lava pea mai le Perofeta o Iosefa Samita e oo mai i lo tatou Peresitene pele o Nelson i le aso. O mea o tutupu i ni nai aso ua tuanai ua mafai ai ona atili ou mautinoa, ma faalotomaualaloina ai, i le moni o aoaoga faavae toefuataiina, o ki, sauniga, ma feagaiga i le Ekalesia a Iesu Keriso o le Au Paia o Aso e Gata Ai o le “malo o le Alii ua toefaatuina i luga o le lalolagi, e saunia ai mo le afio mai faalua o le Mesia.”6
O Le Tusi a Mamona: O Se Tasi Molimau ia Iesu Keriso ma tusitusiga paia uma o afioga a le Atua.
Sei o tatou taitasi ona o mai e iloa atili lo tatou Faaola ma avea e faapei o Ia a o faamalosia i tatou i le Alii ma a o tatou faamalosia le tasi ma le isi ia te Ia ma Lona aofa.